໙. ມຫລ຺ລກວິຫາຣສິກ຺ຂາປທໍ

໑໓໔. ເຕນ ສມເຍນ ພຸທ຺ໂຘ ຠຄວາ ໂກສມ຺ພິຍໍ ວິຫຣຕິ ໂຆສິຕາຣາເມ. ເຕນ ໂຂ ປນ ສມເຍນ ອາຍສ຺ມໂຕ ຉນ຺ນສ຺ສ ອຸປຏ຺ຐາໂກ ມຫາມຕ຺ໂຕ ອາຍສ຺ມໂຕ ຉນ຺ນສ຺ສ ວິຫາຣໍ ກາຣາເປຕິ. ອຖ ໂຂ ອາຍສ຺ມາ ຉນ຺ໂນ ກຕປຣິໂຍສິຕໍ ວິຫາຣໍ ປຸນປ຺ປຸນໍ ຉາທາເປຕິ, ປຸນປ຺ປຸນໍ ເລປາເປຕິ. ອຕິຠາຣິໂຕ ວິຫາໂຣ ປຣິປຕິ. ອຖ ໂຂ ອາຍສ຺ມາ ຉນ຺ໂນ ຕິຓຎ຺ຈ ກຏ຺ຐຎ຺ຈ ສໍກຑ຺ຒນ຺ໂຕ ອຎ຺ຎຕຣສ຺ສ ພ຺ຣາຫ຺ມຓສ຺ສ ຍວເຂຕ຺ຕໍ ທູເສສິ. ອຖ ໂຂ ໂສ ພ຺ຣາຫ຺ມໂຓ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠທນ຺ຕາ ອມ຺ຫາກໍ ຍວເຂຕ຺ຕໍ ທູເສສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂູ ຕສ຺ສ ພ຺ຣາຫ຺ມຓສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ຉນ຺ໂນ ກຕປຣິໂຍສິຕໍ ວິຫາຣໍ ປຸນປ຺ປຸນໍ ຉາທາເປສ຺ສຕິ, ປຸນປ຺ປຸນໍ ເລປາເປສ຺ສຕິ, ອຕິຠາຣິໂຕ ວິຫາໂຣ ປຣິປຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ຉນ຺ນໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕ຺ວໍ, ຉນ຺ນ, ກຕປຣິໂຍສິຕໍ ວິຫາຣໍ ປຸນປ຺ປຸນໍ ຉາທາເປສິ, ປຸນປ຺ປຸນໍ ເລປາເປສິ, ອຕິຠາຣິໂຕ ວິຫາໂຣ ປຣິປຕີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ກຕປຣິໂຍສິຕໍ ວິຫາຣໍ ປຸນປ຺ປຸນໍ ຉາທາເປສ຺ສສິ, ປຸນປ຺ປຸນໍ ເລປາເປສ຺ສສິ, ອຕິຠາຣິໂຕ ວິຫາໂຣ ປຣິປຕິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໑໓໕. ‘‘ມຫລ຺ລກໍ ປນ ຠິກ຺ຂຸນາ ວິຫາຣໍ ກາຣຍມາເນນ ຍາວທ຺ວາຣໂກສາ ອຄ຺ຄຬຏ຺ຐປນາຍ ອາໂລກສນ຺ຘິປຣິກມ຺ມາຍ ທ຺ວຕ຺ຕິຈ຺ຉທນສ຺ສ ປຣິຍາຍ ອປ຺ປຫຣິເຕ ຐິເຕນ ອຘິຏ຺ຐາຕພ຺ພໍ. ຕໂຕ ເຈ ອຸຕ຺ຕຣິໍ ອປ຺ປຫຣິເຕປິ ຐິໂຕ ອຘິຏ຺ຐເຫຍ຺ຍ ປາຈິຕ຺ຕິຍ’’ນ຺ຕິ.

໑໓໖. ມຫລ຺ລໂກ ນາມ ວິຫາໂຣ ສສ຺ສາມິໂກ ວຸຈ຺ຈຕິ.

ວິຫາໂຣ ນາມ ອຸລ຺ລິຕ຺ໂຕ ວາ ໂຫຕິ ອວລິຕ຺ໂຕ ວາ ອຸລ຺ລິຕ຺ຕາວລິຕ຺ໂຕ ວາ.

ກາຣຍມາເນນາຕິ ກໂຣນ຺ໂຕ ວາ ກາຣາເປນ຺ໂຕ ວາ.

ຍາວ ທ຺ວາຣໂກສາຕິ ປິຏ຺ຐສງ຺ຆາຏສ຺ສ [ປີຐສໍຆາຏສ຺ສ (ອິຕິປິ), ປິຏ຺ຐິສງ຺ຆາຏສ຺ສ (ສ຺ຍາ.)] ສມນ຺ຕາ ຫຕ຺ຖປາສາ.

ອຄ຺ຄຬຏ຺ຐປນາຍາຕິ ທ຺ວາຣຏ຺ຐປນາຍ.

