໒. ອຸທ຺ເທສວາຣອຕ຺ຖວິຠາວນາ

໑. ເອວໍ ສງ຺ຄຫວາເຣນ ສງ຺ເຂປໂຕ ທສ຺ສິເຕ ຫາຣາທໂຍ ອິທານິ ວິຠາເຄນ ທສ຺ເສຕຸໍ ‘‘ຕຕ຺ຖ ກຕເມ ໂສຬສ ຫາຣາ’’ຕິອາທິເທສນາ ອາຣທ຺ຘາ. ອຖ ວາ ໂສຬສຫາຣາທິສມຸທາຍາ ເນຕ຺ຕິ ນາມ ມຍາ ມຫາກຈ຺ຈາເນນ ນິທ຺ທິຏ຺ຐາຕິ ວຸຕ຺ຕາ, ‘‘ກຕເມ ເຕ ໂສຬສ ຫາຣາ’’ຕິ ປຸຈ຺ຉິຕພ຺ພຕ຺ຕາ ວຸຕ຺ຕໍ ‘‘ຕຕ຺ຖ ໂສຬສ ຫາຣາ’’ຕ຺ຍາທິ. ຕຕ຺ຖ ຕຕ຺ຖາຕິ ເຕສຸ ໂສຬສຫາຣາທີສຸ. ເທສນາ ຫາໂຣ, ວິຈໂຍ ຫາໂຣ…ເປ… ສາມາໂຣປໂນ ຫາໂຣຕິ ອິເມ ໂສຬສ ຫາຣາຕິ ທຏ຺ຐພ຺ພາ.

ຕຕ຺ຖ ສພ຺ພສາຘາຣຓຕ຺ຕາ ຫາຣປທສ຺ສ ວຈນຕ຺ໂຖ ປຐມໍ ວຕ຺ຕພ຺ໂພ. ເກນຏ຺ເຐນ ຫາຣາຕິ? ຫຣີຍນ຺ຕິ ເອເຕຫີຕິ ຫາຣາ. ເອເຕຫິ ສໍວຓ຺ຓນາວິເສເສຫິ ສໍວຓ຺ຓິເຍສຸ ສຸຕ຺ຕເຄຍ຺ຍາທີສຸ ອຎ຺ຎາຓສໍສຍວິປລ຺ລາສາ ຫຣີຍນ຺ຕິ, ອິຕິ ອຎ຺ຎາຓາທິຫຣຓກາຣຓຕ຺ຕາ ‘‘ເອເຕຫີ’’ຕິ ປເທນ ນິທ຺ທິຏ຺ຐາ ສໍວຓ຺ຓນາວິເສສາ ຫາຣາ ນາມ, ຫຣ-ຘາຕຸຍາ ອາຈຣິຍສ຺ສ ວຈີເຠທສທ຺ໂທ, ຕໍສມຸຏ຺ຐາປໂກ ຈິຕ຺ຕຸປ຺ປາໂທ ຈ ມຸຂ຺ຍຕ຺ໂຖ, ເວເນຍ຺ຍານໍ ສໍວຓ຺ເຓຕພ຺ພສຸຕ຺ຕສ຺ສ ອຕ຺ຖຊານນາທິຎາຓສມ຺ປຍຸຕ຺ຕຈິຕ຺ຕຸປ຺ປາໂທ ກາຣຓູປຈາຣຕ຺ໂຖ, ຕສ຺ສ ອຸປນິສ຺ສຍປຈ຺ຈຍຠູຕານໍ ສໍວຓ຺ຓນາວິເສສານໍ ອຸປນິສ຺ສຍປຈ຺ຈຍສຕ຺ຕິ ຜລູປຈາຣຕ຺ໂຖ, ອິຕິ-ສທ຺ເທນ ສາ ອຸປນິສ຺ສຍປຈ຺ຈຍສຕ຺ຕິເຍວ ປຣາມສີຍຕິ. ຕໍສຕ຺ຕິສມ຺ປນ຺ນາ ສໍວຓ຺ຓນາວິເສສາ ຓ-ປຈ຺ຈຍຕ຺ຖາ ໂຫນ຺ຕິ. ເອສ ນໂຍ ເອວຣູເປສຸ ຐາເນສຸປິ. ວິຕ຺ຖາໂຣ ອຏ຺ຐກຖາຍໍ (ເນຕ຺ຕິ. ອຏ຺ຐ. ໑) ວຸຕ຺ໂຕ ເອວ.

ອສາຘາຣຓໂຕ ປນ ເທສີຍຕິ ເອຕາຍາຕິ ເທສນາ. ເອຕາຍ ສໍວຓ຺ຓນາຍ ສໍວຓ຺ເຓຕພ຺ພສຸຕ຺ຕຕ຺ໂຖ ເທສີຍຕິ ສໍວຓ຺ຓີຍຕິ ສໍວຓ຺ຓນານຸສາເຣນ ຎາປີຍຕິ, ອິຕິ ຎາປນກາຣຓຕ຺ຕາ ‘‘ເອຕາຍາ’’ຕິ ປເທນ ນິທ຺ທິຏ຺ຐາ ວິເສສສໍວຓ຺ຓນາ ເທສນາ ນາມ, ນ ປາຬິເທສນາ, ປາຬິເທສນາຍ ສໍວຓ຺ເຓຕພ຺ພສໍວຓ຺ຓນາຠາເວນ ສຫຈຣຓໂຕ ວາ ເທສນາ. ກິຎ຺ຈາປິ ອຎ຺ເຎ ຫາຣາ ເທສນາປາຬິສງ຺ຂາຕສ຺ສ ສຸຕ຺ຕສ຺ສ ອຕ຺ຖສໍວຓ຺ຓນາຠາວໂຕ ເທສນາຍ ສຫຈາຣິໂນ ໂຫນ຺ຕິ, ອຍໍ ປນ ຫາໂຣ ເຍຠຸຍ຺ເຍນ ຍຖາຣຸຕວເສເນວ ວິຎ຺ຎາຍມານຕ຺ຕາ ປາຬິເທສນາຍ ສຫ ຈຣຕີຕິ ວຕ຺ຕພ຺ພຕໍ ອຣຫຕິ, ນ ຕຖາ ປເຣ. ນ ຫິ ອສ຺ສາທາທີນວນິສ຺ສຣຓາທິສນ຺ທສ຺ສນລກ຺ຂຓຣຫິຕາ ປາຬິເທສນາ ອຕ຺ຖິ, ອຍຎ຺ຈ ຫາໂຣ ອສ຺ສາທາທິສນ຺ທສ຺ສນລກ຺ຂໂຓຕິ.

