໒. ປວຕ຺ຕິວາຣວຓ຺ຓນາ

໒໗-໑໖໔. ທຸກ຺ຂປຣິຎ຺ຎາ ຍາວ ທຸກ຺ຂສມຕິກ຺ກມນຕ຺ຖາຕິ ສປ຺ປເທສໍ ປວຕ຺ຕາປິ ສາ ຕທຕ຺ຖາວຫາ ຠເວຍ຺ຍາຕິ ກສ຺ສຈິ ອາສງ຺ກາ ສິຍາຕິ ທສ຺ເສນ຺ໂຕ ອາຫ ‘‘ອຣິຍຕ຺ຕາ…ເປ… ກຕ຺ວາ ວຸຕ຺ຕ’’ນ຺ຕິ. ເກຈິ ປເນຕ຺ຖ ‘‘ອນ຺ຕິມຠເວ ຐິຕຕ຺ຕາ’’ຕິ ກາຣຓໍ ວທນ຺ຕິ, ຕໍ ນ ຍຸຊ຺ຊຕິ ອຸປປຕ຺ຕິຍາ ທຸກ຺ຂວິຈາຣຕ຺ຕາ, ນ ຈ ສພ຺ເພ ສຸທ຺ຘາວາສາ ອນ຺ຕິມຠວິກາ ອຸທ຺ຘໍໂສຕວຈນໂຕ. ‘‘ຍສ຺ສ ທຸກ຺ຂສຈ຺ຈໍ ອຸປ຺ປຊ຺ຊຕີ’’ຕິ ອຸປ຺ປາທາວຕ຺ຖາ. ອວິເສເສນ ທຸກ຺ຂສຈ຺ຈປຣິຍາປນ຺ນາ ຘມ຺ມາ ສມ຺ພນ຺ຘີຠາເວເນວ ຕໍສມງ຺ຄີ ຈ ປຸຄ຺ຄໂລ ວຸຕ຺ໂຕຕິ ທສ຺ເສນ຺ໂຕ ‘‘ສພ຺ເພ ອຸປປຊ຺ຊນ຺ຕາ’’ຕິອາທິໍ ວຕ຺ວາ ສ຺ວາຍມຕ຺ໂຖ ຍສ຺ມາ ນິຈ຺ຉຍຣູເປນ ຄຫິໂຕ, ນິຈ຺ຉິຕສ຺ເສວ ຈ ອຕ຺ຖສ຺ສ ວິຠາຄທສ຺ສເນນ ຠວິຕພ຺ພໍ, ຕສ຺ມາ ‘‘ເຕສ຺ເວວ…ເປ… ອຸປປນ຺ນເມວາ’’ຕິ ອາຫ. ຕຕ຺ຖ ເຕສ຺ເວວ ເກຈິ ທສ຺ສີຍນ຺ຕີຕິ ສມ຺ພນ຺ໂຘ. ເອກໂກຏ຺ຐາສຸປ຺ປຕ຺ຕິສມງ຺ຄິໂນຕິ ທຸກ຺ຂໂກຏ຺ຐາສຸປ຺ປຕ຺ຕິສມງ຺ຄິໂນ. ເຕສູຕິ ສນ຺ນິຏ຺ຐາເນນ ຄຫິເຕສຸ. ມຄ຺ຄຜລຸປ຺ປາທສມງ຺ຄີສູຕິ ມຄ຺ຄຜລຸປ຺ປາທສມງ຺ຄີນໍ, ອຍເມວ ວາ ປາໂຐ.

