໒. ທຸຕິຍສງ຺ຆາທິເສສສິກ຺ຂາປທໍ

໖໘໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ເວສາລິຍໍ ອຎ຺ຎຕຣສ຺ສ ລິຈ຺ຉວິສ຺ສ ປຊາປຕິ ອຕິຈາຣິນີ ໂຫຕິ. ອຖ ໂຂ ໂສ ລິຈ຺ຉວິ ຕໍ ອິຕ຺ຖິໍ ເອຕທໂວຈ – ‘‘ສາຘຸ ວິຣມາຫິ, ອນຕ຺ຖໍ ໂຂ ເຕ ກຣິສ຺ສາມີ’’ຕິ. ເອວມ຺ປິ ສາ ວຸຈ຺ຈມານາ ນາທິຍິ. ເຕນ ໂຂ ປນ ສມເຍນ ເວສາລິຍໍ ລິຈ຺ຉວິຄໂຓ ສນ຺ນິປຕິໂຕ ໂຫຕິ ເກນຈິເທວ ກຣຓີເຍນ. ອຖ ໂຂ ໂສ ລິຈ຺ຉວິ ເຕ ລິຈ຺ຉວໂຍ ເອຕທໂວຈ – ‘‘ເອກໍ ເມ, ອຍ຺ໂຍ, ອິຕ຺ຖິໍ ອນຸຊານາຖາ’’ຕິ. ‘‘ກາ ນາມ ສາ’’ຕິ? ‘‘ມຍ຺ຫໍ ປຊາປຕິ ອຕິຈຣຕິ, ຕໍ ຆາເຕສ຺ສາມີ’’ຕິ. ‘‘ຊານາຫີ’’ຕິ. ອສ຺ໂສສິ ໂຂ ສາ ອິຕ຺ຖີ – ‘‘ສາມິໂກ ກິຣ ມໍ ຆາເຕຕຸກາໂມ’’ຕິ. ວຣຠຓ຺ຑໍ ອາທາຍ ສາວຕ຺ຖິໍ ຄນ຺ຕ຺ວາ ຕິຕ຺ຖິເຍ ອຸປສງ຺ກມິຕ຺ວາ ປພ຺ພຊ຺ຊໍ ຍາຈິ. ຕິຕ຺ຖິຍາ ນ ອິຈ຺ຉິໍສຸ ປພ຺ພາເຊຕຸໍ. ຠິກ຺ຂຸນິໂຍ ອຸປສງ຺ກມິຕ຺ວາ ປພ຺ພຊ຺ຊໍ ຍາຈິ. ຠິກ຺ຂຸນິໂຍປິ ນ ອິຈ຺ຉິໍສຸ ປພ຺ພາເຊຕຸໍ. ຖຸລ຺ລນນ຺ທໍ ຠິກ຺ຂຸນິໍ ອຸປສງ຺ກມິຕ຺ວາ ຠຓ຺ຑກໍ ທສ຺ເສຕ຺ວາ ປພ຺ພຊ຺ຊໍ ຍາຈິ. ຖຸລ຺ລນນ຺ທາ ຠິກ຺ຂຸນີ ຠຓ຺ຑກໍ ຄເຫຕ຺ວາ ປພ຺ພາເຊສິ.

