໑໒. ໂລຫິຈ຺ຈສຸຕ຺ຕວຓ຺ຓນາ

ໂລຫິຈ຺ຈພ຺ຣາຫ຺ມຓວຕ຺ຖຸວຓ຺ຓນາ

໕໐໑. ເອວໍ ເກວຏ຺ຏສຸຕ຺ຕໍ ສໍວຓ຺ເຓຕ຺ວາ ອິທານິ ໂລຫິຈ຺ຈສຸຕ຺ຕໍ ສໍວຓ຺ເຓນ຺ໂຕ ຍຖານຸປຸພ຺ພໍ ສໍວຓ຺ຓໂນກາສສ຺ສ ປຕ຺ຕຠາວໍ ວິຠາເວຕຸໍ, ເກວຏ຺ຏສຸຕ຺ຕສ຺ສານນ຺ຕຣໍ ສງ຺ຄີຕສ຺ສ ສຸຕ຺ຕສ຺ສ ໂລຫິຈ຺ຈສຸຕ຺ຕຠາວໍ ວາ ປກາເສຕຸໍ ‘‘ເອວໍ ເມ ສຸຕໍ…ເປ… ໂກສເລສູຕິ ໂລຫິຈ຺ຈສຸຕ຺ຕ’’ນ຺ຕິ ອາຫ. ສາລວຕິກາຕິ ກາຣຓມນ຺ຕເຣນ ອິຕ຺ຖິລິງ຺ຄວເສນ ຕສ຺ສ ຄາມສ຺ສ ນາມໍ. ຄາມຓິກາຠາເວນາຕິ ເກຈິ. ວຕິຍາຕິ ກຓ຺ຏກສາຂາທິວຕິຍາ. ໂລຫິໂຕ ນາມ ຕສ຺ສ ກຸເລ ປຸພ຺ພປຸຣິໂສ, ຕພ຺ພໍສວເສນ ໂລຫິຕສ຺ສ ອປຈ຺ຈໍ ໂລຫິຈ຺ໂຈຕິ ພ຺ຣາຫ຺ມຓສ຺ສ ໂຄຕ຺ຕໂຕ ອາຄຕນາມໍ.

໕໐໒. ‘‘ກິຎ຺ຫິ ປໂຣ ປຣສ຺ສ ກຣິສ຺ສຕີ’’ຕິ ປຣານຸກມ຺ປາ ວິຣຫິຕຕ຺ຕາ ລາມກໍ. ນ ຕຸ ອຸຈ຺ເຉທສສ຺ສຕານໍ ອຎ຺ຎຕຣສ຺ສາຕິ ອາຫ ‘‘ນ ປນາ’’ຕິອາທິ. ທິຏ຺ຐິຄຕນ຺ຕິ ຫິ ລທ຺ຘິມຕ຺ຕໍ ອຘິປ຺ເປຕໍ, ອຎ຺ຎຖາ ອຸຈ຺ເຉທສສ຺ສຕຄ຺ຄາຫວິນິມຸຕ຺ໂຕ ໂກຈິ ທິຏ຺ຐິຄ຺ຄາໂຫ ນາມ ນຕ຺ຖີຕິ ເຕສມຎ຺ຎຕຣໍ ສິຍາ. ‘‘ອຸປ຺ປນ຺ນໍ ໂຫຕີ’’ຕິ ອິທໍ ມນສິ, ວຈສິ ຈ ອຸປ຺ປນ຺ນຕາສາຘາຣຓວຈນນ຺ຕິ ທສ຺ເສຕິ ‘‘ນ ເກວລຎ຺ຈາ’’ຕິອາທິນາ. ໂສ ກິຣ…ເປ… ຠາສຕິເຍວາຕິ ຈ ຕສ຺ສາ ລທ຺ຘິຍາ ໂລເກ ປາກຏຠາວໍ ວທຕິ. ຍສ຺ມາ ປນ ອຕ຺ຕໂຕ ອຎ຺ໂຎ ປໂຣ ໂຫຕິ, ຕສ຺ມາ ຍຖາ ອນຸສາສກໂຕ ອນຸສາສິຕພ຺ໂພ ປໂຣ, ເອວໍ ອນຸສາສິຕພ຺ພໂຕປິ ອນຸສາສໂກຕິ ທສ຺ເສຕຸໍ ‘‘ປໂຣ’’ຕິອາທິ ວຸຕ຺ຕໍ. ກິໍ-ສທ຺ທາເປກ຺ຂາຍ ເຈຕ຺ຖ ‘‘ກຣິສ຺ສຕີ’’ຕິ ອນາຄຕກາລວຈນໍ, ອນາຄເຕປິ ວາ ເຕນ ຕສ຺ສ ກາຕພ຺ພໍ ນຕ຺ຖີຕິ ທສ຺ສນຕ຺ຖໍ. ກຸສລໍ ຘມ຺ມນ຺ຕິ ອນວຊ຺ຊຘມ຺ມໍ ນິກ຺ກິເລສຘມ຺ມໍ, ວິໂມກ຺ຂຘມ຺ມນ຺ຕິ ອຕ຺ໂຖ. ‘‘ປເຣສໍ ຘມ຺ມໍ ກເຖສ຺ສາມີ’’ຕິ ເຕຫິ ອຕ຺ຕານໍ ປຣິວາຣາເປຕ຺ວາ ວິຈຣຓໍ ກິມຕ຺ຖິຍໍ, ອາສຍວຸທ຺ຘສ຺ສປິ ອນຸໂຣເຘນ ວິນາ ຕໍ ນ ໂຫຕິ, ຕສ຺ມາ ອຕ຺ຕນາ…ເປ… ວິຫາຕພ຺ພນ຺ຕິ ວທຕິ. ເຕນາຫ ‘‘ເອວໍສມ຺ປທມິທໍ ປາປກໍ ໂລຠຘມ຺ມໍ ວທາມີ’’ຕິ.

