໖. ທຸຕິຍປວາຣຓາສິກ຺ຂາປທໍ

໒໔໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ທ຺ເວ ຠິກ຺ຂູ ໂກສເລສຸ ຊນປເທ ສາວຕ຺ຖິໍ ອທ຺ຘານມຄ຺ຄປ຺ປຏິປນ຺ນາ ໂຫນ຺ຕິ. ເອໂກ ຠິກ຺ຂຸ ອນາຈາຣໍ ອາຈຣຕິ. ທຸຕິໂຍ ຠິກ຺ຂຸ ຕໍ ຠິກ຺ຂຸໍ ເອຕທໂວຈ – ‘‘ມາວຸໂສ, ເອວຣູປມກາສິ, ເນຕໍ ກປ຺ປຕີ’’ຕິ. ໂສ ຕສ຺ມິໍ ອຸປນນ຺ຘິ. ອຖ ໂຂ ເຕ ຠິກ຺ຂູ ສາວຕ຺ຖິໍ ອຄມໍສຸ. ເຕນ ໂຂ ປນ ສມເຍນ ສາວຕ຺ຖິຍໍ ອຎ຺ຎຕຣສ຺ສ ປູຄສ຺ສ ສງ຺ຆຠຕ຺ຕໍ ໂຫຕິ. ທຸຕິໂຍ ຠິກ຺ຂຸ ຠຸຕ຺ຕາວີ ປວາຣິໂຕ ໂຫຕິ. ອຸປນທ຺ໂຘ [ອຸປນນ຺ໂຘ (ກ.)] ຠິກ຺ຂຸ ຎາຕິກຸລໍ ຄນ຺ຕ຺ວາ ປິຓ຺ຑປາຕໍ ອາທາຍ ເຍນ ໂສ ຠິກ຺ຂຸ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ຠິກ຺ຂຸໍ ເອຕທໂວຈ – ‘‘ຠຸຎ຺ຊາຫິ, ອາວຸໂສ’’ຕິ. ‘‘ອລໍ, ອາວຸໂສ, ປຣິປຸຓ຺ໂຓມ຺ຫີ’’ຕິ. ‘‘ສຸນ຺ທໂຣ, ອາວຸໂສ, ປິຓ຺ຑປາໂຕ, ຠຸຎ຺ຊາຫີ’’ຕິ. ອຖ ໂຂ ໂສ ຠິກ຺ຂຸ ເຕນ ຠິກ຺ຂຸນາ ນິປ຺ປີຬິຍມາໂນ ຕໍ ປິຓ຺ຑປາຕໍ ຠຸຎ຺ຊິ. ອຸປນທ຺ໂຘ ຠິກ຺ຂຸ ຕໍ ຠິກ຺ຂຸໍ ເອຕທໂວຈ – ‘‘ຕ຺ວມ຺ປິ [ຕ຺ວໍ ຫິ (ສ຺ຍາ.)] ນາມ, ອາວຸໂສ, ມໍ ວຕ຺ຕພ຺ພໍ ມຎ຺ຎສິ ຍໍ ຕ຺ວໍ ຠຸຕ຺ຕາວີ ປວາຣິໂຕ ອນຕິຣິຕ຺ຕໍ ໂຠຊນໍ ຠຸຎ຺ຊສີ’’ຕິ. ‘‘ນນຸ, ອາວຸໂສ, ອາຈິກ຺ຂິຕພ຺ພ’’ນ຺ຕິ. ‘‘ນນຸ, ອາວຸໂສ, ປຸຈ຺ຉິຕພ຺ພ’’ນ຺ຕິ.

