໓. ຕຕິຍສງ຺ຆາທິເສສສິກ຺ຂາປທໍ

໖໘໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠທ຺ທາຍ ກາປິລານິຍາ ອນ຺ເຕວາສິນີ ຠິກ຺ຂຸນີ ຠິກ຺ຂຸນີຫິ ສທ຺ຘິໍ ຠຓ຺ຑິຕ຺ວາ ຄາມກໍ [ຄາມເກ (ສ຺ຍາ.)] ຎາຕິກຸລໍ ອຄມາສິ. ຠທ຺ທາ ກາປິລານີ ຕໍ ຠິກ຺ຂຸນິໍ ອປສ຺ສນ຺ຕີ ຠິກ຺ຂຸນິໂຍ ປຸຈ຺ຉິ – ‘‘ກຫໍ ອິຕ຺ຖນ຺ນາມາ, ນ ທິສ຺ສຕີ’’ຕິ! ‘‘ຠິກ຺ຂຸນີຫິ ສທ຺ຘິໍ, ອຍ຺ເຍ, ຠຓ຺ຑິຕ຺ວາ ນ ທິສ຺ສຕີ’’ຕິ. ‘‘ອມ຺ມາ, ອມຸກສ຺ມິໍ ຄາມເກ ເອຕິສ຺ສາ ຎາຕິກຸລໍ. ຕຕ຺ຖ ຄນ຺ຕ຺ວາ ວິຈິນຖາ’’ຕິ. ຠິກ຺ຂຸນິໂຍ ຕຕ຺ຖ ຄນ຺ຕ຺ວາ ຕໍ ຠິກ຺ຂຸນິໍ ປສ຺ສິຕ຺ວາ ເອຕທໂວຈຸໍ – ‘‘ກິສ຺ສ ຕ຺ວໍ, ອຍ຺ເຍ, ເອກິກາ ອາຄຕາ, ກຈ຺ຈິສິ ອປ຺ປຘໍສິຕາ’’ຕິ? ‘‘ອປ຺ປຘໍສິຕາມ຺ຫິ, ອຍ຺ເຍ’’ຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ເອກາ ຄາມນ຺ຕຣໍ ຄຈ຺ຉິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ເອກາ ຄາມນ຺ຕຣໍ ຄຈ຺ຉຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ເອກາ ຄາມນ຺ຕຣໍ ຄຈ຺ຉິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ຍາ ປນ ຠິກ຺ຂຸນີ ເອກາ ຄາມນ຺ຕຣໍ ຄຈ຺ເຉຍ຺ຍ, ອຍມ຺ປິ ຠິກ຺ຂຸນີ ປຐມາປຕ຺ຕິກໍ ຘມ຺ມໍ ອາປນ຺ນາ ນິສ຺ສາຣຓີຍໍ ສງ຺ຆາທິເສສ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂຸນີນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໘໘. ເຕນ ໂຂ ປນ ສມເຍນ ທ຺ເວ ຠິກ຺ຂຸນິໂຍ ສາເກຕາ ສາວຕ຺ຖິໍ ອທ຺ຘານມຄ຺ຄປ຺ປຏິປນ຺ນາ ໂຫນ຺ຕິ. ອນ຺ຕຣາມຄ຺ເຄ ນທີ ຕຣິຕພ຺ພາ ໂຫຕິ. ອຖ ໂຂ ຕາ ຠິກ຺ຂຸນິໂຍ ນາວິເກ ອຸປສງ຺ກມິຕ຺ວາ ເອຕທໂວຈຸໍ – ‘‘ສາຘຸ ໂນ, ອາວຸໂສ, ຕາເຣຖາ’’ຕິ. ‘‘ນາຍ຺ເຍ, ສກ຺ກາ ອຸໂຠ ສກິໍ ຕາເຣຕຸ’’ນ຺ຕິ. ເອໂກ ເອກໍ ອຸຕ຺ຕາເຣສິ. ອຸຕ຺ຕິຓ຺ໂຓ ອຸຕ຺ຕິຓ຺ຓໍ ທູເສສິ. ອນຸຕ຺ຕິຓ຺ໂຓ ອນຸຕ຺ຕິຓ຺ຓໍ ທູເສສິ. ຕາ ປຈ຺ຉາ ສມາຄນ຺ຕ຺ວາ ປຸຈ຺ຉິໍສຸ – ‘‘ກຈ຺ຈິສິ, ອຍ຺ເຍ, ອປ຺ປຘໍສິຕາ’’ຕິ? ‘‘ປຘໍສິຕາມ຺ຫິ, ອຍ຺ເຍ! ຕ຺ວໍ ປນ, ອຍ຺ເຍ, ອປ຺ປຘໍສິຕາ’’ຕິ? ‘‘ປຘໍສິຕາມ຺ຫິ, ອຍ຺ເຍ’’ຕິ. ອຖ ໂຂ ຕາ ຠິກ຺ຂຸນິໂຍ ສາວຕ຺ຖິໍ ຄນ຺ຕ຺ວາ ຠິກ຺ຂຸນີນໍ ເອຕມຕ຺ຖໍ ອາໂຣເຈສຸໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ເອກາ ນທີປາຣໍ ຄຈ຺ຉິສ຺ສຕີ’’ຕິ! ອຖ ໂຂ ຕາ ຠິກ຺ຂຸນິໂຍ ຠິກ຺ຂູນໍ ເອຕມຕ຺ຖໍ ອາໂຣເຈສຸໍ. ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ເອກາ ນທີປາຣໍ ຄຈ຺ຉຕີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ເອກາ ນທີປາຣໍ ຄຈ຺ຉິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ຍາ ປນ ຠິກ຺ຂຸນີ ເອກາ ວາ ຄາມນ຺ຕຣໍ ຄຈ຺ເຉຍ຺ຍ, ເອກາ ວາ ນທີປາຣໍ ຄຈ຺ເຉຍ຺ຍ, ອຍມ຺ປິ ຠິກ຺ຂຸນີ ປຐມາປຕ຺ຕິກໍ ຘມ຺ມໍ ອາປນ຺ນາ ນິສ຺ສາຣຓີຍໍ ສງ຺ຆາທິເສສ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂຸນີນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໘໙. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂຸນິໂຍ ໂກສເລສຸ ຊນປເທ ສາວຕ຺ຖິໍ ຄຈ຺ຉນ຺ຕາ [ຄນ຺ຕ຺ວາ (ກ.)] ສາຍໍ ອຎ຺ຎຕຣໍ ຄາມໍ ອຸປຄຈ຺ຉິໍສຸ. ຕຕ຺ຖ ອຎ຺ຎຕຣາ ຠິກ຺ຂຸນີ ອຠິຣູປາ ໂຫຕິ ທສ຺ສນີຍາ ປາສາທິກາ. ອຎ຺ຎຕໂຣ ປຸຣິໂສ ຕສ຺ສາ ຠິກ຺ຂຸນິຍາ ສຫ ທສ຺ສເນນ ປຏິພທ຺ຘຈິຕ຺ໂຕ ໂຫຕິ. ອຖ ໂຂ ໂສ ປຸຣິໂສ ຕາສໍ ຠິກ຺ຂຸນີນໍ ເສຍ຺ຍໍ ປຎ຺ຎເປນ຺ໂຕ ຕສ຺ສາ ຠິກ຺ຂຸນິຍາ ເສຍ຺ຍໍ ເອກມນ຺ຕໍ ປຎ຺ຎາເປສິ. ອຖ ໂຂ ສາ ຠິກ຺ຂຸນີ ສລ຺ລກ຺ເຂຕ຺ວາ – ‘‘ປຣິຍຸຏ຺ຐິໂຕ ອຍໍ ປຸຣິໂສ; ສເຈ ຣຕ຺ຕິໍ ອາຄຈ຺ຉິສ຺ສຕິ, ວິສ຺ສໂຣ ເມ ຠວິສ຺ສຕີ’’ຕິ, ຠິກ຺ຂຸນິໂຍ ອນາປຸຈ຺ຉາ ອຎ຺ຎຕຣໍ ກຸລໍ ຄນ຺ຕ຺ວາ ເສຍ຺ຍໍ ກປ຺ເປສິ. ອຖ ໂຂ ໂສ ປຸຣິໂສ ຣຕ຺ຕິໍ ອາຄນ຺ຕ຺ວາ ຕໍ ຠິກ຺ຂຸນິໍ ຄເວສນ຺ໂຕ ຠິກ຺ຂຸນິໂຍ ຆຏ຺ເຏສິ. ຠິກ຺ຂຸນິໂຍ ຕໍ ຠິກ຺ຂຸນິໍ ອປສ຺ສນ຺ຕິໂຍ ເອວມາຫໍສຸ – ‘‘ນິສ຺ສໍສຍໍ ໂຂ ສາ ຠິກ຺ຂຸນີ ປຸຣິເສນ ສທ຺ຘິໍ ນິກ຺ຂນ຺ຕາ’’ຕິ.