໕໐໔. ‘‘ອິຕ຺ຖິລິງ຺ຄວເສນາ’’ຕິ ອິມິນາ ປຸລ຺ລິງ຺ຄິກສ຺ສປິ ອຕ຺ຖສ຺ສ ອິຕ຺ຖິລິງ຺ຄສມຎ຺ຎາຕິ ທສ຺ເສຕິ. ໂສຕິ ໂລຫິຈ຺ຈພ຺ຣາຫ຺ມໂຓ. ຠາໂຣຕິ ຠຄວໂຕ ປຣິສພາຫຸລ຺ລຕ຺ຕາ, ອຕ຺ຕໂນ ຈ ພຫຸກິຈ຺ຈກຣຓີຍຕ຺ຕາ ຄຣຸ ທຸກ຺ກຣໍ.

໕໐໘. ກຖາຜາສຸກຕ຺ຖນ຺ຕິ ກຖາສຸຂຕ຺ຖໍ, ສຸເຂນ ກຖໍ ກເຖຕຸຎ຺ເຈວ ໂສຕຸຎ຺ຈາຕິ ອຕ຺ໂຖ. ອຍໍ ອຸປາສໂກຕິ ໂຣສິກນ຺ຫາປິຕໍ ອາຫ. ອປ຺ເປວ ນາມ ສິຍາຕິ ເອຕ຺ຖ ປີຕິວເສນ ອາເມຑິຕໍ ທຏ຺ຐພ຺ພໍ. ຕຖາ ຫິ ຕໍ ‘‘ພຸທ຺ຘຄຊ຺ຊິຕ’’ນ຺ຕິ ວຸຈ຺ຈຕິ. ຠຄວາ ຫິ ອີທິເສສຸ ຐາເນສຸ ວິເສສໂຕ ປີຕິໂສມນສ຺ສຊາໂຕ ໂຫຕິ, ຕສ຺ມາ ປີຕິວເສນ ປຐມໍ ຄຊ຺ຊຕິ, ທຸຕິຍມ຺ປິ ອນຸຄຊ຺ຊຕິ. ກິໍ ວິເສສໍ ຄຊ຺ຊນມນຸຄຊ຺ຊນນ຺ຕິ ວຸຕ຺ຕໍ ‘‘ອຍ’’ນ຺ຕິອາທິ. ອາໂທ ຠາສນໍ ອລ຺ລາໂປ, ສຎ຺ໂຎເຄ ປເຣ ຣສ຺ໂສ. ຕທຸຕ຺ຕຣິ ສຫ ຠາສນໍ ສລ຺ລາໂປ.

