໔. ກາຓມາຕຸສິກ຺ຂາປທໍ

໒໓໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ກາຓມາຕາ ອຸປາສິກາ ສທ຺ຘາ ໂຫຕິ ປສນ຺ນາ. ກາຓາ ຄາມເກ ອຎ຺ຎຕຣສ຺ສ ປຸຣິສສ຺ສ ທິນ຺ນາ ໂຫຕິ. ອຖ ໂຂ ກາຓາ ມາຕຸຆຣໍ ອຄມາສິ ເກນຈິເທວ ກຣຓີເຍນ. ອຖ ໂຂ ກາຓາຍ ສາມິໂກ ກາຓາຍ ສນ຺ຕິເກ ທູຕໍ ປາເຫສິ – ‘‘ອາຄຈ຺ຉຕຸ ກາຓາ, ອິຈ຺ຉາມິ ກາຓາຍ ອາຄຕ’’ນ຺ຕິ. ອຖ ໂຂ ກາຓມາຕາ ອຸປາສິກາ ‘‘ກິສ຺ມິໍ ວິຍ ຣິຕ຺ຕຫຕ຺ຖໍ ຄນ຺ຕຸ’’ນ຺ຕິ ປູວໍ [ປູປໍ (ຓ຺ວາທິ)] ປຈິ. ປກ຺ເກ ປູເວ ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ກາຓມາຕາຍ ອຸປາສິກາຍ ນິເວສນໍ ປາວິສິ. ອຖ ໂຂ ກາຓມາຕາ ອຸປາສິກາ ຕສ຺ສ ຠິກ຺ຂຸໂນ ປູວໍ ທາເປສິ. ໂສ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ປູວໍ ທາເປສິ. ໂສປິ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ປູວໍ ທາເປສິ. ຍຖາປຏິຍຕ຺ຕໍ ປູວໍ ປຣິກ຺ຂຍໍ ອຄມາສິ. ທຸຕິຍມ຺ປິ ໂຂ ກາຓາຍ ສາມິໂກ ກາຓາຍ ສນ຺ຕິເກ ທູຕໍ ປາເຫສິ – ‘‘ອາຄຈ຺ຉຕຸ ກາຓາ, ອິຈ຺ຉາມິ ກາຓາຍ ອາຄຕ’’ນ຺ຕິ. ທຸຕິຍມ຺ປິ ໂຂ ກາຓມາຕາ ອຸປາສິກາ ‘‘ກິສ຺ມິໍ ວິຍ ຣິຕ຺ຕຫຕ຺ຕໍ ຄນ຺ຕຸ’’ນ຺ຕິ ປູວໍ ປຈິ. ປກ຺ເກ ປູເວ ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ກາຓມາຕາຍ ອຸປາສິກາຍ ນິເວສນໍ ປາວິສິ. ອຖ ໂຂ ກາຓມາຕາ ອຸປາສິກາ ຕສ຺ສ ຠິກ຺ຂຸໂນ ປູວໍ ທາເປສິ. ໂສ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ປູວໍ ທາເປສິ. ໂສປິ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ປູວໍ ທາເປສິ. ຍຖາປຏິຍຕ຺ຕໍ ປູວໍ ປຣິກ຺ຂຍໍ ອຄມາສິ. ຕຕິຍມ຺ປິ ໂຂ ກາຓາຍ ສາມິໂກ ກາຓາຍ ສນ຺ຕິເກ ທູຕໍ ປາເຫສິ – ‘‘ອາຄຈ຺ຉຕຸ ກາຓາ, ອິຈ຺ຉາມິ ກາຓາຍ ອາຄຕໍ. ສເຈ ກາຓາ ນາຄຈ຺ຉິສ຺ສຕິ, ອຫໍ ອຎ຺ຎໍ ປຊາປຕິໍ ອາເນສ຺ສາມີ’’ຕິ. ຕຕິຍມ຺ປິ ໂຂ ກາຓມາຕາ ອຸປາສິກາ ກິສ຺ມິໍ ວິຍ ຣິຕ຺ຕຫຕ຺ຖໍ ຄນ຺ຕຸນ຺ຕິ ປູວໍ ປຈິ. ປກ຺ເກ ປູເວ ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ກາຓມາຕາຍ ອຸປາສິກາຍ ນິເວສນໍ ປາວິສິ. ອຖ ໂຂ ກາຓມາຕາ ອຸປາສິກາ ຕສ຺ສ ຠິກ຺ຂຸໂນ ປູວໍ ທາເປສິ. ໂສ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ປູວໍ ທາເປສິ. ໂສປິ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ປູວໍ ທາເປສິ. ຍຖາປຏິຍຕ຺ຕໍ ປູວໍ ປຣິກ຺ຂຍໍ ອຄມາສິ. ອຖ ໂຂ ກາຓາຍ ສາມິໂກ ອຎ຺ຎໍ ປຊາປຕິໍ ອາເນສິ.

