໑໐. ຈີວຣອປນິຘານສິກ຺ຂາປທໍ

໓໗໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສຕ຺ຕຣສວຄ຺ຄິຍາ ຠິກ຺ຂູ ອສນ຺ນິຫິຕປຣິກ຺ຂາຣາ ໂຫນ຺ຕິ. ຉພ຺ພຄ຺ຄິຍາ ຠິກ຺ຂູ ສຕ຺ຕຣສວຄ຺ຄິຍານໍ ຠິກ຺ຂູນໍ ປຕ຺ຕມ຺ປິ ຈີວຣມ຺ປິ ອປນິເຘນ຺ຕິ. ສຕ຺ຕຣສວຄ຺ຄິຍາ ຠິກ຺ຂູ ຉພ຺ພຄ຺ຄິເຍ ຠິກ຺ຂູ ເອຕທໂວຈຸໍ – ‘‘ເທຖາວຸໂສ, ອມ຺ຫາກໍ ປຕ຺ຕມ຺ປິ ຈີວຣມ຺ປີ’’ຕິ. ຉພ຺ພຄ຺ຄິຍາ ຠິກ຺ຂູ ຫສນ຺ຕິ, ເຕ ໂຣທນ຺ຕິ. ຠິກ຺ຂູ ເອວມາຫໍສຸ – ‘‘ກິສ຺ສ ຕຸມ຺ເຫ, ອາວຸໂສ, ໂຣທຖາ’’ຕິ? ‘‘ອິເມ, ອາວຸໂສ, ຉພ຺ພຄ຺ຄິຍາ ຠິກ຺ຂູ ອມ຺ຫາກໍ ປຕ຺ຕມ຺ປິ ຈີວຣມ຺ປິ ອປນິເຘນ຺ຕີ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຠິກ຺ຂູນໍ ປຕ຺ຕມ຺ປິ ຈີວຣມ຺ປິ ອປນິເຘສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຠິກ຺ຂູນໍ ປຕ຺ຕມ຺ປິ ຈີວຣມ຺ປິ ອປນິເຘຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຠິກ຺ຂູນໍ ປຕ຺ຕມ຺ປິ ຈີວຣມ຺ປິ ອປນິເຘສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໗໘. ‘‘ໂຍ ປນ ຠິກ຺ຂຸ ຠິກ຺ຂຸສ຺ສ ປຕ຺ຕໍ ວາ ຈີວຣໍ ວາ ນິສີທນໍ ວາ ສູຈິຆຣໍ ວາ ກາຍພນ຺ຘນໍ ວາ ອປນິເຘຍ຺ຍ ວາ ອປນິຘາເປຍ຺ຍ ວາ, ອນ຺ຕມໂສ ຫສາເປກ຺ໂຂປິ, ປາຈິຕ຺ຕິຍ’’ນ຺ຕິ.

໓໗໙. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂຸສ຺ສາຕິ ອຎ຺ຎສ຺ສ ຠິກ຺ຂຸສ຺ສ.

ປຕ຺ໂຕ ນາມ ທ຺ເວ ປຕ຺ຕາ – ອໂຍປຕ຺ໂຕ, ມຕ຺ຕິກາປຕ຺ໂຕ.

ຈີວຣໍ ນາມ ຉນ຺ນໍ ຈີວຣານໍ ອຎ຺ຎຕຣໍ ຈີວຣໍ, ວິກປ຺ປນຸປຄໍ ປຈ຺ຉິມໍ.

ນິສີທນໍ ນາມ ສທສໍ ວຸຈ຺ຈຕິ.

ສູຈິຆຣໍ ນາມ ສສູຈິກໍ ວາ ອສູຈິກໍ ວາ.

ກາຍພນ຺ຘນໍ ນາມ ທ຺ເວ ກາຍພນ຺ຘນານິ – ປຏ຺ຏິກາ, ສູກຣນ຺ຕກໍ.

ອປນິເຘຍ຺ຍ ວາຕິ ສຍໍ ອປນິເຘຕິ, ອາປຕ຺ຕິ ປາຈິຕ຺ຕິຍສ຺ສ.

ອປນິຘາເປຍ຺ຍ ວາຕິ ອຎ຺ຎໍ ອາຓາເປສິ, ອາປຕ຺ຕິ ປາຈິຕ຺ຕິຍສ຺ສ. ອປນິຘາເປຍ຺ຍ ວາ ຕິ ອຍ຺ຍໍ ອາຓາເປຕິ, ອາປຕ຺ຕິ ປາຈິຕ຺ຕິຍສ຺ສ. ສກິໍ ອາຓຕ຺ໂຕ ພຫຸກມ຺ປິ ອປນິເຘຕິ, ອາປຕ຺ຕິ ປາຈິຕ຺ຕິຍສ຺ສ.

ອນ຺ຕມໂສ ຫສາເປກ຺ໂຂປີຕິ ກີຬາຘິປ຺ປາໂຍ.

໓໘໐. ອຸປສມ຺ປນ຺ເນ ອຸປສມ຺ປນ຺ນສຎ຺ຎີ ປຕ຺ຕໍ ວາ ຈີວຣໍ ວາ ນິສີທນໍ ວາ ສູຈິຆຣໍ ວາ ກາຍພນ຺ຘນໍ ວາ ອປນິເຘຕິ ວາ ອປນິຘາເປຕິ ວາ, ອນ຺ຕມໂສ ຫສາເປກ຺ໂຂປິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ເວມຕິໂກ…ເປ… ອຸປສມ຺ປນ຺ເນ ອນຸປສມ຺ປນ຺ນສຎ຺ຎີ ປຕ຺ຕໍ ວາ ຈີວຣໍ ວາ ນິສີທນໍ ວາ ສູຈິຆຣໍ ວາ ກາຍພນ຺ຘນໍ ວາ ອປນິເຘຕິ ວາ ອປນິຘາເປຕິ ວາ, ອນ຺ຕມໂສ ຫສາເປກ຺ໂຂປິ, ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎໍ ປຣິກ຺ຂາຣໍ ອປນິເຘຕິ ວາ ອປນິຘາເປຕິ ວາ, ອນ຺ຕມໂສ ຫສາເປກ຺ໂຂປິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນສ຺ສ ປຕ຺ຕໍ ວາ ຈີວຣໍ ວາ ອຎ຺ຎໍ ວາ ປຣິກ຺ຂາຣໍ ອປນິເຘຕິ ວາ ອປນິຘາເປຕິ ວາ, ອນ຺ຕມໂສ ຫສາເປກ຺ໂຂປິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ເວມຕິໂກ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອນຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ.

໓໘໑. ອນາປຕ຺ຕິ ນຫສາຘິປ຺ປາໂຍ, ທຸນ຺ນິກ຺ຂິຕ຺ຕໍ ປຏິສາເມຕິ, ‘‘ຘມ຺ມິໍ ກຖໍ ກຕ຺ວາ ທສ຺ສາມີ’’ຕິ ປຏິສາເມຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຈີວຣອປນິຘານສິກ຺ຂາປທໍ ນິຏ຺ຐິຕໍ ທສມໍ.

ສຸຣາປານວຄ຺ໂຄ ຉຏ຺ໂຐ.

ຕສ຺ສຸທ຺ທານໍ –

ສຸຣາ ອງ຺ຄຸລິ ຫາໂສ ຈ [ໂຕຍຎ຺ຈ (ອິຕິປິ)], ອນາທຣິຍຎ຺ຈ ຠິໍສນໍ;

ໂຊຕິນຫານທຸພ຺ພຓ຺ຓໍ, ສາມໍ ອປນິເຘນ ຈາຕິ.