ຄນ຺ຖາຣມ຺ຠວຓ຺ຓນາ

ສມຸທາເຍ ເອກເທສາ ອນ຺ໂຕຄຘາຕິ ສມຸທາໂຍ ເຕສໍ ອຘິຏ຺ຐານຠາເວນ ວຸຕ຺ໂຕ ຍຖາ ‘‘ຣຸກ຺ເຂ ສາຂາ’’ຕິ ທສ຺ເສຕິ ‘‘ກຖາສມຸທາຍສ຺ສາ’’ຕິອາທິນາ. ຕຕ຺ຖ ກຖານນ຺ຕິ ຕິສ຺ໂສ ກຖາ ວາໂທ ຊປ຺ໂປ ວິຕຓ຺ຑາຕິ. ເຕສຸ ເຍນ ປມາຓຕກ຺ເກຫິ ປກ຺ຂປຏິປກ຺ຂານໍ ປຕິຏ຺ຐາປນປຏິກ຺ເຂປາ ໂຫນ຺ຕິ, ໂສ ວາໂທ. ເອກາຘິກຣຓາ ຫິ ອຎ຺ຎມຎ຺ຎວິຣຸທ຺ຘາ ຘມ຺ມາ ປກ຺ຂປຏິປກ຺ຂາ ຍຖາ ‘‘ໂຫຕິ ຕຖາຄໂຕ ປຣໍ ມຣຓາ, ນ ໂຫຕິ ຕຖາຄໂຕ ປຣໍ ມຣຓາ’’ຕິ (ທີ. ນິ. ໑.໖໕). ນານາຘິກຣຓາ ປນ ອຎ຺ຎມຎ຺ຎວິຣຸທ຺ຘາປິ ປກ຺ຂປຏິປກ຺ຂາ ນາມ ນ ໂຫນ຺ຕິ ຍຖາ ‘‘ອນິຈ຺ຈໍ ຣູປໍ, ນິຈ຺ຈໍ ນິພ຺ພານ’’ນ຺ຕິ. ເຍນ ຉລຊາຕິນິຄ຺ຄຫຏ຺ຐາເນຫິ ປກ຺ຂປຏິປກ຺ຂານໍ ປຕິຏ຺ຐາປນໍ ປຏິກ຺ເຂປາຣມ຺ໂຠ, ໂສ ຊປ຺ໂປ. ອາຣມ຺ຠມຕ຺ຕເມເວຕ຺ຖ, ນ ອຕ຺ຖສິທ຺ຘີຕິ ທສ຺ສນຕ຺ຖໍ ອາຣມ຺ຠຄ຺ຄຫຓໍ. ຍາຍ ປນ ຉລຊາຕິນິຄ຺ຄຫຏ຺ຐາເນຫິ ປຏິປກ຺ຂປຏິກ຺ເຂປາຍ ວາຍມນ຺ຕິ, ສາ ວິຕຓ຺ຑາ. ຕຕ຺ຖ ອຕ຺ຖວິກປ຺ປຸປປຕ຺ຕິຍາ ວຈນວິຆາໂຕ ຉລໍ ຍຖາ ‘‘ນວກມ຺ພໂລຍໍ ປຸຣິໂສ, ຣາຊາ ໂນ ສກ຺ຂີ’’ຕິ ເອວມາທິ. ທູສນຠາສາ ຊາຕໂຍ, ອຸຕ຺ຕຣປຕິຣູປກາຕິ ອຕ຺ໂຖ. ນິຄ຺ຄຫຏ຺ຐານານິ ປຣໂຕ ອາວິ ຠວິສ຺ສນ຺ຕິ. ເອວໍ ວາທຊປ຺ປວິຕຓ຺ຑປ຺ປເຠທາສຸ ຕີສຸ ກຖາສຸ ອິຘ ວາທກຖາ ‘‘ກຖາ’’ຕິ ອຘິປ຺ເປຕາ. ສາ ຈ ໂຂ ອວິປຣີຕຘມ຺ມຕາຍ ປຕິຏ຺ຐາປນວເສນ, ນ ວິຄ຺ຄາຫິກກຖາຠາເວນາຕິ ເວທິຕພ຺ພໍ. ມາຕິກາຐປເນເນວາຕິ ອຸທ຺ເທສເທສນາຍ ເອວ. ຐປິຕສ຺ສາຕິ ເທສິຕສ຺ສ. ເທສນາ ຫິ ເທເສຕພ຺ພມຕ຺ຖໍ ວິເນຍ຺ຍສນ຺ຕາເນສຸ ຐປນໂຕ ນິກ຺ຂິປນໂຕ ຐປນໍ, ນິກ຺ເຂໂປຕິ ຈ ວຸຈ຺ຈຕິ.

ຄນ຺ຖາຣມ຺ຠວຓ຺ຓນາ ນິຏ຺ຐິຕາ.