໓. ຕຕິຍປາຏິເທສນີຍສິກ຺ຂາປທໍ

໕໖໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສາວຕ຺ຖິຍໍ ອຎ຺ຎຕຣໍ ກຸລໍ ອຸຠໂຕປສນ຺ນໍ ໂຫຕິ. ສທ຺ຘາຍ ວຑ຺ຒຕິ, ໂຠເຄນ ຫາຍຕິ, ຍໍ ຕສ຺ມິໍ ກຸເລ ອຸປ຺ປຊ຺ຊຕິ ປຸເຣຠຕ຺ຕໍ ຂາທນີຍໍ ວາ ໂຠຊນີຍໍ ວາ ຕໍ ສພ຺ພໍ ຠິກ຺ຂູນໍ ວິສ຺ສຊ຺ເຊຕ຺ວາ ອປ຺ເປກທາ ອນສິຕາ ອຈ຺ຉນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ນ ມຕ຺ຕໍ ຊານິຕ຺ວາ ປຏິຄ຺ຄເຫສ຺ສນ຺ຕິ! ອິເມ ອິເມສໍ ທຕ຺ວາ ອປ຺ເປກທາ ອນສິຕາ ອຈ຺ຉນ຺ຕີ’’ຕິ!! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ຍໍ ກຸລໍ ສທ຺ຘາຍ ວຑ຺ຒຕິ, ໂຠເຄນ ຫາຍຕິ ເອວຣູປສ຺ສ ກຸລສ຺ສ ຎຕ຺ຕິທຸຕິເຍນ ກມ຺ເມນ ເສກ຺ຂສມ຺ມຸຕິໍ ທາຕຸໍ. ເອວຎ຺ຈ ປນ, ຠິກ຺ຂເວ, ທາຕພ຺ພາ. ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

໕໖໓. ‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມໍ ກຸລໍ ສທ຺ຘາຍ ວຑ຺ຒຕິ, ໂຠເຄນ ຫາຍຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ອິຕ຺ຖນ຺ນາມສ຺ສ ກຸລສ຺ສ ເສກ຺ຂສມ຺ມຸຕິໍ ທເທຍ຺ຍ. ເອສາ ຎຕ຺ຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມໍ ກຸລໍ ສທ຺ຘາຍ ວຑ຺ຒຕິ, ໂຠເຄນ ຫາຍຕິ. ສງ຺ໂຆ ອິຕ຺ຖນ຺ນາມສ຺ສ ກຸລສ຺ສ ເສກ຺ຂສມ຺ມຸຕິໍ ເທຕິ. ຍສ຺ສາຍສ຺ມໂຕ ຂມຕິ ອິຕ຺ຖນ຺ນາມສ຺ສ ກຸລສ຺ສ ເສກ຺ຂສມ຺ມຸຕິຍາ ທານໍ, ໂສ ຕຸຓ຺ຫສ຺ສ; ຍສ຺ສ ນກ຺ຂມຕິ, ໂສ ຠາເສຍ຺ຍ.

‘‘ທິນ຺ນາ ສງ຺ເຆນ ອິຕ຺ຖນ຺ນາມສ຺ສ ກຸລສ຺ສ ເສກ຺ຂສມ຺ມຸຕິ. ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.

ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຍານິ ໂຂ ປນ ຕານິ ເສກ຺ຂສມ຺ມຕານິ ກຸລານິ, ໂຍ ປນ ຠິກ຺ຂຸ ຕຖາຣູເປສຸ ເສກ຺ຂສມ຺ມເຕສຸ ກຸເລສຸ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປຏິເທເສຕພ຺ພໍ ເຕນ ຠິກ຺ຂຸນາ – ‘ຄາຣຍ຺ຫໍ, ອາວຸໂສ, ຘມ຺ມໍ ອາປຊ຺ຊິໍ ອສປ຺ປາຍໍ ປາຏິເທສນີຍໍ ຕໍ ປຏິເທເສມີ’’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໕໖໔. ເຕນ ໂຂ ປນ ສມເຍນ ສາວຕ຺ຖິຍໍ ອຸສ຺ສໂວ ໂຫຕິ. ມນຸສ຺ສາ ຠິກ຺ຂູ ນິມນ຺ເຕຕ຺ວາ ໂຠເຊນ຺ຕິ. ຕມ຺ປິ ໂຂ ກຸລໍ ຠິກ຺ຂູ ນິມນ຺ເຕສິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຘິວາເສນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ເສກ຺ຂສມ຺ມເຕສຸ ກຸເລສຸ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທິຕຸໍ ຠຸຎ຺ຊິຕຸ’’ນ຺ຕິ. ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກິໍ ນຸ ໂຂ ນາມ ອມ຺ຫາກໍ ຊີວິເຕນ ຍໍ ອຍ຺ຍາ ອມ຺ຫາກໍ ນ ປຏິຄ຺ຄຓ຺ຫນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ນິມນ຺ຕິເຕນ ເສກ຺ຂສມ຺ມເຕສຸ ກຸເລສຸ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທິຕຸໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຍານິ ໂຂ ປນ ຕານິ ເສກ຺ຂສມ຺ມຕານິ ກຸລານິ, ໂຍ ປນ ຠິກ຺ຂຸ ຕຖາຣູເປສຸ ເສກ຺ຂສມ຺ມເຕສຸ ກຸເລສຸ ປຸພ຺ເພ ອນິມນ຺ຕິໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປຏິເທເສຕພ຺ພໍ ເຕນ ຠິກ຺ຂຸນາ – ‘ຄາຣຍ຺ຫໍ, ອາວຸໂສ, ຘມ຺ມໍ ອາປຊ຺ຊິໍ ອສປ຺ປາຍໍ ປາຏິເທສນີຍໍ, ຕໍ ປຏິເທເສມີ’’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໕໖໕. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ຕສ຺ສ ກຸລສ຺ສ ກຸລູປໂກ ໂຫຕິ. ອຖ ໂຂ ໂສ ຠິກ຺ຂຸ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ເຕນ ໂຂ ປນ ສມເຍນ ໂສ ຠິກ຺ຂຸ ຄິລາໂນ ໂຫຕິ. ອຖ ໂຂ ເຕ ມນຸສ຺ສາ ຕໍ ຠິກ຺ຂຸໍ ເອຕທໂວຈຸໍ – ‘‘ຠຸຎ຺ຊຖ, ຠນ຺ເຕ’’ຕິ. ອຖ ໂຂ ໂສ ຠິກ຺ຂຸ – ‘‘ຠຄວຕາ ປຏິກ຺ຂິຕ຺ຕໍ ອນິມນ຺ຕິເຕນ ເສກ຺ຂສມ຺ມເຕສຸ ກຸເລສຸ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທິຕຸໍ ຠຸຎ຺ຊິຕຸ’’ນ຺ຕິ ກຸກ຺ກຸຈ຺ຈາຍນ຺ໂຕ ນ ປຏິຄ຺ຄເຫສິ; ນາສກ຺ຂິ ປິຓ຺ຑາຍ ຈຣິຕຸໍ; ຉິນ຺ນຠຕ຺ໂຕ ອໂຫສິ. ອຖ ໂຂ ໂສ ຠິກ຺ຂຸ ອາຣາມໍ ຄນ຺ຕ຺ວາ ຠິກ຺ຂູນໍ ເອຕມຕ຺ຖໍ ອາໂຣເຈສິ. ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ເສກ຺ຂສມ຺ມເຕສຸ ກຸເລສຸ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທິຕຸໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໕໖໖. ‘‘ຍານິ ໂຂ ປນ ຕານິ ເສກ຺ຂສມ຺ມຕານິ ກຸລານິ, ໂຍ ປນ ຠິກ຺ຂຸ ຕຖາຣູເປສຸ ເສກ຺ຂສມ຺ມເຕສຸ ກຸເລສຸ ປຸພ຺ເພ ອນິມນ຺ຕິໂຕ ອຄິລາໂນ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປຏິເທເສຕພ຺ພໍ ເຕນ ຠິກ຺ຂຸນາ – ‘ຄາຣຍ຺ຫໍ, ອາວຸໂສ, ຘມ຺ມໍ ອາປຊ຺ຊິໍ ອສປ຺ປາຍໍ ປາຏິເທສນີຍໍ, ຕໍ ປຏິເທເສມີ’’ຕິ.

໕໖໗. ຍານິ ໂຂ ປນ ຕານິ ເສກ຺ຂສມ຺ມຕານິ ກຸລານີຕິ ເສກ຺ຂສມ຺ມຕໍ ນາມ ກຸລໍ ຍໍ ກຸລໍ ສທ຺ຘາຍ ວຑ຺ຒຕິ, ໂຠເຄນ ຫາຍຕິ. ເອວຣູປສ຺ສ ກຸລສ຺ສ ຎຕ຺ຕິທຸຕິເຍນ ກມ຺ເມນ ເສກ຺ຂສມ຺ມຸຕິ ທິນ຺ນາ ໂຫຕິ.

ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຕຖາຣູເປສຸ ເສກ຺ຂສມ຺ມເຕສຸ ກຸເລສູຕິ ເອວຣູເປສຸ ເສກ຺ຂສມ຺ມເຕສຸ ກຸເລສຸ.

ອນິມນ຺ຕິໂຕ ນາມ ອຊ຺ຊຕນາຍ ວາ ສ຺ວາຕນາຍ ວາ ອນິມນ຺ຕິໂຕ, ຆຣູປຈາຣໍ ໂອກ຺ກມນ຺ເຕ ນິມນ຺ເຕຕິ, ເອໂສ ອນິມນ຺ຕິໂຕ ນາມ.

ນິມນ຺ຕິໂຕ ນາມ ອຊ຺ຊຕນາຍ ວາ ສ຺ວາຕນາຍ ວາ ນິມນ຺ຕິໂຕ, ຆຣູປຈາຣໍ ອໂນກ຺ກມນ຺ເຕ ນິມນ຺ເຕຕິ, ເອໂສ ນິມນ຺ຕິໂຕ ນາມ.

ອຄິລາໂນ ນາມ ສກ຺ໂກຕິ ປິຓ຺ຑາຍ ຈຣິຕຸໍ.

ຄິລາໂນ ນາມ ນ ສກ຺ໂກຕິ ປິຓ຺ຑາຍ ຈຣິຕຸໍ.

ຂາທນີຍໍ ນາມ ປຎ຺ຈ ໂຠຊນານິ – ຍາມກາລິກໍ ສຕ຺ຕາຫກາລິກໍ ຍາວຊີວິກໍ ຐເປຕ຺ວາ ອວເສສໍ ຂາທນີຍໍ ນາມ.

ໂຠຊນີຍໍ ນາມ ປຎ຺ຈ ໂຠຊນານິ – ໂອທໂນ, ກຸມ຺ມາໂສ, ສຕ຺ຕຸ, ມຈ຺ໂຉ, ມໍສໍ.

ອນິມນ຺ຕິໂຕ ອຄິລາໂນ ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຏິເທສນີຍສ຺ສ.

໕໖໘. ເສກ຺ຂສມ຺ມເຕ ເສກ຺ຂສມ຺ມຕສຎ຺ຎີ ອນິມນ຺ຕິໂຕ ອຄິລາໂນ ຂາທນີຍໍ ວາ ໂຠຊນີຍໍວ ສຫຕ຺ຖາ ປຏິຄ຺ຄເຫຕ຺ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຏິເທສນີຍສ຺ສ. ເສກ຺ຂສມ຺ມເຕ ເວມຕິໂກ…ເປ… ເສກ຺ຂສມ຺ມເຕ ອເສກ຺ຂສມ຺ມຕສຎ຺ຎີ ອນິມນ຺ຕິໂຕ ອຄິລາໂນ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຏິເທສນີຍສ຺ສ.

ຍາມກາລິກໍ ສຕ຺ຕາຫກາລິກໍ ຍາວຊີວິກໍ ອາຫາຣຕ຺ຖາຍ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ອເສກ຺ຂສມ຺ມເຕ ເສກ຺ຂສມ຺ມຕສຎ຺ຎີ, ອາປຕ຺ຕິ ທຸກ຺ກຏສ຺ສ. ອເສກ຺ຂສມ຺ມເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອເສກ຺ຂສມ຺ມເຕ ອເສກ຺ຂສມ຺ມຕສຎ຺ຎີ, ອນາປຕ຺ຕິ.

໕໖໙. ອນາປຕ຺ຕິ ນິມນ຺ຕິຕສ຺ສ, ຄິລານສ຺ສ, ນິມນ຺ຕິຕສ຺ສ ວາ ຄິລານສ຺ສ ວາ ເສສກໍ ຠຸຎ຺ຊຕິ, ອຎ຺ເຎສໍ ຠິກ຺ຂາ ຕຕ຺ຖ ປຎ຺ຎຕ຺ຕາ ໂຫຕິ, ຆຣໂຕ ນີຫຣິຕ຺ວາ ເທນ຺ຕິ, ນິຈ຺ຈຠຕ຺ເຕ, ສລາກຠຕ຺ເຕ, ປກ຺ຂິເກ, ອຸໂປສຖິເກ, ປາຏິປທິເກ, ຍາມກາລິກໍ ສຕ຺ຕາຫກາລິກໍ ຍາວຊີວິກໍ – ‘‘ສຕິ ປຈ຺ຈເຍ ປຣິຠຸຎ຺ຊາ’’ຕິ ເທຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຕຕິຍປາຏິເທສນີຍສິກ຺ຂາປທໍ ນິຏ຺ຐິຕໍ.