ເອຕ຺ຖ ຈາຕິອາທິນາ ‘‘ສພ຺ເພສ’’ນ຺ຕິອາທິປາຬິຍາ ປິຓ຺ຑຕ຺ຖໍ ທສ຺ເສຕິ. ຕຕ຺ຖ ສມຸທຍສຈ຺ຈຸປ຺ປາທໂວມິສ຺ສສ຺ສ ທຸກ຺ຂສຈ຺ຈຸປ຺ປາທສ຺ສາຕິ ອິທໍ ອນາທເຣ ສາມິວຈນໍ. ກຕ຺ຖຈິ ສມຸທຍສຈ຺ຈຸປ຺ປາທໂວມິສ຺ເສປິ ທຸກ຺ຂສຈ຺ເຈ ຕໍຣຫິຕສ຺ສ ສມຸທຍສຈ຺ຈຸປ຺ປາທຣຫິຕສ຺ສ ທຸກ຺ຂສຈ຺ຈຸປ຺ປາທສ຺ສ ທສ຺ສນວເສນ ວຸຕ຺ຕນ຺ຕິ ໂຍຊນາ. ເກຈິ ປນ ‘‘ສມຸທຍສຈ຺ຈາໂວມິສ຺ສສ຺ສາ’’ຕິ ປຐນ຺ຕິ, ເຕສໍ ‘‘ຕໍຣຫິຕສ຺ສາ’’ຕິ ອິທໍ ປຸຣິມປທສ຺ສ ອຕ຺ຖວິວຣຓໍ ເວທິຕພ຺ພໍ. ຕໍສຫິຕສ຺ສາຕິ ສມຸທຍສຈ຺ຈຸປ຺ປາທສຫິຕສ຺ສ ທຸກ຺ຂສຈ຺ຈຸປ຺ປາທສ຺ສ ທສ຺ສນວເສນ ວຸຕ຺ຕນ຺ຕິ ໂຍຊນາ. ເຕສນ຺ຕິ ອສຎ຺ຎສຕ຺ຕານໍ, ປວຕ຺ຕິຍໍ ທຸກ຺ຂສຈ຺ຈສ຺ສ ອຸປ຺ປາໂທ ‘‘ປວຕ຺ເຕ’’ຕິອາທິນາ ວຸຕ຺ເຕສຸ ທ຺ວີສຸປິ ໂກຏ຺ຐາເສສຸ ນ ຄຫິໂຕຕິ ອຕ຺ໂຖ. ປຏິສນ຺ຘິຍໍ ປນ ເຕສໍ ອຸປ຺ປາທສ຺ສ ປຐມໂກຏ຺ຐາເສນ ຄຫິຕຕາ ທສ຺ສິຕາ ເອວ. ຕຖາ ນິໂຣໂຘ ຈາຕິ ຍຖາ ອສຎ຺ຎສຕ຺ຕານໍ ປຏິສນ຺ຘິຍໍ ທຸກ຺ຂສຈ຺ຈສ຺ສ ອຸປ຺ປາໂທ ປຐມໂກຏ຺ຐາເສນ ຄຫິໂຕ, ປວຕ຺ຕິຍໍ ປນ ໂສ ທ຺ວີຫິ ໂກຏ຺ຐາເສຫິ ນ ຄຫິໂຕ, ຕຖາ ເຕສໍ ທຸກ຺ຂສຈ຺ຈສ຺ສ ນິໂຣໂຘປີຕິ ອຕ຺ໂຖ. ຕຖາ ຫິ ‘‘ສພ຺ເພສໍ ຈວນ຺ຕານໍ ປວຕ຺ເຕ ຕຓ຺ຫາວິປ຺ປຍຸຕ຺ຕຈິຕ຺ຕສ຺ສ ຠງ຺ຄກ຺ຂເຓ’’ຕິອາທິນາ (ຍມ. ໑.ສຈ຺ຈຍມກ.໘໘) ນິໂຣຘວາເຣ ປາຬິ ປວຕ຺ຕາ. ເອເສວ ນໂຍຕິ ຍ຺ວາຍໍ ‘‘ເອຕ຺ຖ ຈາ’’ຕິອາທິນາ ສມຸທຍສຈ຺ຈຍມເກ ປາຬິຍາ ອຕ຺ຖນໂຍ ວຸຕ຺ໂຕ, ມຄ຺ຄສຈ຺ຈຍມເກປິ ເອເສວ ນໂຍ, ເອວເມວ ຕຕ຺ຖາປິ ອຕ຺ໂຖ ເນຕພ຺ໂພຕິ ອຕ຺ໂຖ. ຕຖາ ຫິ ‘‘ສພ຺ເພສໍ ອຸປປຊ຺ຊນ຺ຕານ’’ນ຺ຕິອາທິນາ ຕຕ຺ຖ ປາຬິ ປວຕ຺ຕາ.

