໕. ຠິໍສາປນສິກ຺ຂາປທໍ

໓໔໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສຕ຺ຕຣສວຄ຺ຄິເຍ ຠິກ຺ຂູ ຠິໍສາເປນ຺ຕິ. ເຕ ຠິໍສາປີຍມານາ ໂຣທນ຺ຕິ. ຠິກ຺ຂູ ເອວມາຫໍສຸ – ‘‘ກິສ຺ສ ຕຸມ຺ເຫ, ອາວຸໂສ, ໂຣທຖາ’’ຕິ? ‘‘ອິເມ, ອາວຸໂສ, ຉພ຺ພຄ຺ຄິຍາ ຠິກ຺ຂູ ອມ຺ເຫ ຠິໍສາເປນ຺ຕີ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຠິກ຺ຂຸໍ ຠິໍສາເປສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຠິກ຺ຂຸໍ ຠິໍສາເປຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຠິກ຺ຂຸໍ ຠິໍສາເປສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໔໖. ‘‘ໂຍ ປນ ຠິກ຺ຂຸ ຠິກ຺ຂຸໍ ຠິໍສາເປຍ຺ຍ, ປາຈິຕ຺ຕິຍ’’ນ຺ຕິ.

໓໔໗. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂຸນ຺ຕິ ອຎ຺ຎໍ ຠິກ຺ຂຸໍ.

ຠິໍສາເປຍ຺ຍາຕິ ອຸປສມ຺ປນ຺ໂນ ອຸປສມ຺ປນ຺ນໍ ຠິໍສາເປຕຸກາໂມ ຣູປໍ ວາ ສທ຺ທໍ ວາ ຄນ຺ຘໍ ວາ ຣສໍ ວາ ໂຜຏ຺ຐພ຺ພໍ ວາ ອຸປສໍຫຣຕິ. ຠາເຍຍ຺ຍ ວາ ໂສ ນ ວາ ຠາເຍຍ຺ຍ, ອາປຕ຺ຕິ ປາຈິຕ຺ຕິຍສ຺ສ. ໂຈຣກນ຺ຕາຣໍ ວາ ວາຬກນ຺ຕາຣໍ ວາ ປິສາຈກນ຺ຕາຣໍ ວາ ອາຈິກ຺ຂຕິ. ຠາເຍຍ຺ຍ ວາ ໂສ ນ ວາ ຠາເຍຍ຺ຍ, ອາປຕ຺ຕິ ປາຈິຕ຺ຕິຍສ຺ສ.

໓໔໘. ອຸປສມ຺ປນ຺ເນ ອຸປສມ຺ປນ຺ນສຎ຺ຎີ ຠິໍສາເປຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ເວມຕິໂກ ຠິໍສາເປຕິ, ອາປຕ຺ຕິ ປາຈິຕ຺ຕິຍສ຺ສ. ‘ອຸປສມ຺ປນ຺ເນ ອນຸປສມ຺ປນ຺ນສຎ຺ຎີ ຠິໍສາເປຕິ, ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ນໍ ຠິໍສາເປຕຸກາໂມ ຣູປໍ ວາ ສທ຺ທໍ ວາ ຄນ຺ຘໍ ວາ ຣສໍ ວາ ໂຜຏ຺ຐພ຺ພໍ ວາ ອຸປສໍຫຣຕິ. ຠາເຍຍ຺ຍ ວາ ໂສ ນ ວາ ຠາເຍຍ຺ຍ, ອາປຕ຺ຕິ ທຸກ຺ກຏສ຺ສ. ໂຈຣກນ຺ຕາຣໍ ວາ ວາຬກນ຺ຕາຣໍ ວາ ປິສາຈກນ຺ຕາຣໍ ວາ ອາຈິກ຺ຂຕິ. ຠາເຍຍ຺ຍ ວາ ໂສ ນ ວາ ຠາເຍຍ຺ຍ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ເວມຕິໂກ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອນຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ.

໓໔໙. ອນາປຕ຺ຕິ ນ ຠິໍສາເປຕຸກາໂມ ຣູປໍ ວາ ສທ຺ທໍ ວາ ຄນ຺ຘໍ ວາ ຣສໍ ວາ ໂຜຏ຺ຐພ຺ພໍ ວາ ອຸປສໍຫຣຕິ, ໂຈຣກນ຺ຕາຣໍ ວາ ວາຬກນ຺ຕາຣໍ ວາ ປິສາຈກນ຺ຕາຣໍ ວາ ອາຈິກ຺ຂຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຠິໍສາປນສິກ຺ຂາປທໍ ນິຏ຺ຐິຕໍ ປຎ຺ຈມໍ.