໑. ນິໂຣຘກຖາວຓ຺ຓນາ

໕໗໑-໕໗໒. ສກສມເຍ ‘‘ປຸຣິມຈິຕ຺ຕສ຺ສ ນິໂຣຘານນ຺ຕຣໍ ປຈ຺ຉິມຈິຕ຺ຕໍ ອຸປ຺ປຊ຺ຊຕີ’’ຕິ ອິຈ຺ຉິຕໍ, ປຣວາທີ ປນ ‘‘ຍສ຺ມິໍ ຂເຓ ຠວງ຺ຄຈິຕ຺ຕໍ, ຕສ຺ມິໍເຍວ ຂເຓ ກິຣິຍມຍຈິຕ຺ຕໍ ອຸປ຺ປຊ຺ຊຕີ’’ຕິ ວທຕິ. ເອວໍ ສຕິ ປຸຣິມປຈ຺ຉິມຈິຕ຺ຕານໍ ສຫຠາໂວປິ ອນຸຎ຺ຎາໂຕ ໂຫຕິ. ເຕນາຫ ‘‘ຠງ຺ຄກ຺ຂເຓນ ສເຫວາ’’ຕິ. ຕຖາ ຈ ສຕິ ວິປາກກິຣິຍກ຺ຂນ຺ຘານໍ ວິຍ ກິຣິຍວິປາກກ຺ຂນ຺ຘານໍ ວິປາກວິປາກກ຺ຂນ຺ຘານໍ ກິຣິຍກິຣິຍກ຺ຂນ຺ຘານຎ຺ຈ ວຸຕ຺ຕນເຍນ ສຫຠາໂວ ວຕ຺ຕພ຺ໂພຕິ ອິມມຕ຺ຖໍ ທສ຺ເສນ຺ໂຕ ‘‘ຠວງ຺ຄຈິຕ຺ຕສ຺ສາ’’ຕິອາທິມາຫ. ຕຕ຺ຖ ອຸປປຕ຺ຕິຠວຠາເວນ ເອສິຍາ ອິຈ຺ຉິຕພ຺ພາຕິ ອຸປປຕ຺ເຕສິຍາ ວິປາກກ຺ຂນ຺ຘາ, ເຕ ຈ ເຍຠຸຍ຺ເຍນ ຠວງ຺ຄປຣິຍາຍກາຕິ ອຏ຺ຐກຖາຍໍ ວຸຕ຺ຕໍ ‘‘ອຸປປຕ຺ເຕສິຍນ຺ຕິ ສງ຺ຂໍ ຄຕສ຺ສ ຠວງ຺ຄຈິຕ຺ຕສ຺ສາ’’ຕິ. ອາທິປຣິໂຍສານມຕ຺ຕຎ຺ຫິ ຕສ຺ສ ປຏິສນ຺ຘິຈຸຕິຈິຕ຺ຕໍ, ຕທາຣມ຺ມຓໍ ຠວງ຺ຄນ຺ຕ຺ເວວ ວຸຈ຺ຈຕີຕິ. ຈກ຺ຂຸວິຎ຺ຎາຓາທີນໍ ກິຣິຍາເວມຊ຺ເຌ ປຕິຕຕ຺ຕາ ກິຣິຍາຈຕຸກ຺ຂນ຺ຘຄ຺ຄຫເຓນ ຄຫຓໍ ຍຸຕ຺ຕນ຺ຕິ ວຸຕ຺ຕໍ. ຈກ຺ຂຸວິຎ຺ຎາຓາທີນນ຺ຕິ ຫິ ອາທິ-ສທ຺ເທນ ນ ໂສຕວິຎ຺ຎາຓາທີນໍເຍວ ຄຫຓໍ, ອຖ ໂຂ ສມ຺ປຏິຈ຺ຉນສນ຺ຕີຣຓານມ຺ປີຕິ ທຏ຺ຐພ຺ພໍ.

ນິໂຣຘກຖາວຓ຺ຓນາ ນິຏ຺ຐິຕາ.