ວິຈິຍນ຺ຕິ ເອເຕນາຕິ ວິຈໂຍ. ເອເຕນ ສໍວຓ຺ຓນາວິເສເສນ ສຸຕ຺ເຕ ປທປຎ຺ຫາທໂຍ ວິຈິຍນ຺ຕິ, ອິຕິ ວິຈາຣຓກາຣຓຕ຺ຕາ ໂສ ສໍວຓ຺ຓນາວິເສໂສ ວິຈໂຍ ນາມ. ກຕ຺ວຕ຺ຖາຘິກຣຓຕ຺ຖາປິ ລພ຺ຠນ຺ຕິ. ສໍວຓ຺ເຓຕພ຺ພສຸຕ຺ເຕນ ປທປຎ຺ຫາທິວິຈຍນລກ຺ຂໂຓ ສໍວຓ຺ຓນາວິເສໂສ ວິຈໂຍ ຫາໂຣ.

ຍຸຕ຺ຕາຍຸຕ຺ຕິ ວິຈາຣີຍຕິ ເອຕາຍາຕິ ຍຸຕ຺ຕິ. ເອຕາຍ ວິເສສສໍວຓ຺ຓນາຍ ສພ຺ເພສໍ ຫາຣານໍ ຠູມິໂຄຈຣານໍ ຍຸຕ຺ຕາຍຸຕ຺ຕິ ວິຈາຣີຍຕິ, ອິຕິ ວິຈາຣຓກາຣຓຕ຺ຕາ ‘‘ເອຕາຍາ’’ຕິ ປເທນ ນິທ຺ທິຏ຺ຐາ ວິເສສສໍວຓ຺ຓນາ ຍຸຕ຺ຕິ ນາມ. ອິຘ ອຸຕ຺ຕຣປທໂລໂປ ທຏ຺ຐພ຺ໂພ, ຍຸຕ຺ຕິຍາ ວິຈາຣຓາ, ວິຈາຣຓີຍຠາເວນ ສຫຈຣຓໂຕ ວາ ຍຸຕ຺ຕິ. ສພ຺ພຫາຣານໍ ຠູມິໂຄຈຣານໍ ຍຸຕ຺ຕາຍຸຕ຺ຕິວິຈາຣຓລກ຺ຂໂຓ ສໍວຓ຺ຓນາວິເສໂສ ຍຸຕ຺ຕິ ຫາໂຣ.

ປທຕິ ປວຕ຺ເຕຕິ ຜລໍ ເອເຕນາຕິ ປທໍ, ກາຣຓໍ. ຐນ຺ຕິ ຕິຏ຺ຐນ຺ຕິ ເອຕ຺ຖ ຜລານິ ຕທາຍຕ຺ຕວຸຕ຺ຕິຕາຍາຕິ ຐານໍ, ກາຣຓໍ. ປທຎ຺ຈ ຕໍ ຐານຎ຺ຈາຕິ ປທຏ຺ຐານໍ, ອາສນ຺ນກາຣຓໍ. ສຸຕ຺ເຕ ອາຄຕຘມ຺ມານໍ ປທຏ຺ຐານໍ ວິຈາຣີຍຕິ ເອຕາຍາຕິ ປທຏ຺ຐານາ, ວິເສສສໍວຓ຺ຓນາ, ວິຈາຣຓໂລໂປວ, ສຸຕ຺ເຕ ອາຄຕຘມ຺ມານໍ ປທຏ຺ຐານານໍ, ເຕສຎ຺ຈ ປທຏ຺ຐານານໍ ວິຈາຣຓລກ຺ຂໂຓ ສໍວຓ຺ຓນາວິເສໂສ ປທຏ຺ຐາໂນ ຫາໂຣ.

ສຸຕ຺ເຕ ອວຸຕ຺ຕາປິ ສມານລກ຺ຂຓາ ຘມ຺ມາ ລກ຺ຂີຍນ຺ຕິ ເອເຕນ ສໍວຓ຺ຓນາວິເສເສນາຕິ ລກ຺ຂໂຓ, ສຸຕ຺ເຕ ວຸຕ຺ເຕນ ຘມ຺ເມນ ສມານລກ຺ຂຓານໍ ຘມ຺ມານໍ ອວຸຕ຺ຕານມ຺ປິ ນິທ຺ຘາຣຓລກ຺ຂໂຓ ສໍວຓ຺ຓນາວິເສໂສ ລກ຺ຂໂຓ ຫາໂຣ.

ສຸຕ຺ເຕ ທສ຺ສິຍມານາ ນິພ຺ພຈນາທໂຍ ຈຕ຺ຕາໂຣປິ ວິຍູຫີຍນ຺ຕິ ວິຠາເຄນ ສມ຺ປິຓ຺ຑີຍນ຺ຕິ ເອຕ຺ຖ, ເອເຕນ ວາຕິ ພ຺ຍູໂຫ, ຈຕຸນ຺ນໍ ນິພ຺ພຈນາທີນໍ ພ຺ຍູໂຫ ຈຕຸພ຺ຍູໂຫ. ນິພ຺ພຈນາຘິປ຺ປາຍພ຺ຍຎ຺ຊນານຎ຺ເຈວ ເທສນານິທານສ຺ສ ຈ ປຸພ຺ພາປເຣນ ສທ຺ຘິໍ ສນ຺ທສ຺ສນລກ຺ຂໂຓ ສໍວຓ຺ຓນາວິເສໂສ ຈຕຸພ຺ຍູໂຫ ຫາໂຣ.

ເທສນາຍ ຄຫິຕຘມ຺ເມນ ສຠາຄາ, ວິສຠາຄາ ຈ ຘມ຺ມາ ອາວຏ຺ຏີຍນ຺ຕິ ເອຕ຺ຖ, ເອເຕນ ວາຕິ ອາວຏ຺ໂຏ, ເທສນາຍ ຄຫິຕຘມ຺ມານໍ ສຠາຄວິສຠາຄຘມ຺ມວເສນ ອາວຏ຺ຏນລກ຺ຂໂຓ ສໍວຓ຺ຓນາວິເສໂສ ອາວຏ຺ໂຏ ຫາໂຣ.

ອສາຘາຣຓາສາຘາຣຓານໍ ສໍກິເລສຘມ຺ເມ, ໂວທານຘມ຺ເມ ຈ ສາຘາຣຓາສາຘາຣຓໂຕ, ປທຏ຺ຐານໂຕ, ຠູມິໂຕ ຈ ວິຠຊນລກ຺ຂໂຓ ສໍວຓ຺ຓນາວິເສໂສ ວິຠຕ຺ຕິ ຫາໂຣ.

ສຸຕ຺ເຕ ນິທ຺ທິຏ຺ຐາ ຘມ຺ມາ ປຏິປກ຺ຂວເສນ ປຣິວຕ຺ຕີຍນ຺ຕິ ອິມິນາ, ເອຕ຺ຖ ວາຕິ ປຣິວຕ຺ໂຕ, ສຸຕ຺ເຕ ນິທ຺ທິຏ຺ຐານໍ ຘມ຺ມານໍ ປຏິປກ຺ຂໂຕ ປຣິວຕ຺ຕນລກ຺ຂໂຓ ສໍວຓ຺ຓນາວິເສໂສ ປຣິວຕ຺ຕໂນ ຫາໂຣ.

