໘. ສຕິປຏ຺ຐານກຖາວຓ຺ຓນາ

໓໐໑. ປຣມຕ຺ຖສຕິປຏ຺ຐານຕ຺ຕາຕິ ເອເຕນ ໂລກຸຕ຺ຕຣາຍ ເອວ ສມ຺ມາສຕິຍາ ຕຕ຺ຖາປິ ມຄ຺ຄຠູຕາຍ ນິປ຺ປຣິຍາເຍນ ສຕິປຏ຺ຐານຠາໂວ ນິຍ຺ຍານິກຕ຺ຕາ ອິຕຣາຍ ປຣິຍາເຍນາຕິ ທສ຺ເສຕິ. ມຄ຺ຄຜລສມ຺ມາສຕິຍາ ຘມ຺ມານຸສ຺ສຕິຠາວປຣິຍາໂຍ ອຕ຺ຖີຕິ ‘‘ໂລກິຍໂລກຸຕ຺ຕຣສຕິປຏ຺ຐານສມຸທາຍຠູຕສ຺ສາ’’ຕິ ວຸຕ຺ຕໍ. ສຕິສມຸທາຍຠູຕສ຺ສ ນ ສຕິໂຄຈຣຠູຕສ຺ສາຕິ ອຘິປ຺ປາໂຍ. ສຕິໂຄຈຣສ຺ສ ຫິ ສຕິປຏ຺ຐານຕໍ ໂຈເທຕຸໍ ປາຬິຍໍ ‘‘ຈກ຺ຂາຍຕນໍ ສຕິປຏ຺ຐານ’’ນ຺ຕິ ອາຣທ຺ຘໍ. ເຕນ ວຸຕ຺ຕໍ ‘‘ສພ຺ພຘມ຺ມານໍ ປເຠທປຸຈ຺ຉາວເສນ ວຸຕ຺ຕ’’ນ຺ຕິ. ສຸຕ຺ຕສາຘນາຍໍ ປນ ປຐມໍ ໂລກິຍສຕິປຏ຺ຐານວເສນ, ທຸຕິຍໍ ມິສ຺ສກວເສນ, ຕຕິຍໍ ໂລກຸຕ຺ຕຣວເສນ ທສ຺ສິຕນ຺ຕິ ເວທິຕພ຺ພໍ.

ສຕິປຏ຺ຐານກຖາວຓ຺ຓນາ ນິຏ຺ຐິຕາ.