ອສ຺ໂສສິ ໂຂ ກາຓາ – ‘‘ເຕນ ກິຣ ປຸຣິເສນ ອຎ຺ຎາ ປຊາປຕິ ອານີຕາ’’ຕິ. ສາ ໂຣທນ຺ຕີ ອຏ຺ຐາສິ. ອຖ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ກາຓມາຕາຍ ອຸປາສິກາຍ ນິເວສນໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ກາຓມາຕາ ອຸປາສິກາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ກາຓມາຕຣໍ ອຸປາສິກໍ ຠຄວາ ເອຕທໂວຈ – ‘‘ກິສ຺ສາຍໍ ກາຓາ ໂຣທຕີ’’ຕິ? ອຖ ໂຂ ກາຓມາຕາ ອຸປາສິກາ ຠຄວໂຕ ເອຕມຕ຺ຖໍ ອາໂຣເຈສິ. ອຖ ໂຂ ຠຄວາ ກາຓມາຕຣໍ ອຸປາສິກໍ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ ອຸຏ຺ຐາຍາສນາ ປກ຺ກາມິ.

໒໓໑. ເຕນ ໂຂ ປນ ສມເຍນ ອຎ຺ຎຕໂຣ ສຕ຺ໂຖ ຣາຊຄຫາ ປຏິຍາໂລກໍ ຄນ຺ຕຸກາໂມ ໂຫຕິ. ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ຕໍ ສຕ຺ຖໍ ປິຓ຺ຑາຍ ປາວິສິ. ອຎ຺ຎຕໂຣ ອຸປາສໂກ ຕສ຺ສ ຠິກ຺ຂຸໂນ ສຕ຺ຕຸໍ ທາເປສິ. ໂສ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ສຕ຺ຕຸໍ ທາເປສິ. ໂສ ນິກ຺ຂມິຕ຺ວາ ອຎ຺ຎສ຺ສ ອາຈິກ຺ຂິ. ຕສ຺ສປິ ສຕ຺ຕຸໍ ທາເປສິ. ຍຖາປຏິຍຕ຺ຕໍ ປາເຖຍ຺ຍໍ ປຣິກ຺ຂຍໍ ອຄມາສິ. ອຖ ໂຂ ໂສ ອຸປາສໂກ ເຕ ມນຸສ຺ເສ ເອຕທໂວຈ – ‘‘ອຊ຺ຊຓ຺ໂຫ, ອຍ຺ຍາ, ອາຄເມຖ, ຍຖາປຏິຍຕ຺ຕໍ ປາເຖຍ຺ຍໍ ອຍ຺ຍານໍ ທິນ຺ນໍ. ປາເຖຍ຺ຍໍ ປຏິຍາເທສ຺ສາມີ’’ຕິ. ‘‘ນາຍ຺ໂຍ [ນາຍ຺ຍ (ສ຺ຍາ.)] ສກ຺ກາ ອາຄເມຕຸໍ, ປຍາໂຕ ສຕ຺ໂຖ’’ຕິ ອຄມໍສຸ. ອຖ ໂຂ ຕສ຺ສ ອຸປາສກສ຺ສ ປາເຖຍ຺ຍໍ ປຏິຍາເທຕ຺ວາ ປຈ຺ຉາ ຄຈ຺ຉນ຺ຕສ຺ສ ໂຈຣາ ອຈ຺ຉິນ຺ທິໍສຸ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ນ ມຕ຺ຕໍ ຊານິຕ຺ວາ ປຏິຄ຺ຄເຫສ຺ສນ຺ຕິ! ອຍໍ ອິເມສໍ ທຕ຺ວາ ປຈ຺ຉາ ຄຈ຺ຉນ຺ໂຕ ໂຈເຣຫິ ອຈ຺ຉິນ຺ໂນ’’ຕິ. ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ເຕນ ຫິ, ຠິກ຺ຂເວ, ຠິກ຺ຂູນໍ ສິກ຺ຂາປທໍ ປຎ຺ຎເປສ຺ສາມິ ທສ ອຕ຺ຖວເສ ປຏິຈ຺ຈ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ…ເປ… ວິນຍານຸຄ຺ຄຫາຍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໓໒. ‘‘ຠິກ຺ຂຸໍ ປເນວ ກຸລໍ ອຸປຄຕໍ ປູເວຫິ ວາ ມນ຺ເຖຫິ ວາ ອຠິຫຏ຺ຐຸໍ ປວາເຣຍ຺ຍ, ອາກງ຺ຂມາເນນ ຠິກ຺ຂຸນາ ທ຺ວຕ຺ຕິປຕ຺ຕປູຣາ ປຏິຄ຺ຄເຫຕພ຺ພາ ຕໂຕ ເຈ ອຸຕ຺ຕຣິ ປຏິຄ຺ຄຓ຺ເຫຍ຺ຍ ປາຈິຕ຺ຕິຍໍ. ທ຺ວຕ຺ຕິປຕ຺ຕປູເຣ ປຏິຄ຺ຄເຫຕ຺ວາ ຕໂຕ ນີຫຣິຕ຺ວາ ຠິກ຺ຂູຫິ ສທ຺ຘິໍ ສໍວິຠຊິຕພ຺ພໍ. ອຍໍ ຕຕ຺ຖ ສາມີຈີ’’ຕິ.

໒໓໓. ຠິກ຺ຂຸໍ ປເນວ ກຸລໍ ອຸປຄຕນ຺ຕິ ກຸລໍ ນາມ ຈຕ຺ຕາຣິ ກຸລານິ – ຂຕ຺ຕິຍກຸລໍ, ພ຺ຣາຫ຺ມຓກຸລໍ, ເວສ຺ສກຸລໍ, ສຸທ຺ທກຸລໍ.

ອຸປຄຕນ຺ຕິ ຕຕ຺ຖ ຄຕໍ.

ປູວໍ ນາມ ຍໍກິຎ຺ຈິ ປເຫຓກຕ຺ຖາຍ ປຏິຍຕ຺ຕໍ.

ມນ຺ຖໍ ນາມ ຍໍກິຎ຺ຈິ ປາເຖຍ຺ຍຕ຺ຖາຍ ປຏິຍຕ຺ຕໍ.

ອຠິຫຏ຺ຐຸໍ ປວາເຣຍ຺ຍາຕິ ຍາວຕກໍ ອິຈ຺ຉສິ ຕາວຕກໍ ຄຓ຺ຫາຫີຕິ.

ອາກງ຺ຂມາເນນາຕິ ອິຈ຺ຉມາເນນ.

ທ຺ວຕ຺ຕິປຕ຺ຕປູຣາ ປຏິຄ຺ຄເຫຕພ຺ພາຕິ ທ຺ເວຕໂຍ ປຕ຺ຕປູຣາ ປຏິຄ຺ຄເຫຕພ຺ພາ.

ຕໂຕ ເຈ ອຸຕ຺ຕຣິ ປຏິຄຓ຺ເຫຍ຺ຍາຕິ ຕຕຸຕ຺ຕຣິ ປຏິຄ຺ຄຓ຺ຫາຕິ, ອາປຕ຺ຕິ ປາຈິຕ຺ຕິຍສ຺ສ.