ສຸຕ຺ເຕ ວຸຕ຺ຕສ຺ສ ເອກສ຺ເສວ ອຕ຺ຖສ຺ສ ວາຈກໍ ວິວິຘໍ ວຈນໍ ເອຕ຺ຖ ສໍວຓ຺ຓນາວິເສເສຕິ ວິວຈນໍ, ວິວຈນເມວ ເວວຈນໍ, ສຸຕ຺ເຕ ວຸຕ຺ເຕ ເອກສ຺ມິໍ ອຕ຺ເຖ ອເນກປຣິຍາຍສທ຺ທໂຍຊນາລກ຺ຂໂຓ ສໍວຓ຺ຓນາວິເສໂສ ເວວຈໂນ ຫາໂຣ.

ສຸຕ຺ເຕ ວຸຕ຺ຕາ ອຕ຺ຖາ ປກາເຣຫິ ຎາປີຍນ຺ຕິ ອິມິນາ, ເອຕ຺ຖ ວາຕິ ປຎ຺ຎຕ຺ຕິ, ເອເກກສ຺ສ ຘມ຺ມສ຺ສ ອເນກາຫິ ປຎ຺ຎຕ຺ຕີຫິ ປຎ຺ຎາເປຕພ຺ພາກາຣລກ຺ຂໂຓ ສໍວຓ຺ຓນາວິເສໂສ ປຎ຺ຎຕ຺ຕິ ຫາໂຣ.

ສຸຕ຺ຕາຄຕາ ຘມ຺ມາ ປຏິຈ຺ຈສມຸປ຺ປາທາທີສຸ ໂອຕຣີຍນ຺ຕິ ອນຸປ຺ປເວສີຍນ຺ຕິ ເອຕ຺ຖ, ເອເຕນ ວາຕິ ໂອຕຣໂຓ, ປຏິຈ຺ຈສມຸປ຺ປາທາທິມຸເຂຫິ ສຸຕ຺ຕຕ຺ຖສ຺ສ ໂອຕຣຓລກ຺ຂໂຓ ສໍວຓ຺ຓນາວິເສໂສ ໂອຕຣໂຓ ຫາໂຣ.

ສຸຕ຺ເຕ ປທປທຕ຺ຖປຎ຺ຫາຣມ຺ຠາ ໂສຘີຍນ຺ຕິ ສມາຘີຍນ຺ຕິ ເອຕ຺ຖ, ເອເຕນ ວາຕິ ໂສຘໂນ, ສຸຕ຺ເຕ ປທປທຕ຺ຖປຎ຺ຫາຣມ຺ຠານໍ ໂສຘນລກ຺ຂໂຓ ສໍວຓ຺ຓນາວິເສໂສ ໂສຘໂນ ຫາໂຣ.

ສາມຎ຺ຎວິເສສຠູຕາ ຘມ຺ມາ ວິນາ ວິກປ຺ເປນ ອຘິຏ຺ຐີຍນ຺ຕິ ອນຸປ຺ປວຕ຺ຕີຍນ຺ຕິ ເອຕ຺ຖ, ເອເຕນ ວາຕິ ອຘິຏ຺ຐາໂນ, ສຸຕ຺ຕາຄຕານໍ ຘມ຺ມານໍ ອວິກປ຺ປນວເສນ ສາມຎ຺ຎວິເສສນິທ຺ຘາຣຓລກ຺ຂໂຓ ສໍວຓ຺ຓນາວິເສໂສ ອຘິຏ຺ຐາໂນ ຫາໂຣ.

ໂຍ ເຫຕຸ ເຈວ ປຈ຺ຈໂຍ ຈ ຜລໍ ປຣິກໂຣຕິ ອຠິສງ຺ຂໂຣຕິ, ອິຕິ ໂສ ເຫຕຸ ເຈວ ປຈ຺ຈໂຍ ຈ ປຣິກ຺ຂາໂຣ, ໂຍ ສໍວຓ຺ຓນາວິເສໂສ ຕໍ ປຣິກ຺ຂາຣໍ ເຫຕຸຎ຺ເຈວ ປຈ຺ຈຍຎ຺ຈ ອາຈິກ຺ຂຕິ, ອິຕິ ໂສ ສໍວຓ຺ຓນາວິເສໂສ ປຣິກ຺ຂາໂຣ ນາມ. ສຸຕ຺ເຕ ອາຄຕຘມ຺ມານໍ ປຣິກ຺ຂາຣສງ຺ຂາເຕ ເຫຕຸປຈ຺ຈເຍ ນິທ຺ຘາເຣຕ຺ວາ ສໍວຓ຺ຓນາລກ຺ຂໂຓ ສໍວຓ຺ຓນາວິເສໂສ ປຣິກ຺ຂາໂຣ ຫາໂຣ.

ສຸຕ຺ເຕ ອາຄຕຘມ຺ມາ ປທຏ຺ຐານາທິມຸເຂນ ສມາໂຣປີຍນ຺ຕິ ເອຕ຺ຖ, ເອເຕນ ວາຕິ ສມາໂຣປໂນ, ສຸຕ຺ເຕ ອາຄຕຘມ຺ມານໍ ປທຏ຺ຐານເວວຈນຠາວປຫານສມາໂຣປນວິຈາຣຓລກ຺ຂໂຓ ສໍວຓ຺ຓນາວິເສໂສ ສມາໂຣປໂນ ຫາໂຣ. ຠາວສາຘນວເສນາປິ ສພ຺ພຕ຺ຖ ວຈນຕ຺ໂຖ ວຕ຺ຕພ຺ໂພຕິ ຕສ຺ສາປິ ວເສນ ໂຍເຊຕພ຺ພນ຺ຕິ. ເສສໍ ສໍວຓ຺ຓນານຸສາເຣນ ຎາຕພ຺ພນ຺ຕິ.

