ສມາໂຣປນຫາຣວຓ຺ຓນາ

ອາຆາຕາທີນມກຣຓີຍຕາວຈເນນ ຂນ຺ຕິສມ຺ປທາ ທສ຺ສິຕາ ໂຫຕິ. ‘‘ອປ຺ປມຕ຺ຕກໍ ໂຂ ປເນຕ’’ນ຺ຕິອາທິນາ ໂສຣຈ຺ຈສມ຺ປທາ. ‘‘ອຕ຺ຖິ ຠິກ຺ຂເວ’’ຕິອາທິນາ ຎາຓສມ຺ປທາ. ‘‘ອປຣາມສໂຕ ຈສ຺ສ ປຈ຺ຈຕ຺ຕຎ຺ເຎວ ນິພ຺ພຸຕິ ວິທິຕາ’’ຕິ, ‘‘ເວທນານໍ…ເປ… ຍຖາຠູຕໍ ວິທິຕ຺ວາ ອນຸປາທາວິມຸຕ຺ໂຕ’’ຕິ ຈ ເອເຕຫິ ສມາຘິສມ຺ປທາຍ ສທ຺ຘິໍ ວິຊ຺ຊາວິມຸຕ຺ຕິວສີຠາວສມ຺ປທາ ທສ຺ສິຕາ. ຕຕ຺ຖ ຂນ຺ຕິສມ຺ປທາ ປຏິສງ຺ຂານພລສິທ຺ຘິໂຕ ໂສຣຈ຺ຈສມ຺ປທາຍ ປທຏ຺ຐານໍ, ໂສຣຈ຺ຈສມ຺ປທາ ປນ ອຕ຺ຖໂຕ ສີລເມວ, ສີລໍ ສມາຘິສມ຺ປທາຍ ປທຏ຺ຐານໍ. ສມາຘິ ຎາຓສມ຺ປທາຍ ປທຏ຺ຐານນ຺ຕິ ອຍໍ ປທຏ຺ຐານສມາໂຣປນາ.

ປາຓາຕິປາຕາທີຫິ ປຏິວິຣຕິວຈນໍ ສີລສ຺ສ ປຣິຍາຍວິຠາຄທສ຺ສນໍ. ສສ຺ສຕວາທາທິວິຠາຄທສ຺ສນໍ ປນ ທິຏ຺ຐິຍາ ປຣິຍາຍວຈນນ຺ຕິ ອຍໍ ເວວຈນສມາໂຣປນາ.

ສີເລນ ວີຕິກ຺ກມປ຺ປຫານໍ, ຕທງ຺ຄປ຺ປຫານໍ, ທຸຈ຺ຈຣິຕສໍກິເລສປ຺ປຫານຎ຺ຈ ສິຊ຺ຌຕິ. ສມາຘິນາ ປຣິຍຸຏ຺ຐານປ຺ປຫານໍ, ວິກ຺ຂມ຺ຠນປ຺ປຫານໍ, ຕຓ຺ຫາສໍກິເລສປ຺ປຫານຎ຺ຈ ສິຊ຺ຌຕິ. ປຎ຺ຎາຍ ທິຏ຺ຐິສໍກິເລສປ຺ປຫານໍ, ສມຸຈ຺ເຉທປ຺ປຫານໍ, ອນຸສຍປ຺ປຫານຎ຺ຈ ສິຊ຺ຌຕີຕິ ອຍໍ ປຫານສມາໂຣປນາ.

ສີລາທິຘມ຺ມກ຺ຂນ຺ເຘຫິ ສມຖວິປສ຺ສນາຠາວນາປາຣິປູຣິໍ ຄຈ຺ຉຕິ ປຫານຕ຺ຕຍສິທ຺ຘິໂຕຕິ ອຍໍ ຠາວນາສມາໂຣປນາ. ອຍໍ ສຸຕ຺ເຕ ອາຄຕຘມ຺ມານໍ ປທຏ຺ຐານເວວຈນປຫານຠາວນາສມາໂຣປນວິຈາຣຓລກ຺ຂໂຓ ສມາໂຣປນຫາໂຣ ນາມ. ວຸຕ຺ຕຎ຺ເຫຕໍ ‘‘ເຍ ຘມ຺ມາ ຍໍ ມູລາ, ເຍ ເຈກຕ຺ຖາ ປກາສິຕາ ມຸນິນາ’’ຕິອາທິ, (ເນຕ຺ຕິ. ໔.໑໖) ອຍໍ ໂສຬສຫາຣໂຍຊນາ.

ໂສຬສຫາຣວຓ຺ຓນາ ນິຏ຺ຐິຕາ.