໓. ຄມິກວຕ຺ຕກຖາ

໓໖໐. ເຕນ ໂຂ ປນ ສມເຍນ ຄມິກາ ຠິກ຺ຂູ ທາຣຸຠຓ຺ຑໍ ມຕ຺ຕິກາຠຓ຺ຑໍ ອປ຺ປຏິສາເມຕ຺ວາ ທ຺ວາຣວາຕປານໍ ວິວຣິຕ຺ວາ ເສນາສນໍ ອນາປຸຈ຺ຉາ ປກ຺ກມນ຺ຕິ. ທາຣຸຠຓ຺ຑໍ ມຕ຺ຕິກາຠຓ຺ຑໍ ນສ຺ສຕິ. ເສນາສນໍ ອຄຸຕ຺ຕໍ ໂຫຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຄມິກາ ຠິກ຺ຂູ ທາຣຸຠຓ຺ຑໍ ມຕ຺ຕິກາຠຓ຺ຑໍ ອປ຺ປຏິສາເມຕ຺ວາ ທ຺ວາຣວາຕປານໍ ວິວຣິຕ຺ວາ ເສນາສນໍ ອນາປຸຈ຺ຉາ ປກ຺ກມິສ຺ສນ຺ຕິ! ທາຣຸຠຓ຺ຑໍ ມຕ຺ຕິກາຠຓ຺ຑໍ ນສ຺ສຕິ. ເສນາສນໍ ອຄຸຕ຺ຕໍ ໂຫຕີ’’ຕິ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ສຈ຺ຈໍ ກິຣ, ຠິກ຺ຂເວ…ເປ… ສຈ຺ຈໍ ຠຄວາຕິ…ເປ… ວິຄຣຫິຕ຺ວາ…ເປ… ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ –

໓໖໑. ‘‘ເຕນ ຫິ, ຠິກ຺ຂເວ, ຄມິການໍ ຠິກ຺ຂູນໍ ວຕ຺ຕໍ ປຎ຺ຎເປສ຺ສາມິ ຍຖາ ຄມິເກຫິ ຠິກ຺ຂູຫິ ສມ຺ມາ ວຕ຺ຕິຕພ຺ພໍ. ຄມິເກນ, ຠິກ຺ຂເວ, ຠິກ຺ຂຸນາ ທາຣຸຠຓ຺ຑໍ ມຕ຺ຕິກາຠຓ຺ຑໍ ປຏິສາເມຕ຺ວາ ທ຺ວາຣວາຕປານໍ ຖເກຕ຺ວາ ເສນາສນໍ ອາປຸຈ຺ຉາ ປກ຺ກມິຕພ຺ພໍ [ອາປຸຈ຺ຉິຕພ຺ພໍ (ສ຺ຍາ.)]. ສເຈ ຠິກ຺ຂຸ ນ ໂຫຕິ, ສາມເຓໂຣ ອາປຸຈ຺ຉິຕພ຺ໂພ. ສເຈ ສາມເຓໂຣ ນ ໂຫຕິ, ອາຣາມິໂກ ອາປຸຈ຺ຉິຕພ຺ໂພ. ສເຈ ອາຣາມິໂກ ນ ໂຫຕິ, ອຸປາສໂກ ອາປຸຈ຺ຉິຕພ຺ໂພ. ສເຈ ນ ໂຫຕິ ຠິກ຺ຂຸ ວາ ສາມເຓໂຣ ວາ ອາຣາມິໂກ ວາ ອຸປາສໂກ ວາ, ຈຕູສຸ ປາສາເຓສຸ ມຎ຺ຈໍ ປຎ຺ຎເປຕ຺ວາ ມຎ຺ເຈ ມຎ຺ຈໍ ອາໂຣເປຕ຺ວາ ປີເຐ ປີຐໍ ອາໂຣເປຕ຺ວາ ເສນາສນໍ ອຸປຣິ ປຸຎ຺ຊໍ ກຣິຕ຺ວາ ທາຣຸຠຓ຺ຑໍ ມຕ຺ຕິກາຠຓ຺ຑໍ ປຏິສາເມຕ຺ວາ ທ຺ວາຣວາຕປານໍ ຖເກຕ຺ວາ ປກ຺ກມິຕພ຺ພໍ. ສເຈ ວິຫາໂຣ ໂອວສ຺ສຕິ, ສເຈ ອຸສ຺ສຫຕິ, ຉາເທຕພ຺ໂພ, ອຸສ຺ສຸກໍ ວາ ກາຕພ຺ພໍ – ‘ກິນ຺ຕິ ນຸ ໂຂ ວິຫາໂຣ ຉາທິເຍຖາ’ຕິ. ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ໂຍ ເທໂສ ອໂນວສ຺ສໂກ ໂຫຕິ, ຕຕ຺ຖ ຈຕູສຸ ປາສາເຓສຸ ມຎ຺ຈໍ ປຎ຺ຎເປຕ຺ວາ ມຎ຺ເຈ ມຎ຺ຈໍ ອາໂຣເປຕ຺ວາ ປີເຐ ປີຐໍ ອາໂຣເປຕ຺ວາ ເສນາສນໍ ອຸປຣິ ປຸຎ຺ຊໍ ກຣິຕ຺ວາ ທາຣຸຠຓ຺ຑໍ ມຕ຺ຕິກາຠຓ຺ຑໍ ປຏິສາເມຕ຺ວາ ທ຺ວາຣວາຕປານໍ ຖເກຕ຺ວາ ປກ຺ກມິຕພ຺ພໍ. ສເຈ ສພ຺ໂພ ວິຫາໂຣ ໂອວສ຺ສຕິ, ສເຈ ອຸສ຺ສຫຕິ, ເສນາສນໍ ຄາມໍ ອຕິຫຣິຕພ຺ພໍ, ອຸສ຺ສຸກໍ ວາ ກາຕພ຺ພໍ – ‘ກິນ຺ຕິ ນຸ ໂຂ ເສນາສນໍ ຄາມໍ ອຕິຫຣິເຍຖາ’ຕິ. ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ອຊ຺ໂຌກາເສ ຈຕູສຸ ປາສາເຓສຸ ມຎ຺ຈໍ ປຎ຺ຎເປຕ຺ວາ ມຎ຺ເຈ ມຎ຺ຈໍ ອາໂຣເປຕ຺ວາ ປີເຐ ປີຐໍ ອາໂຣເປຕ຺ວາ ເສນາສນໍ ອຸປຣິ ປຸຎ຺ຊໍ ກຣິຕ຺ວາ ທາຣຸຠຓ຺ຑໍ ມຕ຺ຕິກາຠຓ຺ຑໍ ປຏິສາເມຕ຺ວາ ຕິເຓນ ວາ ປຓ຺ເຓນ ວາ ປຏິຈ຺ຉາເທຕ຺ວາ ປກ຺ກມິຕພ຺ພໍ – ອປ຺ເປວ ນາມ ອງ຺ຄານິປິ ເສເສຍ຺ຍຸນ຺ຕິ. ອິທໍ ໂຂ, ຠິກ຺ຂເວ, ຄມິການໍ ຠິກ຺ຂູນໍ ວຕ຺ຕໍ ຍຖາ ຄມິເກຫິ ຠິກ຺ຂູຫິ ສມ຺ມາ ວຕ຺ຕິຕພ຺ພ’’ນ຺ຕິ.