ໂລຫິຈ຺ຈພ຺ຣາຫ຺ມຓານຸໂຍຄວຓ຺ຓນາ

໕໐໙. ສມຸທຍສຎ຺ຊາຕີຕິ ອາຍຸປ຺ປາໂທຕິ ອາຫ ‘‘ໂຠຄຸປ຺ປາໂທ’’ຕິ. ຕໂຕຕິ ສາລວຕິກາຍ. ລາຠນ຺ຕຣາຍກໂຣຕິ ຘນຘຎ຺ຎລາຠສ຺ສ ອນ຺ຕຣາຍກໂຣ. ອນຸປຸພ຺ໂພ ກປິ-ສທ຺ໂທ ອາກງ຺ຂນຕ຺ໂຖຕິ ທສ຺ເສຕິ ‘‘ອິຈ຺ຉຕີ’’ຕິ ອິມິນາ. ອຍໍ ອຏ຺ຐກຖາໂຕ ອປໂຣ ນໂຍ – ສາຕິສເຍນ ຫິເຕນ ອນຸກມ຺ປໂກ ອນຸຄ຺ຄຓ຺ຫນໂກ ຫິຕານຸກມ຺ປີຕິ. ສມ຺ປຊ຺ຊຕີຕິ ອາເສວນລາເຠນ ນິປ຺ປຊ຺ຊຕິ, ພລວຕີ ໂຫຕິ ອວຄ຺ຄຫາຕິ ອຕ຺ໂຖ. ເຕນ ວຸຕ຺ຕໍ ‘‘ນິຍຕາ ໂຫຕີ’’ຕິ.

໕໑໐-໕໑໑. ທຸຕິຍໍ ອຸປປຕ຺ຕິນ຺ຕິ ‘‘ນນຸ ຣາຊາ ປເສນທິໂກສໂລ’’ຕິອາທິນາ ວຸຕ຺ຕໍ ທຸຕິຍໍ ອຸປປຕ຺ຕິໍ ຐານໍ ຍຸຕ຺ຕິໍ. ກາຣຓຎ຺ຫິ ຠຄວາ ອຸປມາມຸເຂນ ທສ຺ເສຕິ, ອິມາຍ ຈ ອຸປປຕ຺ຕິຍາ ຕຸມ຺ເຫ ເຈວ ອຎ຺ເຎ ຈາຕິ ໂລຫິຈ຺ຈມ຺ປິ ອນ຺ໂຕກຕ຺ວາ ສໍເວຊນໍ ກຕໍ ໂຫຕິ. ເຍ ຈ ອິເມ ກຸລປຸຕ຺ຕາ ທິພ຺ພາ ຄພ຺ຠາ ປຣິປາເຈນ຺ຕີຕິ ໂຍຊນາ. ອຸປນິສ຺ສຍສມ຺ປຕ຺ຕິຍາ, ຎາຓປຣິປາກສ຺ສ ວາ ອຠາເວນ ອສກ຺ໂກນ຺ຕາ. ກມ຺ມປເທນ ອຕຸລ຺ຍາຘິກຣຓຕ຺ຕາ ປຣິປາເຈນ຺ຕິ ກິຣິຍາຍ ວິຠຕ຺ຕິວິປລ຺ລາເສນ ອຸປໂຍຄຕ຺ເຖ ປຈ຺ຈຕ຺ຕວຈນໍ. ເຍ ປນ ‘‘ປຣິປຈ຺ຈນ຺ຕີ’’ຕິ ກມ຺ມຣູເປນ ປຐນ຺ຕິ, ເຕສໍ ມເຕ ວິຠຕ຺ຕິວິປລ຺ລາເສນ ປໂຍຊນໍ ນຕ຺ຖິ ກມ຺ມກຕ຺ຕຸຠາວໂຕ, ອຕ຺ໂຖ ປນສ຺ສ ທຸຕິຍວິກປ຺ເປ ວຸຕ຺ຕນເຍນ ທານາທິປຸຎ຺ຎວິເສໂສ ເວທິຕພ຺ໂພ. ອຫິຕານຸກມ຺ປາທິຕາ ຈ ຕສ຺ສ ຕໍສມງ຺ຄີສຕ຺ຕວເສນ ໂຫຕິ. ທິວິ ຠວາຕິ ທິພ຺ພາ. ຄພ຺ເຠນ຺ຕິ ປຣິປຈ຺ຈນວເສນ ອຕ຺ຕນິ ປພນ຺ເຘນ຺ຕີຕິ ຄພ຺ຠາ, ເທວໂລກາ. ‘‘ຉນ຺ນໍ ເທວໂລການ’’ນ຺ຕິ ນິທສ຺ສນວຈນເມຕໍ. ພ຺ຣຫ຺ມໂລກສ຺ສາປິ ຫິ ທິພ຺ພຄພ຺ຠຠາໂວ ລພ຺ຠເຕວ ທິພ຺ພວິຫາຣເຫຕຸກຕ຺ຕາ. ເອວຎ຺ຈ ກຕ຺ວາ ‘‘ຠາວນໍ ຠາວຍມານາ’’ຕິ ອິທມ຺ປິ ວຈນໍ ສມຕ຺ຖິຕໍ ໂຫຕິ. ‘‘ເທວໂລກຄາມິນິໍ ປຏິປທໍ ປູຣຍມານາ’’ຕິ ວຕ຺ວາ ຕໍ ປຏິປທໍ ສຣູປໂຕ ທສ຺ເສຕຸໍ ‘‘ທານໍ ທທມານາ’’ຕິອາທິ ວຸຕ຺ຕໍ. ຠວນ຺ຕິ ເອຕ຺ຖ ຍຖາຣຸຈິ ສຸຂສມປ຺ປິຕາຕິ ຠວາ, ວິມານານິ. ເທວຠາວາວຫຕ຺ຕາ ທິພ຺ພາ. ວຸຕ຺ຕນເຍເນວ ຄພ຺ຠາ.ທານາທໂຍ ເທວໂລກສໍວຕ຺ຕນິກ ປຸຎ຺ຎວິເສສາ. ທິພ຺ພາ ຠວາຕິ ອິຘ ເທວໂລກປຣິຍາປນ຺ນາ ອຸປປຕ຺ຕິຠວາ ອຘິປ຺ເປຕາ. ຕທາວໂຫ ຫິ ກມ຺ມຠໂວ ປຸພ຺ເພ ຄຫິໂຕຕິ ອາຫ ‘‘ເທວໂລເກ ວິປາກກ຺ຂນ຺ຘາ’’ຕິ.

