໑. ປຐມສິກ຺ຂາປທໍ

໑໐໒໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂູ ຄາມກາວາເສ ເອກຈີວຣາ ຈີວຣກມ຺ມໍ ກໂຣນ຺ຕິ. ຠິກ຺ຂຸນິໂຍ ອນາປຸຈ຺ຉາ ອາຣາມໍ ປວິສິຕ຺ວາ ເຍນ ເຕ ຠິກ຺ຂູ ເຕນຸປສງ຺ກມິໍສຸ. ຠິກ຺ຂູ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອນາປຸຈ຺ຉາ ອາຣາມໍ ປວິສິສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ອນາປຸຈ຺ຉາ ອາຣາມໍ ປວິສນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ອນາປຸຈ຺ຉາ ອາຣາມໍ ປວິສິສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ຍາ ປນ ຠິກ຺ຂຸນີ ອນາປຸຈ຺ຉາ ອາຣາມໍ ປວິເສຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂຸນີນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໑໐໒໒. ເຕນ ໂຂ ປນ ສມເຍນ ເຕ ຠິກ຺ຂູ ຕມ຺ຫາ ອາວາສາ ປກ຺ກມິໍສຸ. ຠິກ຺ຂຸນິໂຍ – ‘‘ອຍ຺ຍາ ປກ຺ກນ຺ຕາ’’ຕິ, ອາຣາມໍ ນາຄມໍສຸ. ອຖ ໂຂ ເຕ ຠິກ຺ຂູ ປຸນເທວ ຕໍ ອາວາສໍ ປຈ຺ຈາຄຈ຺ຉິໍສຸ. ຠິກ຺ຂຸນິໂຍ – ‘‘ອຍ຺ຍາ ອາຄຕາ’’ຕິ, ອາປຸຈ຺ຉາ ອາຣາມໍ ປວິສິຕ຺ວາ ເຍນ ເຕ ຠິກ຺ຂູ ເຕນຸປສງ຺ກມິໍສຸ; ອຸປສງ຺ກມິຕ຺ວາ ເຕ ຠິກ຺ຂູ ອຠິວາເທຕ຺ວາ ເອກມນ຺ຕໍ ອຏ຺ຐໍສຸ. ເອກມນ຺ຕໍ ຐິຕາ ໂຂ ຕາ ຠິກ຺ຂຸນິໂຍ ເຕ ຠິກ຺ຂູ ເອຕທໂວຈຸໍ – ‘‘ກິສ຺ສ ຕຸມ຺ເຫ, ຠຄິນິໂຍ, ອາຣາມໍ ເນວ ສມ຺ມຊ຺ຊິຕ຺ຖ ນ ປານີຍໍ ປຣິໂຠຊນີຍໍ ອຸປຏ຺ຐາປິຕ຺ຖາຕິ? ຠຄວຕາ, ອຍ຺ຍາ, ສິກ຺ຂາປທໍ ປຎ຺ຎຕ຺ຕໍ [ປຎ຺ຎຕ຺ຕໍ ໂຫຕິ (ກ.)] ໂຫຕິ – ‘‘ນ ອນາປຸຈ຺ຉາ ອາຣາໂມ ປວິສິຕພ຺ໂພ’’ຕິ. ເຕນ ມຍໍ ນ ອາຄມິມ຺ຫາ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ສນ຺ຕໍ ຠິກ຺ຂຸໍ ອາປຸຈ຺ຉາ ອາຣາມໍ ປວິສິຕຸໍ. ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ຍາ ປນ ຠິກ຺ຂຸນີ ສນ຺ຕໍ ຠິກ຺ຂຸໍ ອນາປຸຈ຺ຉາ ອາຣາມໍ ປວິເສຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂຸນີນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໑໐໒໓. ເຕນ ໂຂ ປນ ສມເຍນ ເຕ ຠິກ຺ຂູ ຕມ຺ຫາ ອາວາສາ ປກ຺ກມິຕ຺ວາ ປຸນເທວ ຕໍ ອາວາສໍ ປຈ຺ຈາຄຈ຺ຉິໍສຸ. ຠິກ຺ຂຸນິໂຍ – ‘‘ອຍ຺ຍາ ປກ຺ກນ຺ຕາ’’ຕິ ອນາປຸຈ຺ຉາ ອາຣາມໍ ປວິສິໍສຸ. ຕາສໍ ກຸກ຺ກຸຈ຺ຈໍ ອໂຫສິ – ‘‘ຠຄວຕາ ສິກ຺ຂາປທໍ ປຎ຺ຎຕ຺ຕໍ – ‘ນ ສນ຺ຕໍ ຠິກ຺ຂຸໍ ອນາປຸຈ຺ຉາ ອາຣາໂມ ປວິສິຕພ຺ໂພ’ຕິ. ມຍຎ຺ຈມ຺ຫາ ສນ຺ຕໍ ຠິກ຺ຂຸໍ ອນາປຸຈ຺ຉາ ອາຣາມໍ ປວິສິມ຺ຫາ. ກຈ຺ຈິ ນຸ ໂຂ ມຍໍ ປາຈິຕ຺ຕິຍໍ ອາປຕ຺ຕິໍ ອາປນ຺ນາ’’ຕິ…ເປ… ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໐໒໔. ‘‘ຍາ ປນ ຠິກ຺ຂຸນີ ຊານໍ ສຠິກ຺ຂຸກໍ ອາຣາມໍ ອນາປຸຈ຺ຉາ ປວິເສຍ຺ຍ, ປາຈິຕ຺ຕິຍ’’ນ຺ຕິ.

