໑໐. ທນ຺ຕໂປນສິກ຺ຂາປທໍ

໒໖໓. ເຕນ ສມເຍນ ພຸທ຺ໂຘ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ສພ຺ພປໍສຸກູລິໂກ ສຸສາເນ ວິຫຣຕິ. ໂສ ມນຸສ຺ເສຫິ ທິຍ຺ຍມານໍ ນ ອິຈ຺ຉຕິ ປຏິຄ຺ຄເຫຕຸໍ, ສຸສາເນປິ ຣຸກ຺ຂມູເລປິ ອຸມ຺ມາເຣປິ ອຍ຺ຍໂວສາຏິຕການິ ສາມໍ ຄເຫຕ຺ວາ ປຣິຠຸຎ຺ຊຕິ [ຠຸຎ຺ຊຕິ (ສ຺ຍາ.)]. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍໍ ຠິກ຺ຂຸ ອມ຺ຫາກໍ ອຍ຺ຍໂວສາຏິຕການິ ສາມໍ ຄເຫຕ຺ວາ ປຣິຠຸຎ຺ຊິສ຺ສຕິ! ເຖໂຣຍໍ ຠິກ຺ຂຸ ວຐໂຣ ມນຸສ຺ສມໍສໍ ມຎ຺ເຎ ຂາທຕີ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸ ອທິນ຺ນໍ ມຸຂທ຺ວາຣໍ ອາຫາຣໍ ອາຫຣິສ຺ສຕີ’’ຕິ…ເປ… ສຈ຺ຈໍ ກິຣ ຕ຺ວໍ, ຠິກ຺ຂຸ, ອທິນ຺ນໍ ມຸຂທ຺ວາຣໍ ອາຫາຣໍ ອາຫຣສີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ອທິນ຺ນໍ ມຸຂທ຺ວາຣໍ ອາຫາຣໍ ອາຫຣິສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂຸ ອທິນ຺ນໍ ມຸຂທ຺ວາຣໍ ອາຫາຣໍ ອາຫເຣຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໖໔. ເຕນ ໂຂ ປນ ສມເຍນ ຠິກ຺ຂູ ອຸທກທນ຺ຕໂປເນ [ອຸທກທນ຺ຕໂປເຓ (ສ຺ຍາ. ກ.)] ກຸກ຺ກຸຈ຺ຈາຍນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ອນຸຊານາມິ, ຠິກ຺ຂເວ, ອຸທກທນ຺ຕໂປນໍ ສາມໍ ຄເຫຕ຺ວາ ປຣິຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໖໕. ‘‘ໂຍ ປນ ຠິກ຺ຂຸ ອທິນ຺ນໍ ມຸຂທ຺ວາຣໍ ອາຫາຣໍ ອາຫເຣຍ຺ຍ, ອຎ຺ຎຕ຺ຣ ອຸທກທນ຺ຕໂປນາ, ປາຈິຕ຺ຕິຍ’’ນ຺ຕິ.

໒໖໖. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອທິນ຺ນໍ ນາມ ອປ຺ປຏິຄ຺ຄຫິຕກໍ ວຸຈ຺ຈຕິ.

ທິນ຺ນໍ ນາມ ກາເຍນ ວາ ກາຍປຏິພທ຺ເຘນ ວາ ນິສ຺ສຄ຺ຄິເຍນ ວາ ເທນ຺ເຕ ຫຕ຺ຖປາເສ ຐິໂຕ ກາເຍນ ວາ ກາຍປຏິພທ຺ເຘນ ວາ ປຏິຄ຺ຄຓ຺ຫາຕິ, ເອຕໍ ທິນ຺ນໍ ນາມ.

ອາຫາໂຣ ນາມ ອຸທກທນ຺ຕໂປນໍ ຐເປຕ຺ວາ ຍໍກິຎ຺ຈິ ອຊ຺ໂຌຫຣຓີຍໍ, ເອໂສ ອາຫາໂຣ ນາມ.

ອຎ຺ຎຕ຺ຣ ອຸທກທນ຺ຕໂປນາຕິ ຐເປຕ຺ວາ ອຸທກທນ຺ຕໂປນໍ.

‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

໒໖໗. ອປ຺ປຏິຄ຺ຄຫິຕເກ ອປ຺ປຏິຄ຺ຄຫິຕກສຎ຺ຎີ ອທິນ຺ນໍ ມຸຂທ຺ວາຣໍ ອາຫາຣໍ ອາຫາເຣຕິ, ອຎ຺ຎຕ຺ຣ ອຸທກທນ຺ຕໂປນາ, ອາປຕ຺ຕິ ປາຈິຕ຺ຕິຍສ຺ສ. ອປ຺ປຏິຄ຺ຄຫິຕເກ ເວມຕິໂກ ອທິນ຺ນໍ ມຸຂທ຺ວາຣໍ ອາຫາຣໍ ອາຫາເຣຕິ, ອຎ຺ຎຕ຺ຣ ອຸທກທນ຺ຕໂປນາ, ອາປຕ຺ຕິ ປາຈິຕ຺ຕິຍສ຺ສ. ອປ຺ປຏິຄ຺ຄຫິຕເກ ປຏິຄ຺ຄຫິຕກສຎ຺ຎີ ອທິນ຺ນໍ ມຸຂທ຺ວາຣໍ ອາຫາຣໍ ອາຫາເຣຕິ, ອຎ຺ຎຕ຺ຣ ອຸທກທນ຺ຕໂປນາ, ອາປຕ຺ຕິ ປາຈິຕ຺ຕິຍສ຺ສ.

ປຏິຄ຺ຄຫິຕເກ ອປ຺ປຏິຄ຺ຄຫິຕກສຎ຺ຎີ, ອາປຕ຺ຕິ ທຸກ຺ກຏສ຺ສ. ປຏິຄ຺ຄຫິຕເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ປຏິຄ຺ຄຫິຕເກ ປຏິຄ຺ຄຫິຕກສຎ຺ຎີ, ອນາປຕ຺ຕິ.

໒໖໘. ອນາປຕ຺ຕິ ອຸທກທນ຺ຕໂປເນ, ຈຕ຺ຕາຣິ ມຫາວິກຕານິ ສຕິ ປຈ຺ຈເຍ ອສຕິ ກປ຺ປິຍກາຣເກ ສາມໍ ຄເຫຕ຺ວາ ປຣິຠຸຎ຺ຊຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທນ຺ຕໂປນສິກ຺ຂາປທໍ ນິຏ຺ຐິຕໍ ທສມໍ.

ໂຠຊນວຄ຺ໂຄ ຈຕຸຕ຺ໂຖ.

ຕສ຺ສຸທ຺ທານໍ –

ປິຓ຺ໂຑ ຄຓໍ ປຣໍ ປູວໍ, ທ຺ເວ ຈ ວຸຕ຺ຕາ ປວາຣຓາ;

ວິກາເລ ສນ຺ນິຘີ ຂີຣໍ, ທນ຺ຕໂປເນນ ເຕ ທສາຕິ.