໒໐໔. ພິມ຺ພິສາຣຣາຊວຕ຺ຖຸ

໓໓໑. ເຕນ ໂຂ ປນ ສມເຍນ ຣຎ຺ໂຎ ມາຄຘສ຺ສ ເສນິຍສ຺ສ ພິມ຺ພິສາຣສ຺ສ ຠຄນ຺ທລາພາໂຘ ໂຫຕິ. ສາຏກາ ໂລຫິເຕນ ມກ຺ຂິຍນ຺ຕິ. ເທວິໂຍ ທິສ຺ວາ ອຸປ຺ປຓ຺ເຑນ຺ຕິ – ‘‘ອຸຕຸນີ ທານິ ເທໂວ, ປຸປ຺ຜໍ ເທວສ຺ສ ອຸປ຺ປນ຺ນໍ, ນ ຈິຣໍ [ນຈິຣສ຺ເສວ (ສ຺ຍາ.)] ເທໂວ ວິຊາຍິສ຺ສຕີ’’ຕິ. ເຕນ ຣາຊາ ມງ຺ກຸ ໂຫຕິ. ອຖ ໂຂ ຣາຊາ ມາຄໂຘ ເສນິໂຍ ພິມ຺ພິສາໂຣ ອຠຍໍ ຣາຊກຸມາຣໍ ເອຕທໂວຈ – ‘‘ມຍ຺ຫໍ ໂຂ, ຠເຓ ອຠຍ, ຕາທິໂສ ອາພາໂຘ, ສາຏກາ ໂລຫິເຕນ ມກ຺ຂິຍນ຺ຕິ, ເທວິໂຍ ມໍ ທິສ຺ວາ ອຸປ຺ປຓ຺ເຑນ຺ຕິ – ‘ອຸຕຸນີ ທານິ ເທໂວ, ປຸປ຺ຜໍ ເທວສ຺ສ ອຸປ຺ປນ຺ນໍ, ນ ຈິຣໍ ເທໂວ ວິຊາຍິສ຺ສຕີ’ຕິ. ອິງ຺ຆ, ຠເຓ ອຠຍ, ຕາທິສໍ ເວຊ຺ຊໍ ຊານາຫິ ໂຍ ມໍ ຕິກິຈ຺ເຉຍ຺ຍາ’’ຕິ. ‘‘ອຍໍ, ເທວ, ອມ຺ຫາກໍ ຊີວໂກ ເວຊ຺ໂຊ ຕຣຸໂຓ ຠທ຺ຣໂກ. ໂສ ເທວໍ ຕິກິຈ຺ຉິສ຺ສຕີ’’ຕິ. ‘‘ເຕນ ຫິ, ຠເຓ ອຠຍ, ຊີວກໍ ເວຊ຺ຊໍ ອາຓາເປຫິ; ໂສ ມໍ ຕິກິຈ຺ຉິສ຺ສຕີ’’ຕິ. ອຖ ໂຂ ອຠໂຍ ຣາຊກຸມາໂຣ ຊີວກໍ ໂກມາຣຠຈ຺ຈໍ ອາຓາເປສິ – ‘‘ຄຈ຺ຉ, ຠເຓ ຊີວກ, ຣາຊານໍ ຕິກິຈ຺ຉາຫີ’’ຕິ. ‘‘ເອວໍ, ເທວາ’’ຕິ ໂຂ ຊີວໂກ ໂກມາຣຠຈ຺ໂຈ ອຠຍສ຺ສ ຣາຊກຸມາຣສ຺ສ ປຏິສ຺ສຸຕ຺ວາ ນເຂນ ເຠສຊ຺ຊໍ ອາທາຍ ເຍນ ຣາຊາ ມາຄໂຘ ເສນິໂຍ ພິມ຺ພິສາໂຣ ເຕນຸປສງ຺ກມິ, ອຸປສງ຺ກມິຕ຺ວາ ຣາຊານໍ ມາຄຘໍ ເສນິຍໍ ພິມ຺ພິສາຣໍ ເອຕທໂວຈ – ‘‘ອາພາຘໍ ເຕ, ເທວ, ປສ຺ສາມາ’’ຕິ [ປສ຺ສາມີຕິ (ສ຺ຍາ.)]. ອຖ ໂຂ ຊີວໂກ ໂກມາຣຠຈ຺ໂຈ ຣຎ຺ໂຎ ມາຄຘສ຺ສ ເສນິຍສ຺ສ ພິມ຺ພິສາຣສ຺ສ ຠຄນ຺ທລາພາຘໍ ເອເກເນວ ອາເລເປນ ອປກຑ຺ຒິ. ອຖ ໂຂ ຣາຊາ ມາຄໂຘ ເສນິໂຍ ພິມ຺ພິສາໂຣ ອໂຣໂຄ ສມາໂນ ປຎ຺ຈ ອິຕ຺ຖິສຕານິ ສພ຺ພາລງ຺ກາຣໍ ຠູສາເປຕ຺ວາ ໂອມຸຎ຺ຈາເປຕ຺ວາ ປຸຎ຺ຊໍ ກາຣາເປຕ຺ວາ ຊີວກໍ ໂກມາຣຠຈ຺ຈໍ ເອຕທໂວຈ – ‘‘ເອຕໍ, ຠເຓ ຊີວກ, ປຎ຺ຈນ຺ນໍ ອິຕ຺ຖິສຕານໍ ສພ຺ພາລງ຺ກາຣໍ ຕຸຍ຺ຫໍ ໂຫຕູ’’ຕິ. ‘‘ອລໍ, ເທວ, ອຘິກາຣໍ ເມ ເທໂວ ສຣຕູ’’ຕິ. ‘‘ເຕນ ຫິ, ຠເຓ ຊີວກ, ມໍ ອຸປຏ຺ຐຫ, ອິຕ຺ຖາຄາຣຎ຺ຈ, ພຸທ຺ຘປ຺ປມຸຂຎ຺ຈ ຠິກ຺ຂຸສງ຺ຆ’’ນ຺ຕິ. ‘‘ເອວໍ, ເທວາ’’ຕິ ໂຂ ຊີວໂກ ໂກມາຣຠຈ຺ໂຈ ຣຎ຺ໂຎ ມາຄຘສ຺ສ ເສນິຍສ຺ສ ພິມ຺ພິສາຣສ຺ສ ປຈ຺ຈສ຺ໂສສິ.

ພິມ຺ພິສາຣຣາຊວຕ຺ຖຸ ນິຏ຺ຐິຕໍ.