໓. ອຘິປຕິປຈ຺ຈຍນິທ຺ເທສວຓ຺ຓນາ

໓. ຘຸຣສຫຈຣິຍໂຕ ໂຘເຣຍ຺ໂຍ ‘‘ຘຸຣ’’ນ຺ຕິ ວຸຕ຺ໂຕຕິ ອາຫ ‘‘ຘຸຣນ຺ຕິ ຘຸຣຄ຺ຄາຫ’’ນ຺ຕິ. ຉນ຺ທສ຺ສ ປຸພ຺ພງ຺ຄມຕາສິທ຺ຘໍ ປາສໍສຠາວໍ ອຸປາທາຍ ອຏ຺ຐກຖາຍໍ ‘‘ເຊຏ຺ຐກ’’ນ຺ຕິ ວຸຕ຺ຕນ຺ຕິ ຕເມວຕ຺ຖໍ ທີເປນ຺ໂຕ ‘‘ເສຏ຺ຐ’’ນ຺ຕິ ອາຫ. ຕຖາ ຫິ ວຸຕ຺ຕໍ ອຏ຺ຐສາລິນິຍໍ ‘‘ຉນ຺ທໍ ປຸພ຺ພງ຺ຄມໍ ກຕ຺ວາ ອາຍູຫິຕ’’ນ຺ຕິ. ປຸຣິມຉນ຺ທສ຺ສາຕິ ‘‘ຉນ຺ທາຘິປຕີ’’ຕິ ປຸຣິມສ຺ມິໍ ປເທ ນິທ຺ເທສວເສນ ວຸຕ຺ຕສ຺ສ ຉນ຺ທສທ຺ທສ຺ສ ສມານຣູເປນ ສທິສາກາເຣນ. ຕທນນ຺ຕຣໍ ນິທ຺ທິຏ຺ເຐນາຕິ ຕສ຺ສ ປຸຣິມສ຺ສ ຉນ຺ທສທ຺ທສ຺ສ ອນນ຺ຕຣໍ ນິທ຺ເທສວເສນ ວຸຕ຺ເຕນ. ຕໂຕ ເອວ ຈ ຕໍສມານຕ຺ຖຕາຍ ຈ ຕໍສມ຺ພນ຺ເຘນ ‘‘ຉນ຺ທສມ຺ປຍຸຕ຺ຕການ’’ນ຺ຕິ ເອຕ຺ຖ ຉນ຺ທສທ຺ເທເນວ ອຘິປຕິສທ຺ທຣຫິເຕນາຕິ ອຕ຺ໂຖ. ປຈ຺ຈຍຠູຕສ຺ສາຕິ ອຘິປຕິປຈ຺ຈຍຠູຕສ຺ສ. ສມ຺ປຍຸຕ຺ຕກວິເສສນຠາໂວຕິ ອຕ຺ຕນາ ສມ຺ປຍຸຕ຺ຕຘມ຺ມານໍ ໂສ ເອວ ອຘິປຕິປຈ຺ຈຍຕາສງ຺ຂາໂຕ ວິເສສນຠາໂວ. ເອສ ນໂຍຕິ ອິມິນາ ‘‘ວີຣິຍາຘິປຕິ ວີຣິຍສມ຺ປຍຸຕ຺ຕການນ຺ຕິອາທີສຸ ປຸຣິມວີຣິຍສ຺ສ ສມານຣູເປນາ’’ຕິອາທິນາ ວຕ຺ຕພ຺ພໍ ອຕ຺ຖວຈນໍ ອຕິທິສຕິ.

ກຸສລາພ຺ຍາກຕານໍ ປວຕ຺ຕິນ຺ຕິ ກຸສລາພ຺ຍາກຕານໍ ອຘິປຕີນໍ ປວຕ຺ຕນາກາຣໍ. ອລທ຺ຘໍ ອາຣມ຺ມຓໍ ລທ຺ຘພ຺ພໍ ລພ຺ຠນີຍໍ, ລທ຺ຘຸໍ ວາ ສກ຺ກຸເຓຍ຺ຍໍ, ທຸຕິເຍ ປນ ອຕ຺ເຖ ລາຠມຣຫຕີຕິ ລທ຺ຘພ຺ພໍ. ອວຎ຺ຎາຕນ຺ຕິ ປເຄວ ອນວຎ຺ຎາຕນ຺ຕິ ອຕ຺ໂຖ.

