໔. ອນນ຺ຕຣປຈ຺ຈຍນິທ຺ເທສວຓ຺ຓນາ

໔. ຍຖາວຸຕ຺ຕາ ນິໂຣຘານນ຺ຕຣສຸຎ຺ຎຕາ ນິໂຣຘປ຺ປຕ຺ຕຕາ ໂອກາສທານວິເສໂສ, ອຕ຺ຕໂນ ອນຸຣູປຈິຕ຺ຕຸປ຺ປາທນສມຕ຺ຖຕາ ຈິຕ຺ຕນິຍມເຫຕຸຕາ, ຕຕ຺ຖ ອນນ຺ຕຣຸປ຺ປາທນສມຕ຺ຖຕາ ຈ ສຓ຺ຐານາຠາວໂຕ ສຸຏ຺ຐຸຕຣໍ ນິຣນ຺ຕຣຸປ຺ປາທນສມຕ຺ຖຕາ ຈ ຈິຕ຺ຕນິຍມເຫຕຸວິເສໂສ ທຏ຺ຐພ຺ໂພ. ຘາຕຸວເສນາຕິ ວິຎ຺ຎາຓຘາຕຸມໂນຘາຕຸມໂນວິຎ຺ຎາຓຘາຕຸວເສນ. ເອຕ຺ຕກາ ເອວ ຫິ ຘາຕຸໂຍ ຠິນ຺ນສຠາວາ ອນນ຺ຕຣປຈ຺ຈຍຕາຍ ນິຍເມຕ຺ວາ ວຕ຺ຕພ຺ພາ, ອຠິນ຺ນສຠາວາ ປນ ວິເສສາຠາວໂຕ ປຸຣິມຕາມຕ຺ຕໍເຍວ ວິເສສໍ ປຸຣກ຺ຂຕ຺ວາ ວຕ຺ຕພ຺ພາຕິ ຕາ ກຸສລາທິເຠເທນ ຕຖາ ວຸຕ຺ຕາ. ເຕນາຫ ‘‘ກຸສລາທິວເສນ ຈາ’’ຕິ. ຍາ ປນ ມໂນຘາຕຸມໂນວິຎ຺ຎາຓຘາຕຸວເສນ ອນນ຺ຕຣປຈ຺ຈຍຕາ ວຕ຺ຕພ຺ພາ, ຕຕ຺ຖ ມໂນວິຎ຺ຎາຓຘາຕຸ ມໂນຘາຕຸຍາ ອນນ຺ຕຣປຈ຺ຈເຍນ ປຈ຺ຈໂຍຕິ ວຸຈ຺ຈມາໂນ ສມ຺ໂມໂຫ ສິຍາ, ປຸເຣ ມໂນຘາຕຸຍາ ອນນ຺ຕຣປຈ຺ຈຍຠາເວນ ວຸຕ຺ຕາ, ອິທານິ ມໂນວິຎ຺ຎາຓຘາຕຸ ມໂນຘາຕຸຍາຕິ ປຈ຺ຈຍປຈ຺ຈຍຸປ຺ປນ຺ນວິເສສາ ນ ວິຎ຺ຎາເຍຍ຺ຍ, ມໂນຘາຕຸຍາ ປນ ຈກ຺ຂຸວິຎ຺ຎາຓາທິຘາຕູນໍ ອນນ຺ຕຣປຈ຺ຈຍຠາເວ ວຸຈ຺ຈມາເນ ນິຍໂມ ນຕ຺ຖິ. ເຕນາຫ ‘‘ມໂນຘາຕຸ ຈກ຺ຂຸວິຎ຺ຎາຓຘາຕຸຍາຕິ ຈາ’’ຕິ. ຕເຖວາຕິ ນິຍມາຠາວໂຕ ເອວາຕິ ອຕ຺ໂຖ. ຕສ຺ມາຕິ ຍສ຺ມາ ອິໂຕ ອຎ຺ຎຖາ ເທສນາຍ ປຈ຺ຈຍປຈ຺ຈຍຸປ຺ປນ຺ນານໍ ວິເສສາຠາໂວ ຈິຕ຺ຕວິເສສທສ຺ສນວິຈ຺ເຉໂທ ນິຍມາຠາໂວ ຈາຕິ ອິເມ ໂທສາ ອາປຊ຺ຊນ຺ຕິ, ຕສ຺ມາ. ນິທສ຺ສເນນາຕິ ຘາຕຸວເສນ ນິທສ຺ສເນນ. ນຍໍ ທສ຺ເສຕ຺ວາຕິ ‘‘ມໂນວິຎ຺ຎາຓຘາຕຸ ຕໍສມ຺ປຍຸຕ຺ຕກາ ຈ ຘມ຺ມາ ມໂນຘາຕຸຍາ ຕໍສມ຺ປຍຸຕ຺ຕການຎ຺ຈ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ’’ຕິ ເອວມາທິກສ຺ສ ອນນ຺ຕຣປຈ຺ຈຍຕາຄ຺ຄຫຓສ຺ສ ນຍໍ ທສ຺ເສຕ຺ວາ. ນິຣວເສສທສ຺ສນຕ຺ຖນ຺ຕິ ນິຣວເສສສ຺ສ ອນນ຺ຕຣປຈ຺ຈຍຠາວິໂນ ຈິຕ຺ຕຸປ຺ປາທສ຺ສ ທສ຺ສນຕ຺ຖໍ.

