໒໒-໒໓-໒໔. ນຕ຺ຖິວິຄຕອວິຄຕປຈ຺ຈຍນິທ຺ເທສວຓ຺ຓນາ

໒໒-໒໓. ເອຕ຺ຖາຕິ ນຕ຺ຖິປຈ຺ຈເຍ. ນານນ຺ຕິ ນານຕ຺ຕໍ. ເອເຕນາຕິ ອນນ຺ຕຣປຈ຺ຈຍໂຕ ນຕ຺ຖິປຈ຺ຈຍສ຺ສ ວິເສສມຕ຺ຕທີປເນນ ‘‘ປຈ຺ຈຍລກ຺ຂຓເມວ ເຫຕ຺ຖ ນານ’’ນ຺ຕິ ອິມິນາ ວຈເນນ. ອຕ຺ໂຖຕິ ຘມ຺ໂມ. ພ຺ຍຎ຺ຊນສງ຺ຄຫິເຕຕິ ‘‘ນຕ຺ຖິປຈ຺ຈໂຍ ວິຄຕປຈ຺ຈໂຍ’’ຕິ ເອວມາທິພ຺ຍຎ຺ຊເນນ ສງ຺ຄຫິເຕ. ປຈ຺ຈຍລກ຺ຂຓມຕ຺ເຕຕິ ເອຕ຺ຖ ປວຕ຺ຕິໂອກາສທາເນນ ອຸປກາຣກາ ອຣູປຘມ຺ມາ, ວິຄຕຠາເວນ ອຸປກາຣກາຕິ ເອວມາທິເກ ປຈ຺ຈຍານໍ ລກ຺ຂຓມຕ຺ເຕ.

ນຕ຺ຖິວິຄຕອວິຄຕປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.

ປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.

ປຈ຺ຈຍນິທ຺ເທສປກິຓ຺ຓກວິນິຈ຺ຉຍກຖາວຓ຺ຓນາ

ອາທິມປາໂຐຕິ ປຸຣິມປາໂຐ. ຕຖາ ຈ ສຕີຕິ ໂທສສ຺ສປິ ສຕ຺ຕຣສຫິ ປຈ຺ຈເຍຫິ ປຈ຺ຈຍຠາເວ ສຕິ. ອຘິປຕິປຈ຺ຈຍຠາໂວປິສ຺ສ ອນຸຎ຺ຎາໂຕ ໂຫຕີຕິ ອາຫ ‘‘ໂທສສ຺ສປິ ຄຣຸກຣຓໍ ປາຬິຍໍ ວຕ຺ຕພ຺ພໍ ສິຍາ’’ຕິ. ‘‘ເສສານ’’ນ຺ຕິ ວຈເນເນວ ນິວາຣິໂຕຕິ ກທາຈິ ອາສງ຺ເກຍ຺ຍາຕິ ຕໍນິວຕ຺ຕນຕ຺ຖມາຫ ‘‘ນ ຈ ເສສານ’’ນ຺ຕິອາທິ. ປຸເຣຊາຕາທີຫີຕິ ປຸເຣຊາຕກມ຺ມາຫາຣຌານິນ຺ທ຺ຣິຍມຄ຺ຄວິປາກປຈ຺ຈເຍຫິ. ຕນ຺ນິວາຣຓຕ຺ຖນ຺ຕິ ຕສ຺ສ ຍຖາວຸຕ຺ຕໂທສສ຺ສ ນິວາຣຓຕ຺ຖໍ. ວິສຸຎ຺ຈ ອຄ຺ຄເຫຕ຺ວາຕິ ໂລຠໂມຫາ ວິປາກປຈ຺ຈຍາປິ ນ ໂຫນ຺ຕິ, ຕຖາ ໂທໂສຕິ ເອວໍ ວິສຸຎ຺ຈ ອຄ຺ຄເຫຕ຺ວາ. ໂຜຏ຺ຐພ຺ພາຍຕນໍ ກາຍວິຎ຺ຎາຓຘາຕຸຍາ ອາຣມ຺ມຓາທິປຈ຺ຈໂຍ ໂຫນ຺ຕໍເຍວ ປຖວີອາທິສຠາວຕ຺ຕາ ອຕ຺ຕນາ ສຫຊາຕານໍ ສຫຊາຕາທິປຈ຺ຈຍາ ໂຫນ຺ຕິເຍວາຕິ ວຸຕ຺ຕໍ ‘‘ໂຜຏ຺ຐພ຺ພາຍຕນສ຺ສ ສຫຊາຕາທິປຈ຺ຈຍຠາວໍ ທສ຺ເສຕີ’’ຕິ. ‘‘ສພ຺ພຘມ຺ມານ’’ນ຺ຕິ ‘‘ສພ຺ເພ ຘມ຺ມາ ມໂນວິຎ຺ຎາຓຘາຕຸຍາ ຕໍສມ຺ປຍຸຕ຺ຕການຎ຺ຈ ຘມ຺ມານໍ ອາຣມ຺ມຓປຈ຺ຈເຍນ ປຈ຺ຈໂຍ’’ຕິ ເອຕ຺ຖ ວຸຕ຺ເຕ ສພ຺ພຘມ຺ເມ ສນ຺ຘາຍາຫ ‘‘ສພ຺ພຘມ຺ມານໍ ຍຖາໂຍຄໍ ເຫຕາທິປຈ຺ຈຍຠາວໍ ທສ຺ເສຕີ’’ຕິ. ນ ຫິ ເອຕໍ…ເປ… ຠາວທສ຺ສນໍ, ອຖ ໂຂ ເອກຘມ຺ມສ຺ສ ອເນກປຈ຺ຈຍຠາວທສ຺ສນໍ, ຕສ຺ມາ ‘‘ເອເຕນ ໂຜຏ຺ຐພ຺ພາຍຕນສ຺ສາ’’ຕິອາທິ ວຸຕ຺ຕນ຺ຕິ ອຘິປ຺ປາໂຍ. ຣູປາທີນນ຺ຕິ ຣູປາຍຕນາທີນໍ.

