໒. ອຣິຍນ຺ຕິກຖາວຓ຺ຓນາ

໓໕໗. ສງ຺ຂາເຣ ສນ຺ຘາຍ ປຏິຊານນ຺ຕສ຺ສາຕິ ທິຏ຺ຐິຍາ ປຣິກປ຺ປິເຕນ ສຕ຺ເຕນ ສຸຎ຺ເຎ ສງ຺ຂາເຣ ສນ຺ຘາຍ ‘‘ສຸຎ຺ຎຕຎ຺ຈ ມນສິ ກໂຣຕີ’’ຕິ ປຸຈ຺ຉາຍ ‘‘ອາມນ຺ຕາ’’ຕິ ປຏິຊານນ຺ຕສ຺ສ. ທ຺ວິນ຺ນໍ ຜສ຺ສານໍ ສໂມຘານໍ ກຖໍ ອາປຊ຺ຊຕິ ຐານາຐານຠູເຕ ສງ຺ຂາເຣ ວຸຕ຺ຕນເຍນ ສຸຎ຺ຎຕໍ ມນສິ ກໂຣນ຺ຕສ຺ສາຕິ ອຘິປ຺ປາໂຍ. ຍຖາວຸຕ຺ຕນເຍນາຕິ ‘‘ທິຏ຺ຐິຍາ ປຣິກປ຺ປິເຕນ ສຕ຺ເຕນ ສຸຎ຺ຎາ ປຎ຺ຈກ຺ຂນ຺ຘາ’’ຕິ ປກາເຣນ ນເຍນ. ອຖ ວາ ຍຖາວຸຕ຺ຕນເຍນາຕິ ‘‘ຐານາຐານມນສິກາໂຣ ສງ຺ຂາຣາຣມ຺ມໂຓ, ສຸຎ຺ຎຕາມນສິກາໂຣ ນິພ຺ພານາຣມ຺ມໂຓ’’ຕິ ເອວໍ ວຸຕ຺ຕນເຍນ. ‘‘ສງ຺ຂາເຣ ສນ຺ຘາຍ ປຏິຊານນ຺ຕສ຺ສາ’’ຕິ ວຸຕ຺ຕຕ຺ຕາ ‘‘ທ຺ວິນ຺ນໍ ຜສ຺ສານໍ ສໂມຘານໍ ກຖໍ ອາປຊ຺ຊຕີ’’ຕິ ອາຫ. ສຕ຺ຕສຸຎ຺ຎຕາຍ ສຸຎ຺ຎຕ຺ເຕປິ ສງ຺ຂາຣານໍ ອຎ຺ໂຎວ ຐານາຐານມນສິກາໂຣ, ອຎ຺ໂຎ ສຸຎ຺ຎຕາມນສິກາໂຣຕິ ຍຸຊ຺ຊເຕວ ທ຺ວິນ຺ນໍ ຜສ຺ສານໍ ສໂມຘານາປຕ຺ຕິໂຈທນາ, ສງ຺ຂາເຣ ສນ຺ຘາຍ ປຏິຊານນ຺ຕສ຺ສ ປນ ກຖໍ ອຣິຍຠາວສິທ຺ຘິ ຐານາຐານຎາຓາທີນນ຺ຕິ ວິຈາເຣຕພ຺ພໍ. ກິໍ ວາ ເອຕາຍ ຍຸຕ຺ຕິຈິນ຺ຕາຍ. ອຸມ຺ມຕ຺ຕກປຈ຺ຉິສທິໂສ ຫິ ປຣວາທິວາໂທ. ອຎ຺ເຎສຸປິ ຐາເນສຸ ອີທິເສສຸ ເອເສວ ນໂຍ. ອາໂຣເປຕ຺ວາຕິ ອິຕ຺ຖິປຸຣິສາທິອາກາຣໍ, ສຕ຺ຕາກາຣເມວ ວາ ອສນ຺ຕໍ ຣູປາທິອຸປາທາເນ ອາໂຣເປຕ຺ວາ. ອຠູຕາໂຣປນຎ຺ເຫຕ຺ຖ ປຓິທຫນນ຺ຕິ ອຘິປ຺ເປຕໍ. ເຕນາຫ ‘‘ປຣິກປ຺ປນວເສນາ’’ຕິ. ໂສຕິ ຍຖາວຸຕ຺ໂຕ ປຓິຘິ. ເອກສ຺ມິມ຺ປິ ຂນ຺ເຘ.

ອຣິຍນ຺ຕິກຖາວຓ຺ຓນາ ນິຏ຺ຐິຕາ.