໑໐໒໕. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຊານາຕິ ນາມ ສາມໍ ວາ ຊານາຕິ, ອຎ຺ເຎ ວາ ຕສ຺ສາ ອາໂຣເຈນ຺ຕິ, ເຕ ວາ ອາໂຣເຈນ຺ຕິ.

ສຠິກ຺ຂຸໂກ ນາມ ອາຣາໂມ ຍຕ຺ຖ ຠິກ຺ຂູ ຣຸກ຺ຂມູເລປິ ວສນ຺ຕິ.

ອນາປຸຈ຺ຉາ ອາຣາມໍ ປວິເສຍ຺ຍາຕິ ຠິກ຺ຂຸໍ ວາ ສາມເຓຣໍ ວາ ອາຣາມິກໍ ວາ ອນາປຸຈ຺ຉາ ປຣິກ຺ຂິຕ຺ຕສ຺ສ ອາຣາມສ຺ສ ປຣິກ຺ເຂປໍ ອຕິກ຺ກາເມນ຺ຕິຍາ ອາປຕ຺ຕິ ປາຈິຕ຺ຕິຍສ຺ສ. ອປຣິກ຺ຂິຕ຺ຕສ຺ສ ອາຣາມສ຺ສ ອຸປຈາຣໍ ໂອກ຺ກມນ຺ຕິຍາ ອາປຕ຺ຕິ ປາຈິຕ຺ຕິຍສ຺ສ.

໑໐໒໖. ສຠິກ຺ຂຸເກ ສຠິກ຺ຂຸກສຎ຺ຎາ ສນ຺ຕໍ ຠິກ຺ຂຸໍ ອນາປຸຈ຺ຉາ ອາຣາມໍ ປວິສຕິ, ອາປຕ຺ຕິ ປາຈິຕ຺ຕິຍສ຺ສ. ສຠິກ຺ຂຸເກ ເວມຕິກາ ສນ຺ຕໍ ຠິກ຺ຂຸໍ ອນາປຸຈ຺ຉາ ອາຣາມໍ ປວິສຕິ, ອາປຕ຺ຕິ ທຸກ຺ກຏສ຺ສ. ສຠິກ຺ຂຸເກ ອຠິກ຺ຂຸກສຎ຺ຎາ ສນ຺ຕໍ ຠິກ຺ຂຸໍ ອນາປຸຈ຺ຉາ ອາຣາມໍ ປວິສຕິ, ອນາປຕ຺ຕິ.

ອຠິກ຺ຂຸເກ ສຠິກ຺ຂຸກສຎ຺ຎາ, ອາປຕ຺ຕິ ທຸກ຺ກຏສ຺ສ. ອຠິກ຺ຂຸເກ ເວມຕິກາ, ອາປຕ຺ຕິ ທຸກ຺ກຏສ຺ສ. ອຠິກ຺ຂຸເກ ອຠິກ຺ຂຸກສຎ຺ຎາ, ອນາປຕ຺ຕິ.

໑໐໒໗. ອນາປຕ຺ຕິ ສນ຺ຕໍ ຠິກ຺ຂຸໍ ອາປຸຈ຺ຉາ ປວິສຕິ, ອສນ຺ຕໍ ຠິກ຺ຂຸໍ ອນາປຸຈ຺ຉາ ປວິສຕິ, ສີສານຸໂລກິກາ ຄຈ຺ຉຕິ, ຍຕ຺ຖ ຠິກ຺ຂຸນິໂຍ ສນ຺ນິປຕິຕາ ໂຫນ຺ຕິ ຕຕ຺ຖ ຄຈ຺ຉຕິ, ອາຣາເມນ ມຄ຺ໂຄ ໂຫຕິ, ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຐມສິກ຺ຂາປທໍ ນິຏ຺ຐິຕໍ.