໑໘໔. ວຸຑ຺ຒປພ຺ພຊິຕວຕ຺ຖຸ

໓໐໓. ອຖ ໂຂ ຠຄວາ ກຸສິນາຣາຍໍ ຍຖາຠິຣນ຺ຕໍ ວິຫຣິຕ຺ວາ ເຍນ ອາຕຸມາ ເຕນ ຈາຣິກໍ ປກ຺ກາມິ ມຫຕາ ຠິກ຺ຂຸສງ຺ເຆນ ສທ຺ຘິໍ ອຑ຺ຒເຕລເສຫິ ຠິກ຺ຂຸສເຕຫິ. ເຕນ ໂຂ ປນ ສມເຍນ ອຎ຺ຎຕໂຣ ວຸຑ຺ຒປພ຺ພຊິໂຕ ອາຕຸມາຍໍ ປຏິວສຕິ ນຫາປິຕປຸພ຺ໂພ. ຕສ຺ສ ທ຺ເວ ທາຣກາ ໂຫນ຺ຕິ, ມຎ຺ຊຸກາ ປຏິຠາເນຍ຺ຍກາ, ທກ຺ຂາ ປຣິໂຍທາຕສິປ຺ປາ ສເກ ອາຈຣິຍເກ ນຫາປິຕກມ຺ເມ. ອສ຺ໂສສິ ໂຂ ໂສ ວຸຑ຺ຒປພ຺ພຊິໂຕ – ‘‘ຠຄວາ ກິຣ ອາຕຸມໍ ອາຄຈ຺ຉຕິ ມຫຕາ ຠິກ຺ຂຸສງ຺ເຆນ ສທ຺ຘິໍ ອຑ຺ຒເຕລເສຫິ ຠິກ຺ຂຸສເຕຫີ’’ຕິ. ອຖ ໂຂ ໂສ ວຸຑ຺ຒປພ຺ພຊິໂຕ ເຕ ທາຣເກ ເອຕທໂວຈ – ‘‘ຠຄວາ ກິຣ, ຕາຕາ, ອາຕຸມໍ ອາຄຈ຺ຉຕິ ມຫຕາ ຠິກ຺ຂຸສງ຺ເຆນ ສທ຺ຘິໍ ອຑ຺ຒເຕລເສຫິ ຠິກ຺ຂຸສເຕຫິ. ຄຈ຺ຉຖ ຕຸມ຺ເຫ, ຕາຕາ, ຂຸຣຠຓ຺ຑໍ ອາທາຍ ນາຬິຍາວາປເກນ ອນຸຆຣກໍ ອນຸຆຣກໍ ອາຫິຓ຺ຑຖ, ໂລຓມ຺ປິ, ເຕລມ຺ປິ, ຕຓ຺ຑຸລມ຺ປິ, ຂາທນີຍມ຺ປິ ສໍຫຣຖ, ຠຄວໂຕ ອາຄຕສ຺ສ ຍາຄຸປານໍ ກຣິສ຺ສາມາ’’ຕິ. ‘‘ເອວໍ, ຕາຕາ’’ຕິ ໂຂ ເຕ ທາຣກາ ຕສ຺ສ ວຸຑ຺ຒປພ຺ພຊິຕສ຺ສ ປຏິສ຺ສຸຓິຕ຺ວາ ຂຸຣຠຓ຺ຑໍ ອາທາຍ ນາຬິຍາວາປເກນ ອນຸຆຣກໍ ອນຸຆຣກໍ ອາຫິຓ຺ຑນ຺ຕິ, ໂລຓມ຺ປິ, ເຕລມ຺ປິ, ຕຓ຺ຑຸລມ຺ປິ, ຂາທນີຍມ຺ປິ ສໍຫຣນ຺ຕາ. ມນຸສ຺ສາ ເຕ ທາຣເກ ມຎ຺ຊຸເກ ປຏິຠາເນຍ຺ຍເກ ປສ຺ສິຕ຺ວາ ເຍປິ ນ ກາຣາເປຕຸກາມາ ເຕປິ ກາຣາເປນ຺ຕິ, ກາຣາເປຕ຺ວາປິ ພຫຸໍ ເທນ຺ຕິ. ອຖ ໂຂ ເຕ ທາຣກາ ພຫຸໍ ໂລຓມ຺ປິ, ເຕລມ຺ປິ, ຕຓ຺ຑຸລມ຺ປິ, ຂາທນີຍມ຺ປິ ສໍຫຣິໍສຸ.

