໘໗. ປາຣິສຸທ຺ຘິທານກຖາ

໑໖໔. ອຖ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ສນ຺ນິປຕຖ, ຠິກ຺ຂເວ, ສງ຺ໂຆ ອຸໂປສຖໍ ກຣິສ຺ສຕີ’’ຕິ. ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ອຕ຺ຖິ, ຠນ຺ເຕ, ຠິກ຺ຂຸ ຄິລາໂນ, ໂສ ອນາຄໂຕ’’ຕິ. ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ປາຣິສຸທ຺ຘິໍ ທາຕຸໍ. ເອວຎ຺ຈ ປນ, ຠິກ຺ຂເວ, ທາຕພ຺ພາ – ເຕນ ຄິລາເນນ ຠິກ຺ຂຸນາ ເອກໍ ຠິກ຺ຂຸໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຸກ຺ກຸຏິກໍ ນິສີທິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ປາຣິສຸທ຺ຘິໍ ທມ຺ມິ, ປາຣິສຸທ຺ຘິໍ ເມ ຫຣ, ປາຣິສຸທ຺ຘິໍ ເມ ອາໂຣເຈຫີ’’ຕິ. ກາເຍນ ວິຎ຺ຎາເປຕິ, ວາຈາຍ ວິຎ຺ຎາເປຕິ, ກາເຍນ ວາຈາຍ ວິຎ຺ຎາເປຕິ, ທິນ຺ນາ ໂຫຕິ ປາຣິສຸທ຺ຘິ. ນ ກາເຍນ ວິຎ຺ຎາເປຕິ, ນ ວາຈາຍ ວິຎ຺ຎາເປຕິ, ນ ກາເຍນ ວາຈາຍ ວິຎ຺ຎາເປຕິ, ນ ທິນ຺ນາ ໂຫຕິ ປາຣິສຸທ຺ຘິ. ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ໂສ, ຠິກ຺ຂເວ, ຄິລາໂນ ຠິກ຺ຂຸ ມຎ຺ເຈນ ວາ ປີເຐນ ວາ ສງ຺ຆມຊ຺ເຌ ອາເນຕ຺ວາ ອຸໂປສໂຖ ກາຕພ຺ໂພ. ສເຈ, ຠິກ຺ຂເວ, ຄິລານຸປຏ຺ຐາການໍ ຠິກ຺ຂູນໍ ເອວໍ ໂຫຕິ – ‘‘ສເຈ ໂຂ ມຍໍ ຄິລານໍ ຐານາ ຈາເວສ຺ສາມ, ອາພາໂຘ ວາ ອຠິວຑ຺ຒິສ຺ສຕິ ກາລໍກິຣິຍາ ວາ ຠວິສ຺ສຕີ’’ຕິ, ນ, ຠິກ຺ຂເວ, ຄິລາໂນ ຠິກ຺ຂຸ ຐານາ ຈາເວຕພ຺ໂພ. ສງ຺ເຆນ ຕຕ຺ຖ ຄນ຺ຕ຺ວາ ອຸໂປສໂຖ ກາຕພ຺ໂພ. ນ ຕ຺ເວວ ວຄ຺ເຄນ ສງ຺ເຆນ ອຸໂປສໂຖ ກາຕພ຺ໂພ. ກເຣຍ຺ຍ ເຈ, ອາປຕ຺ຕິ ທຸກ຺ກຏສ຺ສ.

ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ຕຕ຺ເຖວ ປກ຺ກມຕິ, ອຎ຺ຎສ຺ສ ທາຕພ຺ພາ ປາຣິສຸທ຺ຘິ. ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ຕຕ຺ເຖວ ວິພ຺ຠມຕິ,…ເປ… ກາລໍ ກໂຣຕິ – ສາມເຓໂຣ ປຏິຊານາຕິ – ສິກ຺ຂໍ ປຈ຺ຈກ຺ຂາຕໂກ ປຏິຊານາຕິ – ອນ຺ຕິມວຕ຺ຖຸໍ ອຊ຺ຌາປນ຺ນໂກ ປຏິຊານາຕິ – ອຸມ຺ມຕ຺ຕໂກ ປຏິຊານາຕິ – ຂິຕ຺ຕຈິຕ຺ໂຕ ປຏິຊານາຕິ – ເວທນາຏ຺ໂຏ ປຏິຊານາຕິ – ອາປຕ຺ຕິຍາ ອທສ຺ສເນ ອຸກ຺ຂິຕ຺ຕໂກ ປຏິຊານາຕິ – ອາປຕ຺ຕິຍາ ອປ຺ປຏິກມ຺ເມ ອຸກ຺ຂິຕ຺ຕໂກ ປຏິຊານາຕິ – ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕໂກ ປຏິຊານາຕິ – ປຓ຺ຑໂກ ປຏິຊານາຕິ – ເຖຍ຺ຍສໍວາສໂກ ປຏິຊານາຕິ – ຕິຕ຺ຖິຍປກ຺ກນ຺ຕໂກ ປຏິຊານາຕິ – ຕິຣຈ຺ຉານຄໂຕ ປຏິຊານາຕິ – ມາຕຸຆາຕໂກ ປຏິຊານາຕິ – ປິຕຸຆາຕໂກ ປຏິຊານາຕິ – ອຣຫນ຺ຕຆາຕໂກ ປຏິຊານາຕິ – ຠິກ຺ຂຸນິທູສໂກ ປຏິຊານາຕິ – ສງ຺ຆເຠທໂກ ປຏິຊານາຕິ – ໂລຫິຕຸປ຺ປາທໂກ ປຏິຊານາຕິ – ອຸຠໂຕພ຺ຍຎ຺ຊນໂກ ປຏິຊານາຕິ, ອຎ຺ຎສ຺ສ ທາຕພ຺ພາ ປາຣິສຸທ຺ຘິ.

ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ອນ຺ຕຣາມຄ຺ເຄ ປກ຺ກມຕິ, ອນາຫຏາ ໂຫຕິ ປາຣິສຸທ຺ຘິ. ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ອນ຺ຕຣາມຄ຺ເຄ ວິພ຺ຠມຕິ,…ເປ… ອຸຠໂຕພ຺ຍຎ຺ຊນໂກ ປຏິຊານາຕິ, ອນາຫຏາ ໂຫຕິ ປາຣິສຸທ຺ຘິ.

ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ສງ຺ຆປ຺ປຕ຺ໂຕ ປກ຺ກມຕິ, ອາຫຏາ ໂຫຕິ ປາຣິສຸທ຺ຘິ. ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ສງ຺ຆປ຺ປຕ຺ໂຕ ວິພ຺ຠມຕິ,…ເປ… ອຸຠໂຕພ຺ຍຎ຺ຊນໂກ ປຏິຊານາຕິ, ອາຫຏາ ໂຫຕິ ປາຣິສຸທ຺ຘິ.

ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ສງ຺ຆປ຺ປຕ຺ໂຕ ສຸຕ຺ໂຕ ນ ອາໂຣເຈຕິ, ປມຕ຺ໂຕ ນ ອາໂຣເຈຕິ, ສມາປນ຺ໂນ ນ ອາໂຣເຈຕິ, ອາຫຏາ ໂຫຕິ ປາຣິສຸທ຺ຘິ. ປາຣິສຸທ຺ຘິຫາຣກສ຺ສ ອນາປຕ຺ຕິ.

ປາຣິສຸທ຺ຘິຫາຣໂກ ເຈ, ຠິກ຺ຂເວ, ທິນ຺ນາຍ ປາຣິສຸທ຺ຘິຍາ ສງ຺ຆປ຺ປຕ຺ໂຕ ສຎ຺ຈິຈ຺ຈ ນ ອາໂຣເຈຕິ, ອາຫຏາ ໂຫຕິ ປາຣິສຸທ຺ຘິ. ປາຣິສຸທ຺ຘິຫາຣກສ຺ສ ອາປຕ຺ຕິ ທຸກ຺ກຏສ຺ສາຕິ.