໑໐. ປຐມສງ຺ຆເຠທສິກ຺ຂາປທວຓ຺ຓນາ

໔໑໐. ທສເມ ເຍ ທຸພ຺ພລາ ໂຫນ຺ຕິ ອປ຺ປຖາມາ, ນ ສກ຺ໂກນ຺ຕິ ອຣຎ຺ຎກາທີນິ ເສວນ຺ຕາ ທຸກ຺ຂສ຺ສນ຺ຕໍ ກາຕຸໍ, ເຕ ສນ຺ຘາຍາຫ ‘‘ພຫູນໍ ກຸລປຸຕ຺ຕານໍ ມຄ຺ຄນ຺ຕຣາຍາຍ ສໍວຕ຺ຕນ຺ຕີ’’ຕິ. ອຘິວາສນຂນ຺ຕິສມ຺ປນ຺ໂນຕິ ‘‘ຂໂມ ໂຫຕິ ສີຕສ຺ສາ’’ຕິອາທິນາ ວຸຕ຺ຕສີຕຸຓ຺ຫາທິສຫນລກ຺ຂຓາຍ ຂນ຺ຕິຍາ ສມນ຺ນາຄໂຕ. ພ຺ຍຎ຺ຊນປທເມວ ປຣມໍ ອສ຺ສາຕິ ປທປຣໂມ. ຍສ຺ສ ຫິ ປຸຄ຺ຄລສ຺ສ ພຫຸມ຺ປິ ສຸຓໂຕ ພຫຸມ຺ປິ ຠຓໂຕ ພຫຸມ຺ປິ ຘາຣຍໂຕ ພຫຸມ຺ປິ ວາຈຍໂຕ ນ ຕາຍ ຊາຕິຍາ ຘມ຺ມາຠິສມໂຍ ໂຫຕິ, ອຍໍ ‘‘ປທປຣໂມ’’ຕິ ວຸຈ຺ຈຕິ. ອຠິສມ຺ຠຸຓິຕ຺ວາຕິ ນິປ຺ຜາເທຕ຺ວາ. ນາຠິສມ຺ຠຸຓາຕີຕິ ນ ສມ຺ປາເທຕິ, ອຣຎ຺ຎວາສໍ ສມ຺ປາເທຕຸໍ ນ ສກ຺ໂກຕີຕິ ວຸຕ຺ຕໍ ໂຫຕິ. ຘມ຺ມໂຕ ອເປຕໍ ອຸທ຺ຘມ຺ມໍ. ອສພ຺ພຎ຺ຎູ ອສ຺ສາຕິ ເຕສໍ ອນຸຣູປສ຺ສ ອຊານນໂຕ ອສພ຺ພຎ຺ຎູ ຠເວຍ຺ຍ. ‘‘ນ, ຠິກ຺ຂເວ, ອເສນາສນິເກນ ວສ຺ສໍ ອຸປຄນ຺ຕພ຺ພ’’ນ຺ຕິ (ມຫາວ. ໒໐໔) ວຈນໂຕ ‘‘ຈຕ຺ຕາໂຣ ປນ…ເປ… ປຏິກ຺ຂິຕ຺ຕເມວາ’’ຕິ ວຸຕ຺ຕໍ. ອິທເມວ ວຈນໍ ສນ຺ຘາຍ ປາຬິຍມ຺ປິ ‘‘ອຏ຺ຐ ມາເສ ໂຂ ມຍາ ເທວທຕ຺ຕ ຣຸກ຺ຂມູລເສນາສນໍ ອນຸຎ຺ຎາຕ’’ນ຺ຕິ ວຸຕ຺ຕໍ.