ອປ຺ປນາປ຺ປຕ຺ຕາ ກຸສລກິຣິຍຘມ຺ມາ ມຫາພລາ ສາຘິປຕິກາ ເອວ ໂຫນ຺ຕິ, ຕຖາ ມິຈ຺ຉຕ຺ຕນິຍຕາປີຕິ ອາຫ ‘‘ອປ຺ປນາສທິສາ…ເປ… ນຸປ຺ປຊ຺ຊນ຺ຕີ’’ຕິ. ອປ຺ປນາສທິສາຕິ ອປ຺ປນາປ຺ປຕ຺ຕສທິສາ. ກມ຺ມກິເລສາວຣຓຠູຕາ ຈ ເຕຕິ ເຕ ມິຈ຺ຉຕ຺ຕນິຍຕຘມ຺ມາ ກມ຺ມາວຣຓຠູຕາ, ເຍ ອານນ຺ຕຣິຍປ຺ປກາຣາ ກິເລສາວຣຓຠູຕາ, ເຍ ນິຍຕມິຈ຺ຉາທິຏ຺ຐິຘມ຺ມາ, ສມ຺ປຍຸຕ຺ຕເຈຕນາຍ ປເນຕ຺ຖ ກິເລສາວຣຓປກ຺ຂິກຕາ ທຏ຺ຐພ຺ພາ ອານນ຺ຕຣິຍເຈຕນາສມ຺ປຍຸຕ຺ຕສ຺ສ ປຏິຆສ຺ສ ກມ຺ມາວຣຓປກ຺ຂິກຕາ ວິຍ. ປຈ຺ຈກ຺ຂຄຕິ ອນນ຺ຕຣຕາຍ ວິນາ ຠາວິນີຕິ ວຸຕ຺ຕໍ ‘‘ປຈ຺ຈກ຺ຂສຄ຺ຄານໍ ກາມາວຈຣເທວານມ຺ປີ’’ຕິ. ເຕນ ເຕສຸ ອານນ຺ຕຣິຍາ ວິຍ ອສມ຺ຠາວິໂນ ອເຫຕຸກາຠິນິເວສາທໂຍປີຕິ ທສ຺ເສຕິ.

ຕິວິໂຘປິ ກິຣິຍາຣມ຺ມຓາຘິປຕີຕິ ເອຕ຺ຖ ອຍໍ ກິຣິຍາຣມ຺ມຓາຘິປຕີຕິ ອຊ຺ຌຕ຺ຕາຣມ຺ມໂຓ ອຘິປ຺ເປໂຕ, ອຸທາຫຸ ພຫິທ຺ຘາຣມ຺ມໂຓຕິ ອຸຠຍຖາປິ ນ ສມ຺ຠໂວ ເອວາຕິ ທສ຺ເສນ຺ໂຕ ‘‘ກາມາວຈຣາທິເຠທໂຕ ປນາ’’ຕິອາທິມາຫ. ຕຕ຺ຖ ປຣສນ຺ຕານຄຕານໍ ສາຣມ຺ມຓຘມ຺ມານໍ ອຘິປຕິປຈ຺ຈຍຕາ ນຕ຺ຖີຕິ ສມ຺ພນ຺ໂຘ. ອຠາວໂຕຕິ ອວຈນໂຕ. ອວຈນຎ຺ຫິ ນາມ ຍຖາຘມ຺ມສາສເນ ອຠິຘມ຺ເມ ອຠາໂວ ເອວາຕິ ເອເຕເນວ ອນຸທ຺ຘຏຕາປິ ອວຸຕ຺ຕໂຕ ເວທິຕພ຺ພາ. ອຊ຺ຌຕ຺ຕາຣມ຺ມຓພຫິທ຺ຘາຣມ຺ມຓທ຺ວຍວິນິມຸຕ຺ຕສ຺ສ ສາຣມ຺ມຓຘມ຺ມສ຺ສ ອຠາວໂຕ ນຕ຺ຖີຕິ ວິຎ຺ຎາຍຕີຕິ ວຕ຺ຕພ຺ເພ ຕເມວ ວິຎ຺ຎາຍມານຕໍ ສມ຺ຠາເວນ຺ໂຕ ‘‘ນຕ຺ຖີຕິ ວິຎ຺ຎາຍມາເນປີ’’ຕິ ອາຫ. ເຕນ ວຸຕ຺ຕໍ ‘‘ພຫິທ຺ຘາ ຂນ຺ເຘ’’ຕິອາທິ. ຣູເປ ເອວ ຠວິຕຸໍ ອຣຫຕິ ເອທິເສສຸ ຐາເນສຸ ອຣູເປ ອສມ຺ຠວໂຕຕິ ອຘິປ຺ປາໂຍ. ອສມ຺ຠວໂຕ ຈ ຍຖາວຸຕ຺ຕປາຬິອນຸສາຣໂຕຕິ ເວທິຕພ຺ພນ຺ຕິ. ‘‘ວິຈາຣິຕ’’ນ຺ຕິ ກສ຺ມາ ວຸຕ຺ຕໍ, ນນຸ ‘‘ອຕີຕາຣມ຺ມເຓ ອນາຄເຕ ຂນ຺ເຘ ຄຣຸໍ ກຕ຺ວາ ອສ຺ສາເທຕີ’’ຕິອາທິວຈນໂຕ ອຣູເປປິ ເອທິເສສຸ ຐາເນສຸ ຂນ຺ຘສທ຺ໂທ ປວຕ຺ຕເຕວ. ອາວຊ຺ຊນກິຣິຍສພ຺ຠາວໂຕ ປນາຕິ ອິທໍ ຍຖາທສ຺ສິຕປາຬິຍາ ວິໂຣຘປຣິຫຣຓາຘິປ຺ປາເຍນ ວຸຕ຺ຕໍ, ອວຈນໍ ປນ ກຕ຺ຖຈິ ວິເນຍ຺ຍຊ຺ຌາສເຍນ, ກຕ຺ຖຈິ ນຍທສ຺ສເນນ ໂຫຕີຕິ ກຸໂຕ ວິໂຣຘາວສໂຣ.

ອຘິປຕິປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.