ຕໂຍໂຈທນາຣຫວຓ຺ຓນາ

໕໑໓. ອນິຍາມິເຕເນວາຕິ ອນິຍມິເຕເນວ, ‘‘ຕ຺ວໍ ເອວໍ ທິຏ຺ຐິໂກ, ເອວໍ ສຕ຺ຕານໍ ອນຕ຺ຖສ຺ສ ກາຣໂກ’’ຕິ ເອວໍ ອນຸທ຺ເທສິເກເນວ. ສພ຺ພໂລກປຕ຺ຖຏາຍ ລທ຺ຘິຍາ ສມຸປ຺ປຊ຺ຊນໂຕ ຍາວ ຠວຄ຺ຄາ ອຸຄ຺ຄຕໍ. ມານນ຺ຕິ ‘‘ອຫເມຕໍ ຊານາມິ, ອຫເມຕໍ ປສ຺ສາມີ’’ຕິ ເອວໍ ປວຕ຺ຕໍ ປຓ຺ຑິຕມານໍ. ຠິນ຺ທິຕ຺ວາຕິ ວິຘເມຕ຺ວາ, ຊຫາເປຕ຺ວາຕິ ອຕ຺ໂຖ. ຕໂຍ ສຕ຺ຖາເຣຕິ ອສມ຺ປາທິຕອຕ຺ຕຫິໂຕ ອໂນວາທກຣສາວໂກ ຈ ອສມ຺ປາທິຕອຕ຺ຕຫິໂຕ ໂອວາທກຣສາວໂກ ຈ ສມ຺ປາທິຕອຕ຺ຕຫິໂຕ ອໂນວາທກຣສາວໂກ ເຈຕິ ອິເມ ຕໂຍ ສຕ຺ຖາເຣ. ຈຕຸຕ຺ໂຖ ປນ ສມ຺ມາສມ຺ພຸທ຺ໂຘ ນ ໂຈທນາຣໂຫ, ຕສ຺ມາ ‘‘ຕໍ ເຕນ ປຸຈ຺ຉິໂຕ ເອວ ກເຖສ຺ສາມີ’’ຕິ ໂຈທນາຣເຫວ ຕໂຍ ສຕ຺ຖາເຣ ປຐມໍ ທສ຺ເສຕິ, ປຈ຺ຉາ ຈຕຸຕ຺ຖໍ ສຕ຺ຖາຣໍ. ກາມຎ຺ເຈຕ຺ຖ ຈຕຸຕ຺ໂຖ ສຕ຺ຖາ ເອໂກ ອທຸຕິໂຍ ອນຎ຺ຎສາຘາຣໂຓ, ຕຖາປິ ໂສ ເຍສໍ ອຸຕ຺ຕຣິມນຸສ຺ສຘມ຺ມານໍ ວເສນ ‘‘ຘມ຺ມມໂຍ ກາໂຍ’’ຕິ ວຸຈ຺ຈຕິ, ເຕສໍ ສມຸທາຍຠູໂຕປິ ເຕ ຄຸຓາວຍເວ ສຕ຺ຖຸຏ຺ຐານິເຍ ກຕ຺ວາ ທສ຺ເສນ຺ໂຕ ຠຄວາ ‘‘ອຍມ຺ປິ ໂຂ ໂລຫິຈ຺ຈ ສຕ຺ຖາ’’ຕິ ອຠາສິ.

