໕. ວຈີເຠທກຖາວຓ຺ຓນາ

໓໒໖. ໂສຕິ ປຐມມຄ຺ຄຏ຺ໂຐ. ຕສ຺ມາຕິ ຍສ຺ມາ ‘‘ວິຣຊໍ ວີຕມລໍ ຘມ຺ມຈກ຺ຂຸໍ ອຸທປາທິ ‘ຍໍ ກິຎ຺ຈິ ສມຸທຍຘມ຺ມໍ, ສພ຺ພໍ ຕໍ ນິໂຣຘຘມ຺ມ’’’ນ຺ຕິ ສຸຕ຺ຕສ຺ສ ອຕ຺ຖໍ ອຎ຺ຎຖາ ຄເຫຕ຺ວາ ອຸທຍພ຺ພຍານຸປສ຺ສນານິສ຺ສນ຺ເທນ ມຄ຺ຄກ຺ຂເຓປິ ທຸກ຺ຂນ຺ຕິ ວິປສ຺ສນາ ອຸປຏ຺ຐາຕິ, ຕສ຺ມາ ‘‘ໂສ ທຸກ຺ຂມິຈ຺ເຈວ ວາຈໍ ຠາສຕີ’’ຕິ ວທນ຺ຕິ.

໓໒໘. ອິຈ຺ຉິເຕຕິ ປຣວາທິນາ ສມ຺ປຏິຈ຺ຉິເຕ. ອາໂຣປິເຕຕິ ຍຸຕ຺ຕິນິທ຺ຘາຣເຓນ ຕສ຺ມິໍ ອຕ຺ເຖ ປຕິຏ຺ຐາປິເຕ ຍຸຊ຺ຊຕິ, ວຈີສມຸຏ຺ຐາປນກ຺ຂຓໂຕ ປນ ປຈ຺ຉາ ຕໍ ສທ຺ທໍ ສຸຓາຕີຕິ ອິຈ຺ຉິເຕ ນ ຍຸຊ຺ຊຕິ ໂສຕວິຎ຺ຎາຓສ຺ສ ປຈ຺ຈຸປ຺ປນ຺ນາຣມ຺ມຓຕ຺ຕາຕິ ອຘິປ຺ປາໂຍ. ຍສ຺ມາ ປນ ອຕ຺ຕນາ ນິຈ຺ຉາຣິຕໍ ສທ຺ທໍ ອຕ຺ຕນາປິ ສຸຓາຕິ, ຕສ຺ມາ ໂສຕວິຎ຺ຎາຓໍ ‘‘ເຍນ ຕໍ ສທ຺ທໍ ສຸຓາຕີ’’ຕິ ອຏ຺ຐກຖາຍໍ ວຸຕ຺ຕນ຺ຕິ ທຏ຺ຐພ຺ພໍ.

໓໓໒. ໂລກຸຕ຺ຕຣມຄ຺ຄກ຺ຂເຓຕິ ປຐມຊ຺ຌານິກສ຺ສ ປຐມມຄ຺ຄສ຺ສ ຂເຓ. ອຠິຠູສຸຕ຺ຕາຫຣເຓ ອຘິປ຺ປາໂຍ ວຕ຺ຕພ຺ໂພຕິ ເອເຕນ ຕທາຫຣຓສ຺ສ ອສມ຺ພນ຺ຘຕໍ ທສ຺ເສຕິ. ເຕນາຫ ‘‘ຕສ຺ມາ ອສາຘກ’’ນ຺ຕິ.

ວຈີເຠທກຖາວຓ຺ຓນາ ນິຏ຺ຐິຕາ.