໑໘໕. ຈຕຸມຫາປເທສກຖາ

໓໐໕. ເຕນ ໂຂ ປນ ສມເຍນ ຠິກ຺ຂູນໍ ກິສ຺ມິຎ຺ຈິ ກິສ຺ມິຎ຺ຈິ ຐາເນ ກຸກ຺ກຸຈ຺ຈໍ ອຸປ຺ປຊ຺ຊຕິ – ‘‘ກິໍ ນຸ ໂຂ ຠຄວຕາ ອນຸຎ຺ຎາຕໍ, ກິໍ ອນນຸຎ຺ຎາຕ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ‘‘ຍໍ, ຠິກ຺ຂເວ, ມຍາ ‘ອິທໍ ນ ກປ຺ປຕີ’ຕິ ອປ຺ປຏິກ຺ຂິຕ຺ຕໍ ຕຎ຺ເຈ ອກປ຺ປິຍໍ ອນຸໂລເມຕິ, ກປ຺ປິຍໍ ປຏິພາຫຕິ, ຕໍ ໂວ ນ ກປ຺ປຕິ. ຍໍ, ຠິກ຺ຂເວ, ມຍາ ‘ອິທໍ ນ ກປ຺ປຕີ’ຕິ ອປ຺ປຏິກ຺ຂິຕ຺ຕໍ ຕຎ຺ເຈ ກປ຺ປິຍໍ ອນຸໂລເມຕິ, ອກປ຺ປິຍໍ ປຏິພາຫຕິ, ຕໍ ໂວ ກປ຺ປຕິ. ຍໍ, ຠິກ຺ຂເວ, ມຍາ ‘ອິທໍ ກປ຺ປຕີ’ຕິ ອນນຸຎ຺ຎາຕໍ ຕຎ຺ເຈ ອກປ຺ປິຍໍ ອນຸໂລເມຕິ, ກປ຺ປິຍໍ ປຏິພາຫຕິ, ຕໍ ໂວ ນ ກປ຺ປຕິ. ຍໍ, ຠິກ຺ຂເວ, ມຍາ ‘ອິທໍ ກປ຺ປຕີ’ຕິ ອນນຸຎ຺ຎາຕໍ, ຕຎ຺ເຈ ກປ຺ປິຍໍ ອນຸໂລເມຕິ, ອກປ຺ປິຍໍ ປຏິພາຫຕິ, ຕໍ ໂວ ກປ຺ປຕີ’’ຕິ.

ອຖ ໂຂ ຠິກ຺ຂູນໍ ເອຕທໂຫສິ – ‘‘ກປ຺ປຕິ ນຸ ໂຂ ຍາວກາລິເກນ ຍາມກາລິກໍ, ນ ນຸ ໂຂ ກປ຺ປຕິ? ກປ຺ປຕິ ນຸ ໂຂ ຍາວກາລິເກນ ສຕ຺ຕາຫກາລິກໍ, ນ ນຸ ໂຂ ກປ຺ປຕິ? ກປ຺ປຕິ ນຸ ໂຂ ຍາວກາລິເກນ ຍາວຊີວິກໍ, ນ ນຸ ໂຂ ກປ຺ປຕິ? ກປ຺ປຕິ ນຸ ໂຂ ຍາມກາລິເກນ ສຕ຺ຕາຫກາລິກໍ, ນ ນຸ ໂຂ ກປ຺ປຕິ? ກປ຺ປຕິ ນຸ ໂຂ ຍາມກາລິເກນ ຍາວຊີວິກໍ, ນ ນຸ ໂຂ ກປ຺ປຕິ? ກປ຺ປຕິ ນຸ ໂຂ ສຕ຺ຕາຫກາລິເກນ ຍາວຊີວິກໍ, ນ ນຸ ໂຂ ກປ຺ປຕີ’’ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ‘‘ຍາວກາລິເກນ, ຠິກ຺ຂເວ, ຍາມກາລິກໍ, ຕທຫຸ ປຏິຄ຺ຄຫິຕໍ ກາເລ ກປ຺ປຕິ, ວິກາເລ ນ ກປ຺ປຕິ. ຍາວກາລິເກນ, ຠິກ຺ຂເວ, ສຕ຺ຕາຫກາລິກໍ, ຕທຫຸ ປຏິຄ຺ຄຫິຕໍ ກາເລ ກປ຺ປຕິ, ວິກາເລ ນ ກປ຺ປຕິ. ຍາວກາລິເກນ, ຠິກ຺ຂເວ, ຍາວຊີວິກໍ, ຕທຫຸ ປຏິຄ຺ຄຫິຕໍ ກາເລ ກປ຺ປຕິ, ວິກາເລ ນ ກປ຺ປຕິ. ຍາມກາລິເກນ, ຠິກ຺ຂເວ, ສຕ຺ຕາຫກາລິກໍ, ຕທຫຸ ປຏິຄ຺ຄຫິຕໍ ຍາເມ ກປ຺ປຕິ, ຍາມາຕິກ຺ກນ຺ເຕ ນ ກປ຺ປຕິ. ຍາມກາລິເກນ, ຠິກ຺ຂເວ, ຍາວຊີວິກໍ, ຕທຫຸ ປຏິຄ຺ຄຫິຕໍ ຍາເມ ກປ຺ປຕິ, ຍາມາຕິກ຺ກນ຺ເຕ ນ ກປ຺ປຕິ. ສຕ຺ຕາຫກາລິເກນ, ຠິກ຺ຂເວ, ຍາວຊີວິກໍ ປຏິຄ຺ຄຫິຕໍ, ສຕ຺ຕາຫໍ ກປ຺ປຕິ, ສຕ຺ຕາຫາຕິກ຺ກນ຺ເຕ ນ ກປ຺ປຕີ’’ຕິ.

ຈຕຸມຫາປເທສກຖາ ນິຏ຺ຐິຕາ.

ເຠສຊ຺ຊກ຺ຂນ຺ຘໂກ ຉຏ຺ໂຐ.