໓. ປຣິຎ຺ຎາວາຣວຓ຺ຓນາ

໒໐໖-໒໐໘. ຕສ຺ສາປີຕິ ປຸຄ຺ຄໂລກາສວາຣສ຺ສປິ. ໂອກາເສ ປຸຄ຺ຄລສ຺ເສວາຕິ ຍຖາຄຫິເຕ ໂອກາເສ ໂຍ ປຸຄ຺ຄໂລ, ຕສ຺ເສວ ໂອກາສວິສິຏ຺ຐປຸຄ຺ຄລສ຺ເສວາຕິ ອຕ຺ໂຖ. ຍຖາ ປນ ປຸຄ຺ຄລວາເຣ ລພ຺ຠມາເນ ປຸຄ຺ຄໂລກາສວາໂຣປິ ລພ຺ຠຕິ, ເອວໍ ໂອກາສວາໂຣປິ ລພ຺ເຠຍ຺ຍາຕິ ໂຈທນໍ ສນ຺ຘາຍາຫ ‘‘ໂອກາສວາໂຣປິ ຈາ’’ຕິ. ຕສ຺ມາຕິ ຍສ຺ມາ ວຸຈ຺ຈມາໂນປິ ໂອກາໂສ ປຸຄ຺ຄລສ຺ສ ວິເສສຠາເວເນວ ວຸຈ຺ເຈຍ຺ຍ, ນ ວິສຸໍ, ຕສ຺ມາ.

ອຎ຺ຎຖາຕິ ປວຕ຺ຕິວາເຣ ວິຍ ອາທານນິກ຺ເຂປປຣິຈ຺ຉິນ຺ນໍ ກມ຺ມຊສນ຺ຕານໍ ເອກຕ຺ເຕນ ຄເຫຕ຺ວາ ຕສ຺ສ ອຸປ຺ປາທນິໂຣຘວເສນ ປຣິຎ຺ຎາວຈເນ. ‘‘ໂຍ ຣູປກ຺ຂນ຺ຘໍ ປຣິຊານາຕີ’’ຕິ ສນ຺ນິຏ຺ຐານປທສງ຺ຄຫິຕຕ຺ຖາຠາວທສ຺ສນມຸເຂນ ອິຕຣສ຺ສປິ ອຠາວໍ ທສ຺ເສຕຸໍ ‘‘ຣຸປກ຺ຂນ຺ຘປຣິຊານນສ຺ສ ອຠາວາ’’ຕິ ວຸຕ຺ຕໍ. ‘‘ອາມນ຺ຕາ’’ຕິ ຈ ກຕໍ, ຕສ຺ມາ ປວຕ຺ເຕ ຈິຕ຺ຕກ຺ຂຓວເສເນເວຕ຺ຖ ຕໂຍ ອທ຺ໂຘ ລພ຺ຠນ຺ຕີຕິ ອຕ຺ໂຖ. ‘‘ອຄ຺ຄມຄ຺ຄສມງ຺ຄິຎ຺ຈ ອຣຫນ຺ຕຎ຺ຈາ’’ຕິ ທ຺ວິນ຺ນໍ ປທານໍ ‘‘ຣູປກ຺ຂນ຺ຘຎ຺ຈ ນ ປຣິຊານນ຺ຕິ ເວທນາກ຺ຂນ຺ຘຎ຺ຈ ນ ປຣິຊານິຕ຺ຖາ’’ຕິ ທ຺ວີຫິ ປເທຫິ ຍຖາກ຺ກມໍ ສມ຺ພນ຺ໂຘ. ‘‘ຐເປຕ຺ວາ ອວເສສາ ປຸຄ຺ຄລາ’’ຕິ ປນ ປຈ຺ເຈກໍ ໂຍເຊຕພ຺ພໍ. ອຄ຺ຄມຄ຺ຄ…ເປ… ນຕ຺ຖີຕິ ອິມິນາ ອຣຫຕ຺ຕມຄ຺ຄຎາຓສ຺ເສວ ປຣິຎ຺ຎາມຕ຺ຖກປ຺ປຕ຺ຕິຍາ ປຣິຎ຺ຎາກິຈ຺ຈໍ ສາຕິສຍໍ, ຕທຠາວາ ນ ອິຕເຣສນ຺ຕິ ທສ຺ເສຕິ. ຍໂຕ ຕສ຺ເສວ ວຊິຣູປມຕາ ວຸຕ຺ຕາ, ເສສານຎ຺ຈ ວິຊ຺ຊູປມຕາ. ເຕນາຕິ ເຕນ ຍຖາວຸຕ຺ເຕນ ວຈເນນ. ຕທວເສສສພ຺ພປຸຄ຺ຄເລຕິ ຕໂຕ ອຄ຺ຄມຄ຺ຄສມງ຺ຄິໂຕ ອວເສສສພ຺ພປຸຄ຺ຄເລ. ອິມໍ ປນ ຍຖາວຸຕ຺ຕໂທສໍ ປຣິຫຣນ຺ຕາ ‘‘ປຸຖຸຊ຺ຊນາທໂຍ ສນ຺ຘາຍາ’’ຕິ ວທນ຺ຕິ.

ປຣິຎ຺ຎາວາຣວຓ຺ຓນາ ນິຏ຺ຐິຕາ.

ຂນ຺ຘຍມກວຓ຺ຓນາ ນິຏ຺ຐິຕາ.