໙. ປຓີຕໂຠຊນສິກ຺ຂາປທໍ

໒໕໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສນ຺ຕິ! ກສ຺ສ ສມ຺ປນ຺ນໍ ນ ມນາປໍ, ກສ຺ສ ສາທຸໍ ນ ຣຸຈ຺ຈຕີ’’ຕິ!! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສນ຺ຕີ’’ຕິ …ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ …ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຍານິ ໂຂ ປນ ຕານິ ປຓີຕໂຠຊນານິ, ເສຍ຺ຍຖິທໍ – ສປ຺ປິ ນວນີຕໍ ເຕລໍ ມຘຸ ຜາຓິຕໍ ມຈ຺ໂຉ ມໍສໍ ຂີຣໍ ທຘິ. ໂຍ ປນ ຠິກ຺ຂຸ ເອວຣູປານິ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ເຊຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໕໘. ເຕນ ໂຂ ປນ ສມເຍນ ຠິກ຺ຂູ ຄິລານາ ໂຫນ຺ຕິ. ຄິລານປຸຈ຺ຉກາ ຠິກ຺ຂູ ຄິລາເນ ຠິກ຺ຂູ ເອຕທໂວຈຸໍ – ‘‘ກຈ຺ຈາວຸໂສ ຂມນີຍໍ, ກຈ຺ຈິ ຍາປນີຍ’’ນ຺ຕິ? ‘‘ປຸພ຺ເພ ມຍໍ, ອາວຸໂສ, ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊາມ, ເຕນ ໂນ ຜາສຸ ໂຫຕິ; ອິທານິ ປນ ‘‘ຠຄວຕາ ປຏິກ຺ຂິຕ຺ຕ’’ນ຺ຕິ ກຸກ຺ກຸຈ຺ຈາຍນ຺ຕາ ນ ວິຎ຺ຎາເປມ, ເຕນ ໂນ ນ ຜາສຸ ໂຫຕີ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໕໙. ‘‘ຍານິ ໂຂ ປນ ຕານິ ປຓີຕໂຠຊນານິ, ເສຍ຺ຍຖິທໍ – ສປ຺ປິ ນວນີຕໍ ເຕລໍ ມຘຸ ຜາຓິຕໍ ມຈ຺ໂຉ ມໍສໍ ຂີຣໍ ທຘິ. ໂຍ ປນ ຠິກ຺ຂຸ ເອວຣູປານິ ປຓີຕໂຠຊນານິ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ເຊຍ຺ຍ, ປາຈິຕ຺ຕິຍ’’ນ຺ຕິ.

໒໖໐. ຍານິ ໂຂ ປນ ຕານິ ປຓີຕໂຠຊນານີຕິ ສປ຺ປິ ນາມ ໂຄສປ຺ປິ ວາ ອຊິກາສປ຺ປິ ວາ ມຫິໍສສປ຺ປິ ວາ, ເຍສໍ ມໍສໍ ກປ຺ປຕິ ເຕສໍ ສປ຺ປິ.

ນວນີຕໍ ນາມ ເຕສຎ຺ເຎວ ນວນີຕໍ.

ເຕລໍ ນາມ ຕິລເຕລໍ ສາສປເຕລໍ ມຘຸກເຕລໍ ເອຣຓ຺ຑເຕລໍ ວສາເຕລໍ.

ມຘຸ ນາມ ມກ຺ຂິກາມຘຸ.

ຜາຓິຕໍ ນາມ ອຸຈ຺ຉຸມ຺ຫາ ນິພ຺ພຕ຺ຕໍ.

ມຈ຺ໂຉ ນາມ ອຸທໂກ [ອຸທກຈໂຣ (ສ຺ຍາ. ກ.)] ວຸຈ຺ຈຕິ.

ມໍສໍ ນາມ ເຍສໍ ມໍສໍ ກປ຺ປຕິ, ເຕສໍ ມໍສໍ.

ຂີຣໍ ນາມ ໂຄຂີຣໍ ວາ ອຊິກາຂີຣໍ ວາ ມຫິໍສຂີຣໍ ວາ, ເຍສໍ ມໍສໍ ກປ຺ປຕິ, ເຕສໍ ຂີຣໍ.

ທຘິ ນາມ ເຕສຎ຺ເຎວ ທຘິ.

ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ເອວຣູປານິ ປຓີຕໂຠຊນານີຕິ ຕຖາຣູປານິ ປຓີຕໂຠຊນານິ.

ອຄິລາໂນ ນາມ ຍສ຺ສ ວິນາ ປຓີຕໂຠຊນານິ ຜາສຸ ໂຫຕິ.

ຄິລາໂນ ນາມ ຍສ຺ສ ວິນາ ປຓີຕໂຠຊນານິ ນ ຜາສຸ ໂຫຕິ.

ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕິ, ປໂຍເຄ [ປໂຍເຄ ປໂຍເຄ (ກ.)] ທຸກ຺ກຏໍ. ປຏິລາເຠນ ‘‘ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

໒໖໑. ອຄິລາໂນ ອຄິລານສຎ຺ຎີ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ອຄິລາໂນ ເວມຕິໂກ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ອຄິລາໂນ ຄິລານສຎ຺ຎີ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ.

ຄິລາໂນ ອຄິລານສຎ຺ຎີ, ອາປຕ຺ຕິ ທຸກ຺ກຏສ຺ສ. ຄິລາໂນ ເວມຕິໂກ, ອາປຕ຺ຕິ ທຸກ຺ກຏສ຺ສ. ຄິລາໂນ ຄິລານສຎ຺ຎີ ອນາປຕ຺ຕິ.

໒໖໒. ອນາປຕ຺ຕິ ຄິລານສ຺ສ, ຄິລາໂນ ຫຸຕ຺ວາ ວິຎ຺ຎາເປຕ຺ວາ ອຄິລາໂນ ຠຸຎ຺ຊຕິ, ຄິລານສ຺ສ ເສສກໍ ຠຸຎ຺ຊຕິ, ຎາຕການໍ ປວາຣິຕານໍ ອຎ຺ຎສ຺ສຕ຺ຖາຍ ອຕ຺ຕໂນ ຘເນນ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຓີຕໂຠຊນສິກ຺ຂາປທໍ ນິຏ຺ຐິຕໍ ນວມໍ.