໒໓໒. ອຏ຺ຐຈີວຣມາຕິກາ

໓໗໙. ອຏ຺ຐິມາ, ຠິກ຺ຂເວ, ມາຕິກາ ຈີວຣສ຺ສ ອຸປ຺ປາທາຍ – ສີມາຍ ເທຕິ, ກຕິກາຍ ເທຕິ, ຠິກ຺ຂາປຎ຺ຎຕ຺ຕິຍາ ເທຕິ, ສງ຺ຆສ຺ສ ເທຕິ, ອຸຠໂຕສງ຺ຆສ຺ສ ເທຕິ, ວສ຺ສໍວຸຏ຺ຐສງ຺ຆສ຺ສ ເທຕິ, ອາທິສ຺ສ ເທຕິ, ປຸຄ຺ຄລສ຺ສ ເທຕິ.

ສີມາຍ ເທຕິ – ຍາວຕິກາ ຠິກ຺ຂູ ອນ຺ໂຕສີມຄຕາ ເຕຫິ ຠາເຊຕພ຺ພໍ. ກຕິກາຍ ເທຕິ – ສມ຺ພຫຸລາ ອາວາສາ ສມານລາຠາ ໂຫນ຺ຕິ ເອກສ຺ມິໍ ອາວາເສ ທິນ຺ເນ ສພ຺ພຕ຺ຖ ທິນ຺ນໍ ໂຫຕິ. ຠິກ຺ຂາປຎ຺ຎຕ຺ຕິຍາ ເທຕິ, ຍຕ຺ຖ ສງ຺ຆສ຺ສ ຘຸວກາຣາ ກຣິຍ຺ຍນ຺ຕິ, ຕຕ຺ຖ ເທຕິ. ສງ຺ຆສ຺ສ ເທຕິ, ສມ຺ມຸຂີຠູເຕນ ສງ຺ເຆນ ຠາເຊຕພ຺ພໍ. ອຸຠໂຕສງ຺ຆສ຺ສ ເທຕິ, ພຫຸກາປິ ຠິກ຺ຂູ ໂຫນ຺ຕິ, ເອກາ ຠິກ຺ຂຸນີ ໂຫຕິ, ອຸປຑ຺ຒໍ ທາຕພ຺ພໍ, ພຫຸກາປິ ຠິກ຺ຂຸນິໂຍ ໂຫນ຺ຕິ, ເອໂກ ຠິກ຺ຂຸ ໂຫຕິ, ອຸປຑ຺ຒໍ ທາຕພ຺ພໍ. ວສ຺ສໍວຸຏ຺ຐສງ຺ຆສ຺ສ ເທຕິ, ຍາວຕິກາ ຠິກ຺ຂູ ຕສ຺ມິໍ ອາວາເສ ວສ຺ສໍວຸຏ຺ຐາ, ເຕຫິ ຠາເຊຕພ຺ພໍ. ອາທິສ຺ສ ເທຕິ, ຍາຄຸຍາ ວາ ຠຕ຺ເຕ ວາ ຂາທນີເຍ ວາ ຈີວເຣ ວາ ເສນາສເນ ວາ ເຠສຊ຺ເຊ ວາ. ປຸຄ຺ຄລສ຺ສ ເທຕິ, ‘‘ອິມໍ ຈີວຣໍ ອິຕ຺ຖນ຺ນາມສ຺ສ ທມ຺ມີ’’ຕິ.

ອຏ຺ຐຈີວຣມາຕິກາ ນິຏ຺ຐິຕາ.

ຈີວຣກ຺ຂນ຺ຘໂກ ອຏ຺ຐໂມ.