໙. ເຫວຕ຺ຖິກຖາວຓ຺ຓນາ

໓໐໔. ເຫວຕ຺ຖິກຖາຍໍ ‘‘ສພ຺ໂພ ຘມ຺ໂມ ສກຠາເວນ ອຕ຺ຖິ ປຣຠາເວນ ນຕ຺ຖີ’’ຕິ ປວຕ຺ໂຕ ປຣວາທີວາໂທ ຍຖາ ວິຠຊ຺ຊ ປຏິປຸຈ຺ຉາ ວາ ນ ພ຺ຍາກາຕພ຺ໂພ, ເອວໍ ເອກໍສໂຕ ນ ພ຺ຍາກາຕພ຺ໂພ ວິເສສາຠາວໂຕ, ເກວລໍ ຐປນີຍປກ຺ເຂ ຕິຏ຺ຐຕີຕິ ອຘິປ຺ປາເຍນາຫ ‘‘ອວຕ຺ຕພ຺ພຸຕ຺ຕເຣນາ’’ຕິ. ຍຖາ ຫິ ສພ຺ເພ ວາທາ ສປ຺ປຏິວາທາວາຕິ ປຏິຎ຺ຎາ ຠູຕກຖນຕ຺ຕາ ອວຕ຺ຕພ຺ພຸຕ຺ຕຣາ ອຸເປກ຺ຂິຕພ຺ພາ, ເອວມຍມ຺ປີຕິ ເວທິຕພ຺ພໍ. ເຕນາຫ ‘‘ອຸເປກ຺ຂິຕພ຺ເພນາ’’ຕິ. ອຖ ວາ ອວຕ຺ຕພ຺ພໍ ອຸຕ຺ຕຣໍ ອວຕ຺ຕພ຺ພຸຕ຺ຕຣໍ. ຍຖາ ອນິຈ຺ຈວາທິນໍ ປຕິ ອນິຈ຺ໂຈ ສທ຺ໂທ ປຈ຺ຈຍາຘີນວຸຕ຺ຕິໂຕຕິ, ອຸຕ຺ຕຣໍ ນ ວຕ຺ຕພ຺ພໍ ສິທ຺ຘສາຘນຠາວໂຕ, ເອວໍ ອິຘາປິ ທຏ຺ຐພ຺ພໍ. ສິທ຺ຘສາຘນຎ຺ຫິ ທຑ຺ຒສ຺ສ ຑຫນສທິສຕ຺ຕາ ນິຣຕ຺ຖກເມວ ສິຍາ, ອຏ຺ຐກຖາຍໍ ປນ ຍສ຺ມາ ປຣວາທິນາ ເຍນ ສຠາເວນ ໂຍ ຘມ຺ໂມ ອຕ຺ຖິ, ເຕເນວ ສຠາເວນ ໂສ ວິນາ ກາລເຠທາທິປຣາມສເນນ ນຕ຺ຖີຕິ ປຕິຏ຺ຐາປີຍຕິ, ຕສ຺ມາ ‘‘ອໂຍນິໂສ ປຕິຏ຺ຐາປິຕຕ຺ຕາ’’ຕິ ວຸຕ຺ຕໍ.

