໒໓໑. ທຸຄ຺ຄຫິຕສຸຄ຺ຄຫິຕາທິກຖາ

໓໗໗. ເຕນ ໂຂ ປນ ສມເຍນ ອາຍສ຺ມາ ເຣວໂຕ ອຎ຺ຎຕຣສ຺ສ ຠິກ຺ຂຸໂນ ຫຕ຺ເຖ ອາຍສ຺ມໂຕ ສາຣິປຸຕ຺ຕສ຺ສ ຈີວຣໍ ປາເຫສິ – ‘‘ອິມໍ ຈີວຣໍ ເຖຣສ຺ສ ເທຫີ’’ຕິ. ອຖ ໂຂ ໂສ ຠິກ຺ຂຸ ອນ຺ຕຣາມຄ຺ເຄ ອາຍສ຺ມໂຕ ເຣວຕສ຺ສ ວິສ຺ສາສາ ຕໍ ຈີວຣໍ ອຄ຺ຄເຫສິ. ອຖ ໂຂ ອາຍສ຺ມາ ເຣວໂຕ ອາຍສ຺ມຕາ ສາຣິປຸຕ຺ເຕນ ສມາຄນ຺ຕ຺ວາ ປຸຈ຺ຉິ – ‘‘ອຫໍ, ຠນ຺ເຕ, ເຖຣສ຺ສ ຈີວຣໍ ປາເຫສິໍ. ສມ຺ປຕ຺ຕໍ ຕໍ ຈີວຣ’’ນ຺ຕິ? ‘‘ນາຫໍ ຕໍ, ອາວຸໂສ, ຈີວຣໍ ປສ຺ສາມີ’’ຕິ. ອຖ ໂຂ ອາຍສ຺ມາ ເຣວໂຕ ຕໍ ຠິກ຺ຂຸໍ ເອຕທໂວຈ – ‘‘ອຫໍ, ອາວຸໂສ, ອາຍສ຺ມໂຕ ຫຕ຺ເຖ ເຖຣສ຺ສ ຈີວຣໍ ປາເຫສິໍ. ກຫໍ ຕໍ ຈີວຣ’’ນ຺ຕິ? ‘‘ອຫໍ, ຠນ຺ເຕ, ອາຍສ຺ມໂຕ ວິສ຺ສາສາ ຕໍ ຈີວຣໍ ອຄ຺ຄເຫສິ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ.