ເຠທາຕິ ວິເສສາ. ເຠທໍ ອນາມສິຕ຺ວາຕິ ຈກ຺ຂຸວິຎ຺ຎາຓຘາຕຸອາທິວິເສສໍ ອຄ຺ຄເຫຕ຺ວາ. ເຕ ເອວາຕິ ຍຖາວຸຕ຺ຕວິເສສານໍ ສາມຎ຺ຎຠູເຕ ຂນ຺ເຘ ເອວ. ຍໍ ສນ຺ຘາຍ ‘‘ເອວໍ ນ ສກ຺ກາ ວຕ຺ຕຸ’’ນ຺ຕິ ວຸຕ຺ຕໍ, ຕໍ ວິຠາເວຕຸໍ ‘‘ນ ຫີ’’ຕິອາທິ ວຸຕ຺ຕໍ. ປຏ຺ຐານສໍວຓ຺ຓນາ ເຫສາຕິ ເອເຕນ ສຸຕ຺ເຕ ວຸຕ຺ຕປຣິຍາຍມຄ຺ຄຠາເວເນຕ຺ຖ ນ ສກ຺ກາ ມິຈ຺ຉາວາຈາທີນໍ ມຄ຺ຄປຈ຺ຈຍໍ ວຕ຺ຕຸນ຺ຕິ ທສ຺ເສຕິ. ເສສປຈ຺ຈຍຠາໂວຕິ ມຄ຺ຄປຈ຺ຈຍໍ ຐເປຕ຺ວາ ຍຖາວຸຕ຺ເຕຫິ ເສເສຫິ ອຏ຺ຐາຣສຫິ ປຈ຺ຈເຍຫິ ປຈ຺ຈຍຠາໂວ. ອຘິປຕິປຈ຺ຈໂຍ ນ ໂຫຕີຕິ ອາຣມ຺ມຓາຘິປຕິປຈ຺ຈໂຍ ນ ໂຫຕິ. ຕນ຺ຕິ ວິຈິກິຈ຺ຉໍ. ຕຕ຺ຖາຕິ ຍຖາວຸຕ຺ເຕສຸ ອຫິຣິກາທີສຸ.