ອຖ ໂຂ ສາ ຠິກ຺ຂຸນີ ຕສ຺ສາ ຣຕ຺ຕິຍາ ອຈ຺ຈເຍນ ເຍນ ຕາ ຠິກ຺ຂຸນິໂຍ ເຕນຸປສງ຺ກມິ. ຠິກ຺ຂຸນິໂຍ ຕໍ ຠິກ຺ຂຸນິໍ ເອຕທໂວຈຸໍ – ‘‘ກິສ຺ສ ຕ຺ວໍ, ອຍ຺ເຍ, ປຸຣິເສນ ສທ຺ຘິໍ ນິກ຺ຂນ຺ຕາ’’ຕິ? ‘‘ນາຫໍ, ອຍ຺ເຍ, ປຸຣິເສນ ສທ຺ຘິໍ ນິກ຺ຂນ຺ຕາ’’ຕິ. ຠິກ຺ຂຸນີນໍ ເອຕມຕ຺ຖໍ ອາໂຣເຈສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ເອກາ ຣຕ຺ຕິໍ ວິປ຺ປວສິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ເອກາ ຣຕ຺ຕິໍ ວິປ຺ປວສີຕິ [ວິປ຺ປວສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ເອກາ ຣຕ຺ຕິໍ ວິປ຺ປວສິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

