໑໐. ອຸຍ຺ໂຍຘິກສິກ຺ຂາປທໍ

໓໒໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ທິຣຕ຺ຕຕິຣຕ຺ຕໍ ເສນາຍ ວສມານາ ອຸຍ຺ໂຍຘິກມ຺ປິ ພລຄ຺ຄມ຺ປິ ເສນາພ຺ຍູຫມ຺ປິ ອນີກທສ຺ສນມ຺ປິ ຄຈ຺ຉນ຺ຕິ. ອຎ຺ຎຕໂຣປິ ຉພ຺ພຄ຺ຄິໂຍ ຠິກ຺ຂຸ ອຸຍ຺ໂຍຘິກໍ ຄນ຺ຕ຺ວາ ກຓ຺ເຑນ ປຏິວິທ຺ໂຘ ໂຫຕິ. ມນຸສ຺ສາ ຕໍ ຠິກ຺ຂຸໍ ອຸປ຺ປຓ຺ເຑສຸໍ – ‘‘ກຈ຺ຈິ, ຠນ຺ເຕ, ສຸຍຸທ຺ຘໍ ອໂຫສິ, ກຕິ ເຕ ລກ຺ຂານິ ລທ຺ຘານີ’’ຕິ? ໂສ ຠິກ຺ຂຸ ເຕຫິ ມນຸສ຺ເສຫິ ອຸປ຺ປຓ຺ຑີຍມາໂນ ມງ຺ກຸ ອໂຫສິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ອຸຍ຺ໂຍຘິກໍ ທສ຺ສນາຍ ອາຄຈ຺ຉິສ຺ສນ຺ຕິ! ອມ຺ຫາກມ຺ປິ ອລາຠາ, ອມ຺ຫາກມ຺ປິ ທຸລ຺ລທ຺ຘໍ, ເຍ ມຍໍ ອາຊີວສ຺ສ ເຫຕຸ ປຸຕ຺ຕທາຣສ຺ສ ກາຣຓາ ອຸຍ຺ໂຍຘິກໍ ອາຄຈ຺ຉາມາ’’ຕິ. ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ອຸຍ຺ໂຍຘິກໍ ທສ຺ສນາຍ ຄຈ຺ຉິສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ອຸຍ຺ໂຍຘິກໍ ທສ຺ສນາຍ ຄຈ຺ຉຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ອຸຍ຺ໂຍຘິກໍ ທສ຺ສນາຍ ຄຈ຺ຉິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໒໓. ‘‘ທິຣຕ຺ຕຕິຣຕ຺ຕໍ ເຈ ຠິກ຺ຂຸ ເສນາຍ ວສມາໂນ ອຸຍ຺ໂຍຘິກໍ ວາ ພລຄ຺ຄໍ ວາ ເສນາພ຺ຍູຫໍ ວາ ອນີກທສ຺ສນໍ ວາ ຄຈ຺ເຉຍ຺ຍ, ປາຈິຕ຺ຕິຍ’’ນ຺ຕິ.

໓໒໔. ທິຣຕ຺ຕຕິຣຕ຺ຕໍ ເຈ ຠິກ຺ຂຸ ເສນາຍ ວສມາໂນຕິ ທ຺ເວຕິສ຺ໂສ ຣຕ຺ຕິໂຍ ວສມາໂນ.

ອຸຍ຺ໂຍຘິກໍ ນາມ ຍຕ຺ຖ ສມ຺ປຫາໂຣ ທິສ຺ສຕິ.

ພລຄ຺ຄໍ ນາມ ເອຕ຺ຕກາ ຫຕ຺ຖີ, ເອຕ຺ຕກາ ອສ຺ສາ, ເອຕ຺ຕກາ ຣຖາ, ເອຕ຺ຕກາ ປຕ຺ຕີ.

ເສນາພ຺ຍູຫໍ ນາມ ອິໂຕ ຫຕ຺ຖີ ໂຫນ຺ຕຸ, ອິໂຕ ອສ຺ສາ ໂຫນ຺ຕຸ, ອິໂຕ ຣຖາ ໂຫນ຺ຕຸ, ອິໂຕ ປຕ຺ຕິກາ ໂຫນ຺ຕຸ.

ອນີກໍ ນາມ ຫຕ຺ຖານີກໍ, ອສ຺ສານີກໍ, ຣຖານີກໍ, ປຕ຺ຕານີກໍ. ຕໂຍ ຫຕ຺ຖີ ປຈ຺ຉິມໍ ຫຕ຺ຖານີກໍ, ຕໂຍ ອສ຺ສາ ປຈ຺ຉິມໍ ອສ຺ສານີກໍ, ຕໂຍ ຣຖາ ປຈ຺ຉິມໍ ຣຖານີກໍ, ຈຕ຺ຕາໂຣ ປຸຣິສາ ສຣຫຕ຺ຖາ ປຕ຺ຕີ ປຈ຺ຉິມໍ ປຕ຺ຕານີກໍ. ທສ຺ສນາຍ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິໂຕ ປສ຺ສຕິ, ອາປຕ຺ຕິ ປາຈິຕ຺ຕິຍສ຺ສ. ທສ຺ສນູປຈາຣໍ ວິຊຫິຕ຺ວາ ປຸນປ຺ປຸນໍ ປສ຺ສຕິ, ອາປຕ຺ຕິ ປາຈິຕ຺ຕິຍສ຺ສ.

ເອກເມກໍ ທສ຺ສນາຍ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິໂຕ ປສ຺ສຕິ, ອາປຕ຺ຕິ ທຸກ຺ກຏສ຺ສ. ທສ຺ສນູປຈາຣໍ ວິຊຫິຕ຺ວາ ປຸນປ຺ປຸນໍ ປສ຺ສຕິ, ອາປຕ຺ຕິ ທຸກ຺ກຏສ຺ສ.

໓໒໕. ອນາປຕ຺ຕິ ອາຣາເມ ຐິໂຕ ປສ຺ສຕິ, ຠິກ຺ຂຸສ຺ສ ຐິໂຕກາສໍ ວາ ນິສິນ຺ໂນກາສໍ ວາ ນິປນ຺ໂນກາສໍ ວາ ອາຄນ຺ຕ຺ວາ ສມ຺ປຫາໂຣ ທິສ຺ສຕິ, ປຏິປຖໍ ຄຈ຺ຉນ຺ໂຕ ປສ຺ສຕິ, ສຕິ ກຣຓີເຍ ຄນ຺ຕ຺ວາ ປສ຺ສຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອຸຍ຺ໂຍຘິກສິກ຺ຂາປທໍ ນິຏ຺ຐິຕໍ ທສມໍ.

ອເຈລກວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ປູວໍ ກໂຖປນນ຺ທສ຺ສ, ຕຍໍປຏ຺ຐາກເມວ ຈ;

ມຫານາໂມ ປເສນທິ, ເສນາວິທ຺ໂຘ ອິເມ ທສາຕິ [ອເຈລກໍ ອຸຍ຺ໂຍຊຎ຺ຈ, ສໂຠຊນໍ ທຸເວ ຣໂຫ; ສຠຕ຺ຕກຎ຺ຈ ເຠສຊ຺ຊໍ, ອຸຍ຺ຍຸຕ຺ຕໍ ເສນຸຍ຺ໂຍຘິກໍ].