ອຖ ໂຂ ຠຄວາ ອນຸປຸພ຺ເພນ ຈາຣິກໍ ຈຣມາໂນ ເຍນ ອາຕຸມາ ຕທວສຣິ. ຕຕ຺ຣ ສຸທໍ ຠຄວາ ອາຕຸມາຍໍ ວິຫຣຕິ ຠຸສາຄາເຣ. ອຖ ໂຂ ໂສ ວຸຑ຺ຒປພ຺ພຊິໂຕ ຕສ຺ສາ ຣຕ຺ຕິຍາ ອຈ຺ຈເຍນ ປຫູຕໍ ຍາຄຸໍ ປຏິຍາທາເປຕ຺ວາ ຠຄວໂຕ ອຸປນາເມສິ – ‘‘ປຏິຄ຺ຄຓ຺ຫາຕຸ ເມ, ຠນ຺ເຕ, ຠຄວາ ຍາຄຸ’’ນ຺ຕິ. ຊານນ຺ຕາປິ ຕຖາຄຕາ ປຸຈ຺ຉນ຺ຕິ…ເປ… ສາວການໍ ວາ ສິກ຺ຂາປທໍ ປຎ຺ຎເປສ຺ສາມາຕິ. ອຖ ໂຂ ຠຄວາ ຕໍ ວຸຑ຺ຒປພ຺ພຊິຕໍ ເອຕທໂວຈ – ‘‘ກຸຕາຍໍ, ຠິກ຺ຂຸ ຍາຄູ’’ຕິ? ອຖ ໂຂ ໂສ ວຸຑ຺ຒປພ຺ພຊິໂຕ ຠຄວໂຕ ເອຕມຕ຺ຖໍ ອາໂຣເຈສິ. ວິຄຣຫິ ພຸທ຺ໂຘ ຠຄວາ, ‘‘ອນນຸຈ຺ຉວິກໍ, ໂມຆປຸຣິສ, ອນນຸໂລມິກໍ ອປ຺ປຕິຣູປໍ ອສ຺ສາມຓກໍ ອກປ຺ປິຍໍ ອກຣຓີຍໍ. ກຖຎ຺ຫິ ນາມ ຕ຺ວໍ, ໂມຆປຸຣິສ, ປພ຺ພຊິໂຕ ອກປ຺ປິເຍ ສມາທເປສ຺ສສິ [ສມາທເປສິ (ກ.)]. ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ວິຄຣຫິຕ຺ວາ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ ‘ນ, ຠິກ຺ຂເວ, ປພ຺ພຊິເຕນ ອກປ຺ປິເຍ ສມາທເປຕພ຺ພໍ, ໂຍ ສມາທເປຍ຺ຍ, ອາປຕ຺ຕິ ທຸກ຺ກຏສ຺ສ. ນ ຈ, ຠິກ຺ຂເວ, ນຫາປິຕປຸພ຺ເພນ ຂຸຣຠຓ຺ຑໍ ປຣິຫຣິຕພ຺ພໍ. ໂຍ ປຣິຫເຣຍ຺ຍ, ອາປຕ຺ຕິ ທຸກ຺ກຏສ຺ສາ’’’ຕິ.

ອຖ ໂຂ ຠຄວາ ອາຕຸມາຍໍ ຍຖາຠິຣນ຺ຕໍ ວິຫຣິຕ຺ວາ ເຍນ ສາວຕ຺ຖິ ເຕນ ຈາຣິກໍ ປກ຺ກາມິ. ອນຸປຸພ຺ເພນ ຈາຣິກໍ ຈຣມາໂນ ເຍນ ສາວຕ຺ຖິ ຕທວສຣິ. ຕຕ຺ຣ ສຸທໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສາວຕ຺ຖິຍໍ ພຫຸໍ ຜລຂາທນີຍໍ ອຸປ຺ປນ຺ນໍ ໂຫຕິ. ອຖ ໂຂ ຠິກ຺ຂູນໍ ເອຕທໂຫສິ – ‘‘ກິໍ ນຸ ໂຂ ຠຄວຕາ ຜລຂາທນີຍໍ ອນຸຎ຺ຎາຕໍ, ກິໍ ອນນຸຎ຺ຎາຕ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ‘‘ອນຸຊານາມິ, ຠິກ຺ຂເວ, ສພ຺ພໍ ຜລຂາທນີຍ’’ນ຺ຕິ.

໓໐໔. ເຕນ ໂຂ ປນ ສມເຍນ ສງ຺ຆິການິ ພີຊານິ ປຸຄ຺ຄລິກາຍ ຠູມິຍາ ໂຣປິຍນ຺ຕິ, ປຸຄ຺ຄລິການິ ພີຊານິ ສງ຺ຆິກາຍ ຠູມິຍາ ໂຣປິຍນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ສງ຺ຆິການິ, ຠິກ຺ຂເວ, ພີຊານິ ປຸຄ຺ຄລິກາຍ ຠູມິຍາ ໂຣປິຕານິ ຠາຄໍ ທຕ຺ວາ ປຣິຠຸຎ຺ຊິຕພ຺ພານິ. ປຸຄ຺ຄລິການິ ພີຊານິ ສງ຺ຆິກາຍ ຠູມິຍາ ໂຣປິຕານິ ຠາຄໍ ທຕ຺ວາ ປຣິຠຸຎ຺ຊິຕພ຺ພານີຕິ.

ວຸຑ຺ຒປພ຺ພຊິຕວຕ຺ຖຸ ນິຏ຺ຐິຕໍ.