໑. ວາທຍຸຕ຺ຕິວຓ຺ຓນາ

໒໘໒. ສພ຺ພໍ ອຕ຺ຖີຕິ ເອຕ຺ຖ ຍສ຺ມາ ປຈ຺ຈຸປ຺ປນ຺ນໍ ວິຍ ອຕີຕານາຄຕມ຺ປິ ຘຣມານສຠາວນ຺ຕິ ປຣວາທິໂນ ລທ຺ຘິ, ຕສ຺ມາ ສພ຺ພນ຺ຕິ ກາລວິຠາຄໂຕ ອຕີຕາທິເຠທໍ ສພ຺ພໍ. ໂສ ປນ ‘‘ຍມ຺ປິ ນຕ຺ຖິ, ຕມ຺ປິ ອຕ຺ຖີ’’ຕິ ກາລວິມຸຕ຺ຕສ຺ສ ວເສນ ອນຸໂຍໂຄ, ຕໍ ອຕິປ຺ປສງ຺ຄທສ຺ສນວເສນ ປຣວາທິປຏິຎ຺ຎາຍ ໂທສາໂຣປນໍ. ນຍທສ຺ສນໍ ວາ ອຕີຕານາຄຕານໍ ນຕ຺ຖິຠາວສ຺ສ. ອຕ຺ຖີຕິ ປນ ອຍໍ ອຕ຺ຖິຠາໂວ ຍສ຺ມາ ເທສກາລາກາຣຘມ຺ເມຫິ ວິນາ ນ ໂຫຕິ, ຕສ຺ມາ ຕໍ ຕາວ ເຕຫິ ສທ຺ຘິໍ ໂຍເຊຕ຺ວາ ອນຸໂຍຄໍ ທສ຺ເສຕຸໍ ‘‘ສພ຺ພຕ຺ຖ ສພ຺ພມຕ຺ຖີ’’ຕິອາທິນາ ປາຬິ ປວຕ຺ຕາ. ຕຕ຺ຖ ຍທິປິ ສພ຺ພຕ຺ຖາຕິ ອິທໍ ສາມຎ຺ຎວຈນໍ, ຕໍ ປນ ຍສ຺ມາ ວິເສສນິວິຏ຺ຐໍ ໂຫຕິ, ປຣໂຕ ຈ ສພ຺ເພສູຕິ ຘມ຺ມາ ວິຠາຄໂຕ ວຸຈ຺ຈນ຺ຕິ, ຕສ຺ມາ ໂອຬາຣິກສ຺ສ ປາກຏສ຺ສ ຣູປຘມ຺ມສມຸທາຍສ຺ສ ວເສນ ອຕ຺ຖໍ ທສ຺ເສຕຸໍ ອຏ຺ຐກຖາຍໍ ‘‘ສພ຺ພຕ຺ຖາຕິ ສພ຺ພສ຺ມິໍ ສຣີເຣ’’ຕິ ວຸຕ຺ຕໍ, ນິທສ຺ສນມຕ຺ຕໍ ວາ ເອຕໍ ທຏ຺ຐພ຺ພໍ. ຕຖາ ຈ ກາຓາທກາປິເລຫິ ປຏິຎ຺ຎາຍມານາ ອາກາສກາລາທິສຕ຺ຕປກຕິປຸຣິສາ ວິຍ ປຣວາທິນາ ປຏິຎ຺ຎາຍມານໍ ສພ຺ພໍ ສພ຺ພພ຺ຍາປີຕິ ອາປນ຺ນເມວ ໂຫຕີຕິ. ‘‘ສພ຺ພຕ຺ຖ ສຣີເຣ’’ຕິ ຈ ‘‘ຕິເລ ເຕລ’’ນ຺ຕິ ວິຍ ພ຺ຍາປເນ ຠຸມ຺ມນ຺ຕິ ສຣີຣປຣິຍາປນ຺ເນນ ສພ຺ເພນ ຠວິຕພ຺ພນ຺ຕິ ວຸຕ຺ຕໍ ‘‘ສິຣສິ ປາທາ…ເປ… ອຕ຺ໂຖ’’ຕິ.

ສພ຺ພສ຺ມິໍ ກາເລ ສພ຺ພມຕ຺ຖີຕິ ໂຍຊນາ. ເອຕສ຺ມິໍ ປກ຺ເຂເຍວສ຺ສ ອຎ຺ຎວາໂທ ປຣິທີປິໂຕ ສິຍາ ‘‘ຍໍ ອຕ຺ຖິ, ອຕ຺ເຖວ ຕໍ, ຍໍ ນຕ຺ຖິ, ນຕ຺ເຖວ ຕໍ, ອສໂຕ ນຕ຺ຖິ ສມ຺ຠໂວ, ສໂຕ ນຕ຺ຖິ ວິນາໂສ’’ຕິ. ເອວໍ ສພ຺ເພນາກາເຣນ ສພ຺ພໍ ສພ຺ເພສຸ ຘມ຺ເມສຸ ສພ຺ພໍ ອຕ຺ຖີຕິ ອຕ຺ໂຖຕິ ສມ຺ພນ຺ໂຘ. ອິເມຫິ ປນ ປກ຺ເຂຫິ ‘‘ສພ຺ພໍ ສພ຺ພສຠາວໍ, ອເນກສຕ຺ຕິນິຈິຕາຠາວາ ອສໂຕ ນຕ຺ຖິ ສມ຺ຠໂວ’’ຕິ ວາໂທ ປຣິທີປິໂຕ ສິຍາ. ໂຍຄຣຫິຕນ຺ຕິ ເກນຈິ ຍຸຕ຺ຕາຍຸຕ຺ຕລກ຺ຂຓສໍໂຍຄຣຫິຕໍ. ຕໍ ປນ ເອກສຠາວນ຺ຕິ ສໍໂຍຄຣຫິຕໍ ນາມ ອຕ຺ຖໂຕ ເອກສຠາວໍ, ເອກຘມ຺ໂມຕິ ອຕ຺ໂຖ. ເອເຕນ ເທວວາທີນໍ ພ຺ຣຫ຺ມທສ຺ສນໍ ອຕ຺ເຖວາຕິວາໂທ ປຣິທີປິໂຕ ສິຍາ. ອຕ຺ຖີຕິ ປຸຈ຺ຉຕີຕິ ຍທິ ສພ຺ພມຕ຺ຖີຕິ ຕວ ວາໂທ, ຍຖາວຸຕ຺ຕາຍ ມມ ທິຏ຺ຐິຍາ ສມ຺ມາທິຏ຺ຐິຠາໂວ ອຕ຺ຖີຕິ ເອກນ຺ເຕນ ຕຍາ ສມ຺ປຏິຈ຺ຉິຕພ຺ໂພ, ຕສ຺ມາ ‘‘ກິໍ ໂສ ອຕ຺ຖີ’’ຕິ ປຸຈ຺ຉຕີຕິ ອຕ຺ໂຖ.

ວາທຍຸຕ຺ຕິວຓ຺ຓນາ ນິຏ຺ຐິຕາ.