໕. ປຐມປວາຣຓາສິກ຺ຂາປທໍ

໒໓໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕໂຣ ພ຺ຣາຫ຺ມໂຓ ຠິກ຺ຂູ ນິມນ຺ເຕຕ຺ວາ ໂຠເຊສິ. ຠິກ຺ຂູ ຠຸຕ຺ຕາວີ ປວາຣິຕາ ຎາຕິກຸລານິ ຄນ຺ຕ຺ວາ ເອກຈ຺ເຈ ຠຸຎ຺ຊິໍສຸ ເອກຈ຺ເຈ ປິຓ຺ຑປາຕໍ ອາທາຍ ອຄມໍສຸ. ອຖ ໂຂ ໂສ ພ຺ຣາຫ຺ມໂຓ ປຏິວິສ຺ສເກ [ປຏິວິສເກ (ໂຍຊນາ)] ເອຕທໂວຈ – ‘‘ຠິກ຺ຂູ ມຍາ ອຍ຺ຍາ ສນ຺ຕປ຺ປິຕາ. ເອຖ, ຕຸມ຺ເຫປິ ສນ຺ຕປ຺ເປສ຺ສາມີ’’ຕິ. ເຕ ເອວມາຫໍສຸ – ‘‘ກິໍ ຕ຺ວໍ, ອຍ຺ໂຍ [ອຍ຺ຍ (ສ຺ຍາ.)], ອມ຺ເຫ ສນ຺ຕປ຺ເປສ຺ສສິ? ເຍປິ ຕຍາ ນິມນ຺ຕິຕາ ເຕປິ ອມ຺ຫາກໍ ຆຣານິ ອາຄນ຺ຕ຺ວາ ເອກຈ຺ເຈ ຠຸຎ຺ຊິໍສຸ ເອກຈ຺ເຈ ປິຓ຺ຑປາຕໍ ອາທາຍ ອຄມໍສູ’’ຕິ!

ອຖ ໂຂ ໂສ ພ຺ຣາຫ຺ມໂຓ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠທນ຺ຕາ ອມ຺ຫາກໍ ຆເຣ ຠຸຎ຺ຊິຕ຺ວາ ອຎ຺ຎຕ຺ຣ ຠຸຎ຺ຊິສ຺ສນ຺ຕິ! ນ ຈາຫໍ ປຏິພໂລ ຍາວທຕ຺ຖໍ ທາຕຸ’’ນ຺ຕິ! ອສ຺ໂສສຸໍ ໂຂ ຠິກ຺ຂູ ຕສ຺ສ ພ຺ຣາຫ຺ມຓສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂູ ຠຸຕ຺ຕາວີ ປວາຣິຕາ ອຎ຺ຎຕ຺ຣ ຠຸຎ຺ຊິສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂູ ຠຸຕ຺ຕາວີ ປວາຣິຕາ ອຎ຺ຎຕ຺ຣ ຠຸຎ຺ຊນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ເຕ, ຠິກ຺ຂເວ, ໂມຆປຸຣິສາ ຠຸຕ຺ຕາວີ ປວາຣິຕາ ອຎ຺ຎຕ຺ຣ ຠຸຎ຺ຊິສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂຸ ຠຸຕ຺ຕາວີ ປວາຣິໂຕ ຂາທນີຍໍ ວາ ໂຠຊນີຍໍ ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໓໗. ເຕນ ໂຂ ປນ ສມເຍນ ຠິກ຺ຂູ ຄິລານານໍ ຠິກ຺ຂູນໍ ປຓີເຕ ປິຓ຺ຑປາເຕ ນີຫຣນ຺ຕິ. ຄິລານາ ນ ຈິຕ຺ຕຣູປໍ ຠຸຎ຺ຊນ຺ຕິ. ຕານິ ຠິກ຺ຂູ ຉຏ຺ເຏນ຺ຕິ. ອສ຺ໂສສິ ໂຂ ຠຄວາ ອຸຈ຺ຈາສທ຺ທໍ ມຫາສທ຺ທໍ ກາໂກຣວສທ຺ທໍ. ສຸຕ຺ວານ ອາຍສ຺ມນ຺ຕໍ ອານນ຺ທໍ ອາມນ຺ເຕສິ – ‘‘ກິໍ ນຸ ໂຂ ໂສ, ອານນ຺ທ, ອຸຈ຺ຈາສທ຺ໂທ ມຫາສທ຺ໂທ ກາໂກຣວສທ຺ໂທ’’ຕິ? ອຖ ໂຂ ອາຍສ຺ມາ ອານນ຺ໂທ ຠຄວໂຕ ເອຕມຕ຺ຖໍ ອາໂຣເຈສິ. ‘‘ຠຸຎ຺ເຊຍ຺ຍຸໍ ປນານນ຺ທ, ຠິກ຺ຂູ ຄິລານາຕິຣິຕ຺ຕ’’ນ຺ຕິ. ‘‘ນ ຠຸຎ຺ເຊຍ຺ຍຸໍ, ຠຄວາ’’ຕິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ ຠິກ຺ຂເວ, ຄິລານສ຺ສ ຈ ອຄິລານສ຺ສ ຈ ອຕິຣິຕ຺ຕໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອຕິຣິຕ຺ຕໍ ກາຕພ຺ພໍ – ‘‘ອລເມຕໍ ສພ຺ພ’’ນ຺ຕິ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໓໘. ‘‘ໂຍ ປນ ຠິກ຺ຂຸ ຠຸຕ຺ຕາວີ ປວາຣິໂຕ ອນຕິຣິຕ຺ຕໍ ຂາທນີຍໍ ວາ ໂຠຊນີຍໍ ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປາຈິຕ຺ຕິຍ’’ນ຺ຕິ.

