໖. ໂຊຕິກສິກ຺ຂາປທໍ

໓໕໐. ເຕນ ສມເຍນ ພຸທ຺ໂຘ ຠຄວາ ຠຄ຺ເຄສຸ ວິຫຣຕິ ສຸໍສຸມາຣຄິເຣ [ສຸໍສຸມາຣຄິເຣ (ສີ. ສ຺ຍາ.) ສໍສຸມາຣຄິເຣ (ກ.)] ເຠສກຬາວເນ ມິຄທາເຍ. ເຕນ ໂຂ ປນ ສມເຍນ ຠິກ຺ຂູ ເຫມນ຺ຕິເກ ກາເລ ອຎ຺ຎຕຣໍ ມຫນ຺ຕໍ ສຸສິຣກຏ຺ຐໍ ໂຊຕິໍ ສມາທຫິຕ຺ວາ ວິສິພ຺ເພສຸໍ. ຕສ຺ມິຎ຺ຈ ສຸສິເຣ ກຓ຺ຫສປ຺ໂປ ອຄ຺ຄິນາ ສນ຺ຕຕ຺ໂຕ ນິກ຺ຂມິຕ຺ວາ ຠິກ຺ຂູ ປຣິປາເຕສິ. ຠິກ຺ຂູ ຕຫໍ ຕຫໍ ອຸປຘາວິໍສຸ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂູ ໂຊຕິໍ ສມາທຫິຕ຺ວາ ວິສິພ຺ເພສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂູ ໂຊຕິໍ ສມາທຫິຕ຺ວາ ວິສິພ຺ເພນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ເຕ, ຠິກ຺ຂເວ, ໂມຆປຸຣິສາ ໂຊຕິໍ ສມາທຫິຕ຺ວາ ວິສິພ຺ເພສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂຸ ວິສິພ຺ພນາເປກ຺ໂຂ ໂຊຕິໍ ສມາທເຫຍ຺ຍ ວາ ສມາທຫາເປຍ຺ຍ ວາ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໓໕໑. ເຕນ ໂຂ ປນ ສມເຍນ ຠິກ຺ຂູ ຄິລານາ ໂຫນ຺ຕິ. ຄິລານປຸຈ຺ຉກາ ຠິກ຺ຂູ ຄິລາເນ ຠິກ຺ຂູ ເອຕທໂວຈຸໍ – ‘‘ກຈ຺ຈາວຸໂສ, ຂມນີຍໍ, ກຈ຺ຈິ ຍາປນີຍ’’ນ຺ຕິ? ‘‘ປຸພ຺ເພ ມຍໍ, ອາວຸໂສ, ໂຊຕິໍ ສມາທຫິຕ຺ວາ ວິສິພ຺ເພມ; ເຕນ ໂນ ຜາສຸ ໂຫຕິ. ອິທານິ ປນ ‘‘ຠຄວຕາ ປຏິກ຺ຂິຕ຺ຕ’’ນ຺ຕິ ກຸກ຺ກຸຈ຺ຈາຍນ຺ຕາ ນ ວິສິພ຺ເພມ, ເຕນ ໂນ ນ ຜາສຸ ໂຫຕີ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ໂຊຕິໍ ສມາທຫິຕ຺ວາ ວາ ສມາທຫາເປຕ຺ວາ ວາ ວິສິພ຺ເພຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂຸ ອຄິລາໂນ ວິສິພ຺ພນາເປກ຺ໂຂ ໂຊຕິໍ ສມາທເຫຍ຺ຍ ວາ ສມາທຫາເປຍ຺ຍ ວາ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໓໕໒. ເຕນ ໂຂ ປນ ສມເຍນ ຠິກ຺ຂູ ປທີເປປິ ໂຊຕິເກປິ ຊນ຺ຕາຆເຣປິ ກຸກ຺ກຸຈ຺ຈາຍນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ຕຖາຣູປປ຺ປຈ຺ຈຍາ ໂຊຕິໍ ສມາທຫິຕຸໍ ສມາທຫາເປຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໕໓. ‘‘ໂຍ ປນ ຠິກ຺ຂຸ ອຄິລາໂນ ວິສິພ຺ພນາເປກ຺ໂຂ ໂຊຕິໍ ສມາທເຫຍ຺ຍ ວາ ສມາທຫາເປຍ຺ຍ ວາ, ອຎ຺ຎຕ຺ຣ ຕຖາຣູປປ຺ປຈ຺ຈຍາ, ປາຈິຕ຺ຕິຍ’’ນ຺ຕິ.

໓໕໔. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອຄິລາໂນ ນາມ ຍສ຺ສ ວິນາ ອຄ຺ຄິນາ ຜາສຸ ໂຫຕິ.

ຄິລາໂນ ນາມ ຍສ຺ສ ວິນາ ອຄ຺ຄິນາ ນ ຜາສຸ ໂຫຕິ.

ວິສິພ຺ພນາເປກ຺ໂຂຕິ ຕປ຺ປິຕຸກາໂມ.

ໂຊຕິ ນາມ ອຄ຺ຄິ ວຸຈ຺ຈຕິ.

ສມາທເຫຍ຺ຍາຕິ ສຍໍ ສມາທຫຕິ, ອາປຕ຺ຕິ ປາຈິຕ຺ຕິຍສ຺ສ.

ສມາທຫາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ປາຈິຕ຺ຕິຍສ຺ສ. ສກິໍ ອາຓຕ຺ໂຕ ພຫຸກມ຺ປິ ສມາທຫຕິ, ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎຕ຺ຣ ຕຖາ ຣູປປ຺ປຈ຺ຈຍາຕິ ຐເປຕ຺ວາ ຕຖາຣູປປ຺ປຈ຺ຈຍໍ.

໓໕໕. ອຄິລາໂນ ອຄິລານສຎ຺ຎີ ວິສິພ຺ພນາເປກ຺ໂຂ ໂຊຕິໍ ສມາທຫຕິ ວາ ສມາທຫາເປຕິ ວາ, ອຎ຺ຎຕ຺ຣ ຕຖາຣູປປ຺ປຈ຺ຈຍາ, ອາປຕ຺ຕິ ປາຈິຕ຺ຕິຍສ຺ສ. ອຄິລາໂນ ເວມຕິໂກ ວິສິພ຺ພນາເປກ຺ໂຂ ໂຊຕິໍ ສມາທຫຕິ ວາ ສມາທຫາເປຕິ ວາ, ອຎ຺ຎຕ຺ຣ ຕຖາຣູປປ຺ປຈ຺ຈຍາ, ອາປຕ຺ຕິ ປາຈິຕ຺ຕິຍສ຺ສ. ອຄິລາໂນ ຄິລານສຎ຺ຎີ ວິສິພ຺ພນາເປກ຺ໂຂ ໂຊຕິໍ ສມາທຫຕິ ວາ ສມາທຫາເປຕິ ວາ, ອຎ຺ຎຕ຺ຣ ຕຖາຣູປປ຺ປຈ຺ຈຍາ, ອາປຕ຺ຕິ ປາຈິຕ຺ຕິຍສ຺ສ.

ປຏິລາຕໍ ອຸກ຺ຂິປຕິ, ອາປຕ຺ຕິ ທຸກ຺ກຏສ຺ສ. ຄິລາໂນ ອຄິລານສຎ຺ຎີ, ອາປຕ຺ຕິ ທຸກ຺ກຏສ຺ສ. ຄິລາໂນ ເວມຕິໂກ, ອາປຕ຺ຕິ ທຸກ຺ກຏສ຺ສ. ຄິລາໂນ ຄິລານສຎ຺ຎີ, ອນາປຕ຺ຕິ.

໓໕໖. ອນາປຕ຺ຕິ ຄິລານສ຺ສ, ອຎ຺ເຎນ ກຕໍ ວິສິພ຺ເພຕິ, ວີຕຈ຺ຈິຕງ຺ຄາຣໍ ວິສິພ຺ເພຕິ, ປທີເປ ໂຊຕິເກ ຊນ຺ຕາຆເຣ ຕຖາຣູປປ຺ປຈ຺ຈຍາ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ໂຊຕິກສິກ຺ຂາປທໍ ນິຏ຺ຐິຕໍ ຉຏ຺ຐໍ.