‘‘ຕຕ຺ຖ ກຕເມ ໂສຬສ ຫາຣາ ເທສນາ’’ຕ຺ຍາທິນາ ຫາຣສຣູປໍ ວຸຕ຺ຕໍ, ກິມຕ຺ຖໍ ‘‘ຕສ຺ສານຸຄີຕິ’’ຕ຺ຍາທິ ວຸຕ຺ຕນ຺ຕິ? ອນຸຄີຕິຄາຖາຍ ສຸຂຄ຺ຄຫຓຕ຺ຖໍ ປຸນ ‘‘ຕສ຺ສານຸຄີຕິ ເທສນາ ວິຈໂຍ ຍຸຕ຺ຕິ’’ຕ຺ຍາທິ ວຸຕ຺ຕໍ. ຕຕ຺ຖ ຕສ຺ສາຕິ ຫາຣຸທ຺ເທສສ຺ສ. ອນຸຄີຕີຕິ ອນຸ ປຈ຺ຉາ ຄາຍນຄາຖາ. ປຎ຺ຈທໂສຕິ ປຎ຺ຈທສໂມ. ໂສຬໂສຕິ ໂສຬສໂມ. ອຕ຺ຖໂຕ ອສໍກິຓ຺ຓາຕິ ເທສນາທິປທຕ຺ຖໂຕ ລກ຺ຂຓຕ຺ຖໂຕ ສງ຺ກຣໂຕ ຣຫິຕາ. ເຕນ ວຸຕ຺ຕໍ ອຏ຺ຐກຖາຍໍ ‘‘ໂສ ຈ ເນສໍ ອສງ຺ກໂຣ ລກ຺ຂຓນິທ຺ເທເສ ສຸປາກໂຏ ໂຫຕີ’’ຕິ. ເສສໍ ສໍວຓ຺ຓນານຸສາເຣນ ຎາຕພ຺ພນ຺ຕິ. ‘‘ເກຈິ ຫາຣາ ເກຫິຈິ ຫາເຣຫິ ສໍກິຓ຺ຓາ ວິຍ ທິສ຺ສນ຺ຕິ, ກສ຺ມາ ອສໍກິຓ຺ຓາຕິ ຎາຕພ຺ພ’’ນ຺ຕິ ວຕ຺ຕພ຺ພຕ຺ຕາ ວຸຕ຺ຕໍ ‘‘ເອເຕສຎ຺ເຈວາ’’ຕິອາທິ. ຕຕ຺ຖ ເອເຕສຎ຺ເຈວ ຠວຕີຕິ ເອເຕສໍ ໂສຬສນ຺ນໍ ຫາຣານໍ ຍຖາ ເຍນາກາເຣນ ອສງ຺ກໂຣ ໂຫຕິ, ຕຖາ ອສງ຺ກຣາກາເຣນ ຠວຕິ. ອຍຕິ ປວຕ຺ຕຕິ ນຍວິຠຕ຺ຕີຕິ ອຍາ, ວິຕ຺ຖາເຣນ ອຍາຕິ ວິຕ຺ຖາຣຕຍາ, ຕ-ກາໂຣ ມິສ຺ສກໂທສາປຄມຕ຺ຖາຍ ອາຄໂຕ, ນຍວິຠຕ຺ຕິວິເສສວຈນໍ. ນເຍນ ຎາເຍນ ວິຠຕ຺ຕິ ນຍວິຠຕ຺ຕິ, ນ ປຎ຺ຈນຍວິຠຕ຺ຕາຫາຣານໍ ວິຕ຺ຖາເຣນ ປວຕ຺ຕາ ຎາຍວິຠຕ຺ຕິ ຕຖາ ອສງ຺ກຣາກາເຣນ ຠວຕິ ຕສ຺ມິໍ ອສໍກິຓ຺ຓາຕິ ຎາຕພ຺ພາຕິ ອຘິປ຺ປາໂຍ.

໒. ໂສຬສ ຫາຣາ ສຣູປໂຕ ວຸຕ຺ຕາ, ອມ຺ເຫຫິ ຈ ວິຎ຺ຎາຕາ, ‘‘ກຕເມ ປຎ຺ຈ ນຍາ’’ຕິ ວຕ຺ຕພ຺ພຠາວໂຕ ຕຖາ ປຸຈ຺ຉິຕ຺ວາ ສຣູປໂຕ ອຸທ຺ທິສິຕຸໍ ‘‘ຕຕ຺ຖ ກຕເມ ປຎ຺ຈ ນຍາ’’ຕ຺ຍາທິ ວຸຕ຺ຕໍ. ອຏ຺ຐກຖາຍໍ ປນ ‘‘ເອວໍ ຫາເຣ ອຸທ຺ທິສິຕ຺ວາ ອິທານິ ນເຍ ອຸທ຺ທິສິຕຸໍ ‘ຕຕ຺ຖ ກຕເມ’ຕິອາທິ ວຸຕ຺ຕ’’ນ຺ຕິ (ເນຕ຺ຕິ. ອຏ຺ຐ. ໒) ວຸຕ຺ຕໍ. ‘‘ຕຕ຺ຖ ນຍນ຺ຕິ ສໍກິເລເສ, ໂວທາເນ ຈ ວິຠາຄໂຕ ຎາເປນ຺ຕີຕິ ນຍາ, ນີຍນ຺ຕິ ວາ ຕານິ ເອຕ຺ຖ, ເອເຕຫິ ວາຕິ ນຍາ’’ຕິອາທິນາ (ເນຕ຺ຕິ. ອຏ຺ຐ. ໒) ອຏ຺ຐກຖາຍໍ ວິຕ຺ຖາເຣນ ວຈນຕ຺ໂຖ ວຸຕ຺ໂຕ. ນີ-ຘາຕຸຍາ ນນ຺ທິຍາວຏ຺ຏາທິນຍານຸສາເຣນ ສໍກິເລເສ, ໂວທາເນ ຈ ອາລມ຺ພິຕ຺ວາ ປວຕ຺ໂຕ ຎາຓສມ຺ປຍຸຕ຺ຕຈິຕ຺ຕຸປ຺ປາໂທ ມຸຂ຺ຍຕ຺ໂຖ, ນນ຺ທິຍາວຏ຺ຏາທິນຍານໍ ອຸປນິສ຺ສຍປຈ຺ຈຍສຕ຺ຕິ ຜລູປຈາຣໂຕ ຄຫິຕາ, ອິຕິ-ສທ຺ໂທ ຕໍ ຜລູປຈາຣໂຕ ຄຫິຕສຕ຺ຕິໍ ປຣາມສິ, ຕໍສຕ຺ຕິສຫິຕາ ນນ຺ທິຍາວຏ຺ຏາທິນຍາ ອ-ປຈ຺ຈຍຕ຺ຖາ.

ຕຓ຺ຫາອວິຊ຺ຊາຫິ ສໍກິເລສປກ຺ຂສ຺ສ ສຸຕ຺ຕສ຺ສ, ສມຖວິປສ຺ສນາຫິ ໂວທານປກ຺ຂສ຺ສ ສຸຕ຺ຕສ຺ສ ຈຕຸສຈ຺ຈໂຍຊນມຸເຂນ ນຍນລກ຺ຂໂຓ ສໍວຓ຺ຓນາວິເສໂສ ນນ຺ທິຍາວຏ຺ໂຏ ນໂຍ. ຕຕ຺ຖ ຈຕຸສຈ຺ຈນ຺ຕິ ຕຓ຺ຫາ ຈ ອວິຊ຺ຊາ ຈ ຠວມູລຕ຺ຕາ ສມຸທຍສຈ຺ຈໍ, ອວເສສາ ເຕຠູມກາ ຘມ຺ມາ ທຸກ຺ຂສຈ຺ຈໍ, ສມຖວິປສ຺ສນາ ມຄ຺ຄສຈ຺ຈໍ, ເຕນ ປຕ຺ຕພ຺ພາ ອສງ຺ຂຕຘາຕຸ ນິໂຣຘສຈ຺ຈນ຺ຕິ.