ອຎ຺ຎາຕິ ຍ-ກາຣໂລປນິທ຺ເທໂສ ‘‘ສຍໍ ອຠິຎ຺ຎາ’’ຕິອາທີສຸ (ທີ. ນິ. ໑.໒໘, ໓໗; ມ. ນິ. ໑.໑໕໔, ໔໔໔) ວິຍ, ຕທຕ຺ເຖ ເຈຕໍ ສມ຺ປທານວຈນນ຺ຕິ ທສ຺ເສຕິ ‘‘ອຎ຺ຎາຍາ’’ຕິອາທິນາ. ສາວກຕ຺ຕໍ ປຏິຊານິຕ຺ວາ ຐິຕຕ຺ຕາ ເອກເທເສນສ຺ສ ສາສນໍ ກໂຣນ຺ຕີຕິ ອາຫ ‘‘ນິຣນ຺ຕຣໍ ຕສ຺ສ ສາສນໍ ອກຕ຺ວາ’’ຕິ. ອຸກ຺ກມິຕ຺ວາ ອຸກ຺ກມິຕ຺ວາຕິ ກທາຈິ ຕຖາ ກຣຓໍ, ກທາຈິ ຕຖາ ອກຣຓຎ຺ຈ ສນ຺ຘາຍ ວິຈ຺ຉາວຈນໍ, ຍທິຈ຺ຉິຕໍ ກໂຣນ຺ຕີຕິ ອຘິປ຺ປາໂຍ. ປຏິກ຺ກມນ຺ຕິຍາຕິ ອນຠິຣຕິຍາ ອຄາຣເວນ ອປຄຈ຺ຉນ຺ຕິຍາ. ເຕນ ວຸຕ຺ຕໍ ‘‘ອນິຈ຺ຉນ຺ຕິຍາ’’ຕິອາທິ. ເອກາຍາຕິ ອທຸຕິຍາຍ ອິຕ຺ຖິຍາ, ສມ຺ປໂຍຄນ຺ຕິ ເມຖຸນຘມ຺ມສມາໂຍຄໍ. ເອໂກ ອິຈ຺ເຉຍ຺ຍາຕິ ອທຸຕິໂຍ ປຸຣິໂສ ສມ຺ປໂຍຄໍ ອິຈ຺ເຉຍ຺ຍາຕິ ອາເນຕ຺ວາ ສມ຺ພນ຺ໂຘ. ໂອສກ຺ກນາທິມຸເຂນ ອິຕ຺ຖິປຸຣິສສມ຺ພນ຺ຘນິທສ຺ສນໍ ເຄຫສ຺ສິຕາເຄຫສ຺ສິຕອເປກ຺ຂວເສນ ຕສ຺ສ ສຕ຺ຖຸໂນ ສາວເກສຸ ປຏິປຕ຺ຕິທສ຺ສນຕ຺ຖໍ. ອຕິວິຣຕ຺ຕຠາວໂຕ ທຏ຺ຐຸມ຺ປິ ອນິຈ຺ຉມານໍ ປຣມ຺ມຸຂິໍ ຐິຕໍ ອິຕ຺ຖິໍ. ໂລເຠນາຕິ ປຣິວາຣໍ ນິສ຺ສາຍ ອຸປ຺ປຊ຺ຊນກລາຠສກ຺ກາຣໂລເຠນ. ອີທິໂສຕິ ເອວໍສຠາໂວ ສຕ຺ຖາ. ເຍນາຕິ ໂລຠຘມ຺ເມນ. ຕຕ຺ຖ ສມ຺ປາເທຫີຕິ ຕສ຺ມິໍ ປຏິປຕ຺ຕິຘມ຺ເມ ປຕິຏ຺ຐິຕໍ ກຕ຺ວາ ສມ຺ປາເທຫິ. ກາຍວງ຺ກາທິວິຄເມນ ອຸຊຸໍ ກໂຣຫິ.