ເອວຎ຺ຈ ສຕີຕິ ເອວໍ ຂຓວເສນ ໂອກາສຄ຺ຄຫເຓ ສຕີຕິ ຍຖາວຸຕ຺ຕມຕ຺ຖໍ ອນນຸຊານນວເສນ ປຈ຺ຈາມສຕິ. ເອຕສ຺ສ ວິສ຺ສຊ຺ຊເນຕິ ເອຕສ຺ສ ຍມກປທສ຺ສ ວິສ຺ສຊ຺ຊເນ. ‘‘ອຄ຺ຄມຄ຺ຄສ຺ສ ອຸປ຺ປາທກ຺ຂເຓ, ອຣຫນ຺ຕານໍ ຈິຕ຺ຕສ຺ສ ອຸປ຺ປາທກ຺ຂເຓ, ຍສ຺ສ ຈິຕ຺ຕສ຺ສ ອນນ຺ຕຣາ ອຄ຺ຄມຄ຺ຄໍ ປຏິລຠິສ຺ສນ຺ຕິ, ຕສ຺ສ ຈິຕ຺ຕສ຺ສ ອຸປ຺ປາທກ຺ຂເຓ, ອສຎ຺ຎສຕ຺ຕໍ ອຸປປຊ຺ຊນ຺ຕານໍ ເຕສໍ ຕຕ຺ຖ ທຸກ຺ຂສຈ຺ຈໍ ອຸປ຺ປຊ຺ຊຕິ, ໂນ ຈ ເຕສໍ ຕຕ຺ຖ ສມຸທຍສຈ຺ຈໍ ອຸປ຺ປຊ຺ຊິສ຺ສຕີ’’ຕິ (ຍມ. ໑.ສຈ຺ຈຍມກ.໗໑) ປຸຣິມໂກຏ຺ຐາສສ຺ສ ອາຄຕຕ຺ຕາ ວິໂຣໂຘ ນຕ຺ຖີຕິ ‘‘ປຈ຺ຉິມໂກຏ຺ຐາເສ’’ຕິອາທິ ວຸຕ຺ຕໍ. ຕຕ຺ຖ ຕສ຺ມາຕິ ຍສ຺ມາ ນ ອຸປປຕ຺ຕິຈິຕ຺ຕຸປ຺ປາທກ຺ຂໂຓ ຠາວິໂນ ສມຸທຍປຈ຺ຈຸປ຺ປາທສ຺ສ ອາຘາໂຣ, ອຖ ໂຂ ກາມາວຈຣາທິໂອກາໂສ, ຕສ຺ມາ. ປຸຄ຺ຄໂລກາສວາໂຣ ເຫສາຕິ ຍສ຺ມາ ປຸຄ຺ຄໂລກາສວາໂຣ ເອສ, ຕສ຺ມາ ‘‘ເຕສໍ ຕຕ຺ຖາ’’ຕິ ເອຕ຺ຖ ໂອກາສວເສນ ຕຕ຺ຖ-ສທ຺ທສ຺ສ ອຕ຺ໂຖ ເວທິຕພ຺ໂພ. ຍທິ ປຸຄ຺ຄໂລກາສວາເຣ ກາມາວຈຣາທິໂອກາສວເສເນວ ອຕ຺ໂຖ ຄເຫຕພ຺ໂພ, ນ ຂຓວເສນ, ອຖ ກສ຺ມາ ‘‘ສພ຺ເພສໍ ອຸປປຊ຺ຊນ຺ຕານ’’ນ຺ຕິອາທິນາ ໂອກາສໍ ອນາມສິຕ຺ວາ ຕຕ຺ຖ ວິສ຺ສຊ຺ຊນໍ ປວຕ຺ຕນ຺ຕິ ໂຈທນໍ ສນ຺ຘາຍາຫ ‘‘ຕຕ຺ຖ…ເປ… ໂສ ເອວາ’’ຕິ. ຕຕ຺ຖ ຕຕ຺ຖາຕິ ໂອກາສວາເຣ. ປຸຄ຺ຄລວິເສສທສ຺ສນຕ຺ຖນ຺ຕິ ປຸຄ຺ຄລສງ຺ຂາຕວິເສສທສ຺ສນຕ຺ຖໍ. ຍຕ຺ຖ ເຕຕິ ຍສ຺ມິໍ ກາມາວຈຣາທິໂອກາເສ ເຕ ປຸຄ຺ຄລາ.