ຕີຫິ ໂກຏີຫີຕິ ຕີຫິ ອາກາເຣຫິ, ຕີຫິ ກາຣເຓຫີຕິ ອຕ຺ໂຖ. ຕທຸຠຍວິມຸຕ຺ຕປຣິສງ຺ກິຕນ຺ຕິ ທິຏ຺ຐໍ ສຸຕນ຺ຕິ ອິທໍ ອຸຠຍໍ ອນິສ຺ສາຍ ‘‘ກິໍ ນຸ ໂຂ ອິທໍ ຠິກ຺ຂຸໍ ອຸທ຺ທິສ຺ສ ວຘິຕ຺ວາ ສມ຺ປາທິຕ’’ນ຺ຕິ ເກວລເມວ ປຣິສງ຺ກິຕໍ. ມຈ຺ຉພນ຺ຘນໍ ຊາລໍ, ວາຄຸຣາ ມິຄພນ຺ຘນີ. ກປ຺ປຕີຕິ ຍທິ ເຕສໍ ວຈເນນ ອາສງ຺ກາ ອຸປຈ຺ຉິນ຺ນາ ໂຫຕິ, ວຏ຺ຏຕິ. ປວຕ຺ຕມໍສນ຺ຕິ ວິກ຺ກາຍິກມໍສໍ. ມງ຺ຄລາທີນນ຺ຕິ ອາທິ-ສທ຺ເທນ ອາຫຸນປາຫຸນາທິເກ ສງ຺ຄຓ຺ຫາຕິ. ຠິກ຺ຂູນໍເຍວ ອຕ຺ຖາຍາຕິ ເອຕ຺ຖ ອຏ຺ຐານປ຺ປຍຸຕ຺ໂຕ ເອວ-ສທ຺ໂທ, ຠິກ຺ຂູນໍ ອຕ຺ຖາຍ ອກຕເມວາຕິ ສມ຺ພນ຺ຘິຕພ຺ພໍ. ຕສ຺ມາ ‘‘ຠິກ຺ຂູນຎ຺ຈ ທສ຺ສາມ, ມງ຺ຄລາທີນຎ຺ຈ ອຕ຺ຖາຍ ຠວິສ຺ສຕີ’’ຕິ ມິສ຺ເສຕ຺ວາ ກຕມ຺ປິ ນ ວຏ຺ຏຕີຕິ ເວທິຕພ຺ພໍ. ເກຈິ ປນ ‘‘ຠິກ຺ຂູນໍເຍວາຕິ ອວຘາຣເຓນ ຠິກ຺ຂູນຎ຺ຈ ອຎ຺ເຎສຎ຺ຈ ອຕ຺ຖາຍ ກຕໍ ວຏ຺ຏຕີ’’ຕິ ວທນ຺ຕິ, ຕໍ ນ ສຸນ຺ທຣໍ. ຍຕ຺ຖ ຈ ນິພ຺ເພມຕິໂກ ໂຫຕີຕິ ຠິກ຺ຂູນໍ ອຕ຺ຖາຍ ກເຕປິ ສພ຺ເພນ ສພ຺ພໍ ປຣິສງ຺ກິຕາຠາວມາຫ. ຕເມວຕ຺ຖໍ ອາວິກາຕຸໍ ‘‘ສເຈ ປນາ’’ຕິອາທິ ວຸຕ຺ຕໍ. ອິຕເຣສໍ ວຏ຺ຏຕີຕິ ອຊານນ຺ຕານໍ ວຏ຺ຏຕິ, ຊານໂຕ ເອເວຕ຺ຖ ອາປຕ຺ຕິ ໂຫຕີຕິ. ເຕເຍວາຕິ ເຍ ອຸທ຺ທິສ຺ສ ກຕໍ, ເຕເຍວ. ອຸທ຺ທິສກຕມໍສປຣິໂຠຄໂຕ ອກປ຺ປິຍມໍສປຣິໂຠຄສ຺ສ ວິເສສໍ ທສ຺ເສຕຸໍ ‘‘ອກປ຺ປິຍມໍສໍ ປນາ’’ຕິອາທິ ວຸຕ຺ຕໍ. ປຸຣິມສ຺ມິໍ ສຈິຕ຺ຕກາ ອາປຕ຺ຕິ, ອິຕຣສ຺ມິໍ ອຈິຕ຺ຕກາ. ເຕນາຫ ‘‘ອກປ຺ປິຍມໍສໍ ອຊານິຕ຺ວາ ຠຸຎ຺ຊນ຺ຕສ຺ສປິ ອາປຕ຺ຕິເຍວາ’’ຕິ. ‘‘ປຣິໂຠຄກາເລ ປຸຈ຺ຉິຕ຺ວາ ປຣິຠຸຎ຺ຊິສ຺ສາມີຕິ ວາ ຄເຫຕ຺ວາ ປຸຈ຺ຉິຕ຺ວາ ປຣິຠຸຎ຺ຊິຕພ຺ພ’’ນ຺ຕິ ວຈນໂຕ ອກປ຺ປິຍມໍສໍ ອຊານິຕ຺ວາ ຄຓ຺ຫນ຺ຕສ຺ສ ປຏິຄ຺ຄຫເຓນ ອນາປຕ຺ຕິ ສິຍາ. ອຊານິຕ຺ວາປິ ຠຸຎ຺ຊນ຺ຕສ຺ເສວ ຫິ ອາປຕ຺ຕິ ວຸຕ຺ຕາ. ວຕ຺ຕນ຺ຕິ ວທນ຺ຕີຕິ ອິມິນາ ອາປຕ຺ຕິ ນຕ຺ຖີຕິ ທສ຺ເສຕິ.

ສລ຺ເລຂາ ວຸຕ຺ຕິ ເອເຕສນ຺ຕິ ສລ຺ເລຂວຸຕ຺ຕິໂນ. ພາຫຸລິໂກຕິ ເອກສ຺ສ ລ-ກາຣສ຺ສ ໂລປໍ ກຕ຺ວາ ວຸຕ຺ຕໍ. ກປ຺ປນ຺ຕິ ອາຍຸກປ຺ປໍ. ສງ຺ຆເຠທໂກ ຫິ ເອກໍ ກປ຺ປໍ ອສີຕິຠາເຄ ກຕ຺ວາ ຕໂຕ ເອກຠາຄມຕ຺ຕໍ ກາລໍ ນິຣເຍ ຕິຏ຺ເຐຍ຺ຍາຕິ ອາຍຸກປ຺ປໍ ສນ຺ຘາຍ ‘‘ກປ຺ປໍ ນິຣຍມ຺ຫິ ປຈ຺ຈຕີ’’ຕິ ວຸຕ຺ຕໍ. ກປ຺ປຏ຺ຐກຖາຍໍ (ວິຠ. ອຏ຺ຐ. ໘໐໙) ປນ ‘‘ສຓ຺ຐຫນ຺ເຕ ຫິ ກປ຺ເປ ກປ຺ປເວມຊ຺ເຌ ວາ ສງ຺ຆເຠທໍ ກຕ຺ວາ ກປ຺ປວິນາເສເຍວ ມຸຈ຺ຈຕິ. ສເຈປິ ຫິ ສ຺ເວ ກປ຺ໂປ ວິນສ຺ສິສ຺ສຕີຕິ ອຊ຺ຊ ສງ຺ຆເຠທໍ ກໂຣຕິ, ສ຺ເວວ ມຸຈ຺ຈຕິ, ເອກທິວສເມວ ນິຣເຍ ປຈ຺ຈຕີ’’ຕິ ວຸຕ຺ຕໍ. ຕຕ຺ຖາປິ ກປ຺ປວິນາເສເຍວາຕິ ອາຍຸກປ຺ປວິນາເສເຍວາຕິ ອຕ຺ເຖ ສຕິ ນຕ຺ຖິ ວິໂຣໂຘ. ສຓ຺ຐຫນ຺ເຕຕິ ອິທມ຺ປິ ‘‘ສ຺ເວ ວິນສ຺ສິສ຺ສຕີ’’ຕິ ວິຍ ອຠູຕປຣິກປ຺ປນວເສນ ວຸຕ຺ຕໍ. ‘‘ເອກທິວສເມວ ນິຣເຍ ປຈ຺ຈຕີ’’ຕິ ເອຕ຺ຖາປິ ຕໂຕ ປຣໍ ກປ຺ປາຠາເວ ອາຍຸກປ຺ປສ຺ສປິ ອຠາວໂຕຕິ ອວິໂຣຘໂຕ ອຕ຺ຖໂຍຊນາ ທຏ຺ຐພ຺ພາ. ພ຺ຣຫ຺ມໍ ປຸຎ຺ຎນ຺ຕິ ເສຏ຺ຐໍ ປຸຎ຺ຎໍ. ກປ຺ປໍ ສຄ຺ຄມ຺ຫິ ໂມທຕີຕິ ເອຕ຺ຖາປິ ອາຍຸກປ຺ປເມວ.