ອາໂລກສນ຺ຘິປຣິກມ຺ມາຍາຕິ ວາຕປານປຣິກມ຺ມາຍ ເສຕວຓ຺ຓໍ ກາຬວຓ຺ຓໍ ເຄຣຸກປຣິກມ຺ມໍ ມາລາກມ຺ມໍ ລຕາກມ຺ມໍ ມກຣທນ຺ຕກໍ ປຎ຺ຈປຏິກໍ.

ທ຺ວຕ຺ຕິຈ຺ຉທນສ຺ສ ປຣິຍາຍໍ ອປ຺ປຫຣິເຕ ຐິເຕນ ອຘິຏ຺ຐາຕພ຺ພນ຺ຕິ – ຫຣິຕໍ ນາມ ປຸພ຺ພຓ຺ຓໍ ອປຣຓ຺ຓໍ. ສເຈ ຫຣິເຕ ຐິໂຕ ອຘິຏ຺ຐາຕິ, ອາປຕ຺ຕິ ທຸກ຺ກຏສ຺ສ. ມຄ຺ເຄນ ຉາເທນ຺ຕສ຺ສ ທ຺ເວ ມຄ຺ເຄ ອຘິຏ຺ຐຫິຕ຺ວາ ຕຕິຍໍ ມຄ຺ຄໍ ອາຓາເປຕ຺ວາ ປກ຺ກມິຕພ຺ພໍ. ປຣິຍາເຍນ ຉາເທນ຺ຕສ຺ສ ທ຺ເວ ປຣິຍາເຍ ອຘິຏ຺ຐຫິຕ຺ວາ ຕຕິຍໍ ປຣິຍາຍໍ ອາຓາເປຕ຺ວາ ປກ຺ກມິຕພ຺ພໍ.

໑໓໗. ຕໂຕ ເຈ ອຸຕ຺ຕຣິ ອປ຺ປຫຣິເຕປິ ຐິໂຕ ອຘິຏ຺ຐເຫຍ຺ຍາຕິ ອິຏ຺ຐກາຍ ໒.໐໒໖໒ ຉາເທນ຺ຕສ຺ສ ອິຏ຺ຐກິຏ຺ຐກາຍ ອາປຕ຺ຕິ ປາຈິຕ຺ຕິຍສ຺ສ. ສິລາຍ ຉາເທນ຺ຕສ຺ສ ສິລາຍ ສິລາຍ ອາປຕ຺ຕິ ປາຈິຕ຺ຕິຍສ຺ສ. ສຸຘາຍ ຉາເທນ຺ຕສ຺ສ ປິຓ຺ເຑ ປິຓ຺ເຑ ອາປຕ຺ຕິ ປາຈິຕ຺ຕິຍສ຺ສ. ຕິເຓນ ຉາເທນ຺ຕສ຺ສ ກຣເຬ ກຣເຬ ອາປຕ຺ຕິ ປາຈິຕ຺ຕິຍສ຺ສ. ປຓ຺ເຓນ ຉາເທນ຺ຕສ຺ສ ປຓ຺ເຓ ປຓ຺ເຓ ອາປຕ຺ຕິ ປາຈິຕ຺ຕິຍສ຺ສ.

ອຕິເຣກທ຺ວຕ຺ຕິປຣິຍາເຍ ອຕິເຣກສຎ຺ຎີ ອຘິຏ຺ຐາຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກທ຺ວຕ຺ຕິປຣິຍາເຍ ເວມຕິໂກ ອຘິຏ຺ຐາຕິ, ອາປຕ຺ຕິ ປາຈິຕ຺ຕິຍສ຺ສ. ອຕິເຣກທ຺ວຕ຺ຕິປຣິຍາເຍ ອູນກສຎ຺ຎີ ອຘິຏ຺ຐາຕິ, ອາປຕ຺ຕິ ປາຈິຕ຺ຕິຍສ຺ສ.

ອູນກທ຺ວຕ຺ຕິປຣິຍາເຍ ອຕິເຣກສຎ຺ຎີ, ອາປຕ຺ຕິ ທຸກ຺ກຏສ຺ສ. ອູນກທ຺ວຕ຺ຕິປຣິຍາເຍ ເວມຕິໂກ, ອາປຕ຺ຕິ ທຸກ຺ກຏສ຺ສ. ອູນກທ຺ວຕ຺ຕິປຣິຍາເຍ ອູນກສຎ຺ຎີ, ອນາປຕ຺ຕິ.

໑໓໘. ອນາປຕ຺ຕິ ທ຺ວຕ຺ຕິປຣິຍາເຍ, ອູນກທ຺ວຕ຺ຕິປຣິຍາເຍ, ເລເຓ, ຄຸຫາຍ, ຕິຓກຸຏິກາຍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ວາສາຄາຣໍ ຐເປຕ຺ວາ ສພ຺ພຕ຺ຖ ອນາປຕ຺ຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ມຫລ຺ລກວິຫາຣສິກ຺ຂາປທໍ ນິຏ຺ຐິຕໍ ນວມໍ.