ທສຘາ ປຈ຺ຈຍາ ໂຫນ຺ຕິ, ປຸນ ຕຖາ ຫທຍວຕ຺ຖຸນ຺ຕິ ອິທໍ ອຕ຺ຖມຕ຺ຕວຈນໍ. ປາໂຐ ປນ ‘‘ຫທຍວຕ຺ຖຸ ເຕສຎ຺ເຈວ ວິປ຺ປຍຸຕ຺ຕສ຺ສ ຈ ວເສນ ທສຘາ ປຈ຺ຈໂຍ ໂຫຕີ’’ຕິ ເວທິຕພ຺ໂພ. ຣູປສທ຺ທຄນ຺ຘຣສາຍຕນມຕ຺ຕເມວາຕິ ອິທໍ ຣູປາທີນໍ ສຫຊາຕປຈ຺ຈຍຕາຍ ວິຍ ນິສ຺ສຍປຈ຺ຈຍຕາຍ ຈ ອຠາວໂຕ, ປຸເຣຊາຕປຈ຺ຈຍຕາຍ ຈ ຠາວໂຕ ວຸຕ຺ຕໍ. ເອຕານີຕິ ຍຖາວຸຕ຺ຕານິ ຣູປສທ຺ທຄນ຺ຘຣສາຣມ຺ມຓານິ. ສພ຺ພາຕິກ຺ກນ຺ຕປຈ຺ຈຍາເປກ຺ຂາຕິ ‘‘ເອກຘມ຺ມສ຺ສ ອເນກປຈ຺ຈຍຠາວໂຕ’’ຕິ ເອຕສ຺ມິໍ ວິຈາເຣ ເຫຕຸອາທິອຕິກ຺ກນ຺ຕປຈ຺ຈຍາເປກ຺ຂາ ເອເຕສໍ ຣູປາທີນໍ ອປຸພ຺ພຕາ ນຕ຺ຖິ, ອຖ ໂຂ ອາຣມ຺ມຓອາຣມ຺ມຓາຘິປຕິອາຣມ຺ມຓູປນິສ຺ສຍປຈ຺ຈຍາເປກ຺ຂາ. ນ ຫິ ຣູປາທີນິ ເຫຕຸສຫຊາຕາຘິປຕິອາທິວເສນ ປຈ຺ຈຍາ ໂຫນ຺ຕີຕິ. ຕສ຺ສາຕິ ຣູປຊີວິຕິນ຺ທ຺ຣິຍສ຺ສ ປຸເຣຊາຕປຈ຺ຈຍຠາວໂຕ ອປຸພ຺ພຕາ, ຕສ຺ມາ ຕໍ ເອກູນວີສຕິວິໂຘ ປຈ຺ຈໂຍ ໂຫຕີຕິ ວຸຕ຺ຕໍ ໂຫຕິ. ສຕ຺ຕຘາ ປຈ຺ຈຍຠາໂວ ໂຍເຊຕພ຺ໂພ, ນ ຫິ ໂອຊາ ປຸເຣຊາຕປຈ຺ຈໂຍ ນ ໂຫຕີຕິ.

ອຕ຺ໂຖຕິ ວາ ເຫຕຸອາທິຘມ຺ມານໍ ສຠາໂວ ເວທິຕພ຺ໂພ. ໂສ ຫິ ອຕ຺ຕໂນ ປຈ຺ຈຍຸປ຺ປນ຺ເນຫິ ອຣຓີຍໂຕ ອຸປຄນ຺ຕພ຺ພໂຕ, ຎາເຓນ ວາ ຎາຕພ຺ພໂຕ ‘‘ອຕ຺ໂຖ’’ຕິ ວຸຈ຺ຈຕິ. ອາກາໂຣຕິ ຕສ຺ເສວ ປວຕ຺ຕິອາກາໂຣ, ເຍນ ອຕ຺ຕໂນ ປຈ຺ຈຍຸປ຺ປນ຺ນານໍ ປຈ຺ຈຍຠາວໍ ອຸປຄຈ຺ຉຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ຕໍ ປນ ວິປ຺ປຍຸຕ຺ຕໍ. ‘‘ສຕ຺ຕຫາກາເຣຫີ’’ຕິ ປຐານສ຺ສ ກາຣຓມາຫ ‘‘ອຸກ຺ກຏ຺ຐປຣິຈ຺ເຉໂທ ຫີ’’ຕິອາທິນາ.

