໑໐. ທສມນໂຍ ວິປ຺ປຍຸຕ຺ເຕນວິປ຺ປຍຸຕ຺ຕປທວຓ຺ຓນາ

໓໕໓. ເຍ ວິປ຺ປຍຸຕ຺ເຕນ ວິປ຺ປຍຸຕ຺ຕຠາເວນ ປາຬິຍໍ ອຄ຺ຄຫິຕາ, ເຕສຸ ເກຈິ ວິປ຺ປຍຸຕ຺ຕສ຺ສ ຘມ຺ມນ຺ຕຣສ຺ສ ອຠາວໂຕ ເກຈິ ຂນ຺ຘາທີຫິ ວິປ຺ປໂຍຄສ຺ເສວ ອສມ຺ຠວໂຕຕິ ອິມມຕ຺ຖໍ ທສ຺ເສນ຺ໂຕ ‘‘ຘມ຺ມາຍຕນາທິຘມ຺ມາ’’ຕິອາທິມາຫ. ຕຕ຺ຖ ສພ຺ພຈິຕ຺ຕຸປ຺ປາທຄຕຘມ຺ມຠາວໂຕຕິ ອິມິນາ ຠິນ຺ນກາລຕາທິວິເສສວໂຕ ອຣູປກ຺ຂນ຺ຘສ຺ສ ວິປ຺ປຍຸຕ຺ຕສ຺ສ ຘມ຺ມນ຺ຕຣສ຺ສ ອຠາວມາຫ, ອນາຣມ຺ມຓມິສ຺ສກຠາວໂຕຕິ ອິມິນາ ປນ ສພ຺ພສ຺ສປິ. ກາມຠໂວ ອຸປປຕ຺ຕິຠໂວ ສຎ຺ຎີຠໂວ ປຎ຺ຈໂວກາຣຠໂວຕິ ອິເມ ຈຕ຺ຕາໂຣ ມຫາຠວາ. ວິປ຺ປໂຍຄາຠາວໂຕຕິ ວິປ຺ປໂຍຄາສມ຺ຠວໂຕ. ນ ຫິ ເຍ ທຸກ຺ຂສຈ຺ຈາທີຫິ ວິປ຺ປຍຸຕ຺ຕາ, ເຕຫິ ວິປ຺ປຍຸຕ຺ຕານໍ ເຕສໍເຍວ ທຸກ຺ຂສຈ຺ຈາທີນໍ ຂນ຺ຘາທີສຸ ເກນຈິ ວິປ຺ປໂຍໂຄ ສມ຺ຠວຕິ.

ທສມນຍວິປ຺ປຍຸຕ຺ເຕນວິປ຺ປຍຸຕ຺ຕປທວຓ຺ຓນາ ນິຏ຺ຐິຕາ.