ຕີຫິ ອວຍເວຫິ ໂລຠາທີຫິ ສໍກິເລສປກ຺ເຂ, ຕີຫິ ອວຍເວຫິ ອໂລຠາທີຫິ ຈ ໂວທານປກ຺ເຂ ປຸກ຺ຂໂລ ໂສຠໂນຕິ ຕິປຸກ຺ຂໂລ, ອກຸສລມູເລຫິ ສໍກິເລສປກ຺ຂສ຺ສ, ກຸສລມູເລຫິ ໂວທານປກ຺ຂສ຺ສ ສຸຕ຺ຕຕ຺ຖສ຺ສ ຈຕຸສຈ຺ຈໂຍຊນມຸເຂນ ນຍນລກ຺ຂໂຓ ສໍວຓ຺ຓນາວິເສໂສ ຕິປຸກ຺ຂໂລ.

ສີຫສ຺ສ ຠຄວໂຕ ວິກ຺ກີຬິຕໍ ເອຕ຺ຖ ນເຍຕິ ສີຫວິກ຺ກີຬິໂຕ, ສຸຠສຎ຺ຎາທີຫິ ວິປລ຺ລາເສຫິ ສກລສໍກິເລສປກ຺ຂສ຺ສ, ສທ຺ຘິນ຺ທ຺ຣິຍາທີຫິ ໂວທານປກ຺ຂສ຺ສ ສຸຕ຺ຕຕ຺ຖສ຺ສ ຈຕຸສຈ຺ຈໂຍຊນມຸເຂນ ນຍນລກ຺ຂໂຓ ສໍວຓ຺ຓນາວິເສໂສ ສີຫວິກ຺ກີຬິຕນໂຍ.

ອຕ຺ຖນຍຕ຺ຕຍທິສາຠາເວນ ກຸສລາທິຘມ຺ມານໍ ອາໂລຈນໍ ທິສາໂລຈນໍ. ຕສ຺ສ ຕສ຺ສ ອຕ຺ຖນຍສ຺ສ ໂຍຊນຕ຺ຖໍ ກເຕສຸ ສຸຕ຺ຕສ຺ສ ອຕ຺ຖວິສ຺ສຊ຺ຊເນສຸ ເຍ ໂວທານາທໂຍ, ສໍກິເລສິກາ ຈ ຕສ຺ສ ຕສ຺ສ ນຍສ຺ສ ທິສາຠູຕາ ຘມ຺ມາ ສຸຕ຺ຕໂຕ ນິທ຺ຘາເຣຕ຺ວາ ກຖິຕາ, ເຕສໍ ຍຖາວຸຕ຺ຕຘມ຺ມານໍ ຈິຕ຺ເຕເນວ ‘‘ອຍໍ ປຐມາ ທິສາ, ອຍໍ ທຸຕິຍາ ທິສາ’’ຕິອາທິນາ ອາໂລຈນໍ ທິສາໂລຈນໍ.

ຕຖາ ອາໂລຈິຕານໍ ຘມ຺ມານໍ ອຕ຺ຖນຍຕ຺ຕຍໂຍຊເນ ສມານຍນໂຕ ອງ຺ກຸໂສ ວິຍາຕິ ອງ຺ກຸໂສ, ຕສ຺ສ ຕສ຺ສ ນຍສ຺ສ ທິສາຠູຕານໍ ກຸສລາທິຘມ຺ມານໍ ສມານຍນໍ ອງ຺ກຸໂສ ນໂຍ.

ລຎ຺ເຊຕີຕິ ລຎ຺ຊໂກ. ໂຍ ນໂຍ ສຸຕ຺ຕຕ຺ຖໍ ລຎ຺ເຊຕິ ປກາເສຕິ, ອິຕິ ລຎ຺ຊນໂຕ ປກາສນໂຕ ໂສ ນໂຍ ລຎ຺ຊໂກ ນາມ, ນໂຍ ຈ ໂສ ລຎ຺ຊໂກ ຈາຕິ ນຍລຎ຺ຊໂກ. ນຍລຎ຺ຊໂກ ປຐໂມ ນນ຺ທິຍາວຏ຺ໂຏ ນາມ, ນຍລຎ຺ຊໂກ ທຸຕິໂຍ ຕິປຸກ຺ຂໂລ ນາມ, ນຍລຎ຺ຊໂກ ຕຕິໂຍ ສີຫວິກ຺ກີຬິໂຕ ນາມາຕິ ໂຍເຊຕພ຺ໂພ.

ອຸຄ຺ຄຕານໍ ວິເສເສນ ອຸຄ຺ຄໂຕຕິ ອຸຕ຺ຕໂມ, ຕໍ ອຸຕ຺ຕມໍ. ຄຕາຕິ ຎາຕາ, ມຕາຕິ ອຕ຺ໂຖ. ‘‘ມຕາ’’ຕິ ວາ ປາໂຐ. ເສສເມຕ຺ຖ ວຸຕ຺ຕນຍານຸສາເຣນປິ ສໍວຓ຺ຓນານຸສາເຣນປິ ຊານິຕພ຺ພນ຺ຕິ.

ຍຖາວຸຕ຺ຕນຍວິເສສສໍວຓ຺ຓນາຍ ຏີກາຍໍ –

‘‘ສມູຫາທິໍ ອຸປາທາຍ ໂລກສງ຺ເກຕສິທ຺ຘາ ໂວຫາຣມຕ຺ຕຕາ ສມ຺ມຸຕິສຠາໂວ, ປຖວີຜສ຺ສາທີນໍ ກກ຺ຂຬຜຸສນາທິລກ຺ຂຓໍ ປຣມຕ຺ຖສຠາໂວ. ອຍຎ຺ເຫຕ຺ຖ ສງ຺ເຂໂປ – ຍສ຺ມິໍ ຠິນ຺ເນ, ອິຕຣາໂປເຫ ວາ ຈິຕ຺ເຕນ ກເຕ ນ ຕຖາ ພຸທ຺ຘິ, ອິທໍ ສມ຺ມຸຕິສຈ຺ຈໍ ຍຖາ ຆເຏ, ສສມ຺ຠາຣຊເລ ຈ, ຕພ຺ພິປຣິຍາເຍນ ປຣມຕ຺ຖສຈ຺ຈ’’ນ຺ຕິ –