໓໗໘. ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ເທຫີ’’ຕິ. ໂສ ອນ຺ຕຣາມຄ຺ເຄ ໂຍ ປຫິຓຕິ ຕສ຺ສ ວິສ຺ສາສາ ຄຓ຺ຫາຕິ. ສຸຄ຺ຄຫິຕໍ. ຍສ຺ສ ປຫິຍ຺ຍຕິ ຕສ຺ສ ວິສ຺ສາສາ ຄຓ຺ຫາຕິ. ທຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ເທຫີ’’ຕິ. ໂສ ອນ຺ຕຣາມຄ຺ເຄ ຍສ຺ສ ປຫິຍ຺ຍຕິ ຕສ຺ສ ວິສ຺ສາສາ ຄຓ຺ຫາຕິ. ທຸຄ຺ຄຫິຕໍ. ໂຍ ປຫິຓຕິ ຕສ຺ສ ວິສ຺ສາສາ ຄຓ຺ຫາຕິ. ສຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ເທຫີ’’ຕິ. ໂສ ອນ຺ຕຣາມຄ຺ເຄ ສຸຓາຕິ – ໂຍ ປຫິຓຕິ ໂສ ກາລງ຺ກໂຕຕິ. ຕສ຺ສ ມຕກຈີວຣໍ ອຘິຏ຺ຐາຕິ. ສ຺ວາຘິຏ຺ຐິຕໍ. ຍສ຺ສ ປຫິຍ຺ຍຕິ ຕສ຺ສ ວິສ຺ສາສາ ຄຓ຺ຫາຕິ. ທຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ເທຫີ’’ຕິ. ໂສ ອນ຺ຕຣາມຄ຺ເຄ ສຸຓາຕິ – ຍສ຺ສ ປຫິຍ຺ຍຕິ ໂສ ກາລງ຺ກໂຕຕິ. ຕສ຺ສ ມຕກຈີວຣໍ ອຘິຏ຺ຐາຕິ. ທ຺ວາຘິຏ຺ຐິຕໍ. ໂຍ ປຫິຓຕິ ຕສ຺ສ ວິສ຺ສາສາ ຄຓ຺ຫາຕິ. ສຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ເທຫີ’’ຕິ. ໂສ ອນ຺ຕຣາມຄ຺ເຄ ສຸຓາຕິ – ອຸໂຠ ກາລງ຺ກຕາຕິ. ໂຍ ປຫິຓຕິ ຕສ຺ສ ມຕກຈີວຣໍ ອຘິຏ຺ຐາຕິ. ສ຺ວາຘິຏ຺ຐິຕໍ. ຍສ຺ສ ປຫິຍ຺ຍຕິ ຕສ຺ສ ມຕກຈີວຣໍ ອຘິຏ຺ຐາຕິ. ທ຺ວາຘິຏ຺ຐິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ທມ຺ມີ’’ຕິ. ໂສ ອນ຺ຕຣາມຄ຺ເຄ ໂຍ ປຫິຓຕິ ຕສ຺ສ ວິສ຺ສາສາ ຄຓ຺ຫາຕິ. ທຸຄ຺ຄຫິຕໍ. ຍສ຺ສ ປຫິຍ຺ຍຕິ ຕສ຺ສ ວິສ຺ສາສາ ຄຓ຺ຫາຕິ. ສຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ທມ຺ມີ’’ຕິ. ໂສ ອນ຺ຕຣາມຄ຺ເຄ ຍສ຺ສ ປຫິຍ຺ຍຕິ ຕສ຺ສ ວິສ຺ສາສາ ຄຓ຺ຫາຕິ. ສຸຄ຺ຄຫິຕໍ. ໂຍ ປຫິຓຕິ ຕສ຺ສ ວິສ຺ສາສາ ຄຓ຺ຫາຕິ. ທຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ທມ຺ມີ’’ຕິ. ໂສ ອນ຺ຕຣາມຄ຺ເຄ ສຸຓາຕິ – ‘‘ໂຍ ປຫິຓຕິ ໂສ ກາລງ຺ກໂຕ’’ຕິ. ຕສ຺ສ ມຕກຈີວຣໍ ອຘິຏ຺ຐາຕິ. ທ຺ວາຘິຏ຺ຐິຕໍ. ຍສ຺ສ ປຫິຍ຺ຍຕິ ຕສ຺ສ ວິສ຺ສາສາ ຄຓ຺ຫາຕິ. ສຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ທມ຺ມີ’’ຕິ. ໂສ ອນ຺ຕຣາມຄ຺ເຄ ສຸຓາຕິ – ‘‘ຍສ຺ສ ປຫິຍ຺ຍຕິ ໂສ ກາລງ຺ກໂຕ’’ຕິ. ຕສ຺ສ ມຕກຈີວຣໍ ອຘິຏ຺ຐາຕິ. ສ຺ວາຘິຏ຺ຐິຕໍ. ໂຍ ປຫິຓຕິ ຕສ຺ສ ວິສ຺ສາສາ ຄຓ຺ຫາຕິ. ທຸຄ຺ຄຫິຕໍ.

ອິຘ ປນ, ຠິກ຺ຂເວ, ຠິກ຺ຂຸ ຠິກ຺ຂຸສ຺ສ ຫຕ຺ເຖ ຈີວຣໍ ປຫິຓຕິ – ‘‘ອິມໍ ຈີວຣໍ ອິຕ຺ຖນ຺ນາມສ຺ສ ທມ຺ມີ’’ຕິ. ໂສ ອນ຺ຕຣາມຄ຺ເຄ ສຸຓາຕິ ‘‘ອຸໂຠ ກາລງ຺ກຕາ’’ຕິ. ໂຍ ປຫິຓຕິ ຕສ຺ສ ມຕກຈີວຣໍ ອຘິຏ຺ຐາຕິ. ທ຺ວາຘິຏ຺ຐິຕໍ. ຍສ຺ສ ປຫິຍ຺ຍຕິ ຕສ຺ສ ມຕກຈີວຣໍ ອຘິຏ຺ຐາຕິ. ສ຺ວາຘິຏ຺ຐິຕໍ.

ທຸຄ຺ຄຫິຕສຸຄ຺ຄຫິຕາທິກຖາ ນິຏ຺ຐິຕາ.