໔໑໑. ລທ຺ຘິນານາສໍວາສເກນາຕິ ຠາວປ຺ປຘາໂນຍໍ ນິທ຺ເທໂສ, ລທ຺ຘິນານາສໍວາສກຠາເວນາຕິ ອຕ຺ໂຖ. ກມ຺ມນານາສໍວາສເກນາຕິ ເອຕ຺ຖາປິ ເອເສວ ນໂຍ. ອຎ຺ຎຖາ ນານາສໍວາສເກນ ສຫິຕສ຺ສ ສມານສໍວາສກສ຺ສປິ ສງ຺ຆສ຺ສ ອສມານສໍວາສກຕ຺ຕໍ ອາປຊ຺ເຊຍ຺ຍ. ຕຕ຺ຖ ລທ຺ຘິນານາສໍວາສໂກ ນາມ ອຸກ຺ຂິຕ຺ຕານຸວຕ຺ຕໂກ. ໂສ ຫິ ອຕ຺ຕໂນ ລທ຺ຘິຍາ ນານາສໍວາສໂກ ຊາໂຕຕິ ‘‘ລທ຺ຘິນານາສໍວາສໂກ’’ຕິ ວຸຈ຺ຈຕິ. ກມ຺ມນານາສໍວາສໂກ ນາມ ອຸກ຺ເຂປນີຍກມ຺ມກໂຕ. ໂສ ຫິ ອຸກ຺ເຂປນີຍກມ຺ມວເສນ ນານາສໍວາສໂກ ໂຫຕີຕິ ‘‘ກມ຺ມນານາສໍວາສໂກ’’ຕິ ວຸຈ຺ຈຕິ. ວິຣຫິໂຕຕິ ວິມຸຕ຺ໂຕ. ກາຍສາມຄ຺ຄີທານໍ ເຕສຸ ເຕສຸ ສງ຺ຆກມ຺ເມສຸ ຫຕ຺ຖປາສູປຄມນວເສນ ເວທິຕພ຺ພໍ.

