ໂສຘນຫາຣວຓ຺ຓນາ

‘‘ມມໍ ວາ ຠິກ຺ຂເວ, ປເຣ ອວຓ຺ຓໍ ຠາເສຍ຺ຍຸ’’ນ຺ຕິ ອາຣມ຺ໂຠ. ‘‘ຘມ຺ມສ຺ສ ວາ ອວຓ຺ຓໍ ຠາເສຍ຺ຍຸໍ ສງ຺ຆສ຺ສ ວາ ອວຓ຺ຓໍ ຠາເສຍ຺ຍຸ’’ນ຺ຕິ ປທສຸທ຺ຘິ, ໂນ ອາຣມ຺ຠສຸທ຺ຘິ. ‘‘ຕຕ຺ຣ ຕຸມ຺ເຫຫິ ນ ອາຆາໂຕ, ນ ອປ຺ປຈ຺ຈໂຍ, ນ ເຈຕໂສ ອນຠິຣທ຺ຘິ ກຣຓີຍາ’’ຕິ ປທສຸທ຺ຘິ ເຈວ ອາຣມ຺ຠສຸທ຺ຘິ ຈ. ທຸຕິຍນຍາທີສຸປິ ເອເສວ ນໂຍ, ຕຖາ ‘‘ອປ຺ປມຕ຺ຕກໍ ໂຂ ປເນຕ’’ນ຺ຕິອາທິ ອາຣມ຺ໂຠ. ‘‘ກຕມ’’ນ຺ຕິອາທິ ປຸຈ຺ຉາ. ‘‘ປາຓາຕິປາຕໍ ປຫາຍາ’’ຕິອາທິ ປທສຸທ຺ຘິ, ໂນ ອາຣມ຺ຠສຸທ຺ຘິ. ໂນ ຈ ປຸຈ຺ຉາສຸທ຺ຘິ. ‘‘ອິທໍ ໂຂ’’ຕິອາທິ ປຸຈ຺ຉາສຸທ຺ຘິ ເຈວ ປທສຸທ຺ຘິ ຈ, ອາຣມ຺ຠສຸທ຺ຘິ.

ຕຖາ ‘‘ອຕ຺ຖິ ຠິກ຺ຂເວ’’ຕິອາທິ ອາຣມ຺ໂຠ. ‘‘ກຕເມ ຈ ເຕ’’ຕິອາທິ ປຸຈ຺ຉາ. ‘‘ສນ຺ຕິ ຠິກ຺ຂເວ’’ຕິອາທິ ອາຣມ຺ໂຠ. ‘‘ກິມາຄມ຺ມາ’’ຕິອາທິ ອາຣມ຺ຠປຸຈ຺ຉາ. ‘‘ຍຖາ ສມາຫິເຕ’’ຕິອາທິ ປທສຸທ຺ຘິ, ໂນ ອາຣມ຺ຠສຸທ຺ຘິ, ໂນ ຈ ປຸຈ຺ຉາສຸທ຺ຘິ. ‘‘ອິເມ ໂຂ’’ຕິອາທິ ປທສຸທ຺ຘິ ເຈວ ປຸຈ຺ຉາສຸທ຺ຘິ ຈ ອາຣມ຺ຠສຸທ຺ຘິ ຈ. ອິມິນາ ນເຍນ ສພ຺ພຕ຺ຖ ອາຣມ຺ຠາທໂຍ ເວທິຕພ຺ພາ. ອຍໍ ປທາຣມ຺ຠານໍ ໂສຘິຕາໂສຘິຕຠາວວິຈາຣຓລກ຺ຂໂຓ ໂສຘນຫາໂຣ ນາມ, ວຸຕ຺ຕມ຺ປິ ຈ ‘‘ວິສ຺ສຊ຺ຊິຕມ຺ຫິ ປຎ຺ເຫ, ຄາຖາຍໍ ປຸຈ຺ຉິຕາຍມາຣພ຺ຠາ’’ຕິອາທິ (ເນຕ຺ຕິ. ໔.໑໓).