ເອຕ຺ຖ ຈ ‘‘ເຫວຕ຺ຖິ, ເຫວໍ ນຕ຺ຖີ’’ຕິ ປຏິຊານນ຺ເຕນ ປຣວາທິນາ ຍຖາ ສປຣຠາເວຫິ ຣູປາທີນໍ ອຕ຺ຖິຕາ ປຏິຎ຺ຎາຕາ, ເອວໍ ກາລເທສາທິເຠເທຫິປິ ສາ ປຏິຎ຺ຎາຕາ ເອວ. ເຕເນວາຫ ‘‘ອຕີຕໍ ອນາຄຕປຈ຺ຈຸປ຺ປນ຺ນວເສນ, ອນາຄຕປຈ຺ຈຸປ຺ປນ຺ນານິ ວາ ອຕີຕາທິວເສນ ນຕ຺ຖີ’’ຕິ. ເອວໍ ສຕິ ນິຄຓ຺ຐາເຈລກວາໂທ ປຣິທີປິໂຕ ສິຍາ. ເຕ ຫິ ‘‘ສິຍາ ອຕ຺ຖິ, ສິຍາ ນຕ຺ຖິ, ສິຍາ ອຕ຺ຖິ ຈ ນຕ຺ຖິ ຈາ’’ຕິອາທິນາ ສພ຺ພປທຕ຺ເຖສຸ ປຕ຺ຕຠາເຄ ປຏິຊານນ຺ຕິ. ຕຕ຺ຖ ຍທິ ວຕ຺ຖຸໂນ ສຠາເວເນວ, ເທສກາລສນ຺ຕານວເສນ ວາ ນຕ຺ຖິຕາ ອຘິປ຺ເປຕາ, ຕໍ ສິທ຺ຘສາຘນໍ ສກວາທິໂນປິ ອິຈ຺ຉິຕຕ຺ຕາ. ຍສ຺ສ ຫິ ຘມ຺ມສ຺ສ ໂຍ ສຠາໂວ, ນ ໂສ ຕໂຕ ອຎ຺ຎຖາ ອຸປລພ຺ຠຕິ. ຍທິ ອຸປລພ຺ເຠຍ຺ຍ, ອຎ຺ໂຎ ເອວ ໂສ ສິຍາ. ນ ເຈຕ຺ຖ ສາມຎ຺ຎລກ຺ຂຓໍ ນິທສ຺ເສຕພ຺ພໍ ສລກ຺ຂຓສ຺ສ ອຘິປ຺ເປຕຕ຺ຕາ ຕສ຺ສ ນຕ຺ຖິຠາວສ຺ສ ອຠາວໂຕ. ຍຖາ ຈ ປຣຠາເວນ ນຕ຺ຖິຕາຍ ນ ວິວາໂທ, ເອວໍ ເທສກາລນ຺ຕເຣສຸປິ ອິຕ຺ຕຣກາລຕ຺ຕາ ສງ຺ຂາຣານໍ. ນ ຫິ ສງ຺ຂາຣາ ເທສນ຺ຕຣໍ, ກາລນ຺ຕຣໍ ວາ ສງ຺ກມນ຺ຕິ ຂຓິກຠາວໂຕ. ເອເຕເນວ ປຣິຍາຍນ຺ຕເຣນ ນຕ຺ຖິຕາປິ ປຏິກ຺ຂິຕ຺ຕາ ເວທິຕພ຺ພາ. ຍຖາ ຈ ອຕ຺ຖິຕາ, ນຕ຺ຖິຕາ ວິນາ ກາລເຠເທນ ເອກສ຺ມິໍ ຘມ຺ເມ ປຕິຏ຺ຐໍ ນ ລຠນ຺ຕິ ອຎ຺ຎມຎ຺ຎວິຣຸທ຺ຘຕ຺ຕາ, ເອວໍ ສພ຺ພທາປິ ນິຈ຺ຈຕ຺ຕາ.

ຍໍ ປນ ເຕ ວທນ຺ຕິ ‘‘ຍຖາ ສຸວຓ຺ຓໍ ກຏກາທິຣູເປນ ຐິຕໍ ຣຸຈກາທິຠາວໍ ອາປຊ຺ຊຕີຕິ ນິຈ຺ຈານິຈ຺ຈໍ. ຕຎ຺ຫິ ສຸວຓ຺ຓຠາວາວິຊຫນໂຕ ນິຈ຺ຈໍ ກຏກາທິຠາວຫານິໂຕ ອນິຈ຺ຈໍ, ເອວໍ ສພ຺ພຘມ຺ມາ’’ຕິ. ເຕ ອິທໍ ວຕ຺ຕພ຺ພາ ‘‘ກິໍ ກຏກຠາໂວ ກຏກສ຺ສ, ອຸທາຫຸ ສຸວຓ຺ຓສ຺ສາ’’ຕິ. ຍທິ ກຏກສ຺ສ, ສຸວຓ຺ຓນິຣເປກ຺ໂຂ ສິຍາ ຕທຎ຺ຎຠາໂວ ວິຍ. ອຖ ສຸວຓ຺ຓສ຺ສ, ນິຈ຺ຈກາລໍ ຕຕ຺ຖ ອຸປລພ຺ເຠຍ຺ຍ ສຸວຓ຺ຓຠາໂວ ວິຍ. ນ ຈ ສກ຺ກາ ອຸຠິນ຺ນໍ ເອກຠາໂວຕິ ວຕ຺ຕຸໍ ກຏກວິນາເສປິ ສຸວຓ຺ຓາວິນາສໂຕ. ອຖ ມຕໍ, ສຸວຓ຺ຓກຏກາທີນໍ ປຣິຍາຍີປຣິຍາຍຠາວໂຕ ນາຍໍ ໂທໂສຕິ. ຍຖາ ຫິ ກຏກປຣິຍາຍນິໂຣເຘນ ຣຸຈກປຣິຍາຍຸປ຺ປາເທປິ ປຣິຍາຍີ ຕເຖວ ຕິຏ຺ຐຕິ, ເອວໍ ມນຸສ຺ສປຣິຍາຍນິໂຣເຘ ເທວປຣິຍາຍຸປ຺ປາເທປິ ປຣິຍາຍີ ຊີວທ຺ຣພ຺ຍໍ ຕິຏ຺ຐຕີຕິ ນິຈ຺ຈານິຈ຺ຈໍ, ຕຖາ ສພ຺ພທ຺ຣພ຺ຍານີຕິ. ຕຍິທໍ ອມ຺ພໍ ປຸຏ຺ຐສ຺ສ ລພຸຊພ຺ຍາກຣຓໍ. ຍໍ ສ຺ເວວ ນິຈ຺ໂຈ ອນິຈ຺ໂຈຕິ ວາ ວທນ຺ໂຕ ອຎ຺ຎຕ຺ຖ ນິຈ຺ຈຕໍ ອຎ຺ຎຕ຺ຖ ອນິຈ຺ຈຕໍ ປຏິຊານາຕິ, ອຖ ປຣິຍາຍປຣິຍາຍີນໍ ອນຎ຺ຎຕາ ອິຈ຺ຉິຕາ, ເອວໍ ສຕິ ປຣິຍາໂຍປິ ນິຈ຺ໂຈ ສິຍາ ປຣິຍາຍິໂນ ອນຎ຺ຎຕ຺ຕາ ປຣິຍາຍສຣູປໍ ວິຍ, ປຣິຍາຍີ ວາ ອນິຈ຺ໂຈ ປຣິຍາຍໂຕ ອນຎ຺ຎຕ຺ຕາ ປຣິຍາຍສຣູປໍ ວິຍາຕິ. ອຖ ເນສໍ ອຎ຺ຎາ ອນຎ຺ຎຕາ, ເອວຎ຺ຈ ສຕິ ວຸຕ຺ຕໂທສທ຺ວຍານຕິວຕ຺ຕິ. ອປິຈ ໂກຍໍ ປຣິຍາໂຍ ນາມ, ຍທິ ສຓ຺ຐານໍ, ສຸວຓ຺ໂຓ ຕາວ ໂຫຕຸ, ກຖໍ ຊີວທ຺ຣພ຺ເຍ ອຣູປິຠາວໂຕ. ຍທິ ຕສ຺ສປິ ສຓ຺ຐານວນ຺ຕໍ ອິຈ຺ຉິຕໍ, ຕຖາ ສຕິສ຺ສ ເອກສ຺ມິມ຺ປິ ສຕ຺ຕສນ຺ຕາເນ ພຫຸຕາ ອາປຊ຺ຊຕິ ສຣູປຕາ ຈ ສຓ຺ຐານວນ຺ເຕສຸປິ ປີຬກາທີສຸ ຕຖາທສ຺ສນໂຕ. ອຖ ປວຕ຺ຕິວິເສໂສ, ເອວມ຺ປິ ພຫຸຕາ ຂຓິກຕາ ຈ ອາປຊ຺ຊຕິ, ຕສ຺ມາ ປຣິຍາຍສຣູປເມວ ຕາວ ປຕິຏ຺ຐເປຕພ຺ພໍ.