‘‘ເຠທາຍ ປຣກ຺ກເມຍ຺ຍາ’’ຕິ ວິສຸໍ ວຸຕ຺ຕຕ຺ຕາ ເຠທນສໍວຕ຺ຕນິກສ຺ສ ອຘິກຣຓສ຺ສ ສມາທາຍ ປຄ຺ຄຓ຺ຫໂຕ ປຸພ຺ເພປິ ປກ຺ຂປຣິເຍສນາທິວເສນ ສງ຺ຆເຠທາຍ ປຣກ຺ກມນ຺ຕສ຺ສ ສມນຸຠາສນກມ຺ມໍ ກາຕພ຺ພນ຺ຕິ ເວທິຕພ຺ພໍ. ອິມານິ ວຕ຺ຖູນີຕິ ອຏ຺ຐາຣສ ເຠທກຣວຕ຺ຖູນິ. ກມ຺ເມນາຕິ ອປໂລກນາທີສຸ ຈຕູສຸ ກມ຺ເມສຸ ອຎ຺ຎຕເຣນ ກມ຺ເມນ. ອຸທ຺ເທເສນາຕິ ປຎ຺ຈສຸ ປາຕິໂມກ຺ຂຸທ຺ເທເສສຸ ອຎ຺ຎຕເຣນ ອຸທ຺ເທເສນ. ໂວຫາເຣນາຕິ ຕາຫິ ຕາຫິ ອຸປປຕ຺ຕີຫິ ‘‘ອຘມ຺ມໍ ຘມ຺ໂມ’’ຕິອາທິອຏ຺ຐາຣສເຠທກຣວຕ຺ຖຸທີປເກນ ໂວຫາເຣນ. ອນຸສ຺ສາວນາຍາຕິ ‘‘ນນຸ ຕຸມ຺ເຫ ຊານາຖ ມຍ຺ຫໍ ອຸຈ຺ຈາກຸລາ ປພ຺ພຊິຕຠາວໍ ພຫຸສ຺ສຸຕຠາວຎ຺ຈ, ມາທິໂສ ນາມ ອຸທ຺ຘມ຺ມໍ ອຸພ຺ພິນຍໍ ສຕ຺ຖຸສາສນໍ ຄາເຫຍ຺ຍາຕິ ຈິຕ຺ຕມ຺ປິ ອຸປ຺ປາເທຕຸໍ ຕຸມ຺ຫາກໍ ຍຸຕ຺ຕໍ, ກິໍ ມຍ຺ຫໍ ອວີຈິ ນີລຸປ຺ປລວນໍ ວິຍ ສີຕໂລ, ກິມຫໍ ອປາຍໂຕ ນ ຠາຍາມີ’’ຕິອາທິນາ ນເຍນ ກຓ຺ຓມູເລ ວຈີເຠທໍ ກຕ຺ວາ ອນຸສ຺ສາວເນນ. ສລາກຄ຺ຄາເຫນາຕິ ເອວໍ ອນຸສ຺ສາເວຕ຺ວາ ເຕສໍ ຈິຕ຺ຕໍ ອຸປຕ຺ຖມ຺ເຠຕ຺ວາ ອນິວຕ຺ຕິຘມ຺ເມ ກຕ຺ວາ ‘‘ຄຓ຺ຫຖ ອິມໍ ສລາກ’’ນ຺ຕິ ສລາກຄ຺ຄາເຫນ. ປຎ຺ຈຫິ ກາຣເຓຫິ ສງ຺ຆເຠໂທ ໂຫຕີຕິ ເອຕ຺ຖ ກມ຺ມເມວ ອຸທ຺ເທໂສ ວາ ສງ຺ຆເຠເທ ປຘານກາຣຓນ຺ຕິ ເວທິຕພ຺ພໍ. ໂວຫາຣານຸສ຺ສາວນສລາກຄ຺ຄາຫາ ປນ ປຸພ຺ພຠາຄາ. ອຏ຺ຐາຣສວຕ຺ຖຸທີປນວສເອນ ຫິ ໂວຫຣນ຺ເຕນ ຕຕ຺ຖ ຣຸຈິຊນນຕ຺ຖໍ ອນຸສ຺ສາເວຕ຺ວາ ສລາກາຍ ຄຫິຕາຍປິ ອຠິນ຺ໂນວ ໂຫຕິ ສງ຺ໂຆ. ຍທາ ປນ ເອວໍ ຈຕ຺ຕາໂຣ ວາ ອຕິເຣກາ ວາ ສລາກໍ ຄເຫຕ຺ວາ ອາເວຓິກກມ຺ມໍ ວາ ອຸທ຺ເທສໍ ວາ ກໂຣນ຺ຕິ, ຕທາ ສງ຺ໂຆ ຠິນ຺ໂນ ນາມ ໂຫຕິ. ອພ຺ຠຸສ຺ສິຕນ຺ຕິ ອພ຺ຠຸຄ຺ຄຕໍ. ອຈ຺ເຉຍ຺ຍາຕິ ວິຫເຣຍ຺ຍ, ປວຕ຺ເຕຍ຺ຍາຕິ ອຕ຺ໂຖ.

