໑໒. ປຣິຓາມນສິກ຺ຂາປທໍ

໔໘໙. [ອິທໍ ວຕ຺ຖຸ ປາຣາ. ໖໕໗] ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສາວຕ຺ຖິຍໍ ອຎ຺ຎຕຣສ຺ສ ປູຄສ຺ສ ສງ຺ຆສ຺ສ ສຈີວຣຠຕ຺ຕໍ ປຏິຍຕ຺ຕໍ ໂຫຕິ – ‘‘ໂຠເຊຕ຺ວາ ຈີວເຣນ ອຈ຺ຉາເທສ຺ສາມາ’’ຕິ. ອຖ ໂຂ ຉພ຺ພຄ຺ຄິຍາ ຠິກ຺ຂູ ເຍນ ໂສ ປູໂຄ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຕໍ ປູຄໍ ເອຕທໂວຈຸໍ – ‘‘ເທຖາວຸໂສ, ອິມານິ ຈີວຣານິ ອິເມສໍ ຠິກ຺ຂູນ’’ນ຺ຕິ. ‘‘ນ ມຍໍ, ຠນ຺ເຕ, ທສ຺ສາມ. ອມ຺ຫາກໍ ສງ຺ຆສ຺ສ ອນຸວສ຺ສໍ ສຈີວຣຠິກ຺ຂາ ປຎ຺ຎຕ຺ຕາ’’ຕິ. ‘‘ພຫູ, ອາວຸໂສ, ສງ຺ຆສ຺ສ ທາຍກາ, ພຫູ ສງ຺ຆສ຺ສ ຠຕ຺ຕາ [ຠທ຺ທາ (ກ.)]. ອິເມ ຕຸມ຺ເຫ ນິສ຺ສາຍ ຕຸມ຺ເຫ ສມ຺ປສ຺ສນ຺ຕາ ອິຘ ວິຫຣນ຺ຕິ. ຕຸມ຺ເຫ ເຈ ອິເມສໍ ນ ທສ຺ສຖ, ອຖ ໂກ ຈຣຫິ ອິເມສໍ ທສ຺ສຕິ? ເທຖາວຸໂສ, ອິມານິ ຈີວຣານິ ອິເມສໍ ຠິກ຺ຂູນ’’ນ຺ຕິ. ອຖ ໂຂ ໂສ ປູໂຄ ຉພ຺ພຄ຺ຄິເຍຫິ ຠິກ຺ຂູຫິ ນິປ຺ປີຬິຍມາໂນ ຍຖາປຏິຍຕ຺ຕໍ ຈີວຣໍ ຉພ຺ພຄ຺ຄິຍານໍ ຠິກ຺ຂູນໍ ທຕ຺ວາ ສງ຺ຆໍ ຠຕ຺ເຕນ ປຣິວິສິ. ເຍ ເຕ ຠິກ຺ຂູ ຊານນ຺ຕິ ສງ຺ຆສ຺ສ ສຈີວຣຠຕ຺ຕໍ ປຏິຍຕ຺ຕໍ ‘‘ນ ຈ ຊານນ຺ຕິ ຉພ຺ພຄ຺ຄິຍານໍ ຠິກ຺ຂູນໍ ທິນ຺ນ’’ນ຺ຕິ ເຕ ເອວມາຫໍສຸ – ‘‘ໂອໂຓເຊຖາວຸໂສ, ສງ຺ຆສ຺ສ ຈີວຣ’’ນ຺ຕິ. ‘‘ນຕ຺ຖິ, ຠນ຺ເຕ. ຍຖາປຏິຍຕ຺ຕໍ ຈີວຣໍ ອຍ຺ຍາ ຉພ຺ພຄ຺ຄິຍາ ອຍ຺ຍານໍ ຉພ຺ພຄ຺ຄິຍານໍ ປຣິຓາເມສຸ’’ນ຺ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຊານໍ ສງ຺ຆິກໍ ລາຠໍ ປຣິຓຕໍ ປຸຄ຺ຄລສ຺ສ ປຣິຓາເມສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຊານໍ ສງ຺ຆິກໍ ລາຠໍ ປຣິຓຕໍ ປຸຄ຺ຄລສ຺ສ ປຣິຓາເມຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຊານໍ ສງ຺ຆິກໍ ລາຠໍ ປຣິຓຕໍ ປຸຄ຺ຄລສ຺ສ ປຣິຓາເມສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໔໙໐. ‘‘ໂຍ ປນ ຠິກ຺ຂຸ ຊານໍ ສງ຺ຆິກໍ ລາຠໍ ປຣິຓຕໍ ປຸຄ຺ຄລສ຺ສ ປຣິຓາເມຍ຺ຍ, ປາຈິຕ຺ຕິຍ’’ນ຺ຕິ.