ວຈເນ ຆຏກຖລອາປຊລກທ຺ທມາທິສງ຺ຂາຕໍ ສມູຫາທິໍ ອຸປາທາຍ ໂລກສ຺ສ ປຸພ຺ເພ ຆຏກຖລອາປຊລກທ຺ທມາທິສງ຺ເກຕສິທ຺ຘາ ຆຏກຖລອາປຊລກທ຺ທມາທິໂວຫາຣມຕ຺ຕຕາ ສມ຺ມຸຕິສຠາໂວ ສງ຺ເກຕວເສນ ອວິຕຖຕ຺ຕາ. ປຖວີອາທີນໍ ກກ຺ຂຬາທິລກ຺ຂຓໍ, ຜສ຺ສາທີນໍ ຜຸສນາທິລກ຺ຂຓໍ ປຣມຕ຺ຖສຠາໂວ. ‘‘ຍທິ ເອວໍ ຆຏາທິເກ ອຠິນ຺ເນ ວາ ອາປາທິເກ ວາ ອນຸຣູເປນ ອູນຠາເວນ ອປ຺ປວຕ຺ຕມາເນ ວາ ສຕິ ສມ຺ມຸຕິຠາໂວ ໂຫຕຸ, ຠິນ຺ເນ ວາ ອູເນ ວາ ກຖໍ ສມ຺ມຸຕິຠາໂວ ຠເວຍ຺ຍ, ປຖວີຜສ຺ສາທີນມ຺ປິ ຠິຊ຺ຊມານຕ຺ຕາ, ກກ຺ຂຬຜຸສນາທີນຎ຺ຈ ປຖວີຜສ຺ສາທີຫິ ອນຎ຺ຎຕ຺ຕາ ກຖໍ ປຣມຕ຺ຖສຠາໂວ ຠເວຍ຺ຍ, ກຕເມນ ສງ຺ເຂເປນ ອຕ຺ເຖນ ສມ຺ມຸຕິສຠາໂວ, ປຣມຕ຺ຖສຠາໂວ ຈ ອມ຺ເຫຫິ ຊານິຕພ຺ໂພ’’ຕິ ວຕ຺ຕພ຺ພຠາວໂຕ ‘‘ອຍຎ຺ເຫຕ຺ຖ ສງ຺ເຂໂປ’’ຕິອາທິມາຫ. ຕຕ຺ຖ ເອຕ຺ຖາຕິ ເອເຕສຸ ສມ຺ມຸຕິສຠາວປຣມຕ຺ຖສຠາເວສຸ ອຍໍ ນໂຍ ວຸຈ຺ຈມາໂນ ສງ຺ເຂໂປ ອຕ຺ໂຖ ທຏ຺ຐພ຺ໂພ.

ຍສ຺ມິໍ ຆຏາທິເກ ຠິນ຺ເນ ສຕິ ຕໂຕ ຆຏາທິໂຕ ອິຕໂຣ ກຖລາທິຠາໂວ ຈິຕ຺ເຕນ ປຸພ຺ເພ ກເຕນ ຍຖາ ເຍນ ກຖລາທິໂວຫາເຣນ ຠວຕິ, ຍສ຺ມິໍ ອາປາທິເກ ສມ຺ຠາຣຊລາທິເກ ອູນຠາເວນ ປວຕ຺ຕມາເນ ສຕິ ວາ ຕໂຕ ອາປາທິໂຕ ອິຕໂຣ ກທ຺ທມາທິຠາໂວ ຈິຕ຺ເຕນ ປຸພ຺ເພ ກເຕນ ຍຖາ ເຍນ ກທ຺ທມາທິໂວຫາເຣນ ຠວຕິ, ຕຖາ ເຕນ ໂວຫາເຣນ ພຸທ຺ຘິ ກຖລາທິສຠາວຊານນໍ ກທ຺ທມາທິສຠາວຊານນໍ ຠວຕິ, ອິທໍ ອຠິນ຺ເນ ຆຏາທິກໍ ວາ ຠິນ຺ເນ ກຖລາທິກໍ ວາ ອນູເນ ອາປາທິກໍ ວາ ອູເນ ກທ຺ທມາທິກໍ ວາ ສພ຺ພໍ ສມ຺ມຸຕິສຈ຺ຈໍ ໂຫຕ຺ເວວ. ‘‘ກທ຺ທມສ຺ມິໍ ຠິນ຺ເນ, ກທ຺ທມສ຺ມິໍ ອູເນ ວາ ສຕິ ອິຕໂຣ ສມ຺ມຸຕິສຠາໂວ’’ຕິ ປຸຈ຺ຉິຕພ຺ພຠາວໂຕ ‘‘ຆເຏ, ສມ຺ຠາຣຊເລ ຈາ’’ຕິ ວຸຕ຺ຕໍ.

ສມ຺ມຸຕິສຈ຺ຈສຠາໂວ ຕຸມ຺ເຫຫິ ວຸຕ຺ໂຕ, ອມ຺ເຫຫິ ຈ ຎາໂຕ, ‘‘ກຕໂມ ປຣມຕ຺ຖສຈ຺ຈສຠາໂວ’’ຕິ ວຕ຺ຕພ຺ພຠາວໂຕ ‘‘ຕພ຺ພິປຣິຍາເຍນ ປຣມຕ຺ຖສຈ຺ຈ’’ນ຺ຕິ ວຸຕ຺ຕໍ. ປຖວີອາທີນໍ ກກ຺ຂຬາທິລກ຺ຂຓໂຕ ອິຕຣສ຺ສ ຜຸສນາທິລກ຺ຂຓສ຺ສ ອສມ຺ຠວໂຕ, ຜສ຺ສາທີນຎ຺ຈ ຜຸສນາທິລກ຺ຂຓໂຕ ອິຕຣສ຺ສ ກກ຺ຂຬາທິລກ຺ຂຓສ຺ສ ອສມ຺ຠວໂຕ ປຖວີຜສ຺ສາທີນໍ ລກ຺ຂຬຜຸສນາທິລກ຺ຂຓໍ ປຣມຕ຺ຖສຈ຺ຈໍ ໂຫຕ຺ເວວາຕິ ອິມສ຺ມິໍ ສງ຺ເຂປຕ຺ເຖ ຄຫິເຕ ໂກຈິ ວິໂຣໂຘ ນຕ຺ຖີຕິ ອຘິປ຺ປາໂຍຕິ.

໓. ປຎ຺ຈ ນຍາ ສຣູປໂຕ ອາຈຣິເຍນ ອຸທ຺ທິຏ຺ຐາ, ອມ຺ເຫຫິ ຈ ວິຎ຺ຎາຕາ, ‘‘ຍານິ ປທານິ ອຏ຺ຐາຣສ ມູລປທານິ ອຸທ຺ທິຏ຺ຐານິ, ກຕມານິ ຕານີ’’ຕິ ປຸຈ຺ຉິຕພ຺ພຕ຺ຕາ ຕານິ ສຣູປໂຕ ທສ຺ເສຕຸໍ ‘‘ຕຕ຺ຖ ກຕມານິ ອຏ຺ຐາຣສ ມູລປທານິ’’ຕ຺ຍາທິມາຫ. ອຏ຺ຐກຖາຍໍ ປນ ‘‘ເອວໍ ນເຍປິ ອຸທ຺ທິສິຕ຺ວາ ອິທານິ ມູລປທານິ ອຸທ຺ທິສິຕຸໍ ‘ຕຕ຺ຖ ກຕມານີ’ຕິອາທິ ອາຣທ຺ຘ’’ນ຺ຕິ ວຸຕ຺ຕໍ. ຕຕ຺ຖ ກຸສລານິ ນວ ປທານິ, ອກຸສລານິ ນວ ປທານິ ອຏ຺ຐາຣສ ມູລປທານີຕິ ທຏ຺ຐພ຺ພານີຕິ ໂຍຊນາ. ມູລນ຺ຕິ ປຕິຏ຺ຐຫນ຺ຕິ ເອເຕຫິ ນຍາ, ປຕິຏ຺ຐານວິຠາຄາ ຈາຕິ ມູລານິ, ປທນ຺ຕິ ປຕິຏ຺ຐຫນ຺ຕິ ເອຕ຺ຖ ນຍາ, ປຏ຺ຐານວິຠາຄາ, ອຘິຄມາ ຈາຕິ ປທານິ, ວຸຕ຺ຕປ຺ປກາຣຏ຺ເຐນ ມູລານິ ຈ ຕານິ ປທານິ ຈາຕິ ມູລປທານິ. ກຸຈ຺ຉິເຕ ປາປຘມ຺ເມ ສລຍນ຺ຕີຕິ ກຸສລານິ, ກຸເສ ຣາຄາທໂຍ ລຸນນ຺ຕີຕິ ກຸສລານິ, ກຸສາ ວິຍ ລຸນນ຺ຕີຕິ ກຸສລານິ, ກຸເສນ ຎາເຓນ ລາຕພ຺ພານິ ປວຕ຺ເຕຕພ຺ພານີຕິ ກຸສລານິ. ກຸສລານໍ ປຏິປກ຺ຂານີຕິ ອກຸສລານິ ອ-ສທ຺ໂທ ເຈຕ຺ຖ ປຏິປກ຺ຂຕ຺ໂຖຕິ.

ນວ ປທານິ ກຸສລານິ, ນວ ປທານິ ອກຸສລານີຕິ ຄຓນປຣິຈ຺ເຉທໂຕ, ຊາຕິເຠທໂຕ ຈ ອຸທ຺ທິຏ຺ຐານິ, ‘‘ກຕມານິ ຕານີ’’ຕິ ປຸຈ຺ຉິຕພ຺ພຕ຺ຕາ ນວ ປທານິ ອກຸສລານິ ປຈ຺ຈາສຕ຺ຕິນ຺ຍາເຍນ ສຣູປໂຕ ທສ຺ເສຕຸໍ ‘‘ກຕມານິ ນວ ປທານິ ອກຸສລານີ’’ຕິອາທິ ວຸຕ຺ຕໍ. ອຏ຺ຐກຖາຍໍ ປນ –

‘‘ເອວໍ ຄຓນປຣິຈ຺ເຉທໂຕ, ຊາຕິເຠທໂຕ ຈ ມູລປທານິ ທສ຺ເສຕ຺ວາ ອິທານິ ສຣູປໂຕ ທສ຺ເສນ຺ໂຕ ສໍກິເລສປກ຺ຂໍເຍວ ປຐມໍ ອຸທ຺ທິສຕິ ‘ຕຓ຺ຫາ’ຕິອາທິນາ’’ຕິ (ເນຕ຺ຕິ. ອຏ຺ຐ. ໓) –

ວຸຕ຺ຕໍ. ຕຕ຺ຖ ຣູປາທິເກ ຂນ຺ເຘ ຕສຕິ ປຣິຕສຕີຕິ ຕຓ຺ຫາ. ອວິນ຺ທິຍໍ ກາຍທຸຈ຺ຈຣິຕາທິໍ ວິນ຺ທຕີຕິ ອວິຊ຺ຊາ, ວິນ຺ທິຍໍ ກາຍສຸຈຣິຕາທິໍ ນ ວິນ຺ທຕີຕິ ອວິຊ຺ຊາ, ວິຊ຺ຊາຍ ປຏິປກ຺ຂາຕິ ວາ ອວິຊ຺ຊາ. ລຸພ຺ຠນ຺ຕິ ເຕນາຕິ ໂລໂຠ, ລຸພ຺ຠຕີຕິ ວາ ໂລໂຠ, ລຸພ຺ຠນໍ ວາ ໂລໂຠ. ໂທສໂມເຫສຸປິ ເອເສວ ນໂຍ. ອສຸເຠ ຣູປກ຺ຂນ຺ຘາທິເກ ‘‘ສຸຠ’’ນ຺ຕິ ປວຕ຺ຕາ ສຎ຺ຎາ ສຸຠສຎ຺ຎາ. ທຸກ຺ຂທຸກ຺ຂາທິເກ ‘‘ສຸຂ’’ນ຺ຕິ ປວຕ຺ຕາ ສຎ຺ຎາ ສຸຂສຎ຺ຎາ. ອນິຈ຺ເຈ ສງ຺ຂາຣຘມ຺ເມ ‘‘ນິຈ຺ຈ’’ນ຺ຕິ ປວຕ຺ຕາ ສຎ຺ຎາ ນິຈ຺ຈສຎ຺ຎາ. ອນຕ຺ຕສຠາເວສຸ ຈກ຺ຂາທີສຸ ຂນ຺ເຘສຸ ‘‘ອຕ຺ຕາ’’ຕິ ປວຕ຺ຕາ ສຎ຺ຎາ ອຕ຺ຕສຎ຺ຎາ. ຍຕ຺ຖາຕິ ເຍສຸ ປເທສຸ ສພ຺ໂພ ອກຸສລປກ຺ໂຂ ສງ຺ຄຫໍ ສໂມສຣຓໍ ຄຈ຺ຉຕິ, ຕານິ ປທານິ ອກຸສລານີຕິ ໂຍຊນາ. ສງ຺ຄຫໍ ຄຓນໍ. ສໂມສຣຓໍ ສມາໂຣປນໍ.

