໗. ຈິຕ຺ຕຏ຺ຐິຕິກຖາວຓ຺ຓນາ

໓໓໕. ເອວນ຺ຕິ ‘‘ເອກຈິຕ຺ຕໍ ຍາວຕາຍຸກໍ ຕິຏ຺ຐຕີ’’ຕິ ວຸຕ຺ຕາກາເຣນ. ອຎ຺ຎຕ຺ຖາຕິ ອຣູປຠວໂຕ ອຎ຺ຎສ຺ມິໍ. ເອເຕນາຕິ ‘‘ເອກເມວ ຈິຕ຺ຕໍ ອາຣຸປ຺ເປ ຕິຏ຺ຐຕິ, ຍາວຕາຍຸກໍ ຕິຏ຺ຐຕີ’’ຕິ ເອວໍວາທິນາ ທຸຕິຍາປິ ອຑ຺ຒກຖາ ປສ຺ສິຕພ຺ພາ ປຐມກຖາຍ ຈິຣກາລາວຏ຺ຐານວຈນສ຺ສ ອຎ຺ຎທຕ຺ຖຸ ຠາວວິຠາວນໂຕຕິ ອຘິປ຺ປາໂຍ. ປຸຣິມາຍາຕິ ‘‘ຍາວຕາຍຸກໍ ຕິຏ຺ຐຕີ’’ຕິ ປຎ຺ຫໂຕ ປຸຣິມາຍ. ຕຕ຺ຖ ຫິ ‘‘ວສ຺ສສຕໍ ຕິຏ຺ຐຕີ’’ຕິ ປຸຈ຺ຉາຍ ‘‘ອາມນ຺ຕາ’’ຕິ ອນຸຎ຺ຎາ ກຕາ, ປຈ຺ຉິມາຍໍ ປນ ‘‘ມນຸສ຺ສານໍ ເອກໍ ຈິຕ຺ຕໍ ຍາວຕາຍຸກໍ ຕິຏ຺ຐຕີ’’ຕິ ‘‘ນ ເຫວໍ ວຕ຺ຕພ຺ເພ’’ຕິ ປຏິກ຺ເຂໂປ ກໂຕ. ອວິໂຣໂຘ ວິຠາເວຕພ຺ໂພ, ຍໂຕ ຕຕ຺ເຖວ ອນຸຎ຺ຎາ ກຕາ, ນ ປຈ຺ຉາຕິ ອຘິປ຺ປາໂຍ. ວສ຺ສສຕາທີຕິ ຈ ອາທິ-ສທ຺ເທນ ນ ເກວລໍ ‘‘ທ຺ເວ ວສ຺ສສຕານີ’’ຕິ ເອວມາທິເຍວ ສງ຺ຄຫິຕໍ, ອຖ ໂຂ ‘‘ເອກໍ ຈິຕ຺ຕໍ ທິວສໍ ຕິຏ຺ຐຕີ’’ຕິ ເອວມາທິປີຕິ ທຏ຺ຐພ຺ພໍ. ‘‘ມຸຫຸຕ຺ຕໍ ມຸຫຸຕ຺ຕໍ ອຸປ຺ປຊ຺ຊຕີຕິ ປຎ຺ໂຫ ສກວາທິນາ ປຸຈ຺ຉິໂຕ ວິຍ ວຸຕ຺ໂຕ’’ຕິ ອິທໍ ວິຈາເຣຕພ຺ພໍ. ‘‘ມຸຫຸຕ຺ຕໍ ມຸຫຸຕ຺ຕໍ ອຸປ຺ປຊ຺ຊຕີ’’ຕິ ປຎ຺ໂຫ ປຣວາທິສ຺ສ. ‘‘ອຸປ຺ປາທວຍຘມ຺ມິໂນ’’ຕິອາທິສຸຕ຺ຕຕ຺ຖວເສນ ປຏິຎ຺ຎາ ສກວາທິສ຺ສາຕິ ຫິ ວຸຕ຺ຕໍ.

ຈິຕ຺ຕຏ຺ຐິຕິກຖາວຓ຺ຓນາ ນິຏ຺ຐິຕາ.