໙. ເສນາວາສສິກ຺ຂາປທໍ

໓໑໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສຕິ ກຣຓີເຍ ເສນໍ ຄນ຺ຕ຺ວາ ອຕິເຣກຕິຣຕ຺ຕໍ ເສນາຍ ວສນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ເສນາຍ ວສິສ຺ສນ຺ຕິ! ອມ຺ຫາກມ຺ປິ ອລາຠາ, ອມ຺ຫາກມ຺ປິ ທຸລ຺ລທ຺ຘໍ, ເຍ ມຍໍ ອາຊີວສ຺ສ ເຫຕຸ ປຸຕ຺ຕທາຣສ຺ສ ກາຣຓາ ເສນາຍ ປຏິວສາມາ’’ຕິ. ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ອຕິເຣກຕິຣຕ຺ຕໍ ເສນາຍ ວສິສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ອຕິເຣກຕິຣຕ຺ຕໍ ເສນາຍ ວສຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ອຕິເຣກຕິຣຕ຺ຕໍ ເສນາຍ ວສິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໑໘. ‘‘ສິຍາ ຈ ຕສ຺ສ ຠິກ຺ຂຸໂນ ໂກຈິເທວ ປຈ຺ຈໂຍ ເສນໍ ຄມນາຍ, ທິຣຕ຺ຕຕິຣຕ຺ຕໍ ເຕນ ຠິກ຺ຂຸນາ ເສນາຍ ວສິຕພ຺ພໍ. ຕໂຕ ເຈ ອຸຕ຺ຕຣິໍ ວເສຍ຺ຍ, ປາຈິຕ຺ຕິຍ’’ນ຺ຕິ.

໓໑໙. ສິຍາ ຈ ຕສ຺ສ ຠິກ຺ຂຸໂນ ໂກຈິເທວ ປຈ຺ຈໂຍ ເສນໍ ຄມນາຍາຕິ ສິຍາ ປຈ຺ຈໂຍ ສິຍາ ກຣຓີຍໍ.

ທິຣຕ຺ຕຕິຣຕ຺ຕໍ ເຕນ ຠິກ຺ຂຸນາ ເສນາຍ ວສິຕພ຺ພນ຺ຕິ ທ຺ເວຕິສ຺ໂສ ຣຕ຺ຕິໂຍ ວສິຕພ຺ພໍ.

ຕໂຕ ເຈ ອຸຕ຺ຕຣິ ວເສຍ຺ຍາຕິ ຈຕຸຕ຺ເຖ ທິວເສ ອຕ຺ຖງ຺ຄເຕ ສູຣິເຍ ເສນາຍ ວສຕິ, ອາປຕ຺ຕິ ປາຈິຕ຺ຕິຍສ຺ສ.

໓໒໐. ອຕິເຣກຕິຣຕ຺ເຕ ອຕິເຣກສຎ຺ຎີ ເສນາຍ ວສຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກຕິຣຕ຺ເຕ ເວມຕິໂກ ເສນາຍ ວສຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກຕິຣຕ຺ເຕ ອູນກສຎ຺ຎີ ເສນາຍ ວສຕິ, ອາປຕ຺ຕິ ປາຈິຕ຺ຕິຍສ຺ສ.

ອູນກຕິຣຕ຺ເຕ ອຕິເຣກສຎ຺ຎີ, ອາປຕ຺ຕິ ທຸກ຺ກຏສ຺ສ. ອູນກຕິຣຕ຺ເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອູນກຕິຣຕ຺ເຕ ອູນກສຎ຺ຎີ, ອນາປຕ຺ຕິ.

໓໒໑. ອນາປຕ຺ຕິ ທ຺ເວຕິສ຺ໂສ ຣຕ຺ຕິໂຍ ວສຕິ, ອູນກທ຺ເວຕິສ຺ໂສ ຣຕ຺ຕິໂຍ ວສຕິ, ທ຺ເວ ຣຕ຺ຕິໂຍ ວສິຕ຺ວາ ຕຕິຍາຍ ຣຕ຺ຕິຍາ ປຸຣາຣຸຓາ ນິກ຺ຂມິຕ຺ວາ ປຸນ ວສຕິ, ຄິລາໂນ ວສຕິ, ຄິລານສ຺ສ ກຣຓີເຍນ ວສຕິ, ເສນາ ວາ ປຏິເສນາຍ ຣຸທ຺ຘາ ໂຫຕິ, ເກນຈິ ປລິພຸທ຺ໂຘ ໂຫຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ເສນາວາສສິກ຺ຂາປທໍ ນິຏ຺ຐິຕໍ ນວມໍ.