ເກຈີຕິ ຘມ຺ມສິຣິຕ຺ເຖຣໍ ສນ຺ຘາຍາຫ. ໂສ ຫິ ‘‘ປວຕ຺ເຕ ຈິຕ຺ຕສ຺ສ ຠງ຺ຄກ຺ຂເຓ ທຸກ຺ຂສຈ຺ຈໍ ນຸປ຺ປຊ຺ຊຕີ’’ຕິ ເອຕ຺ຖ ຈິຕ຺ຕຊຣູປເມວ ອຘິປ຺ເປຕໍ ຈິຕ຺ຕປຏິພທ຺ຘວຸຕ຺ຕິຕ຺ຕາຕິ ກາຣຓໍ ວທຕິ. ອປເຣ ‘‘ອຣູເປຕິ ອິມໍ ປຸຣິມາເປກ຺ຂມ຺ປິ ໂຫຕີຕິ ເຕນ ປວຕ຺ຕໍ ວິເສເສຕ຺ວາ ອຣູປຠວວເສນ ອຍມຕ຺ໂຖ ວຸຕ຺ໂຕ, ຕສ຺ມາ ‘ຍສ຺ສ ວາ ປນ ສມຸທຍສຈ຺ຈໍ ນິຣຸຊ຺ຌຕິ, ຕສ຺ສ ທຸກ຺ຂສຈ຺ຈໍ ອຸປ຺ປຊ຺ຊຕີຕິ? ໂນ’ຕິອາທີສຸປິ ເອວມຕ຺ໂຖ ເວທິຕພ຺ໂພ’’ຕິ ວທນ຺ຕິ. ປຸຄ຺ຄໂລ ນ ຈິຕ຺ຕໍ ອເປກ຺ຂິຕ຺ວາວ ຄຫິໂຕຕິ ອິທໍ ຈິຕ຺ຕສ຺ສ ອນຘິກຕຕ຺ຕາ ວຸຕ຺ຕໍ. ຍຕ຺ຖ ປນ ສມຸທຍສຈ຺ຈສ຺ສ ອຸປ຺ປາທນິຈ຺ຉໂຍ, ຕຕ຺ເຖວ ຕສ຺ສ ອນຸປ຺ປາທນິຈ຺ຉເຍນປິ ຠວິຕພ຺ພໍ ຈິຕ຺ເຕນ ຈ ວິນາ ປຸຄ຺ຄລສ຺ເສວ ອນຸປລພ຺ຠນໂຕຕິ ‘‘ຍສ຺ສ ສມຸທຍສຈ຺ຈໍ ນຸປ຺ປຊ຺ຊຕີ’’ຕິ ເອຕ຺ຖ ສມຸທຍສຈ຺ຈາຘາຣໍ ຈິຕ຺ຕໍ ອຕ຺ຖໂຕ ຄຫິຕເມວາຕິ ສກ຺ກາ ວິຎ຺ຎາຕຸໍ. ອປິຈ ອິນ຺ທ຺ຣິຍພທ຺ເຘປິ ນ ສພ຺ໂພ ຣູປຸປ຺ປາໂທ ເອກນ຺ເຕນ ຈິຕ຺ຕຸປ຺ປາທາຘີໂນຕິ ສກ຺ກາ ວຕ຺ຕຸໍ ຈິຕ຺ຕຸປ຺ປຕ຺ຕິຍາ ວິນາປິ ຕຕ຺ຖ ຣູປຸປ຺ປຕ຺ຕິທສ຺ສນໂຕ, ຕສ຺ມາ ຈິຕ຺ຕຊຣູປເມວ ຈິຕ຺ຕສ຺ສ ອຸປ຺ປາທກ຺ຂເຓ ອຸປ຺ປຊ຺ຊຕິ, ນ ອິຕຣໍ, ອິຕຣໍ ປນ ຕສ຺ສ ຕີສຸປິ ຂເຓສຸ ອຸປ຺ປຊ຺ຊຕີຕິ ນິຏ຺ຐເມຕ຺ຖ ຄນ຺ຕພ຺ພໍ. ວິຠຊິຕພ຺ພາ ອວິຠຕ຺ຕາ ນາມ ນຕ຺ຖີຕິ ສິຍາຍໍ ປສງ຺ໂຄ ປຐມວາເຣ, ທຸຕິຍວາເຣ ປນ ວິຠຊນາ ເອວ ສາຕິ ນາຍໍ ປສງ຺ໂຄ ລພ຺ຠຕິ, ປຐມວາເຣປິ ວາ ນາຍໍ ປສງ຺ໂຄ. ກສ຺ມາ? ເອສາ ຫິ ຍມກສ຺ສ ປກຕິ, ຍທິທໍ ຍຖາລາຠວເສນ ໂຍຊນາ.

ທຸຕິເຍ ຈິຕ຺ເຕ ວຕ຺ຕມາເນຕິ ເອຕ຺ຖ ‘‘ປຐມໍ ຠວງ຺ຄໍ, ທຸຕິຍໍ ຈິຕ຺ຕ’’ນ຺ຕິ ວທນ຺ຕິ. ຠວນິກນ຺ຕິຍາ ອາວຊ຺ຊນມ຺ປິ ວິປາກປ຺ປວຕ຺ຕິໂຕ ວິສທິສຕ຺ຕາ ‘‘ທຸຕິຍ’’ນ຺ຕິ ວຕ຺ຕຸໍ ສກ຺ກາ, ຕໂຕ ປຏ຺ຐາຍ ປຸພ຺ເພ ຕສ຺ສ ຕຕ຺ຖ ສມຸທຍສຈ຺ຈໍ ນຸປ຺ປຊ຺ຊິຕ຺ຖາຕິ ວຕ຺ຕພ຺ພາຕິ ອປເຣ. ຠວນິກນ຺ຕິຍາ ປນ ສຫຊາຕໍ ປຐມໍ ຈິຕ຺ຕໍ ອິຘ ທຸຕິຍໍ ຈິຕ຺ຕນ຺ຕິ ອຘິປ຺ເປຕໍ. ຕໂຕ ປຸພ຺ເພ ປວຕ຺ຕໍ ສພ຺ພໍ ອພ຺ຍາກຕຠາເວນ ສມານຊາຕິກຕ຺ຕາ ເອກນ຺ຕິ ກຕ຺ວາ ຕໂຕ ປຏ຺ຐາຍ ເຫຏ຺ຐາ ຕສ຺ສ ຕຕ຺ຖ ສມຸທຍສຈ຺ຈໍ ນຸປ຺ປຊ຺ຊິຕ຺ເຖວາຕິ. ເຕນາຫ ‘‘ສພ຺ພນ຺ຕິເມນ ປຣິຈ຺ເຉເທນາ’’ຕິອາທິ. ຕສ຺ມິນ຺ຕິ ທຸຕິເຍ ຈິຕ຺ເຕ. ເຕນ ສມານຄຕິກຕ຺ຕາຕິ ເຕນ ຍຖາວຸຕ຺ຕທຸຕິຍຈິຕ຺ເຕນ ຈ ຕໍສມງ຺ຄິໂນ ວາ ທຸກ຺ຂສຈ຺ຈໍ ອຸປ຺ປຊ຺ຊິຕ຺ຖ, ໂນ ຈ ສມຸທຍສຈ຺ຈນ຺ຕິ ວຕ຺ຕພ຺ພຠາເວນ ສມານຄຕິກຕ຺ຕາ. ເອວຎ຺ຈ ກຕ຺ວາຕິ ເຕນ ສມານຄຕິກຕາຍ ທສ຺ສິຕຕ຺ຕາ ເອວ. ຍຖາວຸຕ຺ຕາຕິ ທຸຕິຍາກຸສລຈິຕ຺ຕໂຕ ປຸຣິມສພ຺ພຈິຕ຺ຕສມງ຺ຄິໂນ ອຄ຺ຄຫິຕາ ໂຫນ຺ຕິ ອິຕຣຠາວາຠາວໂຕ. ວຸຕ຺ຕເມວຕ຺ຖໍ ປາຐນ຺ຕເຣນ ສມຕ຺ເຖຕຸໍ ‘‘ຍຖາ’’ຕິອາທິ ວຸຕ຺ຕໍ. ເຕຕິ ຈຕຸໂວກາຣາ. ວຊ຺ເຊຕພ຺ພາຕິ ‘‘ອິຕເຣສ’’ນ຺ຕິ ວິເສສເນນ ນິວຕ຺ເຕຕພ຺ພາ. ປຎ຺ຈໂວກາຣາ ວິຍ ຍຖາວຸຕ຺ຕາ ສຸທ຺ຘາວາສາຕິ ທຸຕິຍຈິຕ຺ຕກ຺ຂຓສມງ຺ຄິຠາເວນ ວຸຕ຺ຕປ຺ປກາຣາ ຍຖາ ສຸທ຺ຘາວາສສງ຺ຂາຕາ ປຎ຺ຈໂວກາຣາ ປຸພ຺ເພ ວຸຕ຺ຕາ ສນ຺ຕິ, ເອວໍ ຈຕຸໂວກາຣາ ປຸພ຺ເພ ວຸຕ຺ຕາ ນ ຫິ ສນ຺ຕີຕິ ໂຍຊນາ.

‘‘ຍສ຺ສ ຍຕ຺ຖາ’’ຕິ ປຸຄ຺ຄໂລກາສາ ອາເຘຍ຺ຍາຘາຣຠາເວນ ອເປກ຺ຂິຕາຕິ ອາຫ ‘‘ປຸຄ຺ຄໂລກາສາ ອຎ຺ຎມຎ຺ຎປຣິຈ຺ຉິນ຺ນາ ຄຫິຕາ’’ຕິ. ກາມາວຈເຣ…ເປ… ອຸປປນ຺ນາຕິ ເອຕ຺ຖ ກາມາວຈເຣ ອຠິສເມຕາວິໂນ ຣູປາວຈຣໍ ອຸປປນ຺ນາ, ຣູປາວຈເຣ ອຠິສເມຕາວິໂນ ອຣູປາວຈຣໍ ອຸປປນ຺ນາ, ວາ-ສທ຺ເທນ ກາມາວຈເຣ ອຠິສເມຕາວິໂນ ອຣູປາວຈຣໍ ອຸປປນ຺ນາຕິ ຈ ໂຍເຊຕພ຺ພໍ. ຕຕ຺ຖາຕິ ອຸປປນ຺ໂນກາເສ. ອຠິສມໂຍຕິ ອຸປຣິມຄ຺ຄາຠິສມໂຍ ຍາວ ອຸປປນ຺ໂນ ນ ຠວິສ຺ສຕິ, ຕາວ ເຕ ຕຕ຺ຖ ອຸປປນ຺ນປຸຄ຺ຄລາ ເອຕ຺ຖ ເອຕສ຺ມິໍ ‘‘ອຠິສເມຕາວີນ’’ນ຺ຕິອາທິນາ ວຸຕ຺ເຕ ທຸຕິຍໂກຏ຺ຐາເສ ນ ຄຍ຺ຫນ຺ຕິ ປຸຄ຺ຄໂລກາສານໍ ອຎ຺ຎມຎ຺ຎໍ ປຣິຈ຺ຉິນ຺ນຕ຺ຕາ. ຍທິ ເອວໍ ກິໍ ເຕ ອິມສ຺ມິໍ ຍມເກ ອສງ຺ຄຫິຕາຕິ ອາຫ ‘‘ເຕ ປນາ’’ຕິອາທິ. ຕຕ຺ຖ ຍໍ ວຸຕ຺ຕໍ ‘‘ສມານຄຕິກາຕິ ວິສຸໍ ນ ທສ຺ສິຕາ’’ຕິ, ຕໍ ປາກຏຕຣໍ ກາຕຸໍ ‘‘ອນຠິສເມຕາວີນ’’ນ຺ຕິອາທິ ວຸຕ຺ຕໍ. ຕສ຺ສຕ຺ໂຖ – ‘‘ອນຠິສເມຕາວີນ’’ນ຺ຕິ ອິມິນາ ປຐມປເທນ ຄຫິຕາ ສພ຺ພຕ຺ຖ ມຄ຺ຄຸປ຺ປຕ຺ຕິຣເຫ ສມ຺ປຕ຺ຕິຠເວ ຕຕ຺ຖ ສຸທ຺ຘາວາເສ ເຍ ອນຠິສເມຕາວິໂນ, ເຕສຸ ທ຺ວິປ຺ປກາເຣສຸ ສຸທ຺ຘາວາສາ ຍສ຺ມິໍ ກາເລ ຕຕ຺ຖ ອນຠິສເມຕາວິໂນຕິ ຄເຫຕພ຺ພາ, ຕຕ຺ຖ ເນສໍ ຕຖາ ຄເຫຕພ຺ພກາລສ຺ສ ວິເສສນຕ຺ຖໍ ‘‘ສຸທ຺ຘາວາສານໍ ທຸຕິເຍ ຈິຕ຺ເຕ ວຕ຺ຕມາເນ’’ຕິ ວຸຕ຺ຕນ຺ຕິ.

ເອເຕນາຕິ ເອເຕນ ວຈເນນ. ໂວທານຈິຕ຺ຕໍ ນາມ ມຄ຺ຄຈິຕ຺ຕານໍ ອນນ຺ຕຣປຈ຺ຈຍຠູຕໍ ຈິຕ຺ຕໍ, ອິຘ ປນ ອຄ຺ຄມຄ຺ຄຈິຕ຺ຕສ຺ສ. ຕໂຕຕິ ຍຖາວຸຕ຺ຕໂວທານຈິຕ຺ຕໂຕ ປຸຣິມຕຣຈິຕ຺ຕສມງ຺ຄິໂນ, ອນຸໂລມຎາຓສມ຺ປຍຸຕ຺ຕຈິຕ຺ຕສມງ຺ຄິໂນ, ອວສິຏ຺ຐວຸຏ຺ຐານຄາມິນິວິປສ຺ສນາຈິຕ຺ຕາທິສມງ຺ຄິໂນປິ. ເຕນາຫ ‘‘ຍາວ ສພ຺ພນ຺ຕິມຕຓ຺ຫາສມ຺ປຍຸຕ຺ຕຈິຕ຺ຕສມງ຺ຄີ, ຕາວ ທສ຺ສິຕາ’’ຕິ.

