໒໑. ອຕ຺ຖິປຈ຺ຈຍນິທ຺ເທສວຓ຺ຓນາ

໒໑. ຍສ຺ມິໍ ສຕິ ຍໍ ໂຫຕິ, ອສຕິ ຈ ນ ໂຫຕິ, ໂສ ຕສ຺ສ ປຈ຺ຈໂຍຕິ ຍທິທໍ ສມາສໂຕ ປຈ຺ຈຍລກ຺ຂຓໍ ຍໍ ສນ຺ຘາຍ ສຸຕ຺ເຕ ວຸຕ຺ຕໍ ‘‘ອິມສ຺ມິໍ ສຕິ ອິທໍ ໂຫຕິ, ອິມສ຺ມິໍ ອສຕິ ອິທໍ ນ ໂຫຕີ’’ຕິ, ຕຍິທໍ ອຕ຺ຖິປຈ຺ຈເຍ ໂຍເຊຕ຺ວາ ທສ຺ເສນ຺ໂຕ ‘‘ໂຍ ຫີ’’ຕິອາທິໍ ວຕ຺ວາ ອຍຎ຺ຈ ນໂຍ ນິພ຺ພາເນ ນ ລພ຺ຠຕິ, ຕສ຺ມາ ນິພ຺ພານໍ ອຕ຺ຖິປຈ຺ຈຍຠາເວນ ນ ອຸທ຺ຘຏນ຺ຕິ ທສ຺ເສຕຸໍ ‘‘ນິພ຺ພານຎ຺ຈ…ເປ… ອຸປກາຣກໍ ໂຫຕີ’’ຕິ ອາຫ. ເຕນ ປຈ຺ຈຍຘມ຺ມານໍ ປຈ຺ຈຍຠາໂວ ວິເສສໂຕ ພ຺ຍຕິເຣກມຸເຂນ ປາກໂຏ ໂຫຕີຕິ ທສ຺ເສຕິ. ນຕ຺ຖິຠາໂວປກາຣກຕາວິຣຸທ຺ໂຘຕິ ນຕ຺ຖິປຈ຺ຈຍຠາວວິຣຸທ຺ໂຘ. ວິຄຕາວິຄຕປຈ຺ຈຍາ ວິຍ ຫິ ອຎ຺ຎມຎ຺ຎໍ ອຸຊຸປຈ຺ຈນີກຠາເວນ ຐິຕາ ນຕ຺ຖິອຕ຺ຖິປຈ຺ຈຍາ. ນ ນິພ຺ພານໍ ອຕ຺ຖິປຈ຺ຈໂຍ ນຕ຺ຖິຠາໂວປກາຣກຕາອວິໂຣຘໂຕ. ເຍ ຫິ ອຕ຺ຖິປຈ຺ຈຍຘມ຺ມາ, ເຕ ນຕ຺ຖິຠາໂວປກາຣກຕາວິຣຸທ຺ຘາ ເອວ ທິຏ຺ຐາຕິ ອຘິປ຺ປາໂຍ.

ສຕິ ຈ ອຸປ຺ປນ຺ນຕ຺ເຕຕິ ສມ຺ພນ຺ໂຘ. ເຍສໍ ປຈ຺ຈຍາ ໂຫນ຺ຕິ ອາຫາຣິນ຺ທ຺ຣິຍາຕິ ໂຍຊນາ. ເອກໂຕຕິ ສຫ. ສຫຊາຕາທິປຈ຺ຈຍຕ຺ຕາຠາວໂຕຕິ ສຫຊາຕປຸເຣຊາຕປຈ຺ຉາຊາຕປຈ຺ຈຍຕ຺ຕາຠາວໂຕ. ຕທຠາໂວຕິ ສຫຊາຕາທິປຈ຺ຈຍຕ຺ຕາຠາໂວ. ເອເຕສນ຺ຕິ ອຕ຺ຖິປຈ຺ຈຍຕາວເສນ ປວຕ຺ຕມານານໍ ອາຫາຣິນ຺ທ຺ຣິຍານໍ. ຘມ຺ມສຠາວວເສນາຕິ ຘມ຺ມຕາວເສນ. ຘມ຺ມຕາ ເຫສາ, ຍທິທໍ ປຈ຺ຈຍຸປ຺ປນ຺ເນຫິ ສຫ ປຸເຣຕຣໍ ປຈ຺ຉາ ຈ ລພ຺ຠມານາ ອາຫາຣິນ຺ທ຺ຣິຍາ ເຕສໍ ອຕ຺ຖິປຈ຺ຈຍາ ໂຫນ຺ຕິ, ນ ສຫຊາຕາທິປຈ຺ຈຍາຕິ. ຍຖາ ວາ ຈກ຺ຂາທິທ຺ວາຣານໍ ຣູປາທິອາຣມ຺ມຓານໍ ສຕິປິ ນິຍຕວຸຕ຺ຕິຕາຍ ທ຺ວາຣາຣມ຺ມຓໂຕ ວິຎ຺ຎາຓສ຺ສ ຉພ຺ພິຘຠາເວ ອາຣມ຺ມຓມນາມສິຕ຺ວາ, ທ຺ວາຣໂຕ ທ຺ວາຣມນາມສິຕ຺ວາ ອາຣມ຺ມຓໂຕ ຉພ຺ພິຘຕາ ວຸຈ຺ຈຕິ, ເອວມິຘາປິ ອາຫາຣິນ຺ທ຺ຣິຍານໍ ປຈ຺ຈຍຸປ຺ປນ຺ເນຫິ ສຕິປິ ສຫຊາຕາທິຠາເວ ອຣູປກ຺ຂນ຺ຘາທິວເສນ ສຫຊາຕາທິເຠທຠິນ຺ນສ຺ສ ອຕ຺ຖິປຈ຺ຈຍສ຺ສ ທສ຺ສິຕຕ຺ຕາ ປຎ຺ຫາວາເຣ ອາຫາຣິນ຺ທ຺ຣິຍານໍ ວເສນ ອາຄເຕ ຈຕຸຕ຺ຖປຎ຺ຈມໂກຏ຺ຐາສຠູເຕ ອຕ຺ຖິປຈ຺ຈຍວິເສເສ ສຫຊາຕາທິເຠທໍ ອາມສິຕຸໍ ນ ລພ຺ຠຕີຕິ ທສ຺ເສຕຸໍ ອຏ຺ຐກຖາຍໍ ‘‘ອາຫາໂຣ ອິນ຺ທ຺ຣິຍຎ຺ຈ ສຫຊາຕາທິເຠທໍ ນ ລຠຕີ’’ຕິ ວຸຕ຺ຕໍ, ນ ປນ ອາຫາຣິນ຺ທ຺ຣິເຍສຸ ສຫຊາຕາທິຠາວສ຺ສ ອຠາວໂຕ. ເອວມ຺ເປຕ຺ຖ ອຕ຺ໂຖ ທຏ຺ຐພ຺ໂພ.

ອຕ຺ຖິປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.