ອຖ ໂຂ ໂສ ລິຈ຺ຉວິ ຕໍ ອິຕ຺ຖິໍ ຄເວສນ຺ໂຕ ສາວຕ຺ຖິໍ ຄນ຺ຕ຺ວາ ຠິກ຺ຂຸນີສຸ ປພ຺ພຊິຕໍ ທິສ຺ວານ ເຍນ ຣາຊາ ປເສນທິ ໂກສໂລ ເຕນຸປສງ຺ກມິ; ອຸປສງ຺ກມິຕ຺ວາ ຣາຊານໍ ປເສນທິໍ ໂກສລໍ ເອຕທໂວຈ – ‘‘ປຊາປຕິ ເມ, ເທວ, ວຣຠຓ຺ຑໍ ອາທາຍ ສາວຕ຺ຖິໍ ອນຸປ຺ປຕ຺ຕາ. ຕໍ ເທໂວ ອນຸຊານາຕູ’’ຕິ. ‘‘ເຕນ ຫິ, ຠເຓ, ວິຈິນິຕ຺ວາ ອາຈິກ຺ຂາ’’ຕິ. ‘‘ທິຏ຺ຐາ, ເທວ, ຠິກ຺ຂຸນີສຸ ປພ຺ພຊິຕາ’’ຕິ. ‘‘ສເຈ, ຠເຓ, ຠິກ຺ຂຸນີສຸ ປພ຺ພຊິຕາ, ນ ສາ ລພ຺ຠາ ກິຎ຺ຈິ ກາຕຸໍ. ສ຺ວາກ຺ຂາໂຕ ຠຄວຕາ ຘມ຺ໂມ, ຈຣຕຸ ພ຺ຣຫ຺ມຈຣິຍໍ ສມ຺ມາ ທຸກ຺ຂສ຺ສ ອນ຺ຕກິຣິຍາຍາ’’ຕິ. ອຖ ໂຂ ໂສ ລິຈ຺ຉວິ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ໂຈຣິໍ ປພ຺ພາເຊສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ຕສ຺ສ ລິຈ຺ຉວິສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ໂຈຣິໍ ປພ຺ພາເຊສ຺ສຕີ’’ຕິ! ອຖ ໂຂ ຕາ ຠິກ຺ຂຸນິໂຍ ຠິກ຺ຂູນໍ ເອຕມຕ຺ຖໍ ອາໂຣເຈສຸໍ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ໂຈຣິໍ ປພ຺ພາເຊຕີຕິ [ປພ຺ພາເຊສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ໂຈຣິໍ ປພ຺ພາເຊສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໖໘໓. ‘‘ຍາ ປນ ຠິກ຺ຂຸນີ ຊານໍ ໂຈຣິໍ ວຊ຺ຌໍ ວິທິຕໍ ອນປໂລເກຕ຺ວາ ຣາຊານໍ ວາ ສງ຺ຆໍ ວາ ຄຓໍ ວາ ປູຄໍ ວາ ເສຓິໍ ວາ ອຎ຺ຎຕ຺ຣ ກປ຺ປາ ວຸຏ຺ຐາເປຍ຺ຍ, ອຍມ຺ປິ ຠິກ຺ຂຸນີ ປຐມາປຕ຺ຕິກໍ ຘມ຺ມໍ ອາປນ຺ນາ ນິສ຺ສາຣຓີຍໍ ສງ຺ຆາທິເສສ’’ນ຺ຕິ.

໖໘໔. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຊານາຕິ ນາມ ສາມໍ ວາ ຊານາຕິ ອຎ຺ເຎ ວາ ຕສ຺ສາ ອາໂຣເຈນ຺ຕິ, ສາ ວາ ອາໂຣເຈຕິ.

ໂຈຣີ ນາມ ຍາ ປຎ຺ຈມາສກໍ ວາ ອຕິເຣກປຎ຺ຈມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ເອສາ ໂຈຣີ ນາມ.

ວຊ຺ຌາ ນາມ ຍໍ ກຕ຺ວາ ວຊ຺ຌປ຺ປຕ຺ຕາ ໂຫຕິ.

ວິທິຕາ ນາມ ອຎ຺ເຎຫິ ມນຸສ຺ເສຫິ ຎາຕາ ໂຫຕິ ‘‘ວຊ຺ຌາ ເອສາ’’ຕິ.

ອນປໂລເກຕ຺ວາຕິ ອນາປຸຈ຺ຉາ.

ຣາຊາ ນາມ ຍຕ຺ຖ ຣາຊາ ອນຸສາສຕິ, ຣາຊາ ອປໂລເກຕພ຺ໂພ.

ສງ຺ໂຆ ນາມ ຠິກ຺ຂຸນິສງ຺ໂຆ ວຸຈ຺ຈຕິ, ຠິກ຺ຂຸນິສງ຺ໂຆ ອປໂລເກຕພ຺ໂພ.

ຄໂຓ ນາມ ຍຕ຺ຖ ຄໂຓ ອນຸສາສຕິ, ຄໂຓ ອປໂລເກຕພ຺ໂພ.

