ປຣິວຕ຺ຕນຫາຣວຓ຺ຓນາ

ອາຆາຕາທີນມກຣຓໍ ຂນ຺ຕິໂສຣຈ຺ຈານິ ອນຸພ຺ຣູເຫຕ຺ວາ ປຏິສງ຺ຂານຠາວນາພລສິທ຺ຘິຍາ ອຸຠຍຫິຕປຏິປຕ຺ຕິມາວຫຕິ. ອາຆາຕາທໂຍ ປນ ປວຕ຺ຕິຍມານາ ທຸພ຺ພຓ຺ຓຕໍ, ທຸກ຺ຂເສຍ຺ຍໍ, ໂຠຄຫານິໍ, ອກິຕ຺ຕິໍ, ປເຣຫິ ທຸຣຸປສງ຺ກມນຕຎ຺ຈ ນິປ຺ຜາເທນ຺ຕາ ນິຣຍາທີສຸ ມຫາທຸກ຺ຂມາວຫນ຺ຕິ. ປາຓາຕິປາຕາທິປຏິວິຣຕິ ອວິປ຺ປຏິສາຣາທິກລ຺ຍາຓໍ ປຣມ຺ປຣມາວຫຕິ. ປາຓາຕິປາຕາທິ ປນ ວິປ຺ປຏິສາຣາທິອກລ຺ຍາຓໍ ປຣມ຺ປຣມາວຫຕິ. ຄມ຺ຠີຣຕາທິວິເສສຍຸຕ຺ຕໍ ຎາຓໍ ເວເນຍ຺ຍານໍ ຍຖາຣຫໍ ວິຊ຺ຊາຠິຎ຺ຎາທິຄຸຓວິເສສມາວຫຕິ ສພ຺ພຎ຺ເຎຍ຺ຍສ຺ສ ຍຖາສຠາວາວໂພຘໂຕ. ຕຖາ ຄມ຺ຠີຣຕາທິວິເສສຣຫິຕໍ ປນ ຎາຓໍ ເຎຍ຺ເຍສຸ ສາຘາຣຓຠາວໂຕ ຍຖາວຸຕ຺ຕຄຸຓວິເສສໍ ນາວຫຕິ. ສພ຺ພາປິ ເຈຕາ ທິຏ຺ຐິໂຍ ຍຖາຣຫໍ ສສ຺ສຕຸຈ຺ເຉທຠາວໂຕ ອນ຺ຕທ຺ວຍຠູຕາ ສກ຺ກາຍຕີຣໍ ນາຕິວຕ຺ຕນ຺ຕິ ອນິຍ຺ຍານິກສຠາວຕ຺ຕາ. ສມ຺ມາທິຏ຺ຐິ ປນ ສປຣິກ຺ຂາຣາ ມຊ຺ຌິມປຏິປທາຠູຕາ ສກ຺ກາຍຕີຣມຕິກ຺ກມ຺ມ ປາຣໍ ຄຈ຺ຉຕິ ນິຍ຺ຍານິກສຠາວຕ຺ຕາ. ເວທນານໍ ຍຖາຠູຕໍ ສມຸທຍາທິປຏິເວຘນາ ອນຸປາທາວິມຸຕ຺ຕິມາວຫຕິ ມຄ຺ຄຠາວໂຕ. ເວທນານໍ ຍຖາຠູຕໍ ສມຸທຍາທິອສມ຺ປຏິເວໂຘ ສໍສາຣຈາຣກາວໂຣຘມາວຫຕິ ສງ຺ຂາຣານໍ ປຈ຺ຈຍຠາວໂຕ. ເວທຍິຕສຠາວປຏິຈ຺ຉາທໂກ ສມ຺ໂມໂຫ ຕທຠິນນ຺ທນມາວຫຕິ, ຍຖາຠູຕາວໂພໂຘ ປນ ຕຕ຺ຖ ນິພ຺ເພຘໍ, ວິຣາຄຎ຺ຈ ອາວຫຕິ. ມິຈ຺ຉາຠິນິເວເສ ອໂຍນິໂສມນສິກາຣສຫິຕາ ຕຓ຺ຫາ ອເນກວິຫິຕໍ ທິຏ຺ຐິຊາລໍ ປສາເຣຕິ. ຍຖາວຸຕ຺ຕຕຓ຺ຫາສມຸຈ຺ເຉໂທ ປຐມມຄ຺ໂຄ ຕໍ ທິຏ຺ຐິຊາລໍ ສງ຺ໂກເຈຕິ. ສສ຺ສຕວາທາທິປຎ຺ຎາປນສ຺ສ ຜສ຺ໂສ ປຈ຺ຈໂຍ ອສຕິ ຜສ຺ເສ ຕທຠາວໂຕ. ທິຏ຺ຐິພນ຺ຘນພທ຺ຘານໍ ຜສ຺ສາຍຕນາທີນມນິໂຣຘເນນ ຜສ຺ສາທິອນິໂຣໂຘ ສໍສາຣທຸກ຺ຂສ຺ສ ອນິວຕ຺ຕິເຍວ ຍາຖາວໂຕ ຜສ຺ສາຍຕນາທິປຣິຎ຺ຎາ ສພ຺ພທິຏ຺ຐິທສ຺ສນານິ ອຕິວຕ຺ຕຕິ, ເຕສໍ ປນ ຕຖາ ອປຣິຎ຺ຎາ ທິຏ຺ຐິທສ຺ສນໍ ນາຕິວຕ຺ຕຕິ. ຠວເນຕ຺ຕິສມຸຈ຺ເຉໂທ ອາຍຕິໍ ອຕ຺ຕຠາວສ຺ສ ອນິພ຺ພຕ຺ຕິຍາ ສໍວຕ຺ຕຕິ, ອສມຸຈ຺ຉິນ຺ນາຍ ຠວເນຕ຺ຕິຍາ ອນາຄເຕ ຠວປ຺ປພນ຺ໂຘ ປຣິວຕ຺ຕຕິເຍວາຕິ ອຍໍ ສຸຕ຺ເຕ ນິທ຺ທິຏ຺ຐານໍ ຘມ຺ມານໍ ປຏິປກ຺ຂໂຕ ປຣິວຕ຺ຕນລກ຺ຂໂຓ ປຣິວຕ຺ຕນຫາໂຣ ນາມ. ກິມາຫ ‘‘ກຸສລາກຸສເລ ຘມ຺ເມ, ນິທ຺ທິຏ຺ເຐ ຠາວິເຕ ປຫີເນ ຈາ’’ຕິອາທິ.