ອຖ ໂຂ ໂສ ຠິກ຺ຂຸ ຠິກ຺ຂູນໍ ເອຕມຕ຺ຖໍ ອາໂຣເຈສິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸ ຠິກ຺ຂຸໍ ຠຸຕ຺ຕາວິໍ ປວາຣິຕໍ ອນຕິຣິຕ຺ເຕນ ໂຠຊເນນ ອຠິຫຏ຺ຐຸໍ ປວາເຣສ຺ສຕີ’’ ຕິ…ເປ… ສຈ຺ຈໍ ກິຣ ຕ຺ວໍ, ຠິກ຺ຂຸ, ຠິກ຺ຂຸໍ ຠຸຕ຺ຕາວິໍ ປວາຣິຕໍ ອນຕິຣິຕ຺ເຕນ ໂຠຊເນນ ອຠິຫຏ຺ຐຸໍ ປວາເຣສີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ຠິກ຺ຂຸໍ ຠຸຕ຺ຕາວິໍ ປວາຣິຕໍ ອນຕິຣິຕ຺ເຕນ ໂຠຊເນນ ອຠິຫຏ຺ຐຸໍ ປວາເຣສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ ຠິກ຺ຂເວ ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໔໓. ‘‘ໂຍ ປນ ຠິກ຺ຂຸ ຠິກ຺ຂຸໍ ຠຸຕ຺ຕາວິໍ ປວາຣິຕໍ ອນຕິຣິຕ຺ເຕນ ຂາທນີເຍນ ວາ ໂຠຊນີເຍນ ວາ ອຠິຫຏ຺ຐຸໍ ປວາເຣຍ຺ຍ – ‘ຫນ຺ທ, ຠິກ຺ຂຸ, ຂາທ ວາ ຠຸຎ຺ຊ ວາ’ຕິ, ຊານໍ ອາສາທນາເປກ຺ໂຂ, ຠຸຕ຺ຕສ຺ມິໍ, ປາຈິຕ຺ຕິຍ’’ນ຺ຕິ.

໒໔໔. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂຸນ຺ຕິ ອຎ຺ຎໍ ຠິກ຺ຂຸໍ.

ຠຸຕ຺ຕາວີ ນາມ ປຎ຺ຈນ຺ນໍ ໂຠຊນານໍ ອຎ຺ຎຕຣໍ ໂຠຊນໍ, ອນ຺ຕມໂສ ກຸສຄ຺ເຄນປິ ຠຸຕ຺ຕໍ ໂຫຕິ.

ປວາຣິໂຕ ນາມ ອສນໍ ປຎ຺ຎາຍຕິ, ໂຠຊນໍ ປຎ຺ຎາຍຕິ, ຫຕ຺ຖປາເສ ຐິໂຕ ອຠິຫຣຕິ, ປຏິກ຺ເຂໂປ ປຎ຺ຎາຍຕິ.

ອນຕິຣິຕ຺ຕໍ ນາມ ອກປ຺ປິຍກຕໍ ໂຫຕິ, ອປ຺ປຏິຄ຺ຄຫິຕກຕໍ ໂຫຕິ, ອນຸຈ຺ຈາຣິຕກຕໍ ໂຫຕິ, ອຫຕ຺ຖປາເສ ກຕໍ ໂຫຕິ, ອຠຸຕ຺ຕາວິນາ ກຕໍ ໂຫຕິ, ຠຸຕ຺ຕາວິນາ ປວາຣິເຕນ ອາສນາ ວຸຏ຺ຐິເຕນ ກຕໍ ໂຫຕິ, ‘‘ອລເມຕໍ ສພ຺ພ’’ນ຺ຕິ ອວຸຕ຺ຕໍ ໂຫຕິ, ນ ຄິລານາຕິຣິຕ຺ຕໍ ໂຫຕິ – ເອຕໍ ອນຕິຣິຕ຺ຕໍ ນາມ.

ຂາທນີຍໍ ນາມ ປຎ຺ຈ ໂຠຊນານິ – ຍາມກາລິກໍ ສຕ຺ຕາຫກາລິກໍ ຍາວຊີວິກໍ ຐເປຕ຺ວາ ອວເສສໍ ຂາທນີຍໍ ນາມ.

ໂຠຊນີຍໍ ນາມ ປຎ຺ຈ ໂຠຊນານິ – ໂອທໂນ, ກຸມ຺ມາໂສ, ສຕ຺ຕຸ, ມຈ຺ໂຉ, ມໍສໍ.