໕໑໔. ສສ຺ສຣູປການິ ຕິຓານີຕິ ສສ຺ສສທິສານິ ນີວາຣາທິຕິຓານິ.

໕໑໕. ເອວໍ ໂຈທນໍ ອຣຫຕີຕິ ວຸຕ຺ຕນເຍນ ສາວເກສຸ ອປ຺ໂປສ຺ສຸກ຺ກຠາວາປາທເນ ນິໂຍຊນວເສນ ໂຈທນໍ ອຣຫຕິ, ນ ປຐໂມ ວິຍ ‘‘ເອວຣູໂປ ຕວ ໂລຠຘມ຺ໂມ’’ຕິອາທິນາ, ນ ຈ ທຸຕິໂຍ ວິຍ ‘‘ອຕ຺ຕານເມວ ຕາວ ຕຕ຺ຖ ສມ຺ປາເທຫີ’’ຕິອາທິນາ. ກສ຺ມາ? ສມ຺ປາທິຕອຕ຺ຕຫິຕຕາຍ ຕຕິຍສ຺ສ.

ນໂຈທນາຣຫສຕ຺ຖຸວຓ຺ຓນາ

໕໑໖. ນ ໂຈທນາຣໂຫຕິ ເອຕ຺ຖ ຍສ຺ມາ ໂຈທນາຣຫຕາ ນາມ ສຕ຺ຖຸວິປ຺ປຏິປຕ຺ຕິຍາ ວາ ສາວກວິປ຺ປຏິປຕ຺ຕິຍາ ວາ ອຸຠຍວິປ຺ປຏິປຕ຺ຕິຍາ ວາ ໂຫຕິ, ຕຍິທໍ ສພ຺ພມ຺ປິ ອິມສ຺ມິໍ ສຕ຺ຖຣິ ນຕ຺ຖິ, ຕສ຺ມາ ນ ໂຈທນາຣໂຫຕິ ອິມມຕ຺ຖໍ ທສ຺ເສຕຸໍ ‘‘ອຍຎ຺ຫີ’’ຕິອາທິ ວຸຕ຺ຕໍ. ອສ຺ສວາຕິ ປຏິສ຺ສວາ.

໕໑໗. ມຍາ ຄຫິຕາຍ ທິຏ຺ຐິຍາຕິ ສພ຺ພໂສ ອນວຊ຺ເຊ ອນຸປວຊ຺ເຊ ສມ຺ມາປຏິປນ຺ເນ, ປເຣສຎ຺ຈ ສມ຺ມເທວ ສມ຺ມາປຏິປຕ຺ຕິໍ ທສ຺ເສນ຺ເຕ ສຕ຺ຖຣິ ອຠູຕໂທສາໂຣປນວເສນ ມິຈ຺ຉາຄຫິຕາຍ ນິຣຍຄາມິນິຍາ ປາປທິຏ຺ຐິຍາ. ນຣກປປາຕນ຺ຕິ ນຣກສງ຺ຂາຕໍ ມຫາປປາຕໍ. ປປຕນ຺ຕິ ເອຕ຺ຖາຕິ ຫິ ປປາໂຕ. ຘມ຺ມເທສນາຫຕ຺ເຖນາຕິ ຘມ຺ມເທສນາສງ຺ຂາເຕນ ຫຕ຺ເຖນ. ສຄ຺ຄມຄ຺ຄຖເລຕິ ສຄ຺ຄຄາມິມຄ຺ຄຠູເຕ ປຸຎ຺ຎຘມ຺ມຖເລ, ຈາຕຸມຫາຣາຊິກາທິສຄ຺ຄໂສຕາປຕ຺ຕິອາທິມຄ຺ຄສງ຺ຂາເຕ ວາ ຖເລ. ເສສໍ ສຸວິຎ຺ເຎຍ຺ຍເມວ.

ອິຕິ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍ ປຣມສຸຂຸມຄມ຺ຠີຣທຸຣນຸໂພຘຕ຺ຖປຣິທີປນາຍ ສຸວິມລວິປຸລປຎ຺ຎາເວຍ຺ຍຕ຺ຕິຍຊນນາຍ ສາຘຸວິລາສິນິຍາ ນາມ ລີນຕ຺ຖປກາສນິຍາ ໂລຫິຈ຺ຈສຸຕ຺ຕວຓ຺ຓນາຍ ລີນຕ຺ຖປກາສນາ.

ໂລຫິຈ຺ຈສຸຕ຺ຕວຓ຺ຓນາ ນິຏ຺ຐິຕາ.