ປູໂຄ ນາມ ຍຕ຺ຖ ປູໂຄ ອນຸສາສຕິ, ປູໂຄ ອປໂລເກຕພ຺ໂພ.

ເສຓິ ນາມ ຍຕ຺ຖ ເສຓິ ອນຸສາສຕິ, ເສຓິ ອປໂລເກຕພ຺ໂພ.

ອຎ຺ຎຕ຺ຣ ກປ຺ປາຕິ ຐເປຕ຺ວາ ກປ຺ປໍ. ກປ຺ປໍ ນາມ ທ຺ເວ ກປ຺ປານິ – ຕິຕ຺ຖິເຍສຸ ວາ ປພ຺ພຊິຕາ ໂຫຕິ ອຎ຺ຎາສຸ ວາ ຠິກ຺ຂຸນີສຸ ປພ຺ພຊິຕາ. ອຎ຺ຎຕ຺ຣ ກປ຺ປາ ‘‘ວຸຏ຺ຐາເປສ຺ສາມີ’’ຕິ ຄຓໍ ວາ ອາຈຣິນິໍ ວາ ປຕ຺ຕໍ ວາ ຈີວຣໍ ວາ ປຣິເຍສຕິ, ສີມໍ ວາ ສມ຺ມນ຺ນຕິ, ອາປຕ຺ຕິ ທຸກ຺ກຏສ຺ສ. ຎຕ຺ຕິຍາ ທຸກ຺ກຏໍ. ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ. ກມ຺ມວາຈາປຣິໂຍສາເນ ອຸປຊ຺ຌາຍາຍ ອາປຕ຺ຕິ ສງ຺ຆາທິເສສສ຺ສ. ຄຓສ຺ສ ຈ ອາຈຣິນິຍາ ຈ ອາປຕ຺ຕິ ທຸກ຺ກຏສ຺ສ.

ອຍມ຺ປີຕິ ປຸຣິມໍ ອຸປາທາຍ ວຸຈ຺ຈຕິ.

ປຐມາປຕ຺ຕິກນ຺ຕິ ສຫ ວຕ຺ຖຸຊ຺ຌາຈາຣາ ອາປຊ຺ຊຕິ ອສມນຸຠາສນາຍ.

ນິສ຺ສາຣຓີຍນ຺ຕິ ສງ຺ຆມ຺ຫາ ນິສ຺ສາຣີຍຕິ.

ສງ຺ຆາທິເສສນ຺ຕິ…ເປ… ເຕນປິ ວຸຈ຺ຈຕິ ສງ຺ຆາທິເສໂສຕິ.

໖໘໕. ໂຈຣິຍາ ໂຈຣິສຎ຺ຎາ ອຎ຺ຎຕ຺ຣ ກປ຺ປາ ວຸຏ຺ຐາເປຕິ, ອາປຕ຺ຕິ ສງ຺ຆາທິເສສສ຺ສ. ໂຈຣິຍາ ເວມຕິກາ ອຎ຺ຎຕ຺ຣ ກປ຺ປາ ວຸຏ຺ຐາເປຕິ, ອາປຕ຺ຕິ ທຸກ຺ກຏສ຺ສ. ໂຈຣິຍາ ອໂຈຣິສຎ຺ຎາ ອຎ຺ຎຕ຺ຣ ກປ຺ປາ ວຸຏ຺ຐາເປຕິ, ອນາປຕ຺ຕິ. ອໂຈຣິຍາ ໂຈຣິສຎ຺ຎາ, ອາປຕ຺ຕິ ທຸກ຺ກຏສ຺ສ. ອໂຈຣິຍາ ເວມຕິກາ, ອາປຕ຺ຕິ ທຸກ຺ກຏສ຺ສ. ອໂຈຣິຍາ ອໂຈຣິສຎ຺ຎາ, ອນາປຕ຺ຕິ.

໖໘໖. ອນາປຕ຺ຕິ ອຊານນ຺ຕີ ວຸຏ຺ຐາເປຕິ, ອປໂລເກຕ຺ວາ ວຸຏ຺ຐາເປຕິ, ກປ຺ປກຕໍ ວຸຏ຺ຐາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທຸຕິຍສງ຺ຆາທິເສສສິກ຺ຂາປທໍ ນິຏ຺ຐິຕໍ.