ຍໍ ກມ຺ມປຈ຺ຈໂຍ…ເປ… ທຏ຺ຐພ຺ພໍ ອາເສວນກມ຺ມປຈ຺ຈຍານໍ ປຈ຺ຈຍຸປ຺ປນ຺ນສ຺ສ ອນນ຺ຕຣຏ຺ຐານຕາຍ. ສຫຊາຕມ຺ປິ ຫິ ອນນ຺ຕຣເມວາຕິ. ໂກຈິ ປເນຕ຺ຖາຕິ ເອຕ຺ຖ ເອຕສ຺ມິໍ ປກຕູປນິສ຺ສຍສມຸທາເຍ ໂກຈິ ຕເທກເທສຠູໂຕ ກມ຺ມສຠາໂວ ປກຕູປນິສ຺ສໂຍຕິ ອຕ຺ໂຖ. ຕຕ຺ຖາຕິ ‘‘ຍທິທໍ ອາຣມ຺ມຓປຸເຣຊາເຕ ປເນຕ຺ຖ ອິນ຺ທ຺ຣິຍວິປ຺ປຍຸຕ຺ຕປຈ຺ຈຍຕາ ນ ລພ຺ຠຕີ’’ຕິ ວຸຕ຺ຕໍ, ຕສ຺ມິໍ, ຕສ຺ມິໍ ວາ ອາຣມ຺ມຓປຸເຣຊາຕຄ຺ຄຫເຓ. ວຕ຺ຖຸສ຺ສ ວິປ຺ປຍຸຕ຺ຕປຈ຺ຈຍຕາ ລພ຺ຠຕີຕິ ນ ວຕ຺ຕພ຺ພາ. ນ ຫິ ອາຣມ຺ມຓຠູຕໍ ວຕ຺ຖຸ ວິປ຺ປຍຸຕ຺ຕປຈ຺ຈໂຍ ໂຫຕິ, ອຖ ໂຂ ນິສ຺ສຍຠູຕເມວາຕິ. ອິໂຕ ອຸຕ຺ຕຣີຕິ ເອຕ຺ຖ ‘‘ອິໂຕ’’ຕິ ອິທໍ ປຈ຺ຈາມສນໍ ປຸເຣຊາຕໍ ວາ ສນ຺ຘາຍ ອາຣມ຺ມຓປຸເຣຊາຕໍ ວາ. ຕຕ຺ຖ ປຐມນຍໍ ອເປກ຺ຂິຕ຺ວາ ວຸຕ຺ຕໍ ‘‘ປຸເຣຊາຕໂຕ ປຣໂຕປີ’’ຕິ. ເຕນ ກມ຺ມາທິປຈ຺ຈເຍສຸປິ ວກ຺ຂມາເນສຸ ລພ຺ຠມານາລພ຺ຠມານໍ ເວທິຕພ຺ພນ຺ຕິ ວຸຕ຺ຕໍ ໂຫຕິ. ທຸຕິຍໍ ປນ ນຍໍ ອນເປກ຺ຂິຕ຺ວາ ອຏ຺ຐກຖາຍໍ ອາຄຕວເສນ ວຸຕ຺ຕໍ ‘‘ອິໂຕ ວາ ອິນ຺ທ຺ຣິຍວິປ຺ປຍຸຕ຺ຕໂຕ’’ຕິ, ອຕ຺ຕນາ ວຸຕ຺ຕນເຍນ ປນ ‘‘ນິສ຺ສຍິນ຺ທ຺ຣິຍວິປ຺ປຍຸຕ຺ຕໂຕ ວາ’’ຕິ. ຕຕ຺ຖ ວຕ຺ຕພ຺ພໍ ສຍເມວາຫ ‘‘ອາຣມ຺ມຓາຘິປຕີ’’ຕິອາທິ. ກມ຺ມາທີສຸ ລພ຺ຠມານາລພ຺ຠມານໍ ນ ວກ຺ຂຕິ ‘‘ອິໂຕ ອຸຕ຺ຕຣີ’’ຕິອາທິນາ ປເຄວ ອຕິເທສສ຺ສ ກຕຕ຺ຕາ, ຕສ຺ມາ ປຸຣິໂມເຍວ ປຸເຣຊາຕໂຕປີຕິ ວຸຕ຺ຕອຕ຺ໂຖເຍວ ອຘິປ຺ເປໂຕ.

