໑໖໙. ຫຕ຺ຖິມໍສາທິປຏິກ຺ເຂປກຖາ

໒໘໑. ເຕນ ໂຂ ປນ ສມເຍນ ຣຎ຺ໂຎ ຫຕ຺ຖີ ມຣນ຺ຕິ. ມນຸສ຺ສາ ທຸພ຺ຠິກ຺ເຂ ຫຕ຺ຖິມໍສໍ ປຣິຠຸຎ຺ຊນ຺ຕິ, ຠິກ຺ຂູນໍ ປິຓ຺ຑາຍ ຈຣນ຺ຕານໍ ຫຕ຺ຖິມໍສໍ ເທນ຺ຕິ. ຠິກ຺ຂູ ຫຕ຺ຖິມໍສໍ ປຣິຠຸຎ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ຫຕ຺ຖິມໍສໍ ປຣິຠຸຎ຺ຊິສ຺ສນ຺ຕິ. ຣາຊງ຺ຄໍ ຫຕ຺ຖີ, ສເຈ ຣາຊາ ຊາເນຍ຺ຍ, ນ ເນສໍ ອຕ຺ຕມໂນ ອສ຺ສາ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ຫຕ຺ຖິມໍສໍ ປຣິຠຸຎ຺ຊິຕພ຺ພໍ. ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ເຕນ ໂຂ ປນ ສມເຍນ ຣຎ຺ໂຎ ອສ຺ສາ ມຣນ຺ຕິ. ມນຸສ຺ສາ ທຸພ຺ຠິກ຺ເຂ ອສ຺ສມໍສໍ ປຣິຠຸຎ຺ຊນ຺ຕິ, ຠິກ຺ຂູນໍ ປິຓ຺ຑາຍ ຈຣນ຺ຕານໍ ອສ຺ສມໍສໍ ເທນ຺ຕິ. ຠິກ຺ຂູ ອສ຺ສມໍສໍ ປຣິຠຸຎ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ອສ຺ສມໍສໍ ປຣິຠຸຎ຺ຊິສ຺ສນ຺ຕິ. ຣາຊງ຺ຄໍ ອສ຺ສາ, ສເຈ ຣາຊາ ຊາເນຍ຺ຍ, ນ ເນສໍ ອຕ຺ຕມໂນ ອສ຺ສາ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ອສ຺ສມໍສໍ ປຣິຠຸຎ຺ຊິຕພ຺ພໍ. ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ເຕນ ໂຂ ປນ ສມເຍນ ມນຸສ຺ສາ ທຸພ຺ຠິກ຺ເຂ ສຸນຂມໍສໍ ປຣິຠຸຎ຺ຊນ຺ຕິ, ຠິກ຺ຂູນໍ ປິຓ຺ຑາຍ ຈຣນ຺ຕານໍ ສຸນຂມໍສໍ ເທນ຺ຕິ. ຠິກ຺ຂູ ສຸນຂມໍສໍ ປຣິຠຸຎ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ສຸນຂມໍສໍ ປຣິຠຸຎ຺ຊິສ຺ສນ຺ຕິ, ເຊຄຸຈ຺ໂຉ ສຸນໂຂ ປຏິກູໂລ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ສຸນຂມໍສໍ ປຣິຠຸຎ຺ຊິຕພ຺ພໍ. ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ເຕນ ໂຂ ປນ ສມເຍນ ມນຸສ຺ສາ ທຸພ຺ຠິກ຺ເຂ ອຫິມໍສໍ ປຣິຠຸຎ຺ຊນ຺ຕິ, ຠິກ຺ຂູນໍ ປິຓ຺ຑາຍ ຈຣນ຺ຕານໍ ອຫິມໍສໍ ເທນ຺ຕິ. ຠິກ຺ຂູ ອຫິມໍສໍ ປຣິຠຸຎ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ອຫິມໍສໍ ປຣິຠຸຎ຺ຊິສ຺ສນ຺ຕິ, ເຊຄຸຈ຺ໂຉ ອຫິ ປຏິກູໂລ’’ຕິ. ສຸປສ຺ໂສປິ [ສຸຜສ຺ໂສ (ສີ.)] ນາຄຣາຊາ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິໂຕ ໂຂ ສຸປສ຺ໂສ ນາຄຣາຊາ ຠຄວນ຺ຕໍ ເອຕທໂວຈ – ‘‘ສນ຺ຕິ, ຠນ຺ເຕ, ນາຄາ ອສ຺ສທ຺ຘາ ອປ຺ປສນ຺ນາ. ເຕ ອປ຺ປມຕ຺ຕເກຫິປິ ຠິກ຺ຂູ ວິເຫເຐຍ຺ຍຸໍ. ສາຘຸ, ຠນ຺ເຕ, ອຍ຺ຍາ ອຫິມໍສໍ ນ ປຣິຠຸຎ຺ເຊຍ຺ຍຸ’’ນ຺ຕິ. ອຖ ໂຂ ຠຄວາ ສຸປສ຺ສໍ ນາຄຣາຊານໍ ຘມ຺ມິຍາ ກຖາຍ ສນ຺ທສ຺ເສສິ…ເປ… ປທກ຺ຂິຓໍ ກຕ຺ວາ ປກ຺ກາມິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ນ, ຠິກ຺ຂເວ, ອຫິມໍສໍ ປຣິຠຸຎ຺ຊິຕພ຺ພໍ. ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ລຸທ຺ທກາ ສີຫໍ ຫນ຺ຕ຺ວາ ສີຫມໍສໍ [ມໍສໍ (ກ.)] ປຣິຠຸຎ຺ຊນ຺ຕິ, ຠິກ຺ຂູນໍ ປິຓ຺ຑາຍ ຈຣນ຺ຕານໍ ສີຫມໍສໍ ເທນ຺ຕິ. ຠິກ຺ຂູ ສີຫມໍສໍ ປຣິຠຸຎ຺ຊິຕ຺ວາ ອຣຎ຺ເຎ ວິຫຣນ຺ຕິ. ສີຫາ ສີຫມໍສຄນ຺ເຘນ ຠິກ຺ຂູ ປຣິປາເຕນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ສີຫມໍສໍ ປຣິຠຸຎ຺ຊິຕພ຺ພໍ. ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ເຕນ ໂຂ ປນ ສມເຍນ ລຸທ຺ທກາ ພ຺ຍຄ຺ຆໍ ຫນ຺ຕ຺ວາ…ເປ… ທີປິໍ ຫນ຺ຕ຺ວາ…ເປ… ອຈ຺ຉໍ ຫນ຺ຕ຺ວາ…ເປ… ຕຣຈ຺ຉໍ ຫນ຺ຕ຺ວາ ຕຣຈ຺ຉມໍສໍ ປຣິຠຸຎ຺ຊນ຺ຕິ, ຠິກ຺ຂູນໍ ປິຓ຺ຑາຍ ຈຣນ຺ຕານໍ ຕຣຈ຺ຉມໍສໍ ເທນ຺ຕິ. ຠິກ຺ຂູ ຕຣຈ຺ຉມໍສໍ ປຣິຠຸຎ຺ຊິຕ຺ວາ ອຣຎ຺ເຎ ວິຫຣນ຺ຕິ. ຕຣຈ຺ຉາ ຕຣຈ຺ຉມໍສຄນ຺ເຘນ ຠິກ຺ຂູ ປຣິປາເຕນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ຕຣຈ຺ຉມໍສໍ ປຣິຠຸຎ຺ຊິຕພ຺ພໍ. ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ຫຕ຺ຖິມໍສາທິປຏິກ຺ເຂປກຖາ ນິຏ຺ຐິຕາ.

ສຸປ຺ປິຍຠາຓວາໂຣ ນິຏ຺ຐິໂຕ ທຸຕິໂຍ.