໒໓໙. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠຸຕ຺ຕາວີ ນາມ ປຎ຺ຈນ຺ນໍ ໂຠຊນານໍ ອຎ຺ຎຕຣໍ ໂຠຊນໍ ອນ຺ຕມໂສ ກຸສຄ຺ເຄນປິ ຠຸຕ຺ຕໍ ໂຫຕິ.

ປວາຣິໂຕ ນາມ ອສນໍ ປຎ຺ຎາຍຕິ, ໂຠຊນໍ ປຎ຺ຎາຍຕິ, ຫຕ຺ຖປາເສ ຐິໂຕ ອຠິຫຣຕິ, ປຏິກ຺ເຂໂປ ປຎ຺ຎາຍຕິ.

ອນຕິຣິຕ຺ຕໍ ນາມ ອກປ຺ປິຍກຕໍ ໂຫຕິ, ອປ຺ປຏິຄ຺ຄຫິຕກຕໍ ໂຫຕິ, ອນຸຈ຺ຈາຣິຕກຕໍ ໂຫຕິ, ອຫຕ຺ຖປາເສ ກຕໍ ໂຫຕິ, ອຠຸຕ຺ຕາວິນາ ກຕໍ ໂຫຕິ, ຠຸຕ຺ຕາວິນາ ປວາຣິເຕນ ອາສນາ ວຸຏ຺ຐິເຕນ ກຕໍ ໂຫຕິ, ‘‘ອລເມຕໍ ສພ຺ພນ຺ຕິ ອວຸຕ຺ຕໍ ໂຫຕິ, ນ ຄິລານາຕິຣິຕ຺ຕໍ ໂຫຕິ’’ – ເອຕໍ ອນຕິຣິຕ຺ຕໍ ນາມ.

ອຕິຣິຕ຺ຕໍ ນາມ ກປ຺ປິຍກຕໍ ໂຫຕິ, ປຏິຄ຺ຄຫິຕກຕໍ ໂຫຕິ, ອຸຈ຺ຈາຣິຕກຕໍ ໂຫຕິ, ຫຕ຺ຖປາເສ ກຕໍ ໂຫຕິ, ຠຸຕ຺ຕາວິນາ ກຕໍ ໂຫຕິ, ຠຸຕ຺ຕາວິນາ ປວາຣິເຕນ ອາສນາ ອວຸຏ຺ຐິເຕນ ກຕໍ ໂຫຕິ, ‘‘ອລເມຕໍ ສພ຺ພ’’ນ຺ຕິ ວຸຕ຺ຕໍ ໂຫຕິ, ຄິລານາຕິຣິຕ຺ຕໍ ໂຫຕິ – ເອຕໍ ອຕິຣິຕ຺ຕໍ ນາມ.

ຂາທນີຍໍ ນາມ ປຎ຺ຈ ໂຠຊນານິ – ຍາມກາລິກໍ ສຕ຺ຕາຫກາລິກໍ ຍາວຊີວິກໍ ຐເປຕ຺ວາ ອວເສສໍ ຂາທນີຍໍ ນາມ.

ໂຠຊນີຍໍ ນາມ ປຎ຺ຈ ໂຠຊນານິ – ໂອທໂນ, ກຸມ຺ມາໂສ, ສຕ຺ຕຸ, ມຈ຺ໂຉ, ມໍສໍ.

‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

໒໔໐. ອນຕິຣິຕ຺ເຕ ອນຕິຣິຕ຺ຕສຎ຺ຎີ ຂາທນີຍໍ ວາ ໂຠຊນີຍໍ ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອນຕິຣິຕ຺ເຕ ເວມຕິໂກ ຂາທນີຍໍ ວາ ໂຠຊນີຍໍ ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອນຕິຣິຕ຺ເຕ ອຕິຣິຕ຺ຕສຎ຺ຎີ ຂາທນີຍໍ ວາ ໂຠຊນີຍໍ ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ຍາມກາລິກໍ ສຕ຺ຕາຫກາລິກໍ ຍາວຊີວິກໍ ອາຫາຣຕ຺ຖາຍ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ອຕິຣິຕ຺ເຕ ອນຕິຣິຕ຺ຕສຎ຺ຎີ, ອາປຕ຺ຕິ ທຸກ຺ກຏສ຺ສ. ອຕິຣິຕ຺ເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອຕິຣິຕ຺ເຕ ອຕິຣິຕ຺ຕສຎ຺ຎີ, ອນາປຕ຺ຕິ.

໒໔໑. ອນາປຕ຺ຕິ ອຕິຣິຕ຺ຕໍ ກາຣາເປຕ຺ວາ ຠຸຎ຺ຊຕິ, ‘‘ອຕິຣິຕ຺ຕໍ ກາຣາເປຕ຺ວາ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອຎ຺ຎສ຺ສຕ຺ຖາຍ ຫຣນ຺ໂຕ ຄຈ຺ຉຕິ, ຄິລານສ຺ສ ເສສກໍ ຠຸຎ຺ຊຕິ, ຍາມກາລິກໍ ສຕ຺ຕາຫກາລິກໍ ຍາວຊີວິກໍ ສຕິ ປຈ຺ຈເຍ ປຣິຠຸຎ຺ຊຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຐມປວາຣຓາສິກ຺ຂາປທໍ ນິຏ຺ຐິຕໍ ປຎ຺ຈມໍ.