‘‘ຍາ ປນ ຠິກ຺ຂຸນີ ເອກາ ວາ ຄາມນ຺ຕຣໍ ຄຈ຺ເຉຍ຺ຍ, ເອກາ ວາ ນທີປາຣໍ ຄຈ຺ເຉຍ຺ຍ, ເອກາ ວາ ຣຕ຺ຕິໍ ວິປ຺ປວເສຍ຺ຍ, ອຍມ຺ປິ ຠິກ຺ຂຸນີ ປຐມາປຕ຺ຕິກໍ ຘມ຺ມໍ ອາປນ຺ນາ ນິສ຺ສາຣຓີຍໍ ສງ຺ຆາທິເສສ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂຸນີນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໙໐. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂຸນິໂຍ ໂກສເລສຸ ຊນປເທ ສາວຕ຺ຖິໍ ອທ຺ຘານມຄ຺ຄປ຺ປຏິປນ຺ນາ ໂຫນ຺ຕິ. ຕຕ຺ຖ ອຎ຺ຎຕຣາ ຠິກ຺ຂຸນີ ວຈ຺ເຈນ ປີຬິຕາ ເອກິກາ ໂອຫີຍິຕ຺ວາ [ໂອຫິຍິຕ຺ວາ (ກ.)] ປຈ຺ຉາ ອຄມາສິ. ມນຸສ຺ສາ ຕໍ ຠິກ຺ຂຸນິໍ ປສ຺ສິຕ຺ວາ ທູເສສຸໍ. ອຖ ໂຂ ສາ ຠິກ຺ຂຸນີ ເຍນ ຕາ ຠິກ຺ຂຸນິໂຍ ເຕນຸປສງ຺ກມິ. ຠິກ຺ຂຸນິໂຍ ຕໍ ຠິກ຺ຂຸນິໍ ເອຕທໂວຈຸໍ – ‘‘ກິສ຺ສ ຕ຺ວໍ, ອຍ຺ເຍ, ເອກິກາ ໂອຫີນາ, ກຈ຺ຈິສິ ອປ຺ປຘໍສິຕາ’’ຕິ? ‘‘ປຘໍສິຕາມ຺ຫິ, ອຍ຺ເຍ’’ຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ກຖຎ຺ຫິ ນາມ ຠິກ຺ຂຸນີ ເອກາ ຄຓມ຺ຫາ ໂອຫີຍິສ຺ສຕີຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ເອກາ ຄຓມ຺ຫາ ໂອຫີຍຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ເອກາ ຄຓມ຺ຫາ ໂອຫີຍິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໖໙໑. ‘‘ຍາ ປນ ຠິກ຺ຂຸນີ ເອກາ ວາ ຄາມນ຺ຕຣໍ ຄຈ຺ເຉຍ຺ຍ, ເອກາ ວາ ນທີປາຣໍ ຄຈ຺ເຉຍ຺ຍ, ເອກາ ວາ ຣຕ຺ຕິໍ ວິປ຺ປວເສຍ຺ຍ, ເອກາ ວາ ຄຓມ຺ຫາ ໂອຫີເຍຍ຺ຍ, ອຍມ຺ປິ ຠິກ຺ຂຸນີ ປຐມາປຕ຺ຕິກໍ ຘມ຺ມໍ ອາປນ຺ນາ ນິສ຺ສາຣຓີຍໍ ສງ຺ຆາທິເສສ’’ນ຺ຕິ.

