໖. ສຫຊາຕປຈ຺ຈຍນິທ຺ເທສວຓ຺ຓນາ

໖. ໂປຣາຓປາໂຐຕິ ປຸຣາຕໂນ ອຏ຺ຐກຖາປາໂຐ. ອິມສ຺ສາຕິ ອິມສ຺ສ ປທສ຺ສ. ອວຸຕ຺ຕສ຺ສາຕິ ປາຬິຍໍ ອວຸຕ຺ຕສ຺ສ. ຍທິປິ ສຫຄຕສທ຺ທສ຺ສ ອຕ຺ຖສໍວຓ຺ຓນາຍໍ ສໍສຏ຺ຐສທ຺ທສ຺ສ ວິຍ ສມານຕ຺ຖສ຺ສປິ ກຕ຺ຖຈິ ສທ຺ທນ຺ຕຣສ຺ສ ອຕ຺ໂຖ ວຸຈ຺ຈຕິ ປຣິຍາຍວິເສສໂພຘນຕ຺ຖໍ, ຕຖາປິ ນ ມູລສທ຺ທສ຺ສ ອຕ຺ໂຖ ວິຠາວິໂຕ ໂຫຕີຕິ ທສ຺ເສນ຺ໂຕ ອາຫ ‘‘ນ ຈ…ເປ… ໂຫຕີ’’ຕິ. ‘‘ອຎ຺ຎມຎ຺ຎ’’ນ຺ຕິ ຈ ‘‘ອຎ຺ຎອຎ຺ຎ’’ນ຺ຕິ ວຕ຺ຕພ຺ເພ ມ-ກາຣາຄມໍ ກຕ຺ວາ ນິທ຺ເທໂສ, ກມ຺ມພ຺ຍຕິຫາເຣ ເຈຕໍ ປທໍ, ຕສ຺ມາ ອິຕເຣຕຣນ຺ຕິ ວຸຕ຺ຕໍ ໂຫຕິ. ປຈ຺ຈຍປຈ຺ຈຍຸປ຺ປນ຺ນານໍ ເອກສ຺ມິໍເຍວ ຂເຓ ປຈ຺ຈຍຸປ຺ປນ຺ນປຈ຺ຈຍຠາວສ຺ສ ອິຈ຺ຉິຕຕ຺ຕາ ໂຍ ຫິ ຍສ຺ສ ປຈ຺ຈໂຍ ຍສ຺ມິໍ ຂເຓ, ຕສ຺ມິໍເຍວ ຂເຓ ໂສປິ ຕສ຺ສ ປຈ຺ຈໂຍຕິ ອຍເມຕ຺ຖ ອຎ຺ຎມຎ຺ຎປຈ຺ຈຍຕາ. ຕຖາ ຫິ ອຏ຺ຐກຖາຍໍ ‘‘ອຎ຺ໂຎ ອຎ຺ຎສ຺ສາ’’ຕິ ວຕ຺ວາ ‘‘ອິມິນາ…ເປ… ທີເປຕີ’’ຕິ ວຸຕ຺ຕໍ. ໂອກ຺ກມນໍ ປວິສນນ຺ຕິ ອຕ຺ໂຖ. ອາສນກ຺ຂເຓ ຫິ ຘມ຺ມາ ປຸຣິມຠວໂຕ ອິມໍ ຠວໍ ປວິສນ຺ຕາ ວິຍ ໂຫນ຺ຕິ. ເຕນ ວຸຕ຺ຕໍ ‘‘ປຣໂລກໂຕ ອິມໍ ໂລກໍ ອາຄນ຺ຕ຺ວາ ປວິສນ຺ຕໍ ວິຍ ອຸປ຺ປຊ຺ຊຕີ’’ຕິ. ຕສ຺ມາ ອວິເສເສນ ປຏິສນ຺ຘິ ໂອກ຺ກນ຺ຕິສທ຺ທາຠິເຘຍ຺ຍາຕິ ອຘິປ຺ປາເຍນ ວຸຕ຺ຕໍ ‘‘ໂອກ຺ກນ຺ຕິ…ເປ… ອຘິປ຺ປາເຍນາຫາ’’ຕິ. ຕໍນິວາຣຓຕ຺ຖນ຺ຕິ ຕສ຺ສ ຂຓນ຺ຕເຣ ຣູປີນໍ ສຫຊາຕປຈ຺ຈຍຠາວສ຺ສ ‘‘ກຎ຺ຈິ ກາເລ ນ ສຫຊາຕປຈ຺ຈເຍນ ປຈ຺ຈໂຍ’’ຕິ ນິວາຣຓຕ຺ຖໍ. ເຕນ ປທທ຺ວເຍນ ສມາເນສຸ ປຈ຺ຈຍປຈ຺ຈຍຸປ຺ປນ຺ນຘມ຺ເມສຸ ປຸຣິມໂຕ ປຈ຺ຉິມສ຺ສ ວິເສສມຕ຺ຖໍ ທສ຺ເສຕິ.