ອຠິຫຏ຺ຐຸໍ ປວາເຣຍ຺ຍາຕິ ຍາວຕກໍ ອິຈ຺ຉສິ ຕາວຕກໍ ຄຓ຺ຫາຫີຕິ.

ຊານາຕິ ນາມ ສາມໍ ວາ ຊານາຕິ, ອຎ຺ເຎ ວາ ຕສ຺ສ ອາໂຣເຈນ຺ຕິ, ໂສ ວາ ອາໂຣເຈຕິ.

ອາສາທນາເປກ຺ໂຂຕິ ‘‘ອິມິນາ ອິມໍ ໂຈເທສ຺ສາມິ ສາເຣສ຺ສາມິ ປຏິໂຈເທສ຺ສາມິ ປຏິສາເຣສ຺ສາມິ ມງ຺ກຸ ກຣິສ຺ສາມີ’’ຕິ ອຠິຫຣຕິ, ອາປຕ຺ຕິ ທຸກ຺ກຏສ຺ສ. ຕສ຺ສ ວຈເນນ ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ໂຠຊນປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ.

໒໔໕. ປວາຣິເຕ ປວາຣິຕສຎ຺ຎີ ອນຕິຣິຕ຺ເຕນ ຂາທນີເຍນ ວາ ໂຠຊນີເຍນ ວາ ອຠິຫຏ຺ຐຸໍ ປວາເຣຕິ, ອາປຕ຺ຕິ ປາຈິຕ຺ຕິຍສ຺ສ. ປວາຣິເຕ ເວມຕິໂກ ອນຕິຣິຕ຺ເຕນ ຂາທນີເຍນ ວາ ໂຠຊນີເຍນ ວາ ອຠິຫຏ຺ຐຸໍ ປວາເຣຕິ, ອາປຕ຺ຕິ ທຸກ຺ກຏສ຺ສ. ປວາຣິເຕ ອປ຺ປວາຣິຕສຎ຺ຎີ ອນຕິຣິຕ຺ເຕນ ຂາທນີເຍນ ວາ ໂຠຊນີເຍນ ວາ ອຠິຫຏ຺ຐຸໍ ປວາເຣຕິ, ອນາປຕ຺ຕິ. ຍາມກາລິກໍ ສຕ຺ຕາຫກາລິກໍ ຍາວຊີວິກໍ ອາຫາຣຕ຺ຖາຍ ອຠິຫຣຕິ, ອາປຕ຺ຕິ ທຸກ຺ກຏສ຺ສ. ຕສ຺ສ ວຈເນນ ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ອປ຺ປວາຣິເຕ ປວາຣິຕສຎ຺ຎີ, ອາປຕ຺ຕິ ທຸກ຺ກຏສ຺ສ. ອປ຺ປວາຣິເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອປ຺ປວາຣິເຕ ອປ຺ປວາຣິຕສຎ຺ຎີ, ອນາປຕ຺ຕິ.

໒໔໖. ອນາປຕ຺ຕິ ອຕິຣິຕ຺ຕໍ ກາຣາເປຕ຺ວາ ເທຕິ, ‘‘ອຕິຣິຕ຺ຕໍ ກາຣາເປຕ຺ວາ ຠຸຎ຺ຊາຫີ’’ຕິ ເທຕິ, ອຎ຺ຎສ຺ສຕ຺ຖາຍ ຫຣນ຺ໂຕ ຄຈ຺ຉາຫີຕິ ເທຕິ, ຄິລານສ຺ສ ເສສກໍ ເທຕິ, ‘‘ຍາມກາລິກໍ ສຕ຺ຕາຫກາລິກໍ ຍາວຊີວິກໍ ສຕິ ປຈ຺ຈເຍ ປຣິຠຸຎ຺ຊາ’’ຕິ ເທຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທຸຕິຍປວາຣຓາສິກ຺ຂາປທໍ ນິຏ຺ຐິຕໍ ຉຏ຺ຐໍ.