໒໐໖. ເສຏ຺ຐິປຸຕ຺ຕວຕ຺ຖຸ

໓໓໓. ເຕນ ໂຂ ປນ ສມເຍນ ພາຣາຓເສຍ຺ຍກສ຺ສ ເສຏ຺ຐິປຸຕ຺ຕສ຺ສ ໂມກ຺ຂຈິກາຍ ກີຬນ຺ຕສ຺ສ ອນ຺ຕຄຓ຺ຐາພາໂຘ ໂຫຕິ, ເຍນ ຍາຄຸປິ ປີຕາ ນ ສມ຺ມາ ປຣິຓາມໍ ຄຈ຺ຉຕິ, ຠຕ຺ຕມ຺ປິ ຠຸຕ຺ຕໍ ນ ສມ຺ມາ ປຣິຓາມໍ ຄຈ຺ຉຕິ, ອຸຈ຺ຈາໂຣປິ ປສ຺ສາໂວປິ ນ ປຄຸໂຓ. ໂສ ເຕນ ກິໂສ ໂຫຕິ ລູໂຂ ທຸພ຺ພຓ຺ໂຓ ອຸປ຺ປຓ຺ຑຸປ຺ປຓ຺ຑຸກຊາໂຕ ຘມນິສນ຺ຖຕຄຕ຺ໂຕ. ອຖ ໂຂ ພາຣາຓເສຍ຺ຍກສ຺ສ ເສຏ຺ຐິສ຺ສ ເອຕທໂຫສິ – ‘‘ມຍ຺ຫໍ ໂຂ ປຸຕ຺ຕສ຺ສ ຕາທິໂສ ອາພາໂຘ, ເຍນ ຍາຄຸປິ ປີຕາ ນ ສມ຺ມາ ປຣິຓາມໍ ຄຈ຺ຉຕິ, ຠຕ຺ຕມ຺ປິ ຠຸຕ຺ຕໍ ນ ສມ຺ມາ ປຣິຓາມໍ ຄຈ຺ຉຕິ, ອຸຈ຺ຈາໂຣປິ ປສ຺ສາໂວປິ ນ ປຄຸໂຓ. ໂສ ເຕນ ກິໂສ ລູໂຂ ທຸພ຺ພຓ຺ໂຓ ອຸປ຺ປຓ຺ຑຸປ຺ປຓ຺ຑຸກຊາໂຕ ຘມນິສນ຺ຖຕຄຕ຺ໂຕ. ຍໍນູນາຫໍ ຣາຊຄຫໍ ຄນ຺ຕ຺ວາ ຣາຊານໍ ຊີວກໍ ເວຊ຺ຊໍ ຍາເຈຍ຺ຍໍ ປຸຕ຺ຕໍ ເມ ຕິກິຈ຺ຉິຕຸ’’ນ຺ຕິ. ອຖ ໂຂ ພາຣາຓເສຍ຺ຍໂກ ເສຏ຺ຐິ ຣາຊຄຫໍ ຄນ຺ຕ຺ວາ ເຍນ ຣາຊາ ມາຄໂຘ ເສນິໂຍ ພິມ຺ພິສາໂຣ ເຕນຸປສງ຺ກມິ, ອຸປສງ຺ກມິຕ຺ວາ ຣາຊານໍ ມາຄຘໍ ເສນິຍໍ ພິມ຺ພິສາຣໍ ເອຕທໂວຈ – ‘‘ມຍ຺ຫໍ ໂຂ, ເທວ, ປຸຕ຺ຕສ຺ສ ຕາທິໂສ ອາພາໂຘ, ເຍນ ຍາຄຸປິ ປີຕາ ນ ສມ຺ມາ ປຣິຓາມໍ ຄຈ຺ຉຕິ, ຠຕ຺ຕມ຺ປິ ຠຸຕ຺ຕໍ ນ ສມ຺ມາ ປຣິຓາມໍ ຄຈ຺ຉຕິ, ອຸຈ຺ຈາໂຣປິ ປສ຺ສາໂວປິ ນ ປຄຸໂຓ. ໂສ ເຕນ ກິໂສ ລູໂຂ ທຸພ຺ພຓ຺ໂຓ ອຸປ຺ປຓ຺ຑຸປ຺ປຓ຺ຑຸກຊາໂຕ ຘມນິສນ຺ຖຕຄຕ຺ໂຕ. ສາຘຸ ເທໂວ ຊີວກໍ ເວຊ຺ຊໍ ອາຓາເປຕຸ ປຸຕ຺ຕໍ ເມ ຕິກິຈ຺ຉິຕຸ’’ນ຺ຕິ.