ສທິສກຸສລານນ຺ຕິ ສມານກຸສລານໍ, ສມານຕາ ເຈຕ຺ຖ ເອກວີຖິປຣິຍາປນ຺ນຕາຍ ເວທິຕພ຺ພາ. ເຕເນວາຫ ‘‘ຠູມິຠິນ຺ນານມ຺ປິ ປຈ຺ຈຍຠາໂວ ວຸຕ຺ໂຕ ໂຫຕີ’’ຕິ. ສມານວີຖິຕາ ຈ ຍສ຺ມາ ສມານເວທນາ ສມານເຫຕຸກາ ຈ ໂຫນ຺ຕິ, ຕສ຺ມາ ‘‘ເວທນາຍ ວາ ເຫຕູຫິ ວາ ສທິສກຸສລານ’’ນ຺ຕິ ອາຫ. ວາ-ສທ຺ໂທ ເຈຕ຺ຖ ອນິຍມຕ຺ໂຖ. ເຕນ ຎາຓສງ຺ຂາຣາທິເຠທສ຺ສປິ ວິກປ຺ປນວເສນ ສງ຺ຄໂຫ ທຏ຺ຐພ຺ໂພ. ຈຸຕິປິ ຄຫິຕາ ຕໍສຠາວຕ຺ຕາ. ຠວງ຺ຄຈິຕ຺ຕເມວ ຫິ ປຣິໂຍສາເນ ‘‘ຈຸຕີ’’ຕິ ວຸຈ຺ຈຕິ. ກຸສລາກຸສລານນ຺ຕຣຎ຺ຈ ກທາຈິ ສາ ອຸປ຺ປຊ຺ຊຕີຕິ ຕທາຣມ຺ມຓມ຺ປິ ຄຫິຕນ຺ຕິ ທຏ຺ຐພ຺ພໍ, ກິຣິຍຊວນານນ຺ຕຣໍ ຕທາຣມ຺ມຓຸປ຺ປຕ຺ຕິຍນ຺ຕິ ອຘິປ຺ປາໂຍ.

ກາມາວຈຣກິຣິຍາຍ ອາວຊ຺ຊນສ຺ສາຕິ ອຍເມຕ຺ຖ ອຕ຺ໂຖ ອຘິປ຺ເປໂຕຕິ ທສ຺ເສນ຺ໂຕ ‘‘ອາວຊ຺ຊນຄ຺ຄຫເຓນ ກາມາວຈຣກິຣິຍໍ ວິເສເສຕີ’’ຕິ ອາຫ. ຕເມວ ຫິ ອຕ຺ຖໍ ປາກຏຕຣໍ ກາຕຸໍ ‘‘ກາມາວຈຣວິປາໂກ’’ຕິອາທິ ວຸຕ຺ຕໍ. ໂວຏ຺ຐພ຺ພນມ຺ປິ ຄຫິຕໍ ສນ຺ຕີຣຓານນ຺ຕຣຕ຺ຕາຕິ ອຘິປ຺ປາໂຍ.

ອນນ຺ຕຣປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.