໑໐. ສປ຺ປາຓກສິກ຺ຂາປທໍ

໑໓໙. ເຕນ ສມເຍນ ພຸທ຺ໂຘ ຠຄວາ ອາຬວິຍໍ ວິຫຣຕິ ອຄ຺ຄາຬເວ ເຈຕິເຍ. ເຕນ ໂຂ ປນ ສມເຍນ ອາຬວກາ ຠິກ຺ຂູ ນວກມ຺ມໍ ກໂຣນ຺ຕາ ຊານໍ ສປ຺ປາຓກໍ ອຸທກໍ ຕິຓມ຺ປິ ມຕ຺ຕິກມ຺ປິ ສິຎ຺ຈນ຺ຕິປິ ສິຎ຺ຈາເປນ຺ຕິປິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຬວກາ ຠິກ຺ຂູ ຊານໍ ສປ຺ປາຓກໍ ອຸທກໍ ຕິຓມ຺ປິ ມຕ຺ຕິກມ຺ປິ ສິຎ຺ຈິສ຺ສນ຺ຕິປິ ສິຎ຺ຈາເປສ຺ສນ຺ຕິປີ’’ຕິ! ອຖ ໂຂ ເຕ ຠິກ຺ຂູ ອາຬວເກ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຊານໍ ສປ຺ປາຓກໍ ອຸທກໍ ຕິຓມ຺ປິ ມຕ຺ຕິກມ຺ປິ ສິຎ຺ຈຖປິ ສິຎ຺ຈາເປຖປີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຊານໍ ສປ຺ປາຓກໍ ອຸທກໍ ຕິຓມ຺ປິ ມຕ຺ຕິກມ຺ປິ ສິຎ຺ຈິສ຺ສຖປິ ສິຎ຺ຈາເປສ຺ສຖປິ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໑໔໐. ‘‘ໂຍ ປນ ຠິກ຺ຂຸ ຊານໍ ສປ຺ປາຓກໍ ອຸທກໍ ຕິຓໍ ວາ ມຕ຺ຕິກໍ ວາ ສິຎ຺ເຈຍ຺ຍ ວາ ສິຎ຺ຈາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໑໔໑. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຊານາຕິ ນາມ [ຊານໍ ນາມ (ສ຺ຍາ.)] ສາມໍ ວາ ຊານາຕິ ອຎ຺ເຎ ວາ ຕສ຺ສ ອາໂຣເຈນ຺ຕິ.

ສິຎ຺ເຈຍ຺ຍາຕິ ສຍໍ ສິຎ຺ຈຕິ, ອາປຕ຺ຕິ ປາຈິຕ຺ຕິຍສ຺ສ.

ສິຎ຺ຈາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ປາຈິຕ຺ຕິຍສ຺ສ [ອາປຕ຺ຕິ ທຸກ຺ກຏສ຺ສ (ກຕ຺ຖຈິ)]. ສກິໍ ອາຓຕ຺ໂຕ ພຫຸກມ຺ປິ ສິຎ຺ຈຕິ, ອາປຕ຺ຕິ ປາຈິຕ຺ຕິຍສ຺ສ.

໑໔໒. ສປ຺ປາຓເກ ສປ຺ປາຓກສຎ຺ຎີ ຕິຓໍ ວາ ມຕ຺ຕິກໍ ວາ ສິຎ຺ຈຕິ ວາ ສິຎ຺ຈາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ສປ຺ປາຓເກ ເວມຕິໂກ ຕິຓໍ ວາ ມຕ຺ຕິກໍ ວາ ສິຎ຺ຈຕິ ວາ ສິຎ຺ຈາເປຕິ ວາ, ອາປຕ຺ຕິ ທຸກ຺ກຏສ຺ສ. ສປ຺ປາຓເກ ອປ຺ປາຓກສຎ຺ຎີ ຕິຓໍ ວາ ມຕ຺ຕິກໍ ວາ ສິຎ຺ຈຕິ ວາ ສິຎ຺ຈາເປຕິ ວາ, ອນາປຕ຺ຕິ. ອປ຺ປາຓເກ ສປ຺ປາຓກສຎ຺ຎີ, ອາປຕ຺ຕິ ທຸກ຺ກຏສ຺ສ. ອປ຺ປາຓເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ອປ຺ປາຓເກ ອປ຺ປາຓກສຎ຺ຎີ, ອນາປຕ຺ຕິ.

໑໔໓. ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ສປ຺ປາຓກສິກ຺ຂາປທໍ ນິຏ຺ຐິຕໍ ທສມໍ.

ຠູຕຄາມວຄ຺ໂຄ ທຸຕິໂຍ.

ຕສ຺ສຸທ຺ທານໍ –

ຠູຕໍ ອຎ຺ຎາຍ ອຸຊ຺ຌາຍໍ, ປກ຺ກມນ຺ເຕນ ເຕ ທຸເວ;

ປຸພ຺ເພ ນິກ຺ກຑ຺ຒນາຫຈ຺ຈ, ທ຺ວາຣໍ ສປ຺ປາຓເກນ ຈາຕິ.