‘‘ມຄ຺ຄປຈ຺ຈຍຕໍ ອວິຊຫນ຺ໂຕວາ’’ຕິ ອິມິນາ ຈ ມຄ຺ຄປຈ຺ຈໂຍ ວຸຕ຺ໂຕຕິ ‘‘ມຄ຺ຄວຊ຺ຊານໍ ນວນ຺ນ’’ນ຺ຕິ ວຸຕ຺ຕໍ ປຈ຺ຉິມປາເຐ, ປຸຣິມປາເຐ ປນ ‘‘ມຄ຺ຄປຈ຺ຈຍຕໍ ອວິຊຫນ຺ໂຕວາ’’ຕິ ວຸຕ຺ຕຕ຺ຕາ ເອວ ມຄ຺ຄປຈ຺ຈເຍນ ສທ຺ຘິໍ ສຫຊາຕາທິປຈ຺ຈຍາ ຄເຫຕພ຺ພາຕິ ‘‘ທສນ຺ນ’’ນ຺ຕິ ວຸຕ຺ຕໍ. ຕຕ຺ຖ ປຈ຺ຉິມປາເຐ ‘‘ເອກາທສຫາກາເຣຫີ’’ຕິ ວຕ຺ຕພ຺ພໍ, ປຸຣິມປາເຐ ‘‘ທ຺ວາທສຫີ’’ຕິ.

ສມນນ຺ຕຣນິຣຸທ຺ຘຕາຍ ອາຣມ຺ມຓຠາເວນ ຈາຕິ ວິຊ຺ຊມານມ຺ປິ ວິເສສມນາມສິຕ຺ວາ ເກວລໍ ສມນນ຺ຕຣນິຣຸທ຺ຘຕາຍ ອາຣມ຺ມຓຠາເວນ, ນ ຈ ສມນນ຺ຕຣນິຣຸທ຺ຘຕາອາຣມ຺ມຓຠາວສາມຎ຺ເຎນາຕິ ອຕ຺ໂຖ. ‘‘ອິມິນາ ອຸປາເຍນາ’’ຕິ ປຈ຺ຈຍສຠາຄຕາທສ຺ສເນນ ປຈ຺ຈຍວິສຠາຄຕາທສ຺ສເນນ ຈ ວຸຕ຺ຕໍ ປທທ຺ວຍໍ ເອກຊ຺ຌໍ ກຕ຺ວາ ປທຸທ຺ຘາໂຣ ກໂຕຕິ ທສ຺ເສນ຺ໂຕ ‘‘ເຫຕຸອາທີນໍ ສຫຊາຕານໍ…ເປ… ໂຍເຊຕພ຺ພາ’’ຕິ ອາຫ. ເຫຕຸອາຣມ຺ມຓາທີນໍ ສຫຊາຕາສຫຊາຕຠາເວນ ອຎ຺ຎມຎ຺ຎວິສຠາຄຕາຕິ ໂຍຊນາ. ເອວມາທິນາຕິ ອາທິ-ສທ຺ເທນ ປຸເຣຊາຕານໍ ຈກ຺ຂາທີນໍ ຣູປາທີນຎ຺ຈ ປຸເຣຊາຕຠາເວນ ສຠາຄຕາ, ປວຕ຺ຕິຍໍ ວຕ຺ຖຸຂນ຺ຘາທີນໍ ປຸເຣຊາຕປຈ຺ຉາຊາຕານໍ ປຸເຣຊາຕປຈ຺ຉາຊາຕຠາເວນ ວິສຠາຄຕາຕິ ເອວມາທີນມ຺ປິ ສງ຺ຄໂຫ ທຏ຺ຐພ຺ໂພ. ເຫຕຸນເຫຕຸອາທິຠາວໂຕປິ ເຈຕ຺ຖ ຍຸຄຬກໂຕ ວິຎ຺ຎາຕພ຺ໂພ ວິນິຈ຺ຉໂຍ. ເຫຕຸປຈ຺ຈໂຍ ຫິ ເຫຕຸຠາເວນ ປຈ຺ຈໂຍ, ອິຕເຣ ຕທຎ຺ຎຠາເວນ. ເອວມິຕເຣສຸປິ ຍຖາຣຫໍ ຍຸຄຬກໂຕ ເວທິຕພ຺ໂພ.