໔໙໑. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຊານາຕິ ນາມ ສາມໍ ວາ ຊານາຕິ, ອຎ຺ເຎ ວາ ຕສ຺ສ ອາໂຣເຈນ຺ຕິ, ໂສ ວາ ອາໂຣເຈຕິ.

ສງ຺ຆິກໍ ນາມ ສງ຺ຆສ຺ສ ທິນ຺ນໍ ໂຫຕິ ປຣິຈ຺ຈຕ຺ຕໍ.

ລາໂຠ ນາມ ຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາຣາ, ອນ຺ຕມໂສ ຈຸຓ຺ຓປິຓ຺ໂຑປິ, ທນ຺ຕກຏ຺ຐມ຺ປິ, ທສິກສຸຕ຺ຕມ຺ປິ.

ປຣິຓຕໍ ນາມ ‘‘ທສ຺ສາມ ກຣິສ຺ສາມາ’’ຕິ ວາຈາ ຠິນ຺ນາ ໂຫຕິ, ຕໍ ປຸຄ຺ຄລສ຺ສ ປຣິຓາເມຕິ, ອາປຕ຺ຕິ ປາຈິຕ຺ຕິຍສ຺ສ.

໔໙໒. ປຣິຓເຕ ປຣິຓຕສຎ຺ຎີ ປຸຄ຺ຄລສ຺ສ ປຣິຓາເມຕິ, ອາປຕ຺ຕິ ປາຈິຕ຺ຕິຍສ຺ສ. ປຣິຓເຕ ເວມຕິໂກ ປຸຄ຺ຄລສ຺ສ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ປຣິຓເຕ ອປຣິຓຕສຎ຺ຎີ ປຸຄ຺ຄລສ຺ສ ປຣິຓາເມຕິ, ອນາປຕ຺ຕິ. ສງ຺ຆສ຺ສ ປຣິຓຕໍ ອຎ຺ຎສງ຺ຆສ຺ສ ວາ ເຈຕິຍສ຺ສ ວາ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ເຈຕິຍສ຺ສ ປຣິຓຕໍ ອຎ຺ຎເຈຕິຍສ຺ສ ວາ ສງ຺ຆສ຺ສ ວາ ປຸຄ຺ຄລສ຺ສ ວາ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ປຸຄ຺ຄລສ຺ສ ປຣິຓຕໍ ອຎ຺ຎປຸຄ຺ຄລສ຺ສ ວາ ສງ຺ຆສ຺ສ ວາ ເຈຕິຍສ຺ສ ວາ ປຣິຓາເມຕິ, ອາປຕ຺ຕິ ທຸກ຺ກຏສ຺ສ. ອປຣິຓເຕ ປຣິຓຕສຎ຺ຎີ, ອາປຕ຺ຕິ ທຸກ຺ກຏສ຺ສ. ອປຣິຓເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອປຣິຓເຕ ອປຣິຓຕສຎ຺ຎີ, ອນາປຕ຺ຕິ.

໔໙໓. ອນາປຕ຺ຕິ – ‘‘ກຕ຺ຖ ເທມາ’’ຕິ ປຸຈ຺ຉີຍມາໂນ – ‘‘ຍຕ຺ຖ ຕຸມ຺ຫາກໍ ເທຍ຺ຍຘມ຺ໂມ ປຣິໂຠຄໍ ວາ ລເຠຍ຺ຍ ປຏິສງ຺ຂາຣໍ ວາ ລເຠຍ຺ຍ ຈິຣຏ຺ຐິຕິໂກ ວາ ອສ຺ສ ຍຕ຺ຖ ວາ ປນ ຕຸມ຺ຫາກໍ ຈິຕ຺ຕໍ ປສີທຕິ ຕຕ຺ຖ ເທຖາ’’ຕິ ຠຓຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຣິຓາມນສິກ຺ຂາປທໍ ນິຏ຺ຐິຕໍ ທ຺ວາທສມໍ.

ສຫຘມ຺ມິກວຄ຺ໂຄ ອຏ຺ຐໂມ.

ຕສ຺ສຸທ຺ທານໍ –

ສຫຘມ຺ມ-ວິວຓ຺ຓຎ຺ຈ, ໂມຫາປນໍ ປຫາຣກໍ;

ຕລສຕ຺ຕິ ອມູລຎ຺ຈ, ສຎ຺ຈິຈ຺ຈ ຈ ອຸປສ຺ສຸຕິ;

ປຏິພາຫນຉນ຺ທຎ຺ຈ, ທພ຺ພຎ຺ຈ ປຣິຓາມນນ຺ຕິ.