ທ຺ວຕ຺ຕິປຕ຺ຕປູເຣ ປຏິຄ຺ຄເຫຕ຺ວາ ຕໂຕ ນິກ຺ຂມນ຺ເຕນ ຠິກ຺ຂຸໍ ປສ຺ສິຕ຺ວາ ອາຈິກ຺ຂິຕພ຺ພໍ – ‘‘ອມຸຕ຺ຣ ມຍາ ທ຺ວຕ຺ຕິປຕ຺ຕປູຣາ ປຏິຄ຺ຄຫິຕາ, ມາ ໂຂ ຕຕ຺ຖ ປຏິຄ຺ຄຓ຺ຫີ’’ຕິ. ສເຈ ປສ຺ສິຕ຺ວາ ນ ອາຈິກ຺ຂຕິ, ອາປຕ຺ຕິ ທຸກ຺ກຏສ຺ສ. ສເຈ ອາຈິກ຺ຂິເຕ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ.

ຕໂຕ ນີຫຣິຕ຺ວາ ຠິກ຺ຂູຫິ ສທ຺ຘິໍ ສໍວິຠຊິຕພ຺ພນ຺ຕິ ປຏິກ຺ກມນໍ ນີຫຣິຕ຺ວາ ສໍວິຠຊິຕພ຺ພໍ.

ອຍໍ ຕຕ຺ຖ ສາມີຈີຕິ ອຍໍ ຕຕ຺ຖ ອນຸຘມ຺ມຕາ.

໒໓໔. ອຕິເຣກທ຺ວຕ຺ຕິປຕ຺ຕປູເຣ ອຕິເຣກສຎ຺ຎີ ປຏິຄ຺ຄຓ຺ຫາຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກທ຺ວຕ຺ຕິປຕ຺ຕປູເຣ ເວມຕິໂກ ປຏິຄ຺ຄຓ຺ຫາຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກທ຺ວຕ຺ຕິປຕ຺ຕປູເຣ ອູນກສຎ຺ຎີ ປຏິຄ຺ຄຓ຺ຫາຕິ, ອາປຕ຺ຕິ ປາຈິຕ຺ຕິຍສ຺ສ.

ອູນກທ຺ວຕ຺ຕິປຕ຺ຕປູເຣ ອຕິເຣກສຎ຺ຎີ, ອາປຕ຺ຕິ ທຸກ຺ກຏສ຺ສ. ອູນກທ຺ວຕ຺ຕິປຕ຺ຕປູເຣ ເວມຕິໂກ, ອາປຕ຺ຕິ ທຸກ຺ກຏສ຺ສ. ອູນກທ຺ວຕ຺ຕິປຕ຺ຕປູເຣ ອູນກສຎ຺ຎີ, ອນາປຕ຺ຕິ.

໒໓໕. ອນາປຕ຺ຕິ ທ຺ວຕ຺ຕິປຕ຺ຕປູເຣ ປຏິຄ຺ຄຓ຺ຫາຕິ, ອູນກທ຺ວຕ຺ຕິປຕ຺ຕປູເຣ ປຏິຄ຺ຄຓ຺ຫາຕິ, ນ ປເຫຓກຕ຺ຖາຍ ນ ປາເຖຍ຺ຍຕ຺ຖາຍ ປຏິຍຕ຺ຕໍ ເທນ຺ຕິ, ປເຫຓກຕ຺ຖາຍ ວາ ປາເຖຍ຺ຍຕ຺ຖາຍ ວາ ປຏິຍຕ຺ຕເສສກໍ ເທນ຺ຕິ, ຄມເນ ປຏິປ຺ປສ຺ສທ຺ເຘ ເທນ຺ຕິ, ຎາຕການໍ ປວາຣິຕານໍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ກາຓມາຕຸສິກ຺ຂາປທໍ ນິຏ຺ຐິຕໍ ຈຕຸຕ຺ຖໍ.