ປຏິສນ຺ຘິຈຸຕິຈິຕ຺ຕານໍ ຠງ຺ຄຸປ຺ປາທກ຺ຂຓາ ປວຕ຺ເຕ ຈິຕ຺ຕສ຺ສ ຠງ຺ຄຸປ຺ປາທກ຺ຂເຓຫິ ທຸກ຺ຂສຈ຺ຈາທີນໍ ນຸປ຺ປາທາທີສຸ ສມານຄຕິກາຕິ ກຕ຺ວາ ວຸຕ຺ຕໍ ‘‘ປວຕ຺ເຕ ຈິຕ຺ຕສ຺ສາ’’ຕິອາທິ. ຕຕ຺ຖ ຈຸຕິຈິຕ຺ຕສ຺ສປິ ອຸປ຺ປາທກ຺ຂຓສ຺ສ ຄຫຓໍ ທຏ຺ຐພ຺ພນ຺ຕິ ໂຍຊນາ. ທ຺ວີສຸປິ ໂກຏ຺ຐາເສສູຕິ ສມຸທຍສຈ຺ຈສ຺ສ ຠາວິໂນ ນິໂຣຘສ຺ສ ອປ຺ປຏິກ຺ເຂປປຏິກ຺ເຂປວເສນ ປວຕ຺ເຕສຸ ປຸຣິມປຈ຺ຉິມໂກຏ຺ຐາເສສຸ. ນ ວິເສສິຕນ຺ຕິ ຍຖາວຸຕ຺ເຕ ອປ຺ປຏິກ຺ເຂເປ ຈ ສຕິປິ ວິເສເສຕ຺ວາ ນ ວຸຕ຺ຕນ຺ຕິ ອຕ຺ໂຖ. ເອກສ຺ສປິ ປຸຄ຺ຄລສ຺ສ ຕາທິສສ຺ສ ມຄ຺ຄສ຺ສ ຈ ຜລສ຺ສ ຈ ຠງ຺ຄກ຺ຂຓສມງ຺ຄິໂນ ປຸຣິມໂກຏ຺ຐາສສ຺ເສວ ອຠຊນໂຕ ໂກຏ຺ຐາສທ຺ວຍສມ຺ຠວາຠາວໂຕຕິ ອຕ຺ໂຖ. ອິທານິ ຕເມວຕ຺ຖໍ ວິວຣິຕຸໍ ‘‘ຍສ຺ສ ທຸກ຺ຂສຈ຺ຈ’’ນ຺ຕິອາທິ ວຸຕ຺ຕໍ. ເກສຎ຺ຈິ ປຸຄ຺ຄລານໍ. ນິທ຺ຘາຣເຓ ເຈຕໍ ສາມິວຈນໍ. ‘‘ມຄ຺ຄສ຺ສ ຈ ຜລສ຺ສ ຈາ’’ຕິ ວຸຕ຺ຕມຄ຺ຄຜລານິ ທສ຺ເສນ຺ໂຕ ‘‘ຕິຓ຺ຓໍ ຜລານໍ ທ຺ວິນ຺ນຎ຺ຈ ມຄ຺ຄານ’’ນ຺ຕິ ອາຫ. ຕານິ ປນ ເຫຏ຺ຐິມານິ ຕີຓິ ຜລານິ ມຊ຺ເຌ ຈ ທ຺ເວ ມຄ຺ຄາ ເວທິຕພ຺ພາ. ນິຣນ຺ຕຣໍ ອນຸປ຺ປາເທຕ຺ວາຕິ ປຏິປກ຺ຂຘມ຺ເມຫິ ອໂວກິຓ຺ຓໍ ກຕ຺ວາ ສຫ ວິປສ຺ສນາຍ ມຄ຺ຄໍ ອຸປ຺ປາເທນ຺ເຕນ ຍາ ສາຕຈ຺ຈກິຣິຍາ ກາຕພ຺ພາ, ຕໍ ອກຕ຺ວາຕິ ອຕ຺ໂຖ. ເຕນາຫ ‘‘ອນ຺ຕຣນ຺ຕຣາ…ເປ… ອຸປ຺ປາເທຕ຺ວາ’’ຕິ. ‘‘ອຣູເປ ມຄ຺ຄສ຺ສ ຈ ຜລສ຺ສ ຈ ຠງ຺ຄກ຺ຂເຓ’’ຕິ ອວິເສສໂຕ ວຸຕ຺ເຕ ກຖມຍໍ ວິເສໂສ ລພ຺ຠຕີຕິ ອາຫ ‘‘ສາມຎ຺ຎວຈເນນປີ’’ຕິອາທິ. ເຕນ ອປວາທວິສຍປຣິຍາເຍນ ອຸປສຄ຺ຄາ ອຠິນິວິສນ຺ຕີຕິ ໂລກສິທ຺ໂຘຍໍ ຎາໂຍຕິ ທສ຺ເສຕິ.

ປວຕ຺ຕິວາຣວຓ຺ຓນາ ນິຏ຺ຐິຕາ.