‘‘ລຊ຺ຊີ ຣກ຺ຂິສ຺ສຕີ’’ຕິ ວຈນໂຕ ອາປຕ຺ຕິຠເຍນ ອາໂຣຈນໍ ລຊ຺ຊີນໍເຍວ ຠາໂຣຕິ ອາຫ ‘‘ລຊ຺ຊີຫິ ຠິກ຺ຂູຫີ’’ຕິ. ອລຊ຺ຊິສ຺ສປິ ອນາໂຣເຈນ຺ຕສ຺ສ ອາປຕ຺ຕິເຍວ ‘‘ເຍ ປສ຺ສນ຺ຕິ, ເຍ ສຸຓນ຺ຕີ’’ຕິ ວຈນໂຕ. ສມາຄຈ຺ຉຕູຕິ ເອກີ ຠວຕຸ. ເອກີຠາໂວ ຈ ສມານລທ຺ຘິວເສນ ໂຫຕີຕິ ອາຫ ‘‘ເອກລທ຺ຘິໂກ ໂຫຕູ’’ຕິ. ສມ຺ປຕ຺ຕິຍາຕິ ສີລາທິສມ຺ປຕ຺ຕິຍາ. ປຏິນິສ຺ສຊ຺ຊນ຺ຕສ຺ສ ອນາປຕ຺ຕິຠາວໂຕ ‘‘ໂສຕ຺ຖິຠາໂວ ຕສ຺ສ ຠິກ຺ຂຸໂນ’’ຕິ ວຸຕ຺ຕໍ. ອປ຺ປຏິນິສ຺ສຊ຺ຊໂຕ ທຸກ຺ກຏນ຺ຕິ ວິສຸໍ ວິສຸໍ ວທນ຺ຕານໍ ຄຓນາຍ ທຸກ຺ກຏໍ. ປໂຫນ຺ເຕນາຕິ ຄນ຺ຕຸໍ ສມຕ຺ເຖນ ອຄິລາເນນ. ສງ຺ຆເຠທສ຺ສ ຄຣຸກຠາວໂຕ ອວສ຺ສໍ ກຕ຺ຕພ຺ພຕາທສ຺ສນຕ຺ຖໍ ‘‘ທູເຣປິ ຠາໂຣເຍວາ’’ຕິ ວຸຕ຺ຕໍ, ອາປຕ຺ຕິ ປນ ອທ຺ຘໂຍຊນພ຺ຠນ຺ຕເຣ ຄນ຺ຕຸໍ ສມຕ຺ຖສ຺ສ ອຄິລານສ຺ເສວ ເວທິຕພ຺ພາ.

໔໑໖. ອສມນຸຠາສນ຺ຕສ຺ສາຕິ ກມ຺ມກາຣເກ ກຕ຺ຕຸນິທ຺ເທໂສຕິ ອາຫ ‘‘ອສມນຸຠາສິຍມານສ຺ສາ’’ຕິ. ຕຕິຍກມ຺ມວາຈາຍ ປຏິນິສ຺ສຊ຺ຊນ຺ໂຕ ຎຕ຺ຕິຍາ ທຸກ຺ກຏໍ ທ຺ວີຫິ ກມ຺ມວາຈາຫິ ຖຸລ຺ລຈ຺ຈເຍ ຈ ອາປຊ຺ຊຕິເຍວາຕິ ອາຫ ‘‘ປຏິນິສ຺ສຊ຺ຊນ຺ຕສ຺ສ ສງ຺ຆາທິເສເສນ ອນາປຕ຺ຕີ’’ຕິ. ອສ຺ສາຕິ ເທວທຕ຺ຕສ຺ສ. ກເຕນ ຠວິຕພ຺ພນ຺ຕິ ສມນຸຠາສນກມ຺ເມນ ກເຕນ ຠວິຕພ຺ພໍ. ອຕ຺ຕໂນ ຣຸຈິມຕ຺ເຕນ ວເທຍ຺ຍາຕິອາທິກມ຺ມິກຕ຺ຕາ ອປ຺ປຏິນິສ຺ສຊ຺ຊນ຺ຕສ຺ສປິ ອນາປຕ຺ຕີຕິ ອຘິປ຺ປາເຍນ ວເທຍ຺ຍ. ອປຎ຺ຎຕ຺ເຕ ສິກ຺ຂາປເທ ສມນຸຠາສນກມ຺ມສ຺ເສວ ອຠາວໂຕ ‘‘ນ ຫິ ປຎ຺ຎຕ຺ຕໍ ສິກ຺ຂາປທໍ ວີຕິກ຺ກມນ຺ຕສ຺ສາ’’ຕິ ວຸຕ຺ຕໍ. ສິກ຺ຂາປທໍ ປຎ຺ຎເປນ຺ເຕເນວ ຫິ ສມນຸຠາສນກມ຺ມໍ ອນຸຎ຺ຎາຕໍ. ອຸທ຺ທິສ຺ສ ອນຸຎ຺ຎາຕໂຕຕິ ‘‘ອນຸຊານາມິ, ຠິກ຺ຂເວ, ໂຣມນ຺ຖກສ຺ສ ໂຣມນ຺ຖນ’’ນ຺ຕິອາທິໍ (ຈູຬວ. ໒໗໓) ອຸທ຺ທິສ຺ສ ອນຸຎ຺ຎາຕໍ ສນ຺ຘາຍ ວທນ຺ຕິ. ອນາປຕ຺ຕິຍນ຺ຕິ ອນາປຕ຺ຕິວາເຣ. ອາປຕ຺ຕິໍ ໂຣເປຕພ຺ໂພຕິ ອນິສ຺ສຊ຺ຊນປຈ຺ຈຍາ ອາປນ຺ນປາຈິຕ຺ຕິຍາປຕ຺ຕິໍ ອຸກ຺ເຂປນີຍກມ຺ມກຣຓຕ຺ຖໍ ອາໂຣເປຕພ຺ໂພຕິ ອຕ຺ໂຖ.

ອາປຕ຺ຕິເຍວ ນ ຊາຕາຕິ ສງ຺ຆາທິເສສາປຕ຺ຕິ ນ ຊາຕາເຍວາຕິ ອຕ຺ໂຖ. ສາ ປເນສາຕິ ສາ ປນ ເອສາ ອນາປຕ຺ຕິ. ຕິວງ຺ຄິກນ຺ຕິ ກາຍວາຈາຈິຕ຺ຕວເສນ ຕິວງ຺ຄິກໍ, ກາຍວາຈາຈິຕ຺ຕໂຕ ສມຸຏ຺ຐາຕີຕິ ວຸຕ຺ຕໍ ໂຫຕິ. ‘‘ນປ຺ປຏິນິສ຺ສຊ຺ຊາມີ’’ຕິ ສຎ຺ຎາຍ ອຠາເວນ ມຸຈ຺ຈນໂຕ ສຎ຺ຎາວິໂມກ຺ຂໍ. ສຈິຕ຺ຕກນ຺ຕິ ‘‘ນປ຺ປຏິນິສ຺ສຊ຺ຊາມີ’’ຕິ ຊານນຈິຕ຺ເຕນ ສຈິຕ຺ຕກໍ. ເຠທາຍ ປຣກ຺ກມນໍ, ຘມ຺ມກມ຺ເມນ ສມນຸຠາສນໍ, ກມ຺ມວາຈາປຣິໂຍສານໍ, ອປ຺ປຏິນິສ຺ສຊ຺ຊນນ຺ຕິ ອິມາເນຕ຺ຖ ຈຕ຺ຕາຣິ ອງ຺ຄານິ.

ປຐມສງ຺ຆເຠທສິກ຺ຂາປທວຓ຺ຓນາ ນິຏ຺ຐິຕາ.