ເອວຎ຺ຈ ‘‘ກຎ຺ຈິ ກາເລ’’ຕິ ປທສ຺ສ ‘‘ເກຈິ ກາເລຕິ ວາ, ກິສ຺ມິຎ຺ຈິ ກາເລ’’ຕິ ວາ ວິຠຕ຺ຕິວິປລ຺ລາເສນ ອຕ຺ໂຖ ຄເຫຕພ຺ໂພຕິ ອຘິປ຺ປາເຍນ ປຐມວິກປ຺ປໍ ທສ຺ເສຕ຺ວາ ອິທານິ ປກາຣນ຺ຕເຣນ ທສ຺ເສຕຸໍ ‘‘ກຎ຺ຈິ ກາເລຕິ ເກຈິ ກິສ຺ມິຎ຺ຈິ ກາເລຕິ ວາ ອຕ຺ໂຖ’’ຕິ ອາຫ. ເຕນ ‘‘ກຎ຺ຈີ’’ຕິ ອຍໍ ສາມຎ຺ຎນິທ຺ເທໂສຕິ ທສ຺ເສຕິ. ໂຍ ຫິ ອຍໍ ‘‘ເກຈີ’’ຕິ ປຈ຺ຈຕ຺ຕພຫຸວຈນາຠິເຘຍ຺ໂຍ ອຕ຺ໂຖ, ໂຍ ຈ ‘‘ກິສ຺ມິຎ຺ຈີ’’ຕິ ຠຸມ຺ເມກວຈນາຠິເຘຍ຺ໂຍ, ຕທຸຠຍໍ ສຕິ ກາລວນ຺ຕກາລຕາວິຠາເຄ ກິໍ-ສທ຺ທສ຺ສ ວຈນີຍຕາສາມຎ຺ເຎນ ປນ ເອກຊ຺ຌໍ ກຕ຺ວາ ‘‘ກຎ຺ຈີ’’ຕິ ປາຬິຍໍ ວຸຕ຺ຕນ຺ຕິ ຕໍ ວິຠຊິຕ຺ວາ ທສ຺ເສຕຸໍ ‘‘ເກຈິ ກິສ຺ມິຎ຺ຈີ’’ຕິ ວຸຕ຺ຕໍ. ອຏ຺ຐກຖາຍໍ ປນ ‘‘ກິສ຺ມິຎ຺ຈີ’’ຕິ ຠຸມ຺ມວເສເນວ ວຸຕ຺ຕໍ. ເຕນ ຍຖາວຸຕ຺ຕອຕ຺ຖວິຠາເຄນ ປເທນ. ວຕ຺ຖຸຠູຕາຕິ ວຕ຺ຖຸສຠາວາ. ຫທຍຣູປເມວ ສນ຺ຘາຍ ວທຕິ. ຣູປນ຺ຕຣານນ຺ຕິ ຫທຍວຕ຺ຖຸໂຕ ອຎ຺ຎຣູປານໍ. ອຣູປີນໍ ສຫຊາຕປຈ຺ຈຍຕໍ ປຸພ຺ເພ ‘‘ໂອກ຺ກນ຺ຕິກ຺ຂເຓ ນາມຣູປ’’ນ຺ຕິ ເອຕ຺ຖ ອນິວາຣິຕໍ ນິວາເຣຕີຕິ ໂຍຊນາ, ຕຖາ ວຕ຺ຖຸສ຺ສ ຈ ກາລນ຺ຕເຣ ປຏິສນ຺ຘິກາລໂຕ ອຎ຺ຎສ຺ມິໍ ກາເລ ອຣູປີນໍ ນິວາເຣຕີຕິ. ເອວຎ຺ຈ ກຕ຺ວາຕິອາທິນາ ຍຖາວຸຕ຺ຕອຕ຺ຖວຓ຺ຓນາຍ ປາຬິຍໍ ວິຠຕ຺ຕິນິທ຺ເທສສ຺ສ ຣູປກຠາວມາຫ. ປຸນປິ ປຸຣິມໂຕ ປຈ຺ຉິມສ຺ສ ອຸປຈເຍນ ວິເສສໍ ທສ຺ເສຕຸໍ ‘‘ປຸຣິເມນ ຈາ’’ຕິອາທິ ວຸຕ຺ຕໍ. ຕຕ຺ຖ ປຸຣິເມນາຕິ ‘‘ໂອກ຺ກນ຺ຕິກ຺ຂເຓ ນາມຣູປ’’ນ຺ຕິ ອິມິນາ ປຈ຺ຈຍນິທ຺ເທສວຈເນນ. ‘‘ເອໂກ ຂນ຺ໂຘ ວຕ຺ຖຸ ຈ ຕິຓ຺ຓໍ ຂນ຺ຘານ’’ນ຺ຕິອາທິນາ ປຏິຈ຺ຈວາຣາທິປາເຐນ. ອຕ຺ຖວິວຣຓຎ຺ຫິ ປຈ຺ຈຍນິທ຺ເທສປາຬິຍາ ສພ຺ເພປິ ສຕ຺ຕ ມຫາວາຣາ. ວຕ຺ຖຸສ຺ສ ວຕ຺ຕພ຺ພຕ຺ເຕ ອາປນ຺ເນ ກິນ຺ຕິ ປຈ຺ຈໂຍຕິ ຕສ຺ສ ນາມສ຺ສາຕິ ໂຍຊນາ. ເອເຕນາຕິ ‘‘ຣູປິໂນ ຘມ຺ມາ ອຣູປີນໍ ຘມ຺ມານ’’ນ຺ຕິ ເອເຕນ ວຈເນນ. ເກວລສ຺ສາຕິ ນາມຣຫິຕສ຺ສ ວຕ຺ຖຸສ຺ສ. ຕຖາຕິ ນາມສ຺ສ ປຈ຺ຈຍຠາເວນ.

ກຕ຺ຖຈີຕິ ‘‘ຣູປິໂນ ຘມ຺ມາ ອຣູປີນໍ ຘມ຺ມານໍ ກຎ຺ຈິ ກາລໍ ສຫຊາຕປຈ຺ຈເຍນ ປຈ຺ຈໂຍ’’ຕິ ເອຕສ຺ມິໍ ນິທ຺ເທເສ. ເອຕ຺ຖ ຫິ ອຎ຺ຎມຎ຺ຎສຫຊາຕປຈ຺ຈຍຠາໂວ ລພ຺ຠຕິ. ວຈເນນາຕິ ‘‘ອຎ຺ຎມຎ຺ຎ’’ນ຺ຕິ ອິມິນາ ວຈເນນ ປາຬິຍໍ ສຫຊາຕປຈ຺ຈຍຠາວສ຺ສ ອສງ຺ຄຫິຕຕ຺ຕາ, ອຕ຺ຖໂຕ ປນ ລພ຺ຠເຕວາຕິ. ເຕນາຫ ‘‘ລພ຺ຠມາເນປີ’’ຕິ. ຕສ຺ສາຕິ ອຎ຺ຎມຎ຺ຎປຈ຺ຈຍຕ຺ຕສ຺ສ. ເອວນ຺ຕິ ‘‘ນ ອຎ຺ຎມຎ຺ຎວເສນາ’’ຕິ ອິມິນາ ປກາເຣນ. ສມຸທາເຍກເທສວເສນ ສາມິວຈນນ຺ຕິ ອວຍວາວຍວິສມ຺ພນ຺ເຘ ອວຍວິນິ ສາມິວຈນນ຺ຕິ ອຕ຺ໂຖ, ນິທ຺ຘາຣເຓ ວາ ‘‘ກຓ຺ຫາ ຄາວີນ’’ນ຺ຕິອາທີສຸ ວິຍ.

ສຫຊາຕປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.