ອຸຠຍປ຺ປຘານຕາຕິ ຊນໂນປຕ຺ຖມ຺ຠນປ຺ປຘານຕາ. ຐານນ຺ຕິ ປທສ຺ສ ອຕ຺ຖວຈນໍ ກາຣຓຠາໂວຕິ ວິນາປິ ຠາວປຈ຺ຈຍໍ ຠາວປຈ຺ຈຍສ຺ສ ອຕ຺ໂຖ ຎາຍຕີຕິ. ອຸປນິສ຺ສຍໍ ຠິນ຺ທນ຺ເຕນາຕິ ອນນ຺ຕຣູປນິສ຺ສຍປກຕູປນິສ຺ສຍວິຠາເຄນ ວິຠຊນ຺ເຕນ. ຕໂຍປິ ອຸປນິສ຺ສຍາ ວຕ຺ຕພ຺ພາ ອຸປນິສ຺ສຍວິຠາຄຠາວໂຕ. ອຸປນິສ຺ສຍຄ຺ຄຫຓເມວ ກາຕພ຺ພໍ ສາມຎ຺ຎຣູເປນ. ຕຕ຺ຖາຕິ ເອວມວຏ຺ຐິເຕ ອນນ຺ຕຣູປນິສ຺ສຍປກຕູປນິສ຺ສໂຍຕິ ຠິນ຺ທນໍ ວິຠາຄກຣຓໍ ຍທິ ປກຕູປນິສ຺ສຍສ຺ສ ຣູປານໍ ປຈ຺ຈຍຕ຺ຕາຠາວທສ຺ສນຕ຺ຖໍ, ນນຸ ອາຣມ຺ມຓູປນິສ຺ສຍອນນ຺ຕຣູປນິສ຺ສຍາປິ ຣູປານໍ ປຈ຺ຈຍາ ນ ໂຫນ຺ຕິເຍວາຕິ? ສຈ຺ຈໍ ນ ໂຫນ຺ຕິ, ເຕ ປນ ທສ຺ສິຕນຍາຕິ ຕເທກເທເສນ ອິຕຣມ຺ປິ ທສ຺ສິຕເມວ ໂຫຕີຕິ ອິມມຕ຺ຖໍ ທສ຺ເສນ຺ໂຕ ‘‘ອາຣມ຺ມຓໍ…ເປ… ທຏ຺ຐພ຺ພ’’ນ຺ຕິ ອາຫ. ຕໍສມານຄຕິກຕ຺ຕາຕິ ເຕຫິ ອນນ຺ຕຣາທີຫິ ສມານຄຕິກຕ຺ຕາ ອຣູປານໍເຍວ ປຈ຺ຈຍຠາວໂຕ. ຕນ຺ຕິ ປຸເຣຊາຕປຈ຺ຈຍໍ. ຕຕ຺ຖາຕິ ອນນ຺ຕຣາທີສຸ ປຐິຕ຺ວາ.

ປຈ຺ຈຍນິທ຺ເທສປກິຓ຺ຓກວິນິຈ຺ຉຍກຖາວຓ຺ຓນາ ນິຏ຺ຐິຕາ.