໖໙໒. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ເອກາ ວາ ຄາມນ຺ຕຣໍ ຄຈ຺ເຉຍ຺ຍາຕິ ປຣິກ຺ຂິຕ຺ຕສ຺ສ ຄາມສ຺ສ ປຣິກ຺ເຂປໍ ປຐມໍ ປາທໍ ອຕິກ຺ກາເມນ຺ຕິຍາ ອາປຕ຺ຕິ ຖຸລ຺ລຈ຺ຈຍສ຺ສ, ທຸຕິຍໍ ປາທໍ ອຕິກ຺ກາເມນ຺ຕິຍາ ອາປຕ຺ຕິ ສງ຺ຆາທິເສສສ຺ສ.

ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣໍ ປຐມໍ ປາທໍ ອຕິກ຺ກາເມນ຺ຕິຍາ ອາປຕ຺ຕິ ຖຸລ຺ລຈ຺ຈຍສ຺ສ. ທຸຕິຍໍ ປາທໍ ອຕິກ຺ກາເມນ຺ຕິຍາ ອາປຕ຺ຕິ ສງ຺ຆາທິເສສສ຺ສ.

ເອກາ ວາ ນທີປາຣໍ ຄຈ຺ເຉຍ຺ຍາຕິ ນທີ ນາມ ຕິມຓ຺ຑລໍ ປຏິຈ຺ຉາເທຕ຺ວາ ຍຕ຺ຖ ກຕ຺ຖຈິ ອຸຕ຺ຕຣນ຺ຕິຍາ ຠິກ຺ຂຸນິຍາ ອນ຺ຕຣວາສໂກ ເຕມິຍຕິ. ປຐມໍ ປາທໍ ອຸຕ຺ຕຣນ຺ຕິຍາ ອາປຕ຺ຕິ ຖຸລ຺ລຈ຺ຈຍສ຺ສ. ທຸຕິຍໍ ປາທໍ ອຸຕ຺ຕຣນ຺ຕິຍາ ອາປຕ຺ຕິ ສງ຺ຆາທິເສສສ຺ສ.

ເອກາ ວາ ຣຕ຺ຕິໍ ວິປ຺ປວເສຍ຺ຍາຕິ ສຫ ອຣຸຓຸຄ຺ຄມນາ ທຸຕິຍິກາຍ ຠິກ຺ຂຸນິຍາ ຫຕ຺ຖປາສໍ ວິຊຫນ຺ຕິຍາ ອາປຕ຺ຕິ ຖຸລ຺ລຈ຺ຈຍສ຺ສ. ວິຊຫິເຕ ອາປຕ຺ຕິ ສງ຺ຆາທິເສສສ຺ສ.

ເອກາ ວາ ຄຓມ຺ຫາ ໂອຫີເຍຍ຺ຍາຕິ ອຄາມເກ ອຣຎ຺ເຎ ທຸຕິຍິກາຍ ຠິກ຺ຂຸນິຍາ ທສ຺ສນູປຈາຣໍ ວາ ສວນູປຈາຣໍ ວາ ວິຊຫນ຺ຕິຍາ ອາປຕ຺ຕິ ຖຸລ຺ລຈ຺ຈຍສ຺ສ. ວິຊຫິເຕ ອາປຕ຺ຕິ ສງ຺ຆາທິເສສສ຺ສ.

ອຍມ຺ປີຕິ ປຸຣິມາໂຍ ອຸປາທາຍ ວຸຈ຺ຈຕິ.

ປຐມາປຕ຺ຕິກນ຺ຕິ ສຫ ວຕ຺ຖຸຊ຺ຌາຈາຣາ ອາປຊ຺ຊຕິ ອສມນຸຠາສນາຍ.

ນິສ຺ສາຣຓີຍນ຺ຕິ ສງ຺ຆມ຺ຫາ ນິສ຺ສາຣີຍຕິ.

ສງ຺ຆາທິເສໂສຕິ…ເປ… ເຕນປິ ວຸຈ຺ຈຕິ ສງ຺ຆາທິເສໂສຕິ.

໖໙໓. ອນາປຕ຺ຕິ ທຸຕິຍິກາ ຠິກ຺ຂຸນີ ປກ຺ກນ຺ຕາ ວາ ໂຫຕິ ວິພ຺ຠນ຺ຕາ ວາ ກາລງ຺ກຕາ ວາ ປກ຺ຂສງ຺ກນ຺ຕາ ວາ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຕຕິຍສງ຺ຆາທິເສສສິກ຺ຂາປທໍ ນິຏ຺ຐິຕໍ.