໑໑. ເອກາທສມນໂຍ ສງ຺ຄຫິເຕນສມ຺ປຍຸຕ຺ຕວິປ຺ປຍຸຕ຺ຕປທວຓ຺ຓນາ

໔໐໙. ເຕຕິ ສງ຺ຂາຣກ຺ຂນ຺ຘຘມ຺ມາ. ເສເສຫີຕິ ອວສິຏ຺ເຐຫິ ເວທນາສຎ຺ຎາວິຎ຺ຎາຓກ຺ຂນ຺ເຘຫິ. ‘‘ເອເຕນ ສຫ ສມ຺ພນ຺ໂຘ’’ຕິ ອິມິນາ ປທານໍ ສມ຺ພນ຺ຘທສ຺ສນມຸເຂນ ‘‘ສມຸທຍສຈ຺ເຈນ ເຍ ຘມ຺ມາ ສມ຺ປຍຸຕ຺ຕາ’’ຕິ ປາຬິຍາ ອຕ຺ຖວິວຣຓໍ ປາກຏຕຣໍ ກຕ຺ວາ ເກຫິຈີຕິປທສ຺ສຕ຺ຖໍ ກາຕຸໍ ‘‘ເກຫິຈີຕິ ເອຕສ຺ສ ປນາ’’ຕິອາທິມາຫ. ອຕ຺ຖໍ ທສ຺ເສຕຸໍ ອາຫາຕິ ສມ຺ພນ຺ໂຘ. ວິເສເສຕ຺ວາຕິ ເອຕ຺ຖ ເຕສໍ ຘມ຺ມານໍ ຕຓ຺ຫາວຊ຺ຊານໍ ສງ຺ຂາຣກ຺ຂນ຺ຘຘມ຺ມາຍຕນຘມ຺ມຘາຕຸປຣິຍາປນ຺ນຕາກິຕ຺ຕນໍ ວິເສສນໍ ທຏ຺ຐພ຺ພໍ, ຍໂຕ ເຕ ສມຸທຍສຈ຺ເຈນ ຂນ຺ຘາທິສງ຺ຄເຫນ ສງ຺ຄຫິຕາຕິ ວຸຕ຺ຕາ. ສຍໍ ອຕ຺ຕນາ ສມ຺ປຍຸຕ຺ໂຕ ນ ໂຫຕີຕິ ວຸຕ຺ຕໍ ‘‘ອຕ຺ຕວຊ຺ເຊຫີ’’ຕິ. ເຕນ ວຸຕ຺ຕໍ ‘‘ຈິຕ຺ຕໍ ນ ວຕ຺ຕພ຺ພໍ ຈິຕ຺ເຕນ ສມ຺ປຍຸຕ຺ຕນ຺ຕິປິ, ຈິຕ຺ເຕນ ວິປ຺ປຍຸຕ຺ຕນ຺ຕິປີ’’ຕິ. ສມ຺ປໂຍຄາຣເຫຫີຕິ ວິເສສນໍ ສຸຂຸມຣູປໍ ນິພ຺ພານນ຺ຕິ ທ຺ເວ ສນ຺ຘາຍ ກຕໍ, ນ ຕຓ຺ຫາທິເກ.

ເອກາທສມນຍສງ຺ຄຫິເຕນສມ຺ປຍຸຕ຺ຕວິປ຺ປຍຸຕ຺ຕປທວຓ຺ຓນາ ນິຏ຺ຐິຕາ.