໘໘. ຉນ຺ທທານກຖາ

໑໖໕. ອຖ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ສນ຺ນິປຕຖ, ຠິກ຺ຂເວ, ສງ຺ໂຆ ກມ຺ມໍ ກຣິສ຺ສຕີ’’ຕິ. ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ອຕ຺ຖິ, ຠນ຺ເຕ, ຠິກ຺ຂຸ ຄິລາໂນ, ໂສ ອນາຄໂຕ’’ຕິ. ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ຉນ຺ທໍ ທາຕຸໍ. ເອວຎ຺ຈ ປນ, ຠິກ຺ຂເວ, ທາຕພ຺ໂພ. ເຕນ ຄິລາເນນ ຠິກ຺ຂຸນາ ເອກໍ ຠິກ຺ຂຸໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຸກ຺ກຸຏິກໍ ນິສີທິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ຉນ຺ທໍ ທມ຺ມິ, ຉນ຺ທໍ ເມ ຫຣ, ຉນ຺ທໍ ເມ ອາໂຣເຈຫີ’’ຕິ. ກາເຍນ ວິຎ຺ຎາເປຕິ, ວາຈາຍ ວິຎ຺ຎາເປຕິ, ກາເຍນ ວາຈາຍ ວິຎ຺ຎາເປຕິ, ທິນ຺ໂນ ໂຫຕິ ຉນ຺ໂທ. ນ ກາເຍນ ວິຎ຺ຎາເປຕິ, ນ ວາຈາຍ ວິຎ຺ຎາເປຕິ, ນ ກາເຍນ ວາຈາຍ ວິຎ຺ຎາເປຕິ, ນ ທິນ຺ໂນ ໂຫຕິ ຉນ຺ໂທ. ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ໂສ, ຠິກ຺ຂເວ, ຄິລາໂນ ຠິກ຺ຂຸ ມຎ຺ເຈນ ວາ ປີເຐນ ວາ ສງ຺ຆມຊ຺ເຌ ອາເນຕ຺ວາ ກມ຺ມໍ ກາຕພ຺ພໍ. ສເຈ, ຠິກ຺ຂເວ, ຄິລານຸປຏ຺ຐາການໍ ຠິກ຺ຂູນໍ ເອວໍ ໂຫຕິ – ‘‘ສເຈ ໂຂ ມຍໍ ຄິລານໍ ຐານາ ຈາເວສ຺ສາມ, ອາພາໂຘ ວາ ອຠິວຑ຺ຒິສ຺ສຕິ ກາລໍກິຣິຍາ ວາ ຠວິສ຺ສຕີ’’ຕິ, ນ, ຠິກ຺ຂເວ, ຄິລາໂນ ຠິກ຺ຂຸ ຐານາ ຈາເວຕພ຺ໂພ. ສງ຺ເຆນ ຕຕ຺ຖ ຄນ຺ຕ຺ວາ ກມ຺ມໍ ກາຕພ຺ພໍ. ນ ຕ຺ເວວ ວຄ຺ເຄນ ສງ຺ເຆນ ກມ຺ມໍ ກາຕພ຺ພໍ. ກເຣຍ຺ຍ ເຈ, ອາປຕ຺ຕິ ທຸກ຺ກຏສ຺ສ.

ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ຕຕ຺ເຖວ ປກ຺ກມຕິ, ອຎ຺ຎສ຺ສ ທາຕພ຺ໂພ ຉນ຺ໂທ. ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ຕຕ຺ເຖວ ວິພ຺ຠມຕິ…ເປ… ກາລໍກໂຣຕິ – ສາມເຓໂຣ ປຏິຊານາຕິ – ສິກ຺ຂໍ ປຈ຺ຈກ຺ຂາຕໂກ ປຏິຊານາຕິ – ອນ຺ຕິມວຕ຺ຖຸໍ ອຊ຺ຌາປນ຺ນໂກ ປຏິຊານາຕິ – ອຸມ຺ມຕ຺ຕໂກ ປຏິຊານາຕິ – ຂິຕ຺ຕຈິຕ຺ໂຕ ປຏິຊານາຕິ – ເວທນາຏ຺ໂຏ ປຏິຊານາຕິ – ອາປຕ຺ຕິຍາ ອທສ຺ສເນ ອຸກ຺ຂິຕ຺ຕໂກ ປຏິຊານາຕິ – ອາປຕ຺ຕິຍາ ອປ຺ປຏິກມ຺ເມ ອຸກ຺ຂິຕ຺ຕໂກ ປຏິຊານາຕິ – ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕໂກ ປຏິຊານາຕິ – ປຓ຺ຑໂກ ປຏິຊານາຕິ – ເຖຍ຺ຍສໍວາສໂກ ປຏິຊານາຕິ – ຕິຕ຺ຖິຍປກ຺ກນ຺ຕໂກ ປຏິຊານາຕິ – ຕິຣຈ຺ຉານຄໂຕ ປຏິຊານາຕິ – ມາຕຸຆາຕໂກ ປຏິຊານາຕິ – ປິຕຸຆາຕໂກ ປຏິຊານາຕິ – ອຣຫນ຺ຕຆາຕໂກ ປຏິຊານາຕິ – ຠິກ຺ຂຸນິທູສໂກ ປຏິຊານາຕິ – ສງ຺ຆເຠທໂກ ປຏິຊານາຕິ – ໂລຫິຕຸປ຺ປາທໂກ ປຏິຊານາຕິ – ອຸຠໂຕພ຺ຍຎ຺ຊນໂກ ປຏິຊານາຕິ, ອຎ຺ຎສ຺ສ ທາຕພ຺ໂພ ຉນ຺ໂທ.

ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ອນ຺ຕຣາມຄ຺ເຄ ປກ຺ກມຕິ, ອນາຫໂຏ ໂຫຕິ ຉນ຺ໂທ. ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ອນ຺ຕຣາມຄ຺ເຄ ວິພ຺ຠມຕິ…ເປ… ອຸຠໂຕພ຺ຍຎ຺ຊນໂກ ປຏິຊານາຕິ, ອນາຫໂຏ ໂຫຕິ ຉນ຺ໂທ.

ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ສງ຺ຆປ຺ປຕ຺ໂຕ ປກ຺ກມຕິ, ອາຫໂຏ ໂຫຕິ ຉນ຺ໂທ. ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ສງ຺ຆປ຺ປຕ຺ໂຕ ວິພ຺ຠມຕິ…ເປ… ອຸຠໂຕພ຺ຍຎ຺ຊນໂກ ປຏິຊານາຕິ, ອາຫໂຏ ໂຫຕິ ຉນ຺ໂທ.

ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ສງ຺ຆປ຺ປຕ຺ໂຕ ສຸຕ຺ໂຕ ນ ອາໂຣເຈຕິ, ປມຕ຺ໂຕ ນ ອາໂຣເຈຕິ, ສມາປນ຺ໂນ ນ ອາໂຣເຈຕິ, ອາຫໂຏ ໂຫຕິ ຉນ຺ໂທ. ຉນ຺ທຫາຣກສ຺ສ ອນາປຕ຺ຕິ.

ຉນ຺ທຫາຣໂກ ເຈ, ຠິກ຺ຂເວ, ທິນ຺ເນ ຉນ຺ເທ ສງ຺ຆປ຺ປຕ຺ໂຕ ສຎ຺ຈິຈ຺ຈ ນ ອາໂຣເຈຕິ, ອາຫໂຏ ໂຫຕິ ຉນ຺ໂທ. ຉນ຺ທຫາຣກສ຺ສ ອາປຕ຺ຕິ ທຸກ຺ກຏສ຺ສ. ອນຸຊານາມິ, ຠິກ຺ຂເວ, ຕທຫຸໂປສເຖ ປາຣິສຸທ຺ຘິໍ ເທນ຺ເຕນ ຉນ຺ທມ຺ປິ ທາຕຸໍ, ສນ຺ຕິ ສງ຺ຆສ຺ສ ກຣຓີຍນ຺ຕິ.