ອຖ ໂຂ ຣາຊາ ມາຄໂຘ ເສນິໂຍ ພິມ຺ພິສາໂຣ ຊີວກໍ ໂກມາຣຠຈ຺ຈໍ ອາຓາເປສິ – ‘‘ຄຈ຺ຉ, ຠເຓ ຊີວກ, ພາຣາຓສິໍ ຄນ຺ຕ຺ວາ ພາຣາຓເສຍ຺ຍກໍ ເສຏ຺ຐິປຸຕ຺ຕໍ ຕິກິຈ຺ຉາຫີ’’ຕິ. ‘‘ເອວໍ, ເທວາ’’ຕິ ໂຂ ຊີວໂກ ໂກມາຣຠຈ຺ໂຈ ຣຎ຺ໂຎ ມາຄຘສ຺ສ ເສນິຍສ຺ສ ພິມ຺ພິສາຣສ຺ສ ປຏິສ຺ສຸຕ຺ວາ ພາຣາຓສິໍ ຄນ຺ຕ຺ວາ ເຍນ ພາຣາຓເສຍ຺ຍໂກ ເສຏ຺ຐິປຸຕ຺ໂຕ ເຕນຸປສງ຺ກມິ, ອຸປສງ຺ກມິຕ຺ວາ ພາຣາຓເສຍ຺ຍກສ຺ສ ເສຏ຺ຐິປຸຕ຺ຕສ຺ສ ວິກາຣໍ ສລ຺ລກ຺ເຂຕ຺ວາ ຊນໍ ອຸສ຺ສາເຣຕ຺ວາ ຕິໂຣກຣຓິຍໍ ປຣິກ຺ຂິປິຕ຺ວາ ຖມ຺ເຠ ອຸພ຺ພນ຺ຘິຕ຺ວາ [ອຸປນິພນ຺ຘິຕ຺ວາ (ສີ. ສ຺ຍາ.)] ຠຣິຍໍ ປຸຣໂຕ ຐເປຕ຺ວາ ອຸທຣຈ຺ຉວິໍ ອຸປ຺ປາເຏຕ຺ວາ ອນ຺ຕຄຓ຺ຐິໍ ນີຫຣິຕ຺ວາ ຠຣິຍາຍ ທສ຺ເສສິ – ‘‘ປສ຺ສ ເຕ ສາມິກສ຺ສ ອາພາຘໍ, ອິມິນາ ຍາຄຸປິ ປີຕາ ນ ສມ຺ມາ ປຣິຓາມໍ ຄຈ຺ຉຕິ, ຠຕ຺ຕມ຺ປິ ຠຸຕ຺ຕໍ ນ ສມ຺ມາ ປຣິຓາມໍ ຄຈ຺ຉຕິ, ອຸຈ຺ຈາໂຣປິ ປສ຺ສາໂວປິ ນ ປຄຸໂຓ; ອິມິນາຍໍ ກິໂສ ລູໂຂ ທຸພ຺ພຓ຺ໂຓ ອຸປ຺ປຓ຺ຑຸປ຺ປຓ຺ຑຸກຊາໂຕ ຘມນິສນ຺ຖຕຄຕ຺ໂຕ’’ຕິ. ອນ຺ຕຄຓ຺ຐິໍ ວິນິເວເຐຕ຺ວາ ອນ຺ຕານິ ປຏິປເວເສຕ຺ວາ ອຸທຣຈ຺ຉວິໍ ສິພ຺ພິຕ຺ວາ ອາເລປໍ ອທາສິ. ອຖ ໂຂ ພາຣາຓເສຍ຺ຍໂກ ເສຏ຺ຐິປຸຕ຺ໂຕ ນຈິຣສ຺ເສວ ອໂຣໂຄ ອໂຫສິ. ອຖ ໂຂ ພາຣາຓເສຍ຺ຍໂກ ເສຏ຺ຐິ ‘ປຸຕ຺ໂຕ ເມ ອໂຣໂຄ ຐິໂຕ’ຕິ [ອໂຣຄາປິໂຕຕິ (ສີ.)] ຊີວກສ຺ສ ໂກມາຣຠຈ຺ຈສ຺ສ ໂສຬສສຫສ຺ສານິ ປາທາສິ. ອຖ ໂຂ ຊີວໂກ ໂກມາຣຠຈ຺ໂຈ ຕານິ ໂສຬສສຫສ຺ສານິ ອາທາຍ ປຸນເທວ ຣາຊຄຫໍ ປຈ຺ຈາຄຎ຺ຉິ.

ເສຏ຺ຐິປຸຕ຺ຕວຕ຺ຖຸ ນິຏ຺ຐິຕໍ.