ຍໍ ປນ ວຸຕ຺ຕໍ ‘‘ສຸວຓ຺ຓໍ ກຏກາທິຣູເປນ ຐິຕ’’ນ຺ຕິ, ຕຕ຺ຖ ສມ຺ປຕ຺ຕິໂຍຄໂຕ ວິຎ຺ຎາຍມາເນສຸ ວິສິຏ຺ເຐສຸ ຣູປຄນ຺ຘຣສໂຜຏ຺ຐພ຺ເພສຸ ກິໍ ເອກໍ, ອຸທາຫຸ ເຕສໍ ສມຸທາໂຍ, ຕພ຺ພິນິມຸຕ຺ຕໍ ວາ ຘມ຺ມນ຺ຕຣໍ ສຸວຓ຺ຓນ຺ຕິ? ຕຕ຺ຖ ນ ຕາວ ຣູປາທີສຸ ເອເກກໍ ສຸວຓ຺ຓໍ ເຕນ ສຸວຓ຺ຓກິຈ຺ຈາສິທ຺ຘິໂຕ, ນາປິ ຕພ຺ພິນິມຸຕ຺ຕໍ ຘມ຺ມນ຺ຕຣໍ ຕາທິສສ຺ສ ອຠາວໂຕ. ອຖ ສມຸທາໂຍ, ຕໍ ປນ ປຎ຺ຎຕ຺ຕິມຕ຺ຕນ຺ຕິ ນ ຕສ຺ສ ນິຈ຺ຈຕາ, ນາປິ ອນິຈ຺ຈຕາ ສມ຺ຠວຕິ. ຍຖາ ຈ ສຸວຓ຺ຓສ຺ສ, ເອວໍ ກຏກສ຺ສປິ ປຎ຺ຎຕ຺ຕິມຕ຺ຕຕ຺ຕາຕິ. ຕຍິທໍ ນິທສ຺ສນໍ ປຣວາທິໂນ ຊີວທ຺ຣພ຺ຍສ຺ສປິ ປຎ຺ຎຕ຺ຕິມຕ຺ຕໍ ຕສ຺ເສວ ສາເຘຕີຕິ ກຸໂຕ ຕສ຺ສ ນິຈ຺ຈານິຈ຺ຈຕາຕິ ອລມຕິປ຺ປປຎ຺ເຈນ.

ເຫວຕ຺ຖິກຖາວຓ຺ຓນາ ນິຏ຺ຐິຕາ.

ມຫາວຄ຺ຄວຓ຺ຓນາ ນິຏ຺ຐິຕາ.