ປຈ຺ຈນີກຘມ຺ເມ ອຸທ຺ຘຈ຺ຈາທິເກ ນີວຣເຓ ສເມຕິ ວູປສເມຕິ ຕທງ຺ຄວິກ຺ຂມ຺ຠນວເສນາຕິ ສມໂຖ. ສງ຺ຂາເຣ ອນິຈ຺ຈາທີຫິ ວິວິເຘຫິ ອາກາເຣຫິ ປສ຺ສຕີຕິ ວິປສ຺ສນາ. ໂລຠສ຺ສ ປຏິປກ຺ໂຂ ອໂລໂຠ. ໂທສສ຺ສ ປຏິປກ຺ໂຂ ອໂທໂສ. ໂມຫສ຺ສ ປຏິປກ຺ໂຂ ອໂມໂຫ. ເອຕ຺ຖາປິ ອ-ສທ຺ໂທ ປຏິປກ຺ຂຕ຺ໂຖ, ນ ອຠາວຕ຺ຖາທິໂກຕິ ອຘິປ຺ປາໂຍ. ອສຸເຠ ຣູປກ຺ຂນ຺ຘາທິເກ, ຈກ຺ຂາທິມ຺ຫິ ວາ ‘‘ອສຸຠ’’ນ຺ຕິ ປວຕ຺ຕາ ສຎ຺ຎາປຘານຈິຕ຺ຕຸປ຺ປາທາ ອສຸຠສຎ຺ຎາ, ວິເສສໂຕ ກາຍານຸປສ຺ສນາສຕິປຏ຺ຐານໍ. ທຸກ຺ຂທຸກ຺ຂຕາທີສຸ ‘‘ທຸກ຺ຂ’’ນ຺ຕິ ປວຕ຺ຕາ ສຎ຺ຎາປຘານຈິຕ຺ຕຸປ຺ປາທາ ທຸກ຺ຂສຎ຺ຎາ, ວິເສສໂຕ ເວທນານຸປສ຺ສນາສຕິປຏ຺ຐານໍ. ອນິຈ຺ເຈ ຂນ຺ຘາທິເກ ວິປຣິຓາມຘມ຺ເມ ‘‘ອນິຈ຺ຈ’’ນ຺ຕິ ປວຕ຺ຕາ ສຎ຺ຎາປຘານຈິຕ຺ຕຸປ຺ປາທາ ອນິຈ຺ຈສຎ຺ຎາ, ວິເສສໂຕ ຈິຕ຺ຕານຸປສ຺ສນາສຕິປຏ຺ຐານໍ. ອນຕ຺ຕສຠາເວ ຂນ຺ເຘ, ຈກ຺ຂາທິມ຺ຫິ ວາ ‘‘ອນຕ຺ຕາ’’ຕິ ປວຕ຺ຕາ ສຎ຺ຎາປຘານຈິຕ຺ຕຸປ຺ປາທາ ອນຕ຺ຕສຎ຺ຎາ, ວິເສສໂຕ ຘມ຺ມານຸປສ຺ສນາສຕິປຘານໍ. ປຎ຺ຎາສຕິສີເສນ ຫິ ປວຕ຺ຕາ ອຍໍ ເທສນາ. ເຕນ ວຸຕ຺ຕໍ ຠຄວຕາ ‘‘ກຖຎ຺ຈ, ຠິກ຺ຂເວ, ສຕິພລໍ ທຏ຺ຐພ຺ພໍ? ຈຕູສຸ ສຕິປຏ຺ຐາເນສຸ, ເອຕ຺ຖ ສຕິພລໍ ທຏ຺ຐພ຺ພ’’ນ຺ຕິ. ຍຕ຺ຖາຕິ ເຍສຸ ປເທສຸ ສພ຺ໂພ ກຸສລປກ຺ໂຂ ສງ຺ຄຫໍ ສໂມສຣຓໍ ຄຈ຺ຉຕິ, ຕານິ ປທານິ ກຸສລານີຕິ ໂຍຊນາ.

ອຸທ຺ທານນ຺ຕິ ອຸທ຺ຘໍ ທານໍ ຣກ຺ຂຓໍ ອຸທ຺ທານໍ, ສງ຺ຄຫວຈນນ຺ຕິ ອຕ຺ໂຖ. ອຸທ຺ທາເນ ອວຸຕ຺ເຕ ສຕິ ເຫຏ຺ຐາ ວຸຕ຺ຕສ຺ສ ອຕ຺ຖສ຺ສ ວິປ຺ປກິຓ຺ຓຠາໂວ ທິນ຺ໂນ ວິຍ ຠເວຍ຺ຍ, ຕສ຺ມາ ວິປ຺ປກິຓ຺ຓຠາວສ຺ສ ນິວາຣຓຕ຺ຖໍ ອຸທ຺ທານນ຺ຕິ ອຘິປ຺ປາໂຍ. ຈຕຸໂຣ ຈ ວິປລ຺ລາສາຕິ ສຸຠສຸຂນິຈ຺ຈອຕ຺ຕສຎ຺ຎາ. ກິເລສາ ຠວນ຺ຕິ ເອຕ຺ຖ ນວປເທສູຕິ ຠູມີ, ກິເລສານໍ ຠູມີຕິ ກິເລສຠູມີ, ກິເລສປວຕ຺ຕນຏ຺ຐານານິ ນວ ປທານີຕິ ວຸຕ຺ຕໍ ໂຫຕິ.

ຈຕຸໂຣ ສຕິປຏ຺ຐານາຕິ ອສຸຠທຸກ຺ຂອນິຈ຺ຈອນຕ຺ຕສຎ຺ຎາ. ອິນ຺ທ຺ຣິຍຠູມີຕິ ສທ຺ຘາທີນໍ ວິມຸຕ຺ຕິປຣິປາຈນິນ຺ທ຺ຣິຍານໍ ຠູມີ ປວຕ຺ຕນຏ຺ຐານານິ ສໂມສຣຓຏ຺ຐານານິ.

ນວຫິ ກຸສລປເທຫິ ກຸສລປກ຺ຂາ ຍຸຊ຺ຊນ຺ຕິ ໂຍຊີຍນ຺ຕິ, ນວຫິ ອກຸສລປເທຫິ ອກຸສລປກ຺ຂາ ຍຸຊ຺ຊນ຺ຕິ ໂຍຊີຍນ຺ຕິ. ນວຫິ ກຸສລປເທຫິ ສຫ ກຸສລປກ຺ຂາ ຍຸຊ຺ຊນ຺ຕິ ຍຸຊ຺ຊນ຺ຕາ ຠວນ຺ຕິ, ນວຫິ ອກຸສລປເທຫິ ສຫ ອກຸສລປກ຺ຂາ ຍຸຊ຺ຊນ຺ຕິ ຍຸຊ຺ຊນ຺ຕາ ຠວນ຺ຕີຕິ ອຸທ຺ເທສວາເຣ ວຸຕ຺ຕາວເສໂສ ສໍວຓ຺ຓນານຸສາເຣນ ວິຊານິຕພ຺ໂພ.

ອິຕິ ສຕ຺ຕິພລານຸຣູປາ ຣຈິຕາ

ອຸທ຺ເທສວາຣສ຺ສ ອຕ຺